প্রধান মন্ত্রী, শ্রী নরেন্দ্র মোদী অমসুং স্পেনগী প্রধান মন্ত্রী শ্রী পেদ্রো সাঞ্চেজনা ওক্তোবর 28, 2024দা গুজরাতকী ভদোদরাদা লৈবা তাতা এদভান্স সিস্তেম্স লিমিতেদ (TASL) কেম্পসতা C-295 এয়রক্রাফ শানবগী তাতা এয়রক্রাফ কম্প্লেক্স পুন্না শঙ্গাখ্রে।

মীয়াম তিনখিবা অদুদা ৱা ঙাংলদুনা প্রধান মন্ত্রীনা হায়খি মদুদি স্পেনগী প্রধান মন্ত্রী, শ্রী পেদ্রো সঞ্চেজকী ভারতকী অহানবা খোঙচৎনি অমসুং লৈবাক অনিগী মরক্তা লৈরিবা পার্তনরশিপ অসিনা ঙসি অনৌবা মায়োল অমা ফংলি।  C-295 এয়রক্রাফ পুথোক্নবা তাতা এয়রক্রাফত কম্প্লেক্স শঙ্গাখিবা অদু পল্লদুনা প্রধান মন্ত্রীনা হায়খি মদুদি মসিনা লৈবাক অনিগী মরক্তা লৈনরিবা মরী অদু মপাঙ্গল কনখৎহনবতা নত্তনা "মেক ইন ইন্দিয়া, মেক ফোর ৱর্ল্দ"গী মিসন অদুসু খুমাং চাউশিলহল্লগনি। থৌরম অসিদা শ্রী মোদীনা এয়রবস অমসুং তাতাগী তীম পুম্নমক্তা মহাক্কী য়াইফ পাউজেল পীখি। প্রধান মন্ত্রীনা লৈখিদ্রবা শ্রী রতন তাতাজীবুসু ইকায় খুম্নবা উৎখি।

প্রধান মন্ত্রীনা হায়খি মদুদি  C-295 এয়রক্রাফকী ফেক্তরী অসি অনৌবা ভারতকী অনৌবা ৱাক কলচর মমি অমা ওইরি। মহাক্না হায়খি মদুদি লৈবাক অসিদা প্রোজেক্ত অমহেক্তগী ৱাখল্লোনদগী হৌরগা থবক ওইনা পাংথোকপদা ভারতকী খোঙজেল অসি উবা ফংলে। 2022গী ওক্তোবরদা ফেক্তরী অসিগী উরেপ উয়ুং তম্বগী থৌরম পাংথোকখিবা অদু নীংশিংলদুনা প্রধান মন্ত্রীনা হায়খি মদুদি ফেক্তরী অসি হৌজিক  C-295 এয়রক্রাফ পুথোক্নবা শেম-শারি। প্রোজেক্তশিং শেম-শাবদা অমসুং পায়খৎপদা থেংথবা থোকপদা মিৎয়েং চঙবগী মতাংদা পল্লদুনা, প্রধান মন্ত্রীনা গুজরাতকী মুখ্য মন্ত্রী ওইরিঙৈদা বোম্বেদয়র ত্রেন কোচ মেনুফেকচরিং ফেসিলিতী ভদোদরাদা লিংখৎখিবা অদু নীংশিংখি। “ফেক্তরী অসিদা শাবা মেত্রো কোচশিং ঙসিদি অতোপ্পা লৈবাকশিংদা থাদোক্লক্লি।" শ্রী মোদীনা থাজবা থমখি মদুদি ঙসি শঙ্গাখিবা ফেসিলিতী অসিদা শাবা এয়রক্রাফশিং অসি এক্সপোর্ত তৌরগনি।

শক্নাইরবা স্পেনিশ কবি, এন্তোনিও মাচাদোবু পল্লদুনা প্রধান মন্ত্রীনা হায়খি মদুদি ঐখোয়না পান্দম অদুগী মায়কৈদা চংশিল্লকপা মতমদা, পান্দম অদুগী মায়কৈদা চঙগদবা লম্বী অদু মশামক্না শেম্মী। ঙসিদি ভারতকী দিফেন্স মেন্যুফেকচরিং ইকোসিস্তেম অসি অনৌবা অৱাংবা থাক্তা য়ৌরক্লি হায়না পল্লদুনা শ্রী মোদীনা হায়খি মদুদি করিগুম্বা চহি 10গী মমাংদা কংক্রিৎ ওইবা খোঙথাংশিং লৌখৎলমদ্রবদি ঙসিদি মসিগী পান্দম অসি য়ৌহনবা ঙম্লম্লোই। মহাক্না মখা তাখি মদুদি চহি তরাগী মমাংদা, দিফেন্স মেন্যুফেকচরিংগী প্রাইওরিতী অমসুং আইদেন্তিতি অসি ইম্পোর্তকী মতাংদা ওইরম্মি অমসুং কনা অমত্তনা ভারত্তা অসিগুম্বা অচৌবা স্কেল অমদা দিফেন্স মেন্যুফেকচরিং পাংথোকপা ঙমগনি হায়না খল্লমদে। প্রধান মন্ত্রীনা হায়খি মদুদি সরকারনা অনৌবা লম্বীদা চৎনবা ৱারেপ লৌখি, ভারতকীদমক অনৌবা পান্দম থমখি, মসিগী মহৈ ঙসি উবা ফংলে।

প্রধান মন্ত্রীনা হায়খি মদুদি ভারতকী দিফেন্স সেক্তরগী ত্রান্সফোর্মেসন অসিনা মতৌ করম্না অচুম্বা থৌরাং অমসুং পার্তনরশিপনা ওইথোকপা য়াবশিংবু চাউখৎপা ওইহল্লকপা য়াবগে হায়বদু উৎলি। মহাক্না হায়খি মদুদি স্ত্রেতেজিক ওইবা ৱারেপশিং অসিনা হৌখিবা চহি তরা অসিদা ভারত্তা দিফেন্স ইন্দস্ত্রীগী চাউখৎপা হেনগৎহনখ্রে।

“ঐখোয়না দিফেন্স মেন্যুফেকচরিংদা প্রাইবেৎ সেক্তরগী শরুক য়াবা হেনগৎহনখি, পব্লিক সেক্তরগী য়ুনিৎশিংবু হেন্না মপাঙ্গল কনখৎহনখি, ওর্দিনেন্স ফেক্তরীশিংবু মকোক থোংবা কম্পেনী তরেৎতা শেমজিনখি, অমসুং DRDO অমসুং HALদা  শক্তি পীখি”।  মহাক্না হায়খি মদুদি উত্তর প্রদেশ অমসুং তামিল নাদুদা দিফেন্স কোরিদোরশিং লিংখৎপনা সেক্তর অসিদা অনৌবা ইনর্জী পীরি। iDEX (ইন্নোবেসন ফোর দিফেন্স এক্সিলেন্স) স্কিমগী মতাংদা পল্লদুনা প্রধান মন্ত্রীনা হায়খি মদুদি মসিনা হৌখিবা চহি মঙাদগী তরুক ফাওবদা দিফেন্স স্তার্ত-অপ 1,000 রোম হেনগৎহনখ্রে। মহাক্না হায়খি মদুদি হৌখিবা চহি তরা অসিদা ভারতকী দিফেন্স এক্সপোর্ত অসি শরুক 30 হেনগৎখ্রে। লৈবাক অসিনা হৌজিক্তি লৈবাক 100 হেনবদা ইক্বিপমেন্ত এক্সপোর্ত তৌরি।

প্রধান মন্ত্রীনা স্কিলিং অমসুং থবক পীবদা মরুওইবা পীখি অমসুং এয়রবস-তাতা ফেক্তরীগুম্বা প্রোজেক্তশিংনা থবক লিশিং কয়া পীগনি হায়না ফোংদোকখি। মহাক্না হায়খি মদুদি ফেক্তরী অসিনা এয়রক্রাফকী পার্ত 18,000গী লমদমসিগী ওইবা মেনুফেকচরিংদা মতেং পাংগনি। মসিনা ভারত শিনবা থুংনা MSMEশিংগীদমক অচৌবা খুদোংচাবা পীগনি। ঙসিদি ভারত অসি মালেমগী মরুওইবা এয়রক্রাফ কম্পনীশিংগী শরুকশিং য়ানবগী খ্বাইদগী চাউবা মফম অমা ওইরে হায়না পল্লদুনা শ্রী মোদীনা হায়খি মদুদি অনৌবা এয়রক্রাফত ফেক্তরী অসিনা ভারত্তা অনৌবা স্কিল অমসুং অনৌবা ইন্দস্ত্রীশিংদা চাউনা মতেং পাংগনি।

প্রধান মন্ত্রীনা হায়খি মদুদি মহাক্না ঙসিগী প্রোগ্রাম অসিদা ত্রান্সপোর্ত এয়রক্রাফশিং শাবগী মথক্তা অতোপ্পা থবকশিংসু য়েংলি। হৌখিবা চহি তরা অসিদা ভারতকী এভিএসন সেক্তরদা মমাংদা অমুক্তা ওইখিদ্রিবা মওংদা চাউখৎপা অমসুং অহোংবা লাকপা অদু পল্লদুনা শ্রী মোদীনা হায়খি মদুদি ভারতনা লৈবাক অসিগী অপীকপা শহর চা কয়াদা এয়র কন্নেক্তিবিতী ফংহল্লি অমসুং ভারতপু এভিএসন অমসুং MRO দোমেনগী হব অমা ওইহন্নবা থবক পায়খৎলি। মহাক্না মখা তাখি মদুদি ইকোসিস্তেম অসিনা তুংলমচৎতা মেদ ইন ইন্দিয়া সিভিল এয়রক্রাফকী লম্বীসু য়াৎলগনি। ভারতকী তোঙান তোঙানবা এয়রলাইন্সশিংনা অনৌবা এয়রক্রাফ 1200 ওর্দর তৌখ্রে হায়না পল্লদুনা শ্রী মোদীনা হায়খি মদুদি মসিনা নৌনা শঙ্গাখিবা ফেক্তরী অসিনা ভারত অমসুং মালেমগী তুংলমচৎকী মথৌ তাবশিং ফংনবা দিজাইন তৌবদগী সিভিল এয়রক্রাফ্ট পুথোকপদা অচৌবা থৌদাং অমা লৌগনি।

ভদোদরা সিতি অসি MSMEশিংগী মপাঙ্গল কল্লবা মফম অমা ওইরি হায়না পল্লদুনা শ্রী মোদীনা হায়খি মদুদি শহর অসিনা ভারতকী হোৎনরিবশিং অসিদা কেতলিস্ত অমা ওইনা থবক তৌগনি। মহাক্না মখা তাখি মদুদি শহর অসিদা ভারতকী তোঙান তোঙানবা সেক্তরশিংগীদমক প্রোফেস্নেলশিং শেম্লিবা গতিশক্তি য়ুনিভর্সিতী অমসু লৈরি। প্রধান মন্ত্রীনা ফার্মা সেক্তর, ইঞ্জিনীয়রিং অমসুং হেভি মেছিনরী, কেমিকেল্স অমসুং পেত্রোকেমিকেল্স, পাৱর অমসুং ইনর্জী ইক্বিপমেন্তগুম্বা সেক্তর কয়াগা মরী লৈনবা কম্পনী কয়া অমা ভদোদারাদা লৈরি হায়নসু পনখি। মহাক্না মখা তাখি মদুদি হৌজিক লমদম অসি ভারতকী এভিএসন মেন্যুফেকচরিংগী মরুওইবা মফম অমা ওইগদৌরি। শ্রী মোদীনা গুজরাত সরকার অমসুং মসিগী মুখ্য মন্ত্রী ভুপেন্দ্র পতেল অমসুং মহাক্কী তীম পুম্নমকপু মখোয়গী মোদর্ন ইন্দস্ত্রিএল পোলিসীশিং অমসুং ৱারেপশিং অসিগীদমক থাগৎপা ফোংদোকখি।

ভদোদরা অসি ভারতকী মরুওইবা কলচরেল সিতী অমনি হায়না পল্লদুনা শ্রী মোদীনা হায়খি মদুদি মহাক্না স্পেনদগী লাকপা মরুপশিং পুম্নমকপু তরাম্না ওকপদা নুংঙাইবা ফাওই। প্রধান মন্ত্রীনা হায়খি, "ভারত অমসুং স্পেনগী মরক্তা লৈরিবা কলচরেল কন্নেক্ত অসি মশাগী ওইবা মরুওইবা লৈ। মহাক্না ফাদর কার্লোস ভেল্লে অসি স্পেনদগী লাকখি অমসুং গুজরাত্তা লৈরকখি অমসুং মহাক্কী পুন্সিগী চহি য়াঙ্খৈ মঙা লৈরকখি হায়না পনখি। ফাদর ভেল্লিনা মহাক্কী ৱাখল্লোন অমসুং অইবশিংগা লোয়ননা কলচর অসিবু মপাঙ্গল কনখৎহনখি হায়না মহাক্না মখা তাখি। শ্রী মোদীনা ফাদর ভেল্লীগা উনবগী খুদোংচাবা ফংখি অমসুং মহাক্কী অচৌবা থৌদাং অদুগীদমক ভারত সরকারনা মহাকপু পদ্মশ্রী পীদুনা ইকায় খুম্নবা উৎখি হায়না ফোংদোকখি।

শ্রী মোদীনা হায়খি মদুদি স্পেনদসু য়োগ অসি য়াম্না পাম্নৈ অমসুং স্পেনগী ফুৎবোল অসিসু ভারত্তা পাম্নৈ। ঙরাং রিএল মাদ্রিদ অমসুং বার্সেলোনাগী মরক্তা পাংথোকখিবা ফুৎবোল মেৎচকী মতাংদা পল্লদুনা শ্রী মোদীনা হায়খি মদুদি বার্সেলোনাগী অচৌবা মায়পাকপা অসি ভারত্তা খন্ন-নৈনবগী হীরম অমা ওইখি অমসুং স্পেনদা লৈবগুম ভারত্তা ক্লব অনি অসিগী ফেনশিংগী পুক্নিং চিংশিনবা অসি চপ মান্নৈ। ভারত অমসুং স্পেনগী মখল কয়াগী পার্তনরশিপকী মতাংদা পল্লদুনা প্রধান মন্ত্রীনা হায়খি, "চীঞ্জাক, ফিল্ম, নৎত্রগা ফুৎবোল ওইগেরা, ঐখোয়গী মপাঙ্গল কনবা মীয়ামগী মরক্তা লৈনরিবা মরী অসিনা ঐখোয়গী মরী অসি মতম পুম্নমক্তা মপাঙ্গল কনখৎহল্লি।" শ্রী মোদীনা ভারত অমসুং স্পেননা 2026 অসি ভারত-স্পেন ইয়র ওফ কলচর, তুরিজম অমসুং AI ওইনা পালন তৌনবা ৱারেপ লৌখিবদা নুংঙাইবা ফোংদোকখি।

মহাক্কী ৱারোল লোইশিল্লদুনা প্রধান মন্ত্রীনা থাজবা থমখি মদুদি ঙসিগী থৌরম অসিনা ভারত অমসুং স্পেনগী মরক্তা অনৌবা পুন্না থবক তৌমিন্নবা প্রোজেক্ত কয়া অমা পুক্নিং থৌগৎকনি। মহাক্না স্পেনগী ইন্দস্ত্রী অমসুং ইন্নোবেতরশিংবু বর্তন তৌখি অমসুং মখোয়বু ভারত্তা লাক্নবা অমসুং লৈবাক অসিগী চাউখৎ থৌরাংগী খোঙচৎতা শরুক য়ানবা পুক্নিং থৌগৎখি।

গুজরাতকী রাজ্যপাল, শ্রী আচার্য দেবব্রত, গুজরাতকী মুখ্য মন্ত্রী, শ্রী ভুপেন্দ্র পতেল, কেন্দ্রগী ঙাকশেল মন্ত্রী, শ্রী রাজনাথ সিংহ অমসুং কেন্দ্রগী মপান থৌরমগী মন্ত্রী, শ্রী এস জয়শকরসু থৌরম অদুদা শরুক য়াখি।

অঙনবা Xকী পোস্ত অমদা ঙাকশেল মন্ত্রীনা শঙ্গাবগী থৌরম অসি ভারতকী এয়রোস্পেস ইন্দস্ত্রীগীদমক্তা অখন্নবা নুমিৎ অমনি হায়না ফোংদোকখি। “C-295 প্রোজেক্ত অসি ভারতকী প্রাইবেৎ ইন্দস্ত্রীগীদমক অচৌবা মায়পাকপা অমনি মরমদি মসি প্রাইবেৎ কম্পনী অমনা ভারত্তা মপুং ফাবা মিলিতরী এয়রক্রাফ পুথোকপা অসিগুম্বা মখলগী অহানবা প্রোজেক্তনি। প্রোজেক্ত অসিনা ভারতকী চাউখৎলক্লিবা এয়রোস্পেস ইকোসিস্তেমদা অচৌবা ইনোৎ অমা পীরগনি," হায়না মহাক্না ইখি।

বেকগ্রাউন্দ

সেপ্তেম্বর 2021দা ঙাকশেল মন্ত্রালয়না স্পেনগী এয়রবস দিফেন্স এন্দ স্পেস SAগা লোয়ননা লুপা করোর 21,935গী কন্ত্রেক্ত অমা খুৎয়েক পীনখি, স্পেন্না  এয়রক্রাফ 56 সপ্লাই তৌগনি মসিগী মনুংদা 16দি স্পেনদগী ফ্লাই অৱে কন্দিসনদা পুরক্কনি অমসুং 40না TASLনা ভারত্তা শাগনি।

দেলিভরী

এয়রক্রাফ 16 অসিগী মনুংদা তরুক অসি ভদোদরাদা লৈবা 11 স্ক্বার্নদা IAFদা ইন্দক্ত তৌখ্রে। অরোইবা অসি ওগস্ত 2025 ফাওবদা পীগনি। অহানবা মেদ-ইন-ইন্দিয়া C-295 অসি সেপ্তেম্বর 2026 ফাওবদা অমসুং লেমহৌরিবা অসি ওগস্ত 2031 ফাওবদা ভদোদরাদা ফাইনেল এসেমব্লী লাইন ফেসিলিতীদগী রোল আউৎ তৌগনি হায়না পানরি। এয়রক্রাফ অসিগা লোয়ননা, ফুল মিসন সিমুলেতর অমা IAFকী আগ্রা স্তেসনদা ইনস্তোল তৌখ্রে।

 

FAL ফেসিলিতী

TASLনা ভারত্তা এয়রক্রাফ 40 পুথোকপগী থৌদাং লৌরি। মসিগী ফেসিলিতী অসিনা লৈবাক অসিদা লানগী এয়রক্রাফকীদমক প্রাইবেৎ সেক্তরগী ফাইনেল এসেমব্লী লাইন (FAL) অহানবা ওইরে। মসিদা এয়রক্রাফকী মপুংফাবা লাইফ সাইকলগী মেনুফেকচরিংদগী এসেমব্লী, তেস্তিং অমসুং ক্বালিফিকেসন, দেলিভরী অমসুং মেনতেন্সন ফাওবা মপুংফাবা ইকোসিস্তেম অমা মপুং ফানা দিবেলপ তৌবা য়াওগনি।

মসিগী ফেসিলিতী অসি চহি অনিগী মনুংদা শাখ্রে। প্রধান মন্ত্রীনা 2022গী ওক্তোবরদা ভদোদরাদা C-295 এয়রক্রা মেনুফেকচরিং ফেসিলিতীগী উরেপ উয়ুং তমখ্রে। প্রি-FAL পুথোকপা অসি 2024গী দিসেম্বরদগী হৌরগনি অমসুং FAL এসেমব্লী অসি 2025গী ওক্তোবরদগী হৌরগনি।

 

 

‘মেক ইন ইন্দিয়া’

ভারত্তা পুথোক্কদৌরিবা এয়রক্রাফ 40 অসিগী ওইনা, C-295 কম্পোনেন্তশিং, সব-এসেমব্লীশিং অমসুং এরো স্ত্রকচরগী মরুওইবা কম্পোনেন্ত এসেমব্লীশিং ভারত্তা পুথোক্নবা থৌরাং তৌরি। এয়রক্রাফ অমদা শীজিন্নরিবা অকুপ্পা পার্ত 14,000গী মনুংদা 13,000দি ভারত্তা রো মেতরিএলশিংদগী শেম্বা ওইগনি। এয়রবসনা পুন্না কম্পনী 37 মশক খঙদোকখ্রে, মসিগী মনুংদা 33দি MSMEশিংনি।

অহানবা এয়রক্রাফ 16দা ইন্দিয়ন কন্তেন্ত অসি 48% ওইগনি অমসুং ভারত্তা শাগদবা এয়রক্রাফ 24 মসি 75%দা হেনগৎলগনি। এয়রক্রাফ 56 খুদিংমক ভারত ইলেক্ত্রোনিক্স লিমিতেদ অমসুং ভারত দাইনামিক্স লিমিতেদনা লৈবাক অসিদা পুথোকপা ইলেক্ত্রোনিক ৱারফেয়র স্যুইৎ য়াওগনি।

থবক পীবা

এয়রবসনা স্পেনদা এয়রক্রাফ অমা শাবদা শীজিন্নরিবা মীওইশিংগী মশিং অদু তপ্না তপ্না ভারত্তা ত্রান্সফর তৌরগনি। অহানবদা, মসিনা অহানবা এয়রক্রাফ মঙাগী ওইনা 78% ওইগনি, মসি লেমহৌরিবা এয়রক্রাফ 35গী ওইনা 96%দা হেনগৎলগনি।

প্রোজেক্ত অসিনা এয়রোস্পেস অমসুং দিফেন্স সেক্তরদা থবক 42.5 লাখ মেন-আৱর হেন্না তৌদুনা অৱাংবা স্কিল লৈবা মীওই 600দা হকথেংননা থবক পীবা, থবক পীদবা মীওই 3000 অমসুং মেদিয়ম স্কিল লৈবা মীওই 3000গী থবক পীবগী খুদোংচাবা পীগনি হায়না পানরি।

C-295গী মরু ওইবা

C-295 অসি এয়রলিফ ওপরেসনগীদমক শীজিন্নরিবা অনৌবা জেনরেসনগী ত্রান্সপোর্ত এয়রক্রাফনি। মসিদা মোদর্ন তেক্নোলোজী অমসুং এভিওনিক্স য়াওই অমসুং মসি 9.5 তনগী পেলোদ অমগা লোয়ননা মসিগী ক্লাস অসিদা খ্বাইদগী ফবা হৌজিক্কী মখল অমনি। এয়রক্রাফ অসি HS 748 এভ্রোগী মহুৎ শিনবা IAF দা হাপচিল্লগনি।

C-295 প্রোজেক্ত অসি ভারতকী প্রাইবেৎ ইন্দস্ত্রীগীদমক অচৌবা মায়পাকপা অমনি মরমদি মসি ভারতকী প্রাইবেৎ কম্পনী অমনা মপুং ফাবা মিলিতরী এয়রক্রাফ পুথোকপা অসিগুম্বা মখলগী অহানবা প্রোজেক্তনি। মসিনা লৈবাক অসিগী এরোস্পেস ইকোসিস্তেমদা খুমাং চাউশিলহল্লগনি।

 

একজিবিসন

প্রধান মন্ত্রী শ্রী নরেন্দ্র মোদী অমসুং মহাক্কী স্পেনিশকা কাউন্তরপার্ত শ্রী পেদ্রো সাঞ্চেজসু থৌরম অদুদা উৎখিবা একজিবিসন অদুদা চৎতুনা য়েংখি। DRDOনা মেরিতাইম সর্ভিলেন্স সিস্তেমশিংগী খ্বাইদগী নৌবা রেঞ্জ, হায়বদি ইন্দিয়ন কোস্ত গার্দকীদমক মল্তি-মিসন মেরিতাইম এয়রক্রাফ (MMMA) অমসুং ইন্দিয়ন নেভীগীদমক মেদিয়ম রেঞ্জ মেরিতাইম রিকনাইসেন্স (MRMR) এয়রক্রাফ্ত অসি থৌরম অসিগী শরুক অমা ওইনা শীনখিবা একজিবিসন অসিদা উৎলি। MMMA অমসুং MRMR অসি সেন্তর ফোর এয়রবোর্ন সিস্তেমস (CABS), DRDOনা তোঙান তোঙানবা DRDO লেবশিংদগী স্তেত-ওফ-দি-আর্ত এদভান্স সেন্সরশিং অমসুং কম্ম্যুনিকেসন স্যুতশিংগা লোয়ননা দিজাইন তৌরবা অমসুং শেমগৎখিবা অখন্নবা মিসনগী এয়রক্রাফশিংনি।

MMMA অমসুং MRMR অসি মোদিফাই তৌরবা C-295 দা য়ুম্ফম ওইরি অমসুং CABS, DRDOনা মিসন এয়রক্রাফ অমসুং মিসন সিস্তেমশিংগী দিজাইন অমসুং দিবেলপমেন্তকী নোদেল এজেন্সী ওইনা, এয়রক্রাফ মোদিফিকেসন অমসুং সর্তিফিকেসনগীদমক এয়রবস দিফেন্স অমসুং স্পেস অমসুং ভারত্তা মোদিফাই তৌরবা এয়রক্রাফশিং শাবগীদমক TASLগী মরক্তা থ্রি-ৱে কোলাবোরেসন লৈরি। মসিনা IAFনা ওর্দর তৌখিবা এয়রক্রাফ 56গী মথক্তা অতোপ্পা C295 15বু ব্লু এয়রক্রাফ কনফিগরেসনদা পুথোক্কদবনি। অসিগুম্বা তেংবাং পীনবা অসিনা DRDOনা দিজাইন ইন ইন্দিয়া অমসুং ইন্দিয়ন ইন্দস্ত্রীনা মেক ইন ইন্দিয়াগী মশক থোকপা খুদম অমনি।

DRDOনা ভারত-স্পেন কোলাবোরেসন উৎলিবা IAFকী এয়রবোর্নে অর্লি ৱার্নিং এন্দ কন্ত্রোল (AEW&C.) MkIIসু উৎলি। CABS, DRDO অসি মিসন এয়রক্রাফ অসিগী দিজাইন অমসুং দিবেলপমেন্তকী নোদেল এজেন্সীনি অমসুং এয়রবসনা AEW&C MkIIgIdmk CABSনা প্রোজেক্ত তৌবা মথৌ তাবশিংদা য়ুম্ফম ওইরগা A321 প্লেৎফোর্ম শেমদোক্কনি। প্রোগ্রাম অহুম অসিগী মনুংদা ভারতকী R&D, একাদেমিক, এয়রৱার্থেন্স ওথোরিতীজ, সর্বিসেস অমসুং ভারতকী ইন্দস্ত্রীজনা শরুক য়াগনি।

 

(Release ID: 2068851) Visitor Counter : 58