ہندوستان کی صدر جمہوریہ محترمہ دروپدی مرمو نے آج (7 نومبر 2024) کو گوا میں ’ڈے ایٹ سی‘ تقریب میں شرکت کی۔ آئی این ایس وکرانت پر اپنے’ڈے ایٹ سی‘کے دوران،  انہوں نے کئی بحری کارروائیوں کا مشاہدہ کیا جن میں مگ29 کے ٹیک آف اور لینڈنگ، جنگی جہاز سے میزائل فائر کرنے کی مشقیں اور آبدوز آپریشن شامل ہیں۔ انہیں ہندوستانی بحریہ کے رول اور چارٹر نیز آپریشنز کے تصور (کونسیپٹ)سے آگاہ کیا گیا۔ انہوں نے آئی این ایس وکرانت کے عملے سے بھی بات چیت کی۔

بحری بیڑے سے اپنے خطاب میں، جسے سمندر میں موجود تمام اکائیوں کو نشر کیا گیا، صدرجمہوریہ  نے کہا کہ ہندوستان کی کئی ہزار سال سے زیادہ پرانی سمندری تاریخ ہے۔ اسے ایک سازگار سمندری جغرافیہ سے بھی نوازا گیا ہے۔ 7500 کلومیٹر سے زیادہ طویل ساحلی پٹی کے ساتھ، ہندوستان کا سمندری جغرافیہ اقتصادی ترقی، علاقائی رابطے اور اسٹریٹجک اثر و رسوخ کے کئی مواقع پیش کرتا ہے۔ ہمارے پاس بہت بڑی سمندری صلاحیت ہے جس سے ہمیں ایک ترقی یافتہ ملک بننے کے سفر میں فائدہ اٹھانا چاہیے۔

صدر جمہوریہ نے کہا کہ عالمی جغرافیائی سیاسی اور سلامتی کے ماحول میں خاص طور پر میری ٹائم ڈومین میں جاری بہاؤ اس بات کا تقاضا کرتا ہے کہ ہم خطے اور اس سے باہر اپنے قومی بحری مفادات کے تحفظ اور اس کی پیروی کے لیے اپنی بحری طاقت کو مضبوط کرتے رہیں۔ ہندوستانی بحریہ کی تیاری اور ثابت قدمی کے ذریعہ ہندوستان نے بحر ہند کے علاقے میں ایک محفوظ اور پرامن ماحول کو یقینی بنایا ہے۔ انہوں نے کہا کہ آئی این ایس وکرانت کی شمولیت اوراس کے عملی طور پر کام کرنےکی وجہ سے بھارت کی دوسری جوہری طاقت سے چلنے والی بیلسٹک میزائل آبدوز آئی این ایس اریگھاٹ کے کام کرنے، اور جدید فرنٹ لائن جنگی جہازوں اور جدید بحری انفراسٹرکچر کے اضافے سے ہندوستان کی سمندری طاقت کو نمایاں فروغ ملا ہے۔ ان کامیابیوں نے ایک مضبوط علاقائی طاقت کے طور پر ہندوستان کی حیثیت کو مستحکم کیا ہے۔

صدر جمہوریہ کو یہ جان کر خوشی ہوئی کہ تمام رینکوں اور رولس میں خواتین کی شمولیت سے آگے بڑھتے ہوئے، ہندوستانی بحریہ نے ہماری خواتین سمندری جنگجوؤں کی مکمل جنگی صلاحیت سے فائدہ اٹھانے کے لیے فعال اقدامات کیے ہیں۔ ہندوستانی بحریہ نے جنگی جہاز پر اپنی پہلی خاتون کمانڈنگ آفیسر کا تقرر کیا ہے۔ اس نے یہ بھی فیصلہ کیا ہے کہ خواتین بحری جہازوں کی پائلٹ ہوں گی۔ حال ہی میں ہندوستانی بحریہ کو اپنی پہلی خاتون ہیلی کاپٹر پائلٹ بھی ملی ہے۔ انہوں نے کہا کہ یہ کامیابیاں ہندوستانی بحریہ کی صنفی شمولیت کو فروغ دینے کی کوششوں میں نمایاں ہیں۔

صدر کی تقریر دیکھنے کے لیے یہاں کلک کریں-

************

ش ح۔ش ت۔ ج ا

 (U: 2237)