কেন্দ্রগী এজুকেসন মন্ত্রী শ্রী ধর্মেন্দ্র প্রধান্না সেন্ত্রেল সেক্তরগী মখাদা লাইরিক ফবা মহৈরোয়শিংদা শেলগী তেংবাং পীনবগী মরুওইবা খোঙথাং অমা ওইরিবা পি.এম. বিদ্যালক্ষ্মী স্কিম কেন্দ্রগী মন্ত্রী-মন্দলনা অয়াবা পীখিববু থাগৎপা ফোংদোকখ্রে।

প্রধান মন্ত্রী শ্রী নরেন্দ্র মোদীগী মফমদা মহাক্কী থাগৎপা ফোংদোক্লদুনা শ্রী প্রধান্না হায়খি মদুদি স্কিম অসিনা ভারতকী হৈ-শিংলবা নহারোলশিংগীদমক 21শুবা চহিচাগী অৱাংবা থাক্কী মহৈ-মশিং তম্বদা য়ুনিভর্সেল ওইনা মতেং পাংগনি। মহাক্না হায়খি মদুদি লুপা করোর 3,600গী শেনফমগা লোয়ননা স্কিম অসিনা হায়র এজুকেসনদা লৈরিবা খুদোংচাদবশিং কোকহল্লগনি অমসুং লৈবাক অসিগী য়ুভা শক্তিনা মখোয়গী মঙলানশিং ফংনবা মতেং পাংগনি। পি.এম. বিদ্যালক্ষ্মীগী মখাদা কোল্লাতরেল-ফ্রী অমসুং গরেন্তর-ফ্রী এজুকেসন লোনশিং অসিনা লাইরিক ফবা মহৈরোয়শিংদা অৱাংবা থাক্কী মহৈ-মশিং তম্বদা এক্সেস পীগনি অমসুং শেল-থুমগী অৱাবা অদুনা মহৈরোয়শিংদা মহৈ-মশিং তম্বদা অথিংবা লৈহন্দবা ঙমহনগনি হায়না মহাক্না ফোংদোকখি।

শ্রী প্রধান্না হায়খি মদুদি চহিগী ওইনা ফেমিলী ইনকম লুপা লাখ 8 ফাওবা  m,শেন্দোই হন্থবা ফংলগনি অমসুং লুপা লাখ 7.5 ফাওবগী লোনশিংদা চাদা 75গী ওইবা ক্রেদিৎ গেরেন্তী ফংলগনি। বেঙ্ক পুম্নমক্তা চৎনগদবা, ত্রান্সপরেন্ত, স্তুদেন্ত-ফ্রেন্দলী অমসুং দিজিতেল এপ্লিকেসন প্রোসেসকী খুত্থাংদা এজুকেসন লোনগী খুদোংচাবা পীগনি হায়না মহাক্না ফোংদোকখি।

মহাক্না হায়খি পি.এম. বিদ্যালক্ষ্মীগী মখাদা এজুকেসন লোন অসি NIRFদা য়ুম্ফম ওইদুনা লৈবাক অসিগী খ্বাইদগী ফবা HEI 860দা এদমিসনশিং ফংলবা মহৈরোয়শিংদা পীগনি। মসিনা চহি খুদিংগী মহৈরোয় লাখ 22 হেন্না কোনশিনগনি।

মন্ত্রীনা মসিসু হায়খি মদুদি লাইরিক ফবা মহৈরোয়শিংদা শেলগী তেংবাং পীবা অসি NEP 2020 গী মরুওইবা রিকমেন্দেসন অমনি অমসুং পি.এম. বিদ্যালক্ষ্মী অসি NEP ইমপ্লিমেন্ত তৌনবা মাইকৈদা মরু ওইবা খোঙথাং অমনি। পি.এম. বিদ্যালক্ষ্মীনা লাইরবশিং অমসুং ময়াই কাংলুপকী মহৈরোয়শিংবু শক্তি পীরগনি হায়না মহাক্না হায়খি।

প্রধান মন্ত্রী শ্রী নরেন্দ্র মোদীনা ময়াই তাংবল লৌদুনা ফমখিবা কেন্দ্রগী সেক্তরগী মখাদা অনৌবা খোঙথাং অমা ওইরিবা পি.এম. বিদ্যঅলক্ষ্মী স্কিম, শেল-থুমগী অৱাবা অদুনা অৱাংবা থাক্কী মহৈ-মশিং তম্বদা অথিংবা লৈহন্দনবা, লাইরিক ফবা মহৈরোয়শিংদা শেলগী তেংবাং পীনবগী পান্দমদা কেন্দ্রগী মন্ত্রীমন্দলনা অয়াবা পীখ্রে। স্কিম অসিনা নেস্নেল এজুকেসন পোলিসী (NEP) 2020দা পীরিবা ভিজন অসি মঙফাওনহন্নবগীদমক মরুওইবা খোঙথাং অমনি। মসিদা পব্লিক অমসুং প্রাইবেৎ হায়র এজুকেসন ইন্সতিত্যুসন (HEI) অনিমক্তা তোঙান তোঙানবা মেকানিজমশিংগী খুত্থাংদা শেলগী তেংবাং ফংহনবগী তঙাই ফদবা লৈ হায়না অকনবা ৱাফম থম্লি।

*****