0 9

ಪ್ರಪಂಚದಾದ್ಯಂತದ ಶಕ್ತಿಯುತವಾದ ಕಥಾಹಂದರವನ್ನು ಪ್ರದರ್ಶಿಸುವ 15 ಚಲನಚಿತ್ರಗಳು 55ನೇ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ 2024 ರಲ್ಲಿ ಪ್ರತಿಷ್ಠಿತ ಗೋಲ್ಡನ್ ಪೀಕಾಕ್ ಗಾಗಿ ಸ್ಪರ್ಧಿಸಲು ಸಿದ್ಧವಾಗಿವೆ. ಈ ವರ್ಷದ ಸ್ಪರ್ಧಾ ವಿಭಾಗದ ಪಟ್ಟಿಯಲ್ಲಿ 12 ಅಂತಾರಾಷ್ಟ್ರೀಯ ಚಿತ್ರಗಳು ಮತ್ತು 3 ಭಾರತೀಯ ಚಿತ್ರಗಳು ಸೇರಿವೆ. ಈ ಪ್ರತಿಯೊಂದು ಚಲನಚಿತ್ರವನ್ನು ವಿಶಿಷ್ಟ ದೃಷ್ಟಿಕೋನ, ವಿಷಯ ಮತ್ತು ಕಲಾತ್ಮಕತೆಯಿಂದ ನಿರೂಪಿಸಲ್ಪಟ್ಟಿರುವುದಕ್ಕಾಗಿ ಆಯ್ಕೆ ಮಾಡಲಾಗಿದೆ.  

ಜಾಗತಿಕ ಮತ್ತು ಭಾರತೀಯ ಚಿತ್ರರಂಗದ ಅತ್ಯುತ್ತಮವಾದದ್ದನ್ನು ಪ್ರಸ್ತುತಪಡಿಸುವ ಈ ಪ್ರತಿಯೊಂದು ಚಲನಚಿತ್ರವು ಮಾನವೀಯ ಮೌಲ್ಯಗಳು, ಸಂಸ್ಕೃತಿ ಮತ್ತು ಕಥೆ ಹೇಳುವ ಕಲೆಯ ಮೇಲೆ ವಿಶಿಷ್ಟವಾದ ನೋಟವನ್ನು ನೀಡುತ್ತದೆ.

ಈ ವರ್ಷ, ಗೌರವಾನ್ವಿತ ಭಾರತೀಯ ಚಲನಚಿತ್ರ ನಿರ್ದೇಶಕ ಅಶುತೋಷ್ ಗೋವಾರಿಕರ್ ನೇತೃತ್ವದ ಗೌರವಾನ್ವಿತ ಗೋಲ್ಡನ್ ಪೀಕಾಕ್ ತೀರ್ಪುಗಾರರ ತಂಡದಲ್ಲಿ ಪ್ರಶಸ್ತಿ ವಿಜೇತ ಸಿಂಗಾಪುರದ ನಿರ್ದೇಶಕ ಆಂಥೋನಿ ಚೆನ್, ಬ್ರಿಟಿಷ್-ಅಮೇರಿಕನ್ ನಿರ್ಮಾಪಕ ಎಲಿಜಬೆತ್ ಕಾರ್ಲ್ಸೆನ್, ಸ್ಪ್ಯಾನಿಷ್ ನಿರ್ಮಾಪಕ ಫ್ರಾನ್ ಬೋರ್ಜಿಯಾ ಮತ್ತು  ಪ್ರಸಿದ್ಧ ಆಸ್ಟ್ರೇಲಿಯಾದ ಚಲನಚಿತ್ರ ಸಂಕಲನಕಾರ  ಜಿಲ್ ಬಿಲ್ಕಾಕ್ ಇದ್ದಾರೆ. ಒಟ್ಟಾಗಿ, ಈ ತೀರ್ಪುಗಾರರ ತಂಡವು ಅತ್ಯುತ್ತಮ ಚಲನಚಿತ್ರ, ಅತ್ಯುತ್ತಮ ನಿರ್ದೇಶಕ, ಅತ್ಯುತ್ತಮ ನಟ, ಅತ್ಯುತ್ತಮ ನಟಿ  ಮತ್ತು ವಿಶೇಷ ತೀರ್ಪುಗಾರರ ಪ್ರಶಸ್ತಿ ವಿಭಾಗಗಳಲ್ಲಿ ವಿಜೇತರನ್ನು ನಿರ್ಧರಿಸುತ್ತದೆ. ವಿಜೇತ ಚಿತ್ರವು ಉತ್ಸವದ ಅತ್ಯುನ್ನತ ಗೌರವದ ಜೊತೆಗೆ ₹ 40 ಲಕ್ಷ ಬಹುಮಾನವನ್ನು ಪಡೆಯುತ್ತದೆ.

ಸ್ಪರ್ಧೆಯಲ್ಲಿರುವ  ಈ ವರ್ಷದ ಚಲನಚಿತ್ರಗಳು, ವಿಭಿನ್ನ ವಿಷಯಗಳು  ಮತ್ತು ಅಭಿವ್ಯಕ್ತಿಗಳೊಂದಿಗೆ,  ನಮ್ಮನ್ನು ಹೊಸ ಲೋಕಗಳಿಗೆ   ಕರೆದೊಯ್ಯುವ ಮತ್ತು ನಮ್ಮ ಗ್ರಹಿಕೆಗಳಿಗೆ ಸವಾಲು ಹಾಕುವ ಹೊಸ ಧ್ವನಿಗಳನ್ನು ಎತ್ತಿ ತೋರಿಸುತ್ತವೆ.

ಗಮನಾರ್ಹ ನಾಮನಿರ್ದೇಶನಗಳ ಒಂದು ನೋಟ ಇಲ್ಲಿದೆ:

1. ಫಿಯರ್ ಆಂಡ್ ಟ್ರೆಂಬ್ಲಿಂಗ್ (ಇರಾನ್)

ಇರಾನಿನ ಇಬ್ಬರು ಬಹು ಪ್ರತಿಷ್ಠಿತ ಮಹಿಳಾ ಚಲನಚಿತ್ರ ನಿರ್ಮಾಪಕರಾದ ಮಣಿಜೆಹ್ ಹೆಕ್ಮತ್ ಮತ್ತು ಫೇಜ್ ಅಜೀಜ್ಖಾನಿ ಅವರು ತಮ್ಮ 'ಫಿಯರ್ ಅಂಡ್ ಟ್ರೆಂಬ್ಲಿಂಗ್' ಚಿತ್ರದಲ್ಲಿ ವೇಗವಾಗಿ ಬದಲಾಗುತ್ತಿರುವ ಜಗತ್ತಿನಲ್ಲಿ ಭಯ ಮತ್ತು ಒಂಟಿತನದಿಂದ ಬಳಲುತ್ತಿರುವ ವಯಸ್ಸಾದ ಮಹಿಳೆ ಮಂಜಾರ್ ಬಗ್ಗೆ ಕಟುವಾದ ಕಥೆಯನ್ನು ಪ್ರಸ್ತುತಪಡಿಸಿದ್ದಾರೆ.

ಈ ಇರಾನಿನ ಚಲನಚಿತ್ರವು ಈ ವರ್ಷದ ಐ.ಎಫ್.ಎಫ್.ಐನಲ್ಲಿ ಅದರ ವಿಶ್ವದ ಪ್ರಥಮ ಪ್ರದರ್ಶನವನ್ನು ಕಾಣಲಿದೆ. ಚಲನಚಿತ್ರವು ಸಾಮಾಜಿಕ ಬದಲಾವಣೆಗಳ ಮುಖಾಂತರ ವೈಯಕ್ತಿಕ ರೂಪಾಂತರವನ್ನು ಪ್ರತಿಬಿಂಬಿಸುತ್ತದೆ ಮತ್ತು ಆಧುನಿಕ ಇರಾನಿನಲ್ಲಿ ಮಹಿಳೆಯರು ಎದುರಿಸುತ್ತಿರುವ ಸವಾಲುಗಳನ್ನು ಚಿತ್ರಿಸುತ್ತದೆ.
 
2. ಗುಲಿಜಾರ್ (ಟರ್ಕಿ)

ತನ್ನ ಚೊಚ್ಚಲ ಸಿನಿಮಾದಲ್ಲಿ, ಟರ್ಕಿಶ್ ಬರಹಗಾರ ಮತ್ತು ನಿರ್ದೇಶಕರಾದ ಬೆಲ್ಕಿಸ್ ಬೇರಾಕ್ ಅವರು ಸ್ವಾತಂತ್ರ್ಯಕ್ಕಾಗಿ ತನ್ನ ಅನ್ವೇಷಣೆಯಲ್ಲಿ ಆಘಾತ ಮತ್ತು ಸಾಮಾಜಿಕ ನಿರೀಕ್ಷೆಗಳೊಂದಿಗೆ ಹೋರಾಡುವ ಯುವತಿ 'ಗುಲಿಜಾರ್' ಜೀವನವನ್ನು ವಿವರಿಸುತ್ತಾರೆ.

ಚಿತ್ರೋತ್ಸವಗಳಾದ್ಯಂತ ಗಮನ ಸೆಳೆದಿರುವ ಚಲನಚಿತ್ರವು ಈಗಾಗಲೇ ಟೊರೊಂಟೊ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವ 2024 ಮತ್ತು ಸ್ಯಾನ್ ಸೆಬಾಸ್ಟಿಯನ್ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವ, 2024 ನಲ್ಲಿ ಪ್ರಥಮ ಪ್ರದರ್ಶನ ಕಂಡಿದೆ.

3. ಹೋಲಿ ಕೌ (ಫ್ರಾನ್ಸ್)

ಫ್ರೆಂಚ್ ಚಲನಚಿತ್ರ ನಿರ್ಮಾಪಕ ಲೂಯಿಸ್ ಕೌರ್ವೊಸಿಯರ್ ಅವರ ಚೊಚ್ಚಲ ಚಲನಚಿತ್ರವಾದ 'ಹೋಲಿ ಕೌ' 18 ವರ್ಷ ವಯಸ್ಸಿನ ಟೊಟೋನ್  ಸುತ್ತ ಸುತ್ತುವ ಹಾಸ್ಯ ಚಿತ್ರವಾಗಿದ್ದು, ಅವರ ಕಿರಿಯ ಸಹೋದರಿಯ ಜವಾಬ್ದಾರಿಯನ್ನು ತೆಗೆದುಕೊಳ್ಳುವಾಗ ಅವರ ನಿರಾತಂಕದ ಜೀವನವು ತಲೆಕೆಳಗಾಗುತ್ತದೆ. ಈ ಚಿತ್ರವು 2024 ರ ಕಾನ್ ಚಲನಚಿತ್ರೋತ್ಸವದಲ್ಲಿ ಪ್ರತಿಷ್ಠಿತ ಯುವ ಪ್ರಶಸ್ತಿಯನ್ನು ಗೆದ್ದುಕೊಂಡಿತು.

ಪಶ್ಚಿಮ ಫ್ರೆಂಚ್ ಆಲ್ಪ್ಸ್ನ ಜುಕಾ ಪರ್ವತ ಪ್ರದೇಶದಲ್ಲಿ ಈ ಆಕರ್ಷಕ ಚಲನಚಿತ್ರವು ಬೆಳೆಯುತ್ತಿರುವ ಪ್ರಕ್ಷುಬ್ಧತೆ ಮತ್ತು ಮುಖ್ಯ ಪಾತ್ರದಾರಿ ಎದುರಿಸುತ್ತಿರುವ ಪ್ರೌಢಾವಸ್ಥೆಯ ಜವಾಬ್ದಾರಿಗಳನ್ನು ಚಿತ್ರಿಸುತ್ತದೆ.

4. ಐ ಆಮ್ ನೆವೆಂಕಾ (ಸ್ಪೇನ್)

ಗೋಯಾ ಪ್ರಶಸ್ತಿ ಪುರಸ್ಕೃತ ನಿರ್ದೇಶಕ ಐಸಿಯಾರ್ ಬೊಲ್ಲೈನ್ ಅವರ 'ಐ ಆಮ್ ನೆವೆಂಕಾ' ಸಮಾಜದ ಅನ್ಯಾಯದ ವಿರುದ್ಧ ತನ್ನದೇ ಆದ ರೀತಿಯಲ್ಲಿ ಹೋರಾಡುವ ಮಹಿಳೆಯ ದಿಟ್ಟ ಕಥೆಯಾಗಿದೆ. ಈ ಚಲನಚಿತ್ರವು 2024 ರಲ್ಲಿ ನಡೆದ ಸ್ಯಾನ್ ಸೆಬಾಸ್ಟಿಯನ್ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಯುಸ್ಕಡಿ ಬಾಸ್ಕ್ ಕಂಟ್ರಿ 2030 ಅಜೆಂಡಾ ಪ್ರಶಸ್ತಿಯನ್ನು ಪಡೆದುಕೊಂಡಿತು.

ಪೋನ್ ಫೆರಾಡಾ ಸಿಟಿ ಕೌನ್ಸಿಲ್ ನ ಸದಸ್ಯರಾದ ನೆವೆಂಕಾ ಫೆರ್ನಾಂಡಿಸ್ ಅವರ ಪ್ರಕರಣವನ್ನು ಚಲನಚಿತ್ರದ ಕಥೆಯಾಗಿದ್ದು, ಅವರು 2001 ರಲ್ಲಿ ಸ್ಪೇನ್ ನಲ್ಲಿ ಉನ್ನತ ಶ್ರೇಣಿಯ ರಾಜಕಾರಣಿಯ ವಿರುದ್ಧ ಲೈಂಗಿಕ ಕಿರುಕುಳದ ನ್ಯಾಯಾಲಯದ ಪ್ರಕರಣವನ್ನು ಗೆದ್ದ ಮೊದಲ ಮಹಿಳೆಯಾಗಿದ್ದಾರೆ.

ನೈಜ ಘಟನೆಗಳಿಂದ ಸ್ಫೂರ್ತಿ ಪಡೆದ, ಇದು ನ್ಯಾಯಕ್ಕಾಗಿ ಹೋರಾಟವನ್ನು ವಿವರಿಸುತ್ತದೆ ಮತ್ತು ಸ್ಪೇನ್ ನಲ್ಲಿ ಕಿರುಕುಳ ಮತ್ತು ಲಿಂಗ ಸಮಾನತೆಯ ದೊಡ್ಡ ಸಾಮಾಜಿಕ ಮತ್ತು ಸಾಂಸ್ಕೃತಿಕ ಪರಿಣಾಮಗಳನ್ನು ಪರಿಶೋಧಿಸುತ್ತದೆ.

5. ಪನೋಪ್ಟಿಕಾನ್ (ಜಾರ್ಜಿಯಾ-ಯುಎಸ್ಎ)

ಜಾರ್ಜಿಯನ್-ಅಮೇರಿಕನ್ ನಿರ್ದೇಶಕ ಜಾರ್ಜ್ ಸಿಖರುಲಿಡ್ಜೆ ಅವರ ಮೊದಲ ಸಿನಿಮಾ 'ಪನೋಪ್ಟಿಕಾನ್' ನಲ್ಲಿ, ಯುವ ಜಾರ್ಜಿಯನ್ ಹದಿಹರೆಯದವರು ತಮ್ಮ ಜೀವನದಲ್ಲಿ  ಅಸ್ತಿತ್ವ, ನೈತಿಕತೆ ಮತ್ತು ಸ್ವಯಂ ಗುರುತಿನ ಸವಾಲುಗಳನ್ನು ಎದುರಿಸುತ್ತಾರೆ. ಈ ಚಲನಚಿತ್ರವು ಕಾರ್ಲೋವಿ ವೇರಿ 2024 ರಲ್ಲಿ ಎಕ್ಯುಮೆನಿಕಲ್ ಜ್ಯೂರಿ - ವಿಶೇಷ  ಪ್ರಶಸ್ತಿಯನ್ನು ಗೆದ್ದಿದೆ.

ಬಾಲ್ಯದಿಂದ ದೊಡ್ಡವರಾಗುವವರೆಗಿನ ಕಥೆಯ ಚಲನಚಿತ್ರವು ಸಮಕಾಲೀನ ಸೋವಿಯತ್ ನಂತರದ ಜಾರ್ಜಿಯನ್ ಸಮಾಜದಲ್ಲಿ ಬೆಳೆಯುತ್ತಿರುವ ಸವಾಲುಗಳನ್ನು ಚಿತ್ರಿಸುತ್ತದೆ.
 
6. ಪಿಯರ್ಸ್ (ಸಿಂಗಪುರ್)

ಮಾಜಿ ರಾಷ್ಟ್ರೀಯ ಫೆನ್ಸರ್ ಮತ್ತು ಸಿಂಗಾಪುರದ ಉದಯೋನ್ಮುಖ ಚಲನಚಿತ್ರ ನಿರ್ಮಾಪಕ, ನೆಲಿಸಿಯಾ ಲೋ ಅವರ 'ಪಿಯರ್ಸ್' ಈ ವರ್ಷ ಕಾರ್ಲೋವಿ ವೇರಿ ಅಂತರಾಷ್ಟ್ರೀಯ ಉತ್ಸವದಲ್ಲಿ ಅತ್ಯುತ್ತಮ ನಿರ್ದೇಶಕ ಪ್ರಶಸ್ತಿಯನ್ನು ಪಡೆಯಿತು.

ಸೈಕಲಾಜಿಕಲ್ ಥ್ರಿಲ್ಲರ್ ಆದ ಈ ಚಲನಚಿತ್ರವು ಕುಟುಂಬ ಮತ್ತು ಒಡಹುಟ್ಟಿದವರ ಪೈಪೋಟಿಯ ಜಟಿಲತೆಗಳನ್ನು ಪರಿಶೀಲಿಸುತ್ತದೆ. ಸ್ಪರ್ಧಾತ್ಮಕ ಫೆನ್ಸಿಂಗ್ ಜಗತ್ತಿನಲ್ಲಿ ಹೊಂದಿಸಲಾದ ಈ ಚಿತ್ರವು ತಮ್ಮ ಮಹತ್ವಾಕಾಂಕ್ಷೆಗಳನ್ನು ಸಮತೋಲನಗೊಳಿಸಲು ಇಬ್ಬರು ಸಹೋದರರ ಹೋರಾಟವನ್ನು  ತೋರಿಸುತ್ತದೆ.

7. ರೆಡ್ ಪಾತ್ (ಟುನೀಶಿಯಾ)

ಸಮೃದ್ಧ ಟ್ಯುನೀಷಿಯನ್ ರಂಗಭೂಮಿ ಮತ್ತು ಸಿನಿಮಾ ನಿರ್ದೇಶಕ ಹಾಗು ನಿರ್ಮಾಪಕ ಲೋಟ್ಫಿ ಅಚೌರ್ ಅವರ ಇತ್ತೀಚಿನ ಚಲನಚಿತ್ರ  'ರೆಡ್ ಪಾತ್' ಯುವ ಕುರುಬನಾದ ಅಚ್ರಾಫ್ ಕಥೆಯನ್ನು ಹೇಳುತ್ತದೆ,  ಈ ಪ್ರಯಾಣದಲ್ಲಿ ಅವನು ಆಘಾತ, ಸಂಪ್ರದಾಯ ಮತ್ತು ವೈಯಕ್ತಿಕ ನಷ್ಟವನ್ನು ಅನುಭವಿಸಬೇಕಾಗುತ್ತದೆ. ಈ ಚಲನಚಿತ್ರವು 2024 ರಲ್ಲಿ ಪ್ರತಿಷ್ಠಿತ ಲೊಕಾರ್ನೊ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಪ್ರಥಮ ಪ್ರದರ್ಶನಗೊಂಡಿತು.

8. ಶೆಫರ್ಡ್ಸ್ (ಕೆನಡಾ-ಫ್ರಾನ್ಸ್)

ಹೊಸ ಕ್ವಿಬೆಕ್ ಸಿನಿಮಾದ ಪ್ರಮುಖ ವ್ಯಕ್ತಿಗಳಲ್ಲಿ ಒಬ್ಬರಾದ ಸೋಫಿ ಡೆರಾಸ್ಪಿಯಾ ಅವರ 'ಶೆಫರ್ಡ್ಸ್' ಸ್ವಯಂ-ಆವಿಷ್ಕಾರ ಮತ್ತು ಗ್ರಾಮೀಣ ಜೀವನದ ಕಠೋರ ಸತ್ಯಗಳ ಚಿತ್ರಣವಾಗಿದೆ. 

2024 ರ ಟೊರೊಂಟೊ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಅತ್ಯುತ್ತಮ ಕೆನಡಿಯನ್ ಚಲನಚಿತ್ರ ಪ್ರಶಸ್ತಿಯನ್ನು ಗೆದ್ದ  ಅವರ ಇತ್ತೀಚಿನ ಚಲನಚಿತ್ರವಾಗಿದೆ.

ಈ ಚಿತ್ರವು ಕೆನಡಾದ ಕಾಪಿರೈಟರ್ ನ ಕಥೆಯಾಗಿದ್ದು, ಅವನು ಫ್ರೆಂಚ್ ಆಲ್ಪ್ಸ್ಗೆ ಹೋಗಿ ಕುರುಬನಾಗಿ ಮನಸ್ಸಿನ ಶಾಂತಿ ಮತ್ತು ಹೊಸ ಆರಂಭವನ್ನು ಹುಡುಕುತ್ತಾ ಬದುಕುತ್ತಾರೆ, ಆದರೆ ಅವನು ತನ್ನ ಹೊಸ ಜೀವನದಲ್ಲಿ ಒಂಟಿತನ ಮತ್ತು ಕಷ್ಟವನ್ನು ಎದುರಿಸುತ್ತಿರುವಾಗ ತನ್ನ ಭೂತಕಾಲದೊಂದಿಗೆ ಹಿಡಿತ ಸಾಧಿಸಬೇಕಾಗುತ್ತದೆ.  ಡೆರಾಸ್ಪೆ ಅವರ  ಅಸಾಧಾರಣ ನಿರ್ದೇಶನವು ವೀಕ್ಷಕರನ್ನು ಮಾನವನ ಚೇತರಿಕೆ ಮತ್ತು ಪಾತ್ರದ ಶಕ್ತಿಯ ವಿಚಾರಗಳನ್ನು ಅನ್ವೇಷಿಸಲು ಒತ್ತಾಯಿಸುತ್ತದೆ.

9. ದಿ ನ್ಯೂ ಇಯರ್ ದಟ್ ನೆವರ್ ಕೇಮ್ (ರೊಮೇನಿಯಾ)

ಪ್ರಶಸ್ತಿ ವಿಜೇತ ರೊಮೇನಿಯನ್ ಬರಹಗಾರ ಮತ್ತು ನಿರ್ದೇಶಕ ಬೊಗ್ಡಾನ್ ಮುರೆಸಾನು ಅವರ 'ದಿ ನ್ಯೂ ಇಯರ್ ದಟ್ ನೆವರ್ ಕ್ಯಾಮ್' ರೊಮೇನಿಯಾದ 1989ರ ಕ್ರಾಂತಿಯ ಸಮಯದಲ್ಲಿ ಆರು ವ್ಯಕ್ತಿಗಳ ಜೀವನದ ಮೂಲಕ ವೀಕ್ಷಕರನ್ನು ಕರೆದೊಯ್ಯುತ್ತದೆ. ಈ ಚಲನಚಿತ್ರವು ಅತ್ಯುತ್ತಮ ಚಲನಚಿತ್ರಕ್ಕಾಗಿ ಒರಿಝೊಂಟಿ ಪ್ರಶಸ್ತಿಯನ್ನು ಗೆದ್ದುಕೊಂಡಿತು ಮತ್ತು ವಿಶೇಷ  ಪ್ರಶಸ್ತಿ: 2024ರ ವೆನಿಸ್ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ 40 ವರ್ಷದೊಳಗಿನ ಲೇಖಕರ ಪ್ರಶಸ್ತಿಯನ್ನು ಗೆದ್ದುಕೊಂಡಿತು.

ಆಳವಾದ ವೈಯಕ್ತಿಕ ಕಥೆಯನ್ನು ಹೊಂದಿರುವ ಐತಿಹಾಸಿಕ ನಾಟಕ, ಮುರೇಸಾನು ಅವರ ಚಲನಚಿತ್ರವು ರಾಜಕೀಯ ಕ್ರಾಂತಿ ಮತ್ತು ಪ್ರತಿರೋಧ, ನಷ್ಟ ಮತ್ತು ಭರವಸೆಯ ಮಾನವ ಕಥೆಗಳನ್ನು ಒಟ್ಟಿಗೆ ಹೆಣೆಯುತ್ತದೆ.

10. ಟಾಕ್ಸಿಕ್ (ಲಿಥುವೇನಿಯಾ)

ತನ್ನ ಚೊಚ್ಚಲ ಚಲನಚಿತ್ರದಲ್ಲಿ, ಲಿಥುವೇನಿಯನ್ ಚಲನಚಿತ್ರ ನಿರ್ಮಾಪಕ ಮತ್ತು ಚಿತ್ರಕಥೆಗಾರರಾದ ಸೌಲೆ ಬ್ಲಿಯುವೈಟ್ ವಿಷಕಾರಿತ್ವದ ನಡುವೆ ಸ್ನೇಹದ ಕಚ್ಚಾ ಮತ್ತು ಕಾಡುವ ಕಥೆಯನ್ನು ನೀಡುತ್ತದೆ.

'ಟಾಕ್ಸಿಕ್' ಹದಿಹರೆಯದ, ಸ್ನೇಹ ಮತ್ತು ಸ್ವಯಂ ನಾಶದ ಸಂಕೀರ್ಣತೆಗಳನ್ನು ಪರಿಶೋಧಿಸುತ್ತದೆ, ಜೊತೆಗೆ ನಿರ್ದೇಶಕರು ಯೌವನದ ಕರಾಳ ಮುಖವನ್ನು ಅನ್ವೇಷಿಸುತ್ತಾರೆ. ಭಾವನಾತ್ಮಕ ಪ್ರಕ್ಷುಬ್ಧತೆ ಮತ್ತು ವಯಸ್ಸಿಗೆ ಬರುವ ಒತ್ತಡದ ಚಿತ್ರಣಕ್ಕಾಗಿ ಇದು ವಿಮರ್ಶಕರ ಮೆಚ್ಚುಗೆಯನ್ನು ಗಳಿಸಿದೆ.

ಚಿತ್ರವು ಗೋಲ್ಡನ್ ಲೆಪರ್ಡ್, ಸ್ವಾಚ್ ಫಸ್ಟ್ ಫೀಚರ್ ಅವಾರ್ಡ್ ಮತ್ತು ಎಕ್ಯುಮೆನಿಕಲ್ ಜ್ಯೂರಿ ಪ್ರಶಸ್ತಿಯನ್ನು 77 ನೇ ಲೊಕಾರ್ನೊ ಇಂಟರ್ನ್ಯಾಷನಲ್ ಫಿಲ್ಮ್ ಫೆಸ್ಟಿವಲ್, 2024 ರಲ್ಲಿ ಗೆದ್ದಿದೆ.

11. ವೇವ್ಸ್ (ಜೆಕ್ ರಿಪಬ್ಲಿಕ್)

'ವೇವ್ಸ್' ಜೆಕ್ ನಟ, ಚಿತ್ರಕಥೆಗಾರ ಮತ್ತು ನಿರ್ದೇಶಕ ಜಿರಿ ಮ್ಯಾಡ್ಲ್ ಅವರ ಮೂರನೇ ಚಲನಚಿತ್ರವಾಗಿದೆ ಮತ್ತು 97ನೇ ಅಕಾಡೆಮಿ ಪ್ರಶಸ್ತಿಗಳಲ್ಲಿ ಅತ್ಯುತ್ತಮ ಅಂತರರಾಷ್ಟ್ರೀಯ ಚಲನಚಿತ್ರಕ್ಕಾಗಿ ಜೆಕ್ ಗಣರಾಜ್ಯದ ಅಧಿಕೃತ ಪ್ರವೇಶವಾಗಿ ಆಯ್ಕೆಯಾಗಿದೆ.

ಈ ಚಲನಚಿತ್ರವು 1968ರ ಸೋವಿಯತ್ ಚೆಕೊಸ್ಲೊವಾಕಿಯಾದ ಆಕ್ರಮಣದ ಸಮಯದಲ್ಲಿ ನಡೆದ ಪ್ರಬಲ ಐತಿಹಾಸಿಕ ಕಥೆಯಾಗಿದೆ. ತಮ್ಮ ದೇಶದ ಸ್ವಾತಂತ್ರ್ಯ ಅಪಾಯದಲ್ಲಿದೆ ಎಂದು ಸತ್ಯವನ್ನು ವರದಿ ಮಾಡಲು ಎಲ್ಲವನ್ನೂ ಪಣಕ್ಕಿಡುವ ಪತ್ರಕರ್ತರ ಗುಂಪಿನ ಸುತ್ತ ಚಲನಚಿತ್ರದ ಕಥೆ ಇದೆ.

12. ಹೂ ಡು ಐ ಬಿಲಾಂಗ್ ಟು' (ಟುನೀಶಿಯಾ-ಕೆನಡಾ)

'ಹೂ ಡು ಐ ಬಿಲಾಂಗ್ ಟು', ಟ್ಯುನೀಷಿಯನ್-ಕೆನಡಾದ ಚಲನಚಿತ್ರ ನಿರ್ಮಾಪಕ ಮೆರ್ಯಮ್ ಜೂಬರ್ ಅವರ ಚೊಚ್ಚಲ ಚಲನಚಿತ್ರವಾಗಿದೆ. ಇದು ವಿಭಕ್ತ ಕುಟುಂಬದ ಬಗ್ಗೆ  ಪ್ರಬಲವಾದ ಆದರೆ ಮಾರ್ಮಿಕ ಕಥೆಯಾಗಿದೆ. ಈ ಚಿತ್ರವು ಟ್ಯುನೀಷಿಯಾದ ಮಹಿಳೆಯೊಬ್ಬಳ ಕಥೆಯನ್ನು ಹೇಳುತ್ತದೆ, ಮಗ ಯುದ್ಧದಿಂದ ಮನೆಗೆ ಹಿಂದಿರುಗಿದಾಗ ಮತ್ತು ಅವರ ಹಳ್ಳಿಯಾದ್ಯಂತ ಕತ್ತಲೆಯನ್ನು ತಂದಾಗ ತನ್ನ ಮಾತೃಪ್ರೇಮ ಮತ್ತು ಸತ್ಯದ ಹುಡುಕಾಟದ ನಡುವೆ ಸಿಕ್ಕಿಹಾಕಿಕೊಂಡ ತಾಯಿಯ ಕಥೆಯನ್ನು ಹೇಳುತ್ತದೆ.

ಈ ಚಲನಚಿತ್ರವು ಬರ್ಲಿನ್ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವ 2024 ರಲ್ಲಿ ಪ್ರಥಮ ಪ್ರದರ್ಶನಗೊಂಡಿತು.

ಚಿತ್ರವು ತಾಯಿಯ ಪ್ರೀತಿ ಮತ್ತು ವೈಯಕ್ತಿಕ ತ್ಯಾಗದ ಸಂಕೀರ್ಣ ನಿರೂಪಣೆಯನ್ನು ಹೆಣೆಯುತ್ತದೆ. ಜೂಬರ್ ಅವರ ಚಿತ್ರವು ಈಗಾಗಲೇ ಅದರ ಭಾವನಾತ್ಮಕ ಆಳ ಮತ್ತು ಅತ್ಯುತ್ತಮ ಪ್ರದರ್ಶನಗಳಿಗಾಗಿ ಪ್ರಶಂಸೆಯನ್ನು ಗಳಿಸಿದೆ.

13. ದಿ ಗೋಟ್ ಲೈಫ್ (ಭಾರತ)

'ದಿ ಗೋಟ್ ಲೈಫ್' ನಲ್ಲಿ, ರಾಷ್ಟ್ರೀಯ ಪ್ರಶಸ್ತಿ ವಿಜೇತ ಮಲಯಾಳಂ ಚಲನಚಿತ್ರ ನಿರ್ದೇಶಕ ಬ್ಲೆಸ್ಸಿ ಸೌದಿ ಅರೇಬಿಯಾದ ಕಠಿಣ ಮರುಭೂಮಿಯಲ್ಲಿ ಬದುಕಲು ಹೆಣಗಾಡುತ್ತಿರುವ ಭಾರತೀಯ ವಲಸೆ ಕಾರ್ಮಿಕನ ನಿಜವಾಗಿ ನಡೆದ ಕಥೆಯನ್ನು ಹೇಳುತ್ತಾರೆ.

ಈ ಚಲನಚಿತ್ರವು ಲೇಖಕ ಬೆನ್ಯಾಮಿನ್ ನ ಅತಿ ಹೆಚ್ಚು ಮಾರಾಟವಾದ ಮಲಯಾಳಂ ಕಾದಂಬರಿ ʼಆಡುಜೀವಿತಮ್ʼನ ರೂಪಾಂತರವಾಗಿದೆ, ಇದು ಗಲ್ಫ್ನಲ್ಲಿ ಮಲಯಾಳಿ ವಲಸೆ ಕಾರ್ಮಿಕ ನಜೀಬ್ ನ ನಿಜ ಜೀವನದ ಕಥೆಯನ್ನು ಆಧರಿಸಿದೆ.

ಈ ಹಿಡಿತದ ಚಿತ್ರಕಥೆಯು ವಲಸೆ, ಬದುಕುಳಿಯುವಿಕೆ ಮತ್ತು ಜೀವನದ ಪ್ರತಿಕೂಲತೆಯ ನಡುವೆ ಮಾನವನ ಆತ್ಮವಿಶ್ವಾಸದ  ವಿಷಯಗಳನ್ನು ಪರಿಶೋಧಿಸುತ್ತದೆ.

14. ಆರ್ಟಿಕಲ್ 370 (ಭಾರತ)

ರಾಷ್ಟ್ರಪ್ರಶಸ್ತಿ ವಿಜೇತ ಚಿತ್ರನಿರ್ಮಾಪಕ ಆದಿತ್ಯ ಸುಹಾಸ್ ಜಂಬಳೆ ನಿರ್ದೇಶಿಸಿದ ‘ಆರ್ಟಿಕಲ್ 370’ ಭಾರತದ ಪ್ರಕ್ಷುಬ್ಧ ಸಾಂವಿಧಾನಿಕ ಬದಲಾವಣೆಗಳ ಹಿನ್ನೆಲೆಯಲ್ಲಿ ಒಂದು ಉದ್ವಿಗ್ನ ರಾಜಕೀಯ ಥ್ರಿಲ್ಲರ್ ಆಗಿದೆ.

ಈ ಕಥೆಯು ಜಮ್ಮು ಮತ್ತು ಕಾಶ್ಮೀರಕ್ಕೆ ವಿಶೇಷ ಸ್ವಾಯತ್ತತೆಯನ್ನು ನೀಡಿದ 370 ನೇ ವಿಧಿಯ ಜಟಿಲತೆಗಳನ್ನು ಆಳವಾಗಿ ಪರಿಶೀಲಿಸುತ್ತದೆ. ಚಲನಚಿತ್ರವು ಪ್ರದೇಶದ ಸಾಮಾಜಿಕ-ರಾಜಕೀಯ ಸನ್ನಿವೇಶವನ್ನು ಅದ್ಭುತವಾಗಿ ಚಿತ್ರಿಸಿದೆ. ಚಿತ್ರದಲ್ಲಿ ಅಧಿಕಾರ ಮತ್ತು ವೈಯಕ್ತಿಕ ತ್ಯಾಗದ ಹೋರಾಟದ ನಿರೂಪಣೆಯನ್ನು ನಿರ್ದೇಶಕರು ಪರಿಣಾಮಕಾರಿಯಾಗಿ ಹೆಣೆದಿದ್ದಾರೆ.

15. ರಾವ್ ಸಾಹೇಬ್ (ಭಾರತ)

ರಾಷ್ಟ್ರಪ್ರಶಸ್ತಿ ವಿಜೇತ ಚಿತ್ರನಿರ್ಮಾಪಕ ನಿಖಿಲ್ ಮಹಾಜನ್ ನಿರ್ದೇಶನದ ಬಹು ನಿರೀಕ್ಷಿತ ಮರಾಠಿ ಕ್ರೈಮ್ ಥ್ರಿಲ್ಲರ್ ಚಿತ್ರ 'ರಾವ್ ಸಾಹೇಬ್'. ಈ ವರ್ಷದ ಐ.ಎಫ್.ಎಫ್.ಐ.ನಲ್ಲಿ ಈ ಚಿತ್ರವು ವಿಶ್ವದ ಮೊದಲ ಪ್ರದರ್ಶನವಾಗಿದೆ. ನಿಖಿಲ್ ಮಹಾಜನ್ ಅವರ ಕ್ರೈಮ್ ಥ್ರಿಲ್ಲರ್ ಬುಡಕಟ್ಟು ಭೂಮಿಯಲ್ಲಿನ ಮನುಷ್ಯ ಪ್ರಾಣಿ ಸಂಘರ್ಷ ಮತ್ತು ನ್ಯಾಯಕ್ಕಾಗಿ ಅನ್ವೇಷಣೆಯ ಮೇಲೆ ಕೇಂದ್ರೀಕರಿಸುತ್ತದೆ. ಈ ಚಿತ್ರವು ಭಾರತದ ಬುಡಕಟ್ಟು ಪ್ರದೇಶಗಳಲ್ಲಿ ನಡೆಯುವ ಕಥೆಯಾಗಿದೆ.
 
ಚಿತ್ರರಂಗದಲ್ಲಿ ಮಹಿಳೆಯರ ಸಾಧನೆಯ ಸಂಭ್ರಮ

ಪ್ರಮುಖವಾಗಿ, ಈ ವರ್ಷದ ನಾಮನಿರ್ದೇಶನಗಳು ಮಹಿಳಾ ಚಲನಚಿತ್ರ ನಿರ್ದೇಶಕರಿಗೆ ಗೌರವವಾಗಿದೆ,  15 ರಲ್ಲಿ 9 ಚಲನಚಿತ್ರಗಳನ್ನು ಪ್ರತಿಭಾವಂತ ಮಹಿಳಾ ಚಲನಚಿತ್ರ ನಿರ್ದೇಶಕರು ನಿರ್ದೇಶಿಸಿದ್ದಾರೆ.

ನಿಮ್ಮ ಕ್ಯಾಲೆಂಡರ್ ಗಳಲ್ಲಿ ಗುರುತಿಸಿಟ್ಟುಕೊಳ್ಳಿರಿ

ಹಾಗಾದರೆ, ನೀವು ಯಾರನ್ನು ಬೆಂಬಲಿಸುತ್ತೀರಿ?

ಮತ್ತು ನಿಮ್ಮ ಮೆಚ್ಚಿನದನ್ನು ನೀವು ಆರಿಸಿದ್ದೀರಾ?
 
ಈ ನವೆಂಬರ್‌ ನಲ್ಲಿ  ಐ.ಎಫ್.ಎಫ್.ಐ ನಲ್ಲಿ ನಮ್ಮೊಂದಿಗೆ ಜೊತೆಯಾಗಿರಿ  ಮತ್ತು ಪ್ರತಿಷ್ಠಿತ ಗೋಲ್ಡನ್ ಪೀಕಾಕ್ ಗಾಗಿ ಸ್ಪರ್ಧಿಸುವ ಈ ಅದ್ಭುತವಾದ ಸಿನಿಮಾಗಳನ್ನು ವೀಕ್ಷಿಸಲು ಅವಕಾಶವನ್ನು ಪಡೆದುಕೊಳ್ಳಿ. 

55ನೇ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವವು ನವೆಂಬರ್ 20 ರಿಂದ 28, 2024 ರವರೆಗೆ ಗೋವಾದ ಪಣಜಿಯಲ್ಲಿ ನಡೆಯಲಿದೆ. ಅಚ್ಚರಿಗೊಳ್ಳಲು, ಸ್ಫೂರ್ತಿ ಪಡೆಯಲು ಮತ್ತು ಮನರಂಜನೆಗಾಗಿ ಸಿದ್ಧರಾಗಿ.

*****