పండుగ రద్దీ దృష్ట్యా, ప్రజలకు సురక్షితమైన ప్రయాణ అనుభవాన్ని అందించడానికి, అవాంఛనీయ ఘటనలను నివారించడానికి భారతీయ రైల్వే కృషి చేస్తోంది. దీపావళి, ఛత్ పండుగల సందర్భంగా దేశవ్యాప్తంగా ప్రజా రవాణా సవాలుతో కూడినదే అయినా, నవరాత్రి, దుర్గా పూజ సందర్భంలో విజయవంతంగా పనిచేసిన అనుభవంతో, భారతీయ రైల్వే ఇప్పుడు దీపావళి, రాబోయే ఛత్ వేడుకల కోసం ప్రయాణికులను సురక్షితంగా వారి గమ్యస్థానాలను చేర్చేందుకు పూర్తిగా సంసిద్ధమైంది.

రైల్వే ప్రాంగణాల్లో ఏవైనా అనుమానాస్పద వస్తువులు కనిపిస్తే, దయచేసి ప్రత్యేక హెల్ప్‌లైన్ నంబరు 139 కి కాల్ చేసి లేదా రైల్ మదద్ పోర్టల్‌ ఉపయోగించి వెంటనే రైల్వే భద్రతా దళం (ఆర్‌పీఎఫ్) కు సమాచారం ఇవ్వాలని రైల్వే పోలీసులు కోరుతున్నారు. దీపావళి పండుగ సమయంలో దేశవ్యాప్తంగా కాంతి, ఆనందం వెల్లివిరియడంతో పాటు ప్రయాణికుల రద్దీ అధికంగా ఉంటుంది. ఈ సమయంలో లక్షలాది మంది ప్రయాణికులను సురక్షితంగా, సాఫీగా వారి గమ్యస్థానాలకు చేర్చడం కోసం ఆర్‌పీఎఫ్ పటిష్ఠ భద్రతా చర్యలను అమలు చేస్తోంది.

పండుగ సీజన్ సమయంలో ప్రజలకు సురక్షితమైన ప్రయాణ అనుభవాన్ని అందించేందుకు, అగ్ని ప్రమాదాలను అరికట్టడానికి, అలాగే రైల్వే నెట్‌వర్క్‌లో ప్రమాదాలను నివారించడం కోసం అన్ని విధాలా సన్నద్ధమైన ఆర్‌పీఎఫ్ ప్రత్యేక భద్రతా చర్యలను తీసుకుంటున్నది. ప్రయాణికులకు భద్రతా చర్యల గురించిన అవగాహన కల్పించే ప్రచారంలో భాగంగా రైల్వేలకు చెందిన ఆసక్తిదారుల సహకారంతో, కరపత్రాల పంపిణీ, పోస్టర్లను ప్రదర్శించడం, ఆకట్టుకునే వీధి నాటకాలు (నుక్కడ్ నాటాక్‌లు) ప్రదర్శించడం, అలాగే బహిరంగ ప్రకటనలను ప్రసారం చేయడం వంటి ప్రచారాలను ఆర్‌పీఎఫ్ నిర్వహిస్తోంది. ప్రయాణికులందరినీ చేరుకునేలా సామాజిక, ముద్రణ, ఎలక్ట్రానిక్ మీడియా ద్వారా ప్రచారం చేస్తోంది. ఈనెల 15 నుంచి చేపట్టిన తనిఖీల్లో భాగంగా, అగ్ని ప్రమాదాల నివారణ కోసం పోర్టబుల్ స్టవ్స్ (సిగ్రిస్) ఉపయోగించే వర్తక, వ్యాపారులతో పాటు ప్రయాణికుల సామాన్లు, పార్శిల్స్ వంటి వాటిని క్షుణ్ణంగా తనిఖీ చేస్తున్నారు.

ఈ తనిఖీల్లో భాగంగా ఇప్పటి వరకు ప్రమాదకరమైన, మండే స్వభావం గల వస్తువులను రవాణా చేస్తున్న 56 మందిపై రైల్వే చట్టాల ప్రకారం కేసులు నమోదు చేశారు. రైళ్లలో ధూమపానం చేస్తున్న 550 మందికి జరిమానా విధించారు. అలాగే సిగరెట్లు, ఇతర పొగాకు ఉత్పత్తుల చట్టం (సీవోపీటీఏ) వివిధ నిబంధనల కింద 2,414 మందిపై కేసులు నమోదు చేశారు.

"దీపావళి, ఛత్ పండుగలు ఆనందం, సమైక్యతకు ప్రతీకగా నిలిచే పండుగలు. ఈ పండుగల వేళ మా ప్రయాణికుల భద్రతే మాకు ప్రధానం" అని ఆర్‌పీఎఫ్ డైరెక్టర్ జనరల్ శ్రీ మనోజ్ యాదవ అన్నారు. "ప్రయాణికులు అప్రమత్తంగా ఉంటూ, సురక్షితమైన ప్రయాణం కోసం మా సిబ్బందికి సహకరించాలని మేం కోరుతున్నాం" అని ఆయన విజ్ఞప్తి చేశారు.

ప్రమాదాలు, నేరాలను నివారించే లక్ష్యంతో, రైల్వే ప్రయాణికుల భద్రత కోసం ఆర్‌పీఎఫ్ సమగ్ర భద్రతాపరమైన హెచ్చరికలను జారీ చేసింది.

. టపాసులు, మండే స్వభావం గల వస్తువులు, అనుమానాస్పద వస్తువులు లేదా వ్యక్తులను రైళ్లలో లేదా రైల్వే స్టేషన్లలో గమనిస్తే, వెంటనే ఆర్‌పీఎఫ్/జీఆర్‌పీ సిబ్బందికి లేదా రైల్వే అధికారులకు సమాచారం ఇవ్వాలి.

. మీ విలువైన వస్తువులను మీ వద్దే భద్రంగా ఉంచుకోవాలి.

. తక్కువ సామాన్లతో ప్రయాణించండి, అదనపు భద్రత కోసం డిజిటల్ చెల్లింపులను ఎంచుకోండి.

. పిల్లల వెంట ఎల్లప్పుడూ పెద్దవారు తోడుగా ఉండేలా చూసుకోండి.

. ప్రకటనలను శ్రద్ధగా వినండి. అలాగే రైల్వే సిబ్బంది సూచనలను పాటించండి.

పూర్తి స్థాయి భద్రతా చర్యలు:

·  ప్రధాన స్టేషన్లలో సీసీటీవీ కెమెరాల ద్వారా నిఘా పెంచడం

·  ఆర్‌పీఎఫ్ సిబ్బంది రైళ్లు, స్టేషన్లలో తనిఖీలను ముమ్మరం చేయడం

·  నేరాలను సమర్థంగా నివారించేందుకు ప్రభుత్వ రైల్వే పోలీస్ (జీఆర్‌పీ) సహకారం

·  సామాన్లు, ప్రయాణికులను రెగ్యులర్‌గా తనిఖీ చేయడం.

· ప్రయాణికులు ఏవైనా భద్రతాపరమైన సమస్యల గురించి రైల్ మదద్ వెబ్ పోర్టల్ (https://railmadad.indianrailways.gov.in) లేదా మొబైల్ అప్లికేషన్ ద్వారా ఫిర్యాదు చేయవచ్చు లేదా హెల్ప్ లైన్ నంబరు 139 కి కాల్ చేయవచ్చు.

*****