பீகாரின் மூன்றாம் நிலை சுகாதார உள்கட்டமைப்பு மற்றும் சேவைகளை வலுப்படுத்தும் வரலாற்று சிறப்புமிக்க வளர்ச்சியாக, பீகார் மாநிலம் தர்பங்காவில் எய்ம்ஸ் மருத்துவமனை கட்டுவதற்கு பிரதமர் திரு. நரேந்திர மோடி இன்று அடிக்கல் நாட்டினார். எய்ம்ஸ் தர்பங்கா, பீகாரில் எய்ம்ஸ் பாட்னாவுக்குப் பிறகு இரண்டாவது எய்ம்ஸ் ஆகும்.

பீகார் ஆளுநர் திரு. ராஜேந்திர அர்லேகர்; முதலமைச்சர் நிதிஷ் குமார், மத்திய உணவு பதனப்படுத்துதல் தொழில்துறை அமைச்சர் திரு சிராக் பாஸ்வான், துணை முதலமைச்சர்கள் திரு சாம்ராட் சவுத்ரி மற்றும் திரு விஜய் குமார் சின்ஹா, மத்திய உள்துறை இணையமைச்சர் திரு. நித்யானந்த் ராய்,பீகார் சுகாதாரத் துறை அமைச்சர் திரு. மங்கள் பாண்டே உள்ளிட்டோர் இந்நிகழ்ச்சியில் கலந்து கொண்டனர்.

திரண்டிருந்தவர்களிடையே உரையாற்றிய பிரதமர், "தர்பங்கா எய்ம்ஸ் மருத்துவமனைக்கு அடிக்கல் நாட்டப்பட்டிருப்பது பீகாரில் சுகாதாரத் துறைக்கு பெரும் ஊக்கத்தை அளிக்கும். பீகாரின் மிதிலா, கோஷி மற்றும் திர்ஹுத் பகுதிகளுடன், மேற்கு வங்கம் மற்றும் அருகிலுள்ள பகுதிகளில் வசிக்கும் மக்களும் இந்தத் திட்டத்தின் மூலம் பயனடைவார்கள். "நேபாளத்திலிருந்து வரும் நோயாளிகளும் எய்ம்ஸ் தர்பங்காவில் சிகிச்சை பெற முடியும்" என்றும் அவர் கூறினார்.

இந்திய மக்கள் தொகையில் பெரும்பான்மையானவர்கள் ஏழைகள் மற்றும் நடுத்தர வர்க்கத்தைச் சேர்ந்தவர்கள் என்றும், அவர்கள் நோய்களால் அதிகம் பாதிக்கப்படுவதாகவும், இதன் விளைவாக மருத்துவ சிகிச்சைக்காக கணிசமான அளவு செலவு ஏற்படுவதாகவும் பிரதமர் குறிப்பிட்டார். ஒரு உறுப்பினர் நோய்வாய்ப்படும்போது ஒரு குடும்பம் எதிர்கொள்ளும் துயரத்தைப் பற்றிய தமது புரிதலை அவர் வெளிப்படுத்தினார். கடந்த காலத்தை நினைவுகூர்ந்த பிரதமர், நாட்டின் சுகாதார உள்கட்டமைப்பு போதுமானதாக இல்லை என்றும், மருத்துவமனைகள், மருத்துவர்கள், நோய் கண்டறியும் அல்லது ஆராய்ச்சி மையங்கள் பற்றாக்குறை மற்றும் அதிக மருந்து செலவுகள் ஆகியவை உள்ளன என்றும் குறிப்பிட்டார். இந்தச் சுகாதார சவால்கள் காரணமாக, குறிப்பாக பின்தங்கிய மக்களுக்கு நாட்டின் முன்னேற்றம் தடைபட்டுள்ளது என்று அவர் வலியுறுத்தினார். இதன் விளைவாக, இந்த பிரச்சினைகளுக்கு தீர்வு காண்பதற்கான மனநிலை மற்றும் அணுகுமுறையில் மாற்றம் ஏற்பட்டுள்ளது என்று அவர் கூறினார்.

சுகாதாரத் துறையில் முழுமையான அணுகுமுறையைப் பின்பற்றுவதை நோக்கிய இந்த மாற்றத்தை வலியுறுத்திய பிரதமர், கவனம் செலுத்த வேண்டிய ஐந்து முக்கிய அம்சங்களை எடுத்துரைத்தார். "முதல் முன்னுரிமை தடுப்பு சுகாதாரம், அதைத் தொடர்ந்து நோய்களை துல்லியமாக கண்டறிவதை உறுதி செய்கிறது. மூன்றாவது கவனம் குடிமக்களுக்கு மலிவான அல்லது இலவச சுகாதார மற்றும் மருந்துகளை வழங்குவதாகும். நான்காவது பகுதி சிறிய நகரங்களில் சுகாதார அணுகலை மேம்படுத்துவதையும், மருத்துவர்களின் பற்றாக்குறையை நிவர்த்தி செய்வதையும் நோக்கமாகக் கொண்டுள்ளது, இறுதியாக, ஐந்தாவது கவனம் சுகாதார விநியோகத்தை மேம்படுத்த தொழில்நுட்பத்தை மேம்படுத்துவதாகும், "என்று அவர் கூறினார்.

யோகா, ஆயுர்வேதம், ஊட்டச்சத்து, ஃபிட் இந்தியா இயக்கம் ஆகியவற்றை மேம்படுத்துவதில் அரசு கவனம் செலுத்தி வருவதாக பிரதமர் வலியுறுத்தினார். கெட்ட உணவை உட்கொள்வது மற்றும் மோசமான வாழ்க்கை முறை தேர்வுகள் போன்ற ஆரோக்கியமற்ற நடவடிக்கைகள் பொதுவான சுகாதார பிரச்சினைகளுக்கு முக்கிய பங்களிப்புகளாக உள்ளன என்று அவர் சுட்டிக்காட்டினார். தூய்மை இந்தியா, ஒவ்வொரு வீட்டிலும் கழிப்பறை வசதி, குழாய் நீர் இணைப்புகள் போன்ற முன்முயற்சிகள் மூலம் இந்த சவால்களை எதிர்கொள்ள அரசு மேற்கொண்டு வரும் முயற்சிகளை பிரதமர் எடுத்துரைத்தார். இவை அனைத்தும் தூய்மையை ஊக்குவித்து நோய்கள் பரவுவதைக் குறைப்பதை நோக்கமாகக் கொண்டுள்ளன.

ஆரம்பத்திலேயே கண்டறியப்பட்டால், பல கடுமையான நோய்களுக்கு சிகிச்சை அளிக்க முடியும் என்று குறிப்பிட்ட பிரதமர், ஆனால் நோய் கண்டறிதலுக்கு அதிக செலவு ஏற்படுவதால், மக்கள் உரிய நேரத்தில் மருத்துவ சிகிச்சை பெறுவது தடுக்கப்படுகிறது என்றார். இதை நிவர்த்தி செய்வதற்காக, நாடு முழுவதும் 1.5 லட்சத்துக்கும் மேற்பட்ட ஆயுஷ்மான் ஆரோக்கிய மந்திரங்கள் அமைக்கப்படுவதை அவர் குறிப்பிட்டார். ஆயுஷ்மான் பாரத் திட்டத்தின் கீழ் 4 கோடிக்கும் மேற்பட்ட நோயாளிகளுக்கு சிகிச்சை அளிக்கப்பட்டுள்ளதாக குறிப்பிட்ட அவர், இந்தத் திட்டம் இல்லாமல், பல நோயாளிகள் மருத்துவமனை கவனிப்பை பெற முடியாது என்று சுட்டிக்காட்டினார். ஆயுஷ்மான் பாரத் திட்டம் பல ஏழைக் குடும்பங்களின் நிதிச்சுமையைக் குறைத்துள்ளது என்றும், லட்சக்கணக்கான குடும்பங்கள் சுமார் ரூ.1.25 லட்சம் கோடியை மிச்சப்படுத்தியுள்ளன என்றும் பிரதமர் கூறினார்.

70 வயதுக்கு மேற்பட்ட மூத்த குடிமக்களுக்கு இலவச சிகிச்சை அளிக்க அரசு உறுதிபூண்டுள்ளதை மீண்டும் வலியுறுத்திய பிரதமர், குடும்ப வருமானத்தைப் பொருட்படுத்தாமல், மூத்த குடிமக்களுக்கு இலவச சிகிச்சை ஏற்கனவே தொடங்கிவிட்டதாகக் குறிப்பிட்ட பிரதமர், அனைத்து பயனாளிகளுக்கும் விரைவில் ஆயுஷ்மான் வயா வந்தனா அட்டை வழங்கப்படும் என்றும் அறிவித்தார். குறைந்த விலையில் மருந்துகள் வழங்கும் மக்கள் மருந்தக மையங்கள் பற்றியும் அவர் குறிப்பிட்டார்.

சிறிய நகரங்களில் சுகாதார சேவையை மேம்படுத்துவதில் கவனம் செலுத்துவதாகக் கூறிய பிரதமர், இந்தியா சுதந்திரம் அடைந்து 60 ஆண்டுகளுக்குப் பிறகு, நாட்டில் ஒரே ஒரு எய்ம்ஸ் மருத்துவமனை மட்டுமே இருந்ததை சுட்டிக்காட்டினார். தற்போதைய அரசு சுகாதாரத் தேவைகளை மட்டும் நிவர்த்தி செய்யவில்லை, இந்தியா முழுவதும் புதிய எய்ம்ஸ் நிறுவனங்களையும் நிறுவியுள்ளது, இதன் மூலம் மொத்த எய்ம்ஸ் நிறுவனங்களின் எண்ணிக்கை சுமார் 24 ஆக உயர்ந்துள்ளது என்று அவர் எடுத்துரைத்தார். கடந்த பத்தாண்டுகளில் மருத்துவக் கல்லூரிகளின் எண்ணிக்கை இரட்டிப்பாகியுள்ளதாகவும், இதனால் மருத்துவர்களின் எண்ணிக்கை அதிகரித்துள்ளதாகவும் அவர் பார்வையாளர்களிடம் தெரிவித்தார். தர்பங்காவில் அமையவுள்ள எய்ம்ஸ் மருத்துவமனை, பீகார் மற்றும் நாடு முழுவதும் சேவையாற்றும் பல புதிய மருத்துவர்களை உருவாக்க உதவும் என்றும் அவர் கூறினார். கற்பூரி தாக்கூரின் தொலைநோக்குப் பார்வைக்கு அஞ்சலி செலுத்தும் வகையில் இந்தி உள்ளிட்ட பிராந்திய மொழிகளில் உயர்கல்விக்கு உந்துதல் அளிக்கப்படுவதையும் பிரதமர் குறிப்பிட்டார். கடந்த 10 ஆண்டுகளில், 1 லட்சம் புதிய மருத்துவ இடங்கள் சேர்க்கப்பட்டுள்ளன என்றும், அடுத்த ஐந்து ஆண்டுகளில் இந்த எண்ணிக்கையை மேலும் 75,000 ஆக அதிகரிக்க திட்டமிட்டுள்ளதாகவும் அவர் தெரிவித்தார்.

புற்றுநோய் சிகிச்சை குறித்து பேசிய பிரதமர், இந்த நோயை எதிர்த்துப் போராட அரசு மேற்கொண்டு வரும் முயற்சிகளை விளக்கினார் முசாபர்பூரில் புதிய புற்றுநோய் சிகிச்சை மையம் கட்டப்பட்டு வருவதாகவும், இது பீகாரில் உள்ள புற்றுநோயாளிகளுக்கு விரிவான கவனிப்பை வழங்குவதாகவும், அவர்கள் தில்லி அல்லது மும்பை போன்ற நகரங்களுக்கு பயணிக்க வேண்டிய தேவையை நீக்கும் என்றும் அவர் கூறினார். வாரணாசியில் அண்மையில் தொடங்கப்பட்ட சங்கரா கண் மருத்துவமனையால் ஈர்க்கப்பட்டு, காஞ்சி காமகோடி ஸ்ரீ சங்கராச்சார்யாவிடம் தாம் விடுத்த வேண்டுகோளைத் தொடர்ந்து, பீகாரில் புதிய கண் மருத்துவமனை அமைக்கப்படும் என்றும் அவர் அறிவித்தார். இந்தக் கண் மருத்துவமனைக்கான பணிகள் நடந்து வருவதாக அவர் கூறினார்.

இந்த நிகழ்ச்சியில் மகிழ்ச்சி தெரிவித்த பீகார் முதலமைச்சர் திரு. நிதீஷ் குமார், தர்பங்கா எய்ம்ஸ் மருத்துவமனை தர்பங்காவில் மட்டுமின்றி, ஒட்டுமொத்த பிராந்தியத்திலும் சுகாதார நிலைமையை மேம்படுத்தும் என்று கூறினார். தர்பங்கா எய்ம்ஸ் மருத்துவமனை இந்தப் பிராந்தியத்தில் இதர சமூக-பொருளாதார வளர்ச்சிகளுக்கும் உந்துதலாக இருக்கும் என்று அவர் குறிப்பிட்டார்.

எய்ம்ஸ் தர்பங்கா பற்றிய பின்னணி குறிப்பு:

இதுவரை 22 எய்ம்ஸ் மருத்துவமனைகளுக்கு ஒப்புதல் அளிக்கப்பட்டுள்ளது. இவற்றில் 2 எய்ம்ஸ் மருத்துவமனைகள் பீகார் மாநிலத்தில் அமைக்க ஒப்புதல் அளிக்கப்பட்டுள்ளது: தர்பங்காவில் எய்ம்ஸ் மருத்துவமனைக்கான பூமி பூஜையை பிரதமர் திரு. நரேந்திர மோடி இன்று நடத்தினார்.

தர்பங்காவில் உள்ள எக்மி-ஷோபன் புறவழிச்சாலையில் அமைந்துள்ள 187 ஏக்கர் நிலத்தில் ரூ .1264 கோடி செலவில் எய்ம்ஸ் தர்பங்கா நிறுவப்படுகிறது. இது 750 படுக்கைகள் கொண்ட சூப்பர் ஸ்பெஷாலிட்டி மருத்துவமனை / ஆயுஷ் பிரிவு, மருத்துவக் கல்லூரி 125 இருக்கைகள், செவிலியர் கல்லூரி 60 இருக்கைகள், நோயாளிகள் மற்றும் அவர்களின் உதவியாளர்களுக்கான இரவு தங்குமிடம், மருத்துவர்கள், மாணவர்கள் மற்றும் ஊழியர்களுக்கான குடியிருப்பு வசதிகளைக் கொண்டிருக்கும். தர்பங்கா மருத்துவமனை முசாபர்பூருக்கு அருகிலுள்ள மாவட்டங்கள் உட்பட பீகார் மக்களுக்கு அதிநவீன கட்டுபடியாகக்கூடிய உலகத்தரம் வாய்ந்த மூன்றாம் நிலை சுகாதார வசதிகளை வழங்கும். ஆரோக்கியமான பாரதம், சம்ருத் பாரதம் இயக்கத்தை அடைவதில் தர்பங்கா எய்ம்ஸ் குறிப்பிடத்தக்க பங்களிப்பை அளிக்கும்.

***

(Release ID: 2072982)
PKV/RR