نوجوانوں کے امور ، کھیلوں اور محنت و روزگار کے مرکزی وزیر،  ڈاکٹر منسکھ منڈاویہ نے آج نئی دہلی میں ڈرافٹ نیشنل اسپورٹس گورننس بل 2024 پر تبادلہ خیال کرنے کے لیے اسٹیک ہولڈرز مشاورتی میٹنگ کی صدارت کی۔ یہ مشاورت ایک سلسلہ وار ملاقاتوں کا حصہ ہے جو مختلف اسٹیک ہولڈرز کے ساتھ ڈرافٹ بل پر ان پٹ جمع کرنے کے لیے کی جا رہی ہیں، جس کا مقصد بھارت میں کھیلوں کے لیے ایک مضبوط گورننس فریم ورک تشکیل دینا ہے۔

اپنے خطاب میں، ڈاکٹر منڈاویہ نے اس بات پر زور دیا کہ ڈرافٹ نیشنل اسپورٹس گورننس بل 2024 کا مقصد اسپورٹس پرسنز کی ترقی اور فلاح و بہبود کو فروغ دینا، اخلاقی گورننس کو یقینی بنانا اور مؤثر تنازعات کے حل کے طریقہ کار فراہم کرنا ہے۔ انہوں نے مزید کہا کہ ‘‘بل کو ایک جامع انداز سے تیار کیا گیا ہے، جس میں ایتھلیٹس، کوچز اور دیگر اسٹیک ہولڈرز کی متنوع ضروریات کو مدنظر رکھا گیا ہے۔’’

ڈاکٹر منڈاویہ نے شرکاء کو اپنی تجاویز اور آراء پیش کرنے کی دعوت دی اور کہا، ‘‘آپ کو یہاں اس بل کو مزید مؤثر بنانے کے لیے آپ کی قیمتی تجاویز کے لیے بلایا گیا ہے تاکہ ایتھلیٹس، کوچز اور دیگر اسٹیک ہولڈرز حقیقی معنوں میں اس سے فائدہ اٹھا سکیں۔’’  انہوں نے ایتھلیٹس کی تربیت میں کوچز کے اہم کردار کو تسلیم کرتے ہوئے کہا، ‘‘مجھے یقین ہے کہ جتنا زیادہ ہم اپنے کوچز کو بااختیار بنائیں گے، وہ قوم کے لیے بہترین ایتھلیٹس پیدا کرنے کے قابل ہوں گے۔’’

مرکزی وزیر نے بھارت کے نوجوانوں کی صلاحیت پر بھی زور دیا اور ان کی صلاحیتوں کو صحیح سمت میں استعمال کرنے کی اہمیت کو اجاگر کیا۔ انہوں نے کہا، ‘‘ہمارے ملک میں نوجوانوں، صلاحیتوں اور ذہانت کی کمی نہیں ہے۔ ہمارا مقصد انہیں اچھی گورننس کے جذبے کے ساتھ صحیح سمت فراہم کرنا ہے۔’’

میٹنگ کے دوران، ایتھلیٹس اور کوچز نے ڈرافٹ بل پر تبادلہ خیال کے موقع کو سراہا۔ انہوں نے اپنی تجاویز پیش کیں اور اس اقدام کو بھارتی کھیلوں میں شمولیت پسند اور ایتھلیٹس پر مبنی گورننس کی طرف ایک مثبت قدم قرار دیا۔

اس ایونٹ میں ارجنا ایوارڈ یافتگان، کھیل رتنا ایوارڈ یافتگان، اولمپیئنز، پیرالمپیئنز، اور دروناچاریہ ایوارڈ یافتہ کوچز سمیت مختلف معروف ایتھلیٹس نے شرکت کی۔ تقریباً 40 اسپورٹس پرسنز اور کوچز نے میٹنگ میں ذاتی طور پر شرکت کی، جبکہ تقریباً 120 افراد نے ورچوئلی شمولیت اختیار کی۔ نمایاں سابق اور موجودہ ایتھلیٹس اور کوچز جیسے رانجن سودھی، منشر سنگھ، نیرج چوپڑا، گربخش سنگھ، اشوک کمار دھیان چند، بھوانی دیوی، نکہت زرین، انکر دھاما، مہا سنگھ راؤ، ڈاکٹر ستیہ پال سنگھ وغیرہ نے ڈرافٹ بل پر اپنی رائے اور تجاویز پیش کیں۔

وزارتِ نوجوانان و کھیل نے ڈرافٹ نیشنل اسپورٹس گورننس بل 2024 کو عوامی تبصروں/تجاویز کے لیے عوامی ڈومین میں رکھا ہے، جو کہ قبل از قانون سازی مشاورتی عمل کا حصہ ہے۔ اسٹیک ہولڈرز اور عوام الناس سے درخواست کی گئی ہے کہ وہ 25.10.2024 تک ترجیحی طور پر ای میل کے ذریعے اپنی تجاویز/تبصرے وزارت کو بھیجیں۔

ڈرافٹ نیشنل اسپورٹس گورننس بل 2024 کو یہاں سے حاصل کیا جا سکتا ہے: 

https://yas.nic.in/sports/draft-national-sports-governance-bill-2024-inviting-comments-suggestions-general-public-and.

******

ش ح۔ اس ک

U No.1635