রোদ ত্রান্সপোর্ত অমসুং হাইৱে মন্ত্রালয়
কেন্দ্র মন্ত্রী শ্রী নিতিন গারকরীনা রোদ সেফ্তী হেনগৎহন্নবা AI অমসুং এদভান্স তেক্নোলোজী শীজিন্ননবা ৱাফম থমখ্রে
শ্রী গারকরীনা রোদ সেফ্তী তেক্নোলোজীদা ইনোভেসন পুরক্নবা অমসুং স্তার্তঅপশিংগা খুৎশম্ননা চৎমিন্ননবা ৱাফম থমখি
Posted On:
24 OCT 2024 2:52PM by PIB Imphal
রোদ ত্রান্সপোর্ত অমসুং হায়ৱেজকী কেন্দ্র মন্ত্রী, শ্রী নিতিন গারকরীনা ঙসি নই দিল্লীদা ত্রাফিক ইনফ্রাতেক এক্সপোগী ১২শুবা ইদিসন্দা ৱা ঙাংলদুনা, রোদ সেফ্তী হেনগৎহনবগী মরুওইবা অমসুং ত্রান্সপোর্তেসন সেক্তরদা এদভান্স তেক্নোলোজীশিং শীজিন্ননবা ৱাফম ফোঙদোকখ্রে।
মহাক্কী ৱারোলদা, শ্রী গারকরীনা ভারত্তা লম্বীগী এক্সিদেন্তকী পাখৎনিংঙাই ওইরবা মশিংগী মতাঙদা পল্লদুনা, লৈবাক অসিদা চহিদা এক্সিদেন্ত লাখ ৫ রোম থোক্তুনা মীওই কয়াগী পুন্সি মাঙলি হায়খি। শীরিবা মীওইশিংসিগী তঙ্খায় হেন্বদি চহি ১৮-৩৬কী কাঙলুপ্তা লৈবা মীওইশিংনি হায়না মহাক্না ফোঙদোকখি। লম্বীগী এক্সিদেন্তনা মরম ওইরগা মাঙলিবা শেন্মিৎলোন অসি লৈবাকসিগী GDP ৩% ওইগনি হায়না পানৈ হায়না মহাক্না হায়খি। রোদ সেফ্তীগী চাং হেনগৎহনবনা লৈঙাক অসিগী তোপ প্রাইওরিতীনি অমসুং হায়রিবা ৱাফম অসিগী মতাঙদা থৌরাং কয়া পায়খৎপা হৌখ্রে হায়না মহাক্না ফোঙদোকখি।
মন্ত্রীনা রোদ ইঞ্জিনিয়রিংদা ফীভম ফগৎহনবগী মথৌ তাবা পল্লদুনা, মালেমগী খ্বায়দগী নৌবা তেক্নোলোজীশিং শীজিন্ননবা ৱাফম থমখি। হীরম অসিদা অনৌবা ৱাখল্লোনশিং ভারতকী স্তার্তঅপশিং অমসুং নহা ওইরিবা ইঞ্জিনিয়রশিংগা খুৎশম্ননা চৎমিন্ননিংবগী অপাম্বা মহাক্না ফোঙদোকখি। রোদ সেফ্তী হায়বসি এদভান্স ইঞ্জিনিয়রিং সোলুসন্স, লো এনফোর্স তৌবা, অমসুং আর্তিফিসিএল ইন্তলিজেন্সনচিংবা কত্তিং এদ্জ তেক্নোলোজীশিং শীজিন্নবা য়াওদনা পুরকপা ঙম্লোই হায়বা ৱাফমসু শ্রী গারকরীনা ফোঙদোকখি।
শ্রী গারকরীনা লো এনফোর্স তৌবগী মতাঙদা তেক্নোলোজী শীজিন্নবগী অনৌবা মল্বীগী মতাঙদসু ৱা ঙাংখি। AI অমসুং অতৈ ইনোভেতিব ওইবা থৌওংশিং শীজিন্নদুনা ত্রাফিক্কী কাঙলোন থুগাইবা খঙদোক্নবা হোৎনদুনা ওথোরিতীদা চৈরাক চুম্না পীবা ঙমহল্লিবা থৌরাংশিংগী মতাঙদা মহাক্না পনখি। সেতলাইত তোল সিস্তেম শীজিন্নবা য়াওনা তোল খোমগৎপগী থৌওং অপগ্রেদ তৌদুনা তোল খোমগৎপদা মতিং লৈবা অমসুং ত্রান্সপেরেন্সী লৈবা থৌওং পুরক্নবা থৌরাংগী মতাঙদসু মহাক্না চাউরাক্না পাউদমখি।
রোদ সেফ্তী ফগৎহন্নবা মন্ত্রালয়না চঙশিল্লবা লম্বীশিংগী মতাঙদা পল্লদুনা, শ্রী গারকরীনা তেক্নোলোজীগী ওইবা পাম্বৈ পুথোক্নবগীদমক প্রাইভেত সেক্তরদগী এক্সপার্তশিং হাপ্তুনা খুৎশম্ননা চৎমিন্ননবা লৈঙাক্না ফিরেপ লৌরে হায়খি। খ্বায়দগী ফবা ৱাখল্লোনশিং পায়খৎনবগীদমক স্তার্তঅপ অমসুং ইন্দস্ত্রী লুচিংবশিংদগী লাক্লিবা প্রপোজেলশিং অখন্নবা এক্সপর্ত কম্মিতী অমনা ইভালুএত তৌগনি। সেক্তর অসিদা থুনা ফীভম ফগৎহন্নবগীদমক কম্মিতী অসিদা মখোয়গী ইভালুএসন থা অহুমগী মনুংদা লোইশিন্নবা ৱাফম থমখ্রে।
তেক্নোলোজীগী লমদা, মরুওইনা কেমেরাগুম্বা সর্ভিলেন্স তেক্নোলোজীগী লমদা হায়-ক্বালিতী স্তেন্দর্দ থম্নবা লৈঙাক্না খোঙফম চেৎন লেপ্লি হায়না মন্ত্রীনা ফোঙদোকখি। পাম্বৈশিং অদু কম্পেনী অচৌবা নৎত্রগা মচাদগী লাকপা ওইরবসু ক্বালিতী অমসুং স্তেন্দর্দতা কৈদৌঙৈদসু য়াশিন্নবা পুরক্লোই হায়না মহাক্না থাজবা পীখি। অৱাবা তাহন্দনা শেন্দোং লৈনা মমল হন্থবা পোৎলমশিং পুথোকপগী মরুওইবা ৱাফম থম্লদুনা, শ্রী গারকরীনা ইনোভেতিব তেক্নোলোজীশিং লৈবা অপিকপা ফর্মশিংদা লৈঙাক্কী তেন্দরশিংদা শরুক য়ানবা পুক্নিং থৌগৎখি।
মহাক্কী ৱারোল লোইশিল্লকপদা, শ্রী গারকরীনা পুনশিল্লবা পাম্বৈশিং পুথোক্নবগীদমক রোদ অমসুং ত্রান্সপোর্ত সেক্তরশিংগী মরক্তা খুৎশম্ননা চৎমিন্নবগী মরুওইবা ৱাফম থমখি। খ্বায়দগী ফবা তেক্নোলোজীশিং শীজিন্নদুনা, ভারতনা ত্রান্সপেরেন্সী ফংবা ঙমগনি, শেঞ্জং হন্থহনবা ঙমগনি, অমসুং রোদ সেফ্তী মশক থোক্না ফগৎহন্বা ঙমগনি হায়না মহাক্না থাজবা ফোঙদোকখি। শ্রী গারকরীনা শরুক য়ারিবশিংগী মফমদা ভারতকী ইন্দস্ত্রীবু মালেমগী থাক্তা পুরক্নবা মখোয়না রীছর্চ অমসুং দিভেলপমেন্ততা হোৎনরিবশিংগীদমক থাগৎপা ফোঙদোকখি অমসুং মখোয়না লৈবাক্কীদমক লৌরিবা থৌদাংদা চাউথোকচবা ফোঙদোকখি।
কেন্দ্র মন্ত্রী শ্রী নিতিন গারকরীনা লৈঙাক, প্রাইভেত সেক্তর, অমসুং স্তার্তঅপ্নচিংবা স্তেকহোল্দর পুম্নমক্তা ভারতকী রোদ সেফ্তীগী মরুওইবা ৱাফমগী পাম্বৈ পুরক্নবা পুনশিন্ননবা ৱাফম থমখি।
*****
(Release ID: 2067687)
Visitor Counter : 30