1 2

#IFFIWood, 22 ऑक्‍टोबर 2024

सध्या नोव्हेंबर म्हयनो उत्सवाच्या उमेदीन येता आसतना, आमी तुमकां फिल्मांच्या वर्सुकी महोत्सवाचो भाग जावपाक आपयतात - भारतीय आंतरराष्ट्रीय चित्रपट महोत्सव (इफ्फी) – 20 ते 28 नोव्हेंबर 2024 मेरेन गोंयच्या पणजे शारांत जावपाचो आसा. गोंय राज्यांतल्या अरबी दर्याच्या भव्य फाटभूंयेर सिनेमाची खोशी मनोवपा खातीर, संवसारभरांतले चित्रपट मोगी हांगाच जमतात.

तुमी संवसारांतल्या खयच्याय कोनशांतल्यान आनी वेगवेगळ्या सांस्कृतीक फाटभूंयेतल्यान आयिल्ले आसले, तरी फिल्मां कडेन आशिल्ल्या मोगा खातीर इफ्फी तुमका एकठांय येवपाची संद दिता. हो उत्सव मनोवपाक, कथा सांगपाच्या आनंदांत आनी व्हडल्या पडद्याच्या जादूंत वांटो घेवपाक आमी सगळ्यांक आपयतात. तुमी https://my.iffigoa.org/ ह्या संकेतथळार नोंदणी करूंक शकतात आनी ह्या वर्साच्या महोत्सवा खातीर इफ्फीचे प्रतिनिधी जावंक शकतात.

इफ्फीत कित्याक वाटो घेवप?

55व्या इफ्फीत, तुमकां संवसारभरांतल्या चित्रपटांची विविधताय आशिल्ली फिल्मा 16 क्युरेट केल्ल्या विभागांनी पळोवपाक मेळटली. तुमकां काळजाक हात घालपी ड्रामा आसूं, रोमांचक माहितीपट आसूं वा अभिनव लघुपटांची आवड आसूं, ह्या महोत्सवांत दरेका सिनेमा मोगी खातीर कितें तरी आनंद घेवपासारके आसतले. जायते सिनेमा हांगाच इफ्फींत, राष्ट्रीय आनी आंतरराष्ट्रीय प्रीमियर करतले ताकालागून प्रतिनिधींक, हेरां पयलीं जायते चित्रपट पळोवपाची एकमेव संद लेगीत मेळटली. पूण हि  फकत सिनेमा पळोवपाची संद न्हय; तर हांगा कथा सांगपाची कलाय शिकपाक मेळटली !

इफ्फीत नामनेचे फिल्म निर्माते आनी उद्देग वेवसायीक हांच्या फुडारपणा खाला, कार्यशाळा आनी मास्टर क्लास घेवन आपली अंतर्दृष्टी आनी अणभव सांगपाक उत्सुक आसात. हांगा येवन जिवंत चर्चा करात, तुमचीं कल्पनांचे दिवप घेवप करात आनी मर्यादे भायर इश्टागत तयार करात, जी तुमी एक भावुक आनी नवोदित फिल्म निर्माते आसल्यार, तुमच्या फुडल्या व्हडल्या प्रकल्पाक मजत करूंक शकता.

फिल्म जगताचो ग्लिट्ज आनी ग्लॅमर तुमकां पयलेच नदरेन अणभवपाची संद मेळटली. इफ्फीच्या रेड कार्पेटांर नामनेचे चित्रपट निर्माते, अभिनेते आनी उद्देगीक प्रतिकांची एक वळेरी आसता, जी आपल्या कामाची परब मनोवपाक आनी सिनेमाची आवड वांटपाक जमतात. इफ्फीच्या प्रतिनिधींक फिल्म निर्माते, अभिनेते आनी उद्देग तज्ञांकडेन मेळपाक आनी तांचे कडेन चर्चा करपाक मेळटली. तुमकां आवडटात त्या चित्रपटांक आकार दिवपी लोकां कडेन, जिवंत चर्चा आनी विचारांचे दिवप घेवप करपाची कल्पना करात.

हाचे भायर इफ्फी आनीक एक फावट ‘क्रिएटिव्ह माइंड्स ऑफ टुमॉरो’, ‘फिल्म बाजार’आनी ‘सिने मेला’ हांचीं 2024 वर्साचीं आवृत्ती परत हाडटा आनी भारतीय आंतरराष्ट्रीय चित्रपट महोत्सव नवोदित प्रतिभेखातीर आनी सगळें फिल्मांखातीर ‘वन स्टॉप शॉप’  करता.

देखून, आयुश्यभराच्या अणभवाक तयार रावचें. ह्या अविश्वसनीय सिनेमा प्रवासांत वांटो घेवपाची संद चुकोवची न्हय.

इफ्फीची प्रवेशयोग्यताय :

इफ्फीत समावेशकतेच्या यत्नांत, महोत्सवाची सुवात सुलभ अशी तयार केल्या आनी तातूंत वेगवेगळ्या सुविधांचो आस्पाव आसा, जाका लागून सगळ्यांक आडमेळीं मुक्त अणभव मेळटलो. दिव्यांजनाच्या खाशेल्या गरजे खातीर, स्थळाची मुळावी बांदावळय नवी केल्या. ईएसजी आनी हेर सुवातींनी जंय चित्रपट दाखयतात थंय रॅम्प, हॅंडरेल, दिव्यांजनाक अनुकूल स्पर्श मार्ग, पार्किंग जागो, रिट्रोफिट शौचालय, ब्रेल भाशेंत सायनबोर्ड आदी तजवीज करून, आडखळ मुक्त केल्यात. जाकालागून फिल्मांचो उत्सव मनयतना, कोणूच फाटीं उरचो ना.

नोंदणी कशी करची?

नोंदणी करपा खातीर, https://my.iffigoa.org/ चेर लॉगऑन करात.

इफ्फीच्या ५५व्या आवृत्ती खातीर प्रतिनिधींची नोंदणी महोत्सव सोंपसर चालू आसा. हे विभाग अशे आसात:

फिल्म तज्ज्ञ

• नोंदणी शुल्क: 1180/-  (18% जीएसटी सयत)
• फायदे: ऑनलायन मान्यताय, अतिरिक्त तिकीट आनी पॅनल तशेच फिल्म स्क्रिनिंगाक फुकट प्रवेश.

सिने उत्साही

• नोंदणी शुल्क: 1180/-  (18% जीएसटी सयत)
• फायदे: ऑनलायन मान्यताय आनी पॅनल तशेच फिल्म स्क्रिनिंगाक फुकट प्रवेश.

प्रतिनिधी - विद्यार्थी

• नोंदणी शुल्क: 0 (शून्य)  
• फायदे: ऑनलायन मान्यताय, पॅनल तशेच फिल्म स्क्रिनिंगाक फुकट प्रवेश आनी दिसाक 4 तिकेटी.

हे विभाग तज्ज्ञ, सिनेमा मोगी आनी सिनेमाच्या विद्यार्थ्यां खातीर तयार केल्ले वेगवेगळे फायदे दितात. विद्यार्थ्यांक दिसाक 4 तिकीटां सयत खाशेलो प्रवेश मेळटा, जाका लागून तांकां चित्रपट आनी कार्यावळींचो व्यापक संपर्क मेळटा, जाल्यार चित्रपट तज्ञां  दिसाक एक अतिरिक्त तिकीट मेळटा.

प्रतिनिधींक ऑनलायन मान्यताय मेळटा, जाका लागून महोत्सवाच्या वेळार सगळ्या कार्यावळींनी आनी सुवातींनी प्रवेश मेळटा. तुमच्या वैयक्तीक डॅशबोर्डांत प्रवेश मेळोवपा खातीर, तुमचें माय-इफ्फी खातें https://my.iffigoa.org/ चेर तयार करचें, जंय तुमी तिकीट बुक करूंक शकतात आनी उत्सवाचे वेळापत्रक तपासूंक शकतात. तुमकां कसलेय प्रस्न वा समस्या आसल्यार, registration@iffigoa.org हाचेर संपर्क सादचो. आतांच नोंदणी करात आनी फिल्मांची कला एकठांय येवन साजरी करात.

गोंयची तिकेट बुक करून फिल्म फिएस्टाखातीर आमचे कडेन येतना, उत्साह उमेद तुमचे वांगडा आसूं !

इफ्फी विशीं :

1952 वर्सा स्थापन जाल्लो भारतीय आंतरराष्ट्रीय चित्रपट महोत्सव (इफ्फी) आशिया खंडांतलो एक मुखेल चित्रपट महोत्सव आसा. सुरवाती सावन इफ्फीन चित्रपट, तांच्यो मनभुलोवपी कथा आनी ताचे फाटल्यान आशिल्ल्या प्रतिभावान व्यक्तींक मनोवपाचो हेत दवरला. ह्या महोत्सवांत चित्रपटांची खोलायेन कदर आनी मोग वाडोवपाक आनी पातळावपाक, लोकां मदीं समजूती आनी इश्टागतीचे संबंद तयार करपाक आनी वैयक्तीक आनी सामुहीक उत्कृश्टतायेच्या नव्या उंचायेर पावपाक प्रेरणा दिवपाचो यत्न केला.

भारत सरकारचे म्हायती आनी प्रसारण मंत्रालय, राष्ट्रीय चित्रपट विकास म्हामंडळ (एनएफडीसी) आनी गोंय सरकारच्या मनरिजवण सोसायटी तसेच येजमान राज्याच्या सहकार्यान इफ्फी घडोवन हाडटा.

55व्या इफ्फीविशीं ताज्या घडामोडीं खातीर, www.iffigoa.org ह्या महोत्सवाच्या संकेतथळाक भेट दिवची.

* * *

PIB Mumbai | NM/M.Prabhugaonkar/D.Rane

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai