বিহারদা অৱাংবা থাক্কী অনা-লায়েংগী ইনফ্রাস্ত্রকচর অমসুং থবকশিং ফগৎহন্নবা মাইকৈদা থাংজিনবা শিংথানিঙাই ওইবা থবক অমা ওইনা, ঙসি প্রধান মন্ত্রী শ্রী নরেন্দ্র মোদীনা বিহারগী দরভঙ্গাদা এ.আই.আই.এম.এস দরভঙ্গা শানবা উরেপ-উয়ুং তমখ্রে। এ.আই.আই.এম.এস দরভঙ্গা অসি এ.আই.আই.এম.এস পাতনাগী মতুংদা বিহারগী অনিশুবা এ.আই.আই.এম.এস ওইরগনি।

থৌরম অদুদা শরুক য়াখিবা শক্নাইরবশিংগী মনুংদা বিহারগী রাজ্যপাল শ্রী রাজেন্দ্র অরলেকার, বিহারগী চীফ মিনিস্তর শ্রী নিতিস কুমার অমসুং ফুদ প্রোসেসিং ইন্দস্ত্রিগী য়ুনিয়ন মিনিস্তর শ্রী চিরাগ পাসৱান, বিহারগী দিপুতি চীফ মিনিস্তরশিং শ্রী সামরাত চৌধুরি অমসুং শ্রী বিজয় কুমার সিনহা, হোম এফেয়ার্সকী রাজ্য মন্ত্রী শ্রী নিত্যনন্দ রাই অমসুং বিহারগী হেল্থ মিনিস্তর শ্রী মঙ্গল পান্দে য়াওখি।

থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি দরভঙ্গাদা এ.আই.আই.এম.এস শানবা মঙলান মঙফাওনবা ঙম্নবা ঙসি শিংথানিঙাই ওইবা খোঙথাং অমা থাংজিনবা অসিনা বিহারদা হকশেলগী লমদা অচৌবা অহোংবশিং লাক্লগনি। মিথিলা, কোসি অমসুং তিরহুতকী লমদমশিংগী মথক্তা নোংচুপ বেঙ্গল অমসুং অনকপা মফমশিং হোস্পিতাল অসিগী কান্নবা ফংলগনি অমসুং মসিনা নেপালদগী ভারত্তা লায়েংবা লাকপা অনাবশিংশিং খুদোংচাবা পীরগনি।

প্রধান মন্ত্রীনা হায়খি লৈবাক অসিগী অপুনবা মীশিংগী অয়াম্বা শরুক লায়রবা অমসুং মিদল ক্লাস মীওইশিং ওইরি। হায়রিবা মীওই কাংলুপশিং অসিনা খ্বাইদগী হেন্না লায়ননা শোকহল্লি অমসুং মসিনা লায়েংনবা য়াম্লবা শেনফম চাদিং তৌহল্লি। করিগুম্বা ইমুং অমদা কনাগুম্বা অমা লায়না অমনা নাবা মতমদা কমদৌনা ইমুং হুপ্না অৱাবা তাহনবগে হায়বা মহাক নিংথিনা খঙই। হোস্পতালশিং অমসুং দোক্তরশিং ৱাৎপা, হিদাক-লাংথকশিং মমল তাংবা অমসুং দাইগ্নোস্তিক অমসুং রিছার্স সেন্তরশিং মশিং য়াম্না লৈতবদগী মমাংঙৈদা মেদিকেল ইনফ্রাস্ত্রকচরগী ফিবম য়াম্না শোকখি। মতিক চাদবা হকশেলগী ইনফ্রাস্ত্রকচর অমসুং লায়রবশিংনা মায়োক্নরিবা অৱাবশিংনা মরম ওইদুনা লৈবাক অসি চাউখৎপা থিন্থখি। মরম অদুনা, অরিবা ৱাখল্লোন অমসুং থৌরাং হোঙদোক্লে।

প্রধান মন্ত্রীনা হায়খি মদুদি হকশেলগী লমদা সরকারনা অচুম্বা থৌরাং পায়খৎলে। অহানবদা লায়নাশিং মাঙজৌননা ঙাকথোক্নবা মীৎয়েং চঙলে; অনিশুবদা অনাবশিং ফজনা লাইওং খঙদোক্নবা; অহুমশুবদা লেম্না নত্ত্রগা মমল হোংনা হিদাক-লাংথকশিং অমসুং লায়েংবা ফংহন্নবা; মরিশুবদা অপীকপা সহরশিংদা অফবা মেদিকেলগী খুদোংচাবশিং ফংহনবা; অমসুং মঙাশুবদা হকশেলগী লমদা তেক্নোলোজি শীজিন্নবা হেনগৎহন্নবা সরকারনা মীৎয়েং চঙলে।

শ্রী মোদীনা হায়খি য়োগ, অয়ুর্বেদ, মচি ওইবা চীঞ্জাক্কী মগুন, ফিত ইন্দিয়া মুভমেন্তদা সরকারনা মীৎয়েং চঙলে। মচি ওইদবা চীঞ্জাকশিং চাবা অমসুং হকচাং শোক্নিংঙাই ওইবা পুন্সি মহিং অমনা লায়নাশিং থোকহনবনি। সরকারনা শ্বাছ ভারত কেম্পেন পায়খৎলে, য়ুম খুদিংদা তোইলেতশিং শাদুনা অমসুং তোতি ঈশিং ফংহন্দুনা লু-নান্না লৈবা হেনগৎহন্নবা অমসুং লায়নাশিং হন্থহন্নবা পান্দম থম্লি।

প্রধান মন্ত্রীনা হায়খি করিগুম্বা ঙল্লিঙৈদা খঙদোকহৌরবদি লায়না কয়াগী অরুবা ফিবমশিং হন্থহনবা ঙমগনি। অদুবু দাইগ্নোস্তিক অমসুং রিছার্সকী মমল য়াম্না ৱাংবদগী মীয়াম্না ঙল্লিঙৈদা খঙদোকপা ঙমখিদে। ঐখোয়না লৈবাক অসিদা অয়ুস্মান অরোগ্যা মন্দির লাখ ১.৫ হেন্না থবক হৌরে। মসিনা লায়নাশিং ঙল্লিঙৈদা ঙাকথোকপদা মতেং পাংগনি। হৌজিক ফাওবদা অয়ু্স্মান ভারত স্কিমগী মখাদা অনাবা মীওই করোর ৪ হেন্না লায়েংখ্রে। স্কিম অসি লৈরমদ্রবদি অনাবা কয়া হোস্পিতালদা মিং চনবা ফাওবা ফংলম্লোই। অয়ুস্মান ভারত স্কিমনা মরম ওইদুনা লায়রবা মীওই কয়াগী অৱাবশিং কোকহল্লে। অয়ুস্মান স্কিমনা মরম ওইদুনা ইমুং করোর কয়া লুপা করোর লাখ ১.২৫ রোম কনবা ঙম্লে অমসুং স্কিম অসিগী মখাদা অনাবশিং সরকার অমসুং লনাই হোস্পিতাল অনিমক্তা লায়েংলে।

প্রধান মন্ত্রীনা হায়খি অয়ুস্মান ভারত স্কিমগী মখাদা চহি ৭০ গী মথক্তা লৈবা মীওইশিং কোনশিন্নবা মহাক্না মীখল মনুংদা থাজবা পীখি। মসিগী থাজবা অসি থবক ওইনা পাংথোক্লে। ইমুং অমগী শেন্থোক থিদনা চহি ৭০ গী মথক্তা লৈবা মীওইশিং লেম্না লায়েংলে। বেনিফিসরিশিং অথুবা মতমদা অয়ুস্মান বয়া বন্দনা কার্দ অমা ফংলগনি। জন ঔসাধি কেন্দ্রশিংনা হিদাক-লাংথকশিং মমল য়াম্না হোংনা পীরে।

ভারত্তা হকশেলগী থবকশিং ফগৎহন্নবা অপীকপা সহরশিংদা অফবা মেদিকেলগী খুদোংচাবশিং অমসুং দোক্তরশিং ফংহন্নবা মরিশুবা খোঙথাং অদুগী মতাংদা, প্রধান মন্ত্রীনা হায়খি মদুদি নিংতম্বা ফংবদগী চহি ৬০ ফাওবদা লৈবাক শীনবা থুংনা এ.আই.আই.এম.এস অমা খক লৈরমখি অমসুং হৌখিবা সরকারশিংনা অনৌবা এ.আই.আই.এম.এসশিং লিংখৎনবা থৌরাংশিং লোইশিল্লমখিদে। হৌজিক পাল্লিবা সরকার অসিনা অনাবশিং য়েংশিনবা খক নত্তনা লৈবাক শীনবা থুংনা অনৌবা এ.আই.আই.এম.এসশিং লিংখৎলে, হৌজিক এ.আই.আই.এম.এস ২৪ রোম লৈরে। হৌখিবা চহি ১০ দা মেদিকেল কলেজশিং শরুক অনি হেনগৎতুনা দোক্তরশিং মশিং হেনগৎলে। বিহার অমসুং লৈবাক অসিগী সেবা তৌনবা দরভঙ্গা এ.আই.আই.এম.এসনা অনৌবা দোক্তর কয়া পুথোক্কনি। প্রধান মন্ত্রীনা হায়খি মদুদি মমালোলদা অৱাং থাক্কী লাইরিক তম্নবা থবক পায়খৎপা হৌরে অমসুং মসি কারপুরি থাকুর জিগী মঙলানশিংদা পীবা খ্বাইদগী চাউবা ইকায়খুম্নবনি। হৌখিবা চহি ১০ দা অনৌবা মেদিকেল সিত লাখ ১ হেন্না হাপচিল্লে অমসুং মথং চহি ৫ দা অতোপ্পা সিত ৭৫,০০০ হাপচিন্নবা থবকশিং পায়খৎলি। হিন্দি অমসুং অতোপ্পা লোলশিংদা মেদিসিন তম্নবা খুদোংচাবা লৈরে।

কেন্সর থেংন্নবা সরকারনা পায়খৎলিবা থবকশিংগী মতাংদা, প্রধান মন্ত্রীনা হায়খি মুজাফরপুরদা শেমগৎলিবা কেন্সর লায়েংনবগী খুদোংচাবা অসিনা বিহারগী কেন্সর অনাবশিংদা কান্নবা পীরগনি। মসিগী অমতা ঙাইরবা খুদোংচাবা অসিনা তোঙান-তোঙানবা মখলগী কেন্সরশিং লায়েংগনি অমসুং অনাবশিং দিল্লি নত্ত্রগা মুম্বাইদা চৎপা দরকার ওইদ্রে। বিহারদা অথুবা মতমদা অনৌবা মীৎ লায়েংনবা হোস্পিতাল অমা লৈরগনি। হন্দক বারানসীদা সঙ্কারা আই হোস্পিতাল হাংদোকখিবা অদুগুম্না বিহারদা মীৎকী হোস্পিতাল অমা শানবা মহাক্না কাঞ্চি কামাকোতি শ্রী সঙ্করচার্য়াদা হায়জখ্রে অমসুং থবক পায়খৎপা হৌরে।

থৌরম অসিদা শ্রী নিতস কুমারনা হায়খি এ.আই.আই.এম.এস দরভঙ্গানা দরভঙ্গা লমদম খক নত্তনা অপুনবা লমদম অসিগী হকশেলগী ফিবম ফগৎহনগনি। এ.আই.আই.এম.এস দরভঙ্গানা লমদম অসিগী অতোপ্পা শেন-থুমগী ফিবমশিংশু চাউখৎহনগনি।

এ.আই.আই.এম.এস দরভঙ্গাগী নুঙগীৱারোল:

প্রধান মন্ত্রী শ্বাস্থ্য সুরক্ষ য়োজনা (পি এম এস এস ৱাই) গী মখাদা, হৌজিক ফাওবদা, ওল ইন্দিয়া ইন্সতিতুৎ ওফ মেদিকেল সাইন্সেস (এ.আই.আই.এম.এস) ২২ অয়াবা পীরে। হায়রিবা এ.আই.আই.এম.এসশিং অসিগী মনুংদা এ.আই.আই.এম.এস ২ বিহার রাজ্যগী অয়াবা পীরে: অমনা পাতনাদা অমসুং অতোপ্পা অমনা দরভঙ্গাদা। ঙসি প্রধান মন্ত্রী শ্রী নরেন্দ্র মোদীনা এ.আই.আই.এম.এস দরভঙ্গাগী উরেপ-উয়ুং তমখ্রে।

দরভঙ্গাদা একমি-সোভান বাইপাসতা লম একর ১৮৭ দা লুপা করোর ১২৬৪  চঙনা এ.আই.আই.এম.এস দরভঙ্গা লিংখৎকনি। মসিদা সুপর-স্পিলিএলিতি হোস্পিতাল অমা/অয়ুস ব্লোক, সিত ১২৫ গী মেদিকেল কলেজ, সিত ৬০ গী নর্শিং কলেজ, অনাবশিংগী সেবা তৌবা লাকপা মীওইশিংগী অহিং লেকফম অমসুং দোক্তরশিং, মহৈরোয়শিং অমসুং স্তাফশিংগী লৈফমশিং য়াওগনি। এ.আই.আই.এম.এস দরভঙ্গানা মুজাফরপুর, সমাস্তিপুর, সিতামাধি, মধুবানি, সাহারসা, পুর্নিয়া, খাগারিয়া, কাতিহার জিলাশিং য়াওনা বিহারগী মীয়ামদা মালেম থাক্কী অনৌবা অমসুং অৱাংবা থাক্কী অনা-লায়েংগী খুদোংচাবশিং পীগনি অমসুং মসিনা নোংচুপ বেঙ্গল অমসুং নোংপোক থংবা উত্তর প্রদেসকী অনকপা জিলাশিংগী মীয়ামদশু কান্নবা ফংহনগনি। শ্বাস্থ ভারত, সামরুধ ভারতকী পান্দমশিং ফংহনবদা এ.আই.আই.এম.এস দরভঙ্গানা শিংথাবা য়ানা মতেং পাংগনি।

****