முந்தைய பயிர் பருவங்களில் பயிர் செயல்திறனை ஆய்வு செய்யவும், ரபி பருவத்தில் பயிர் வாரியான இலக்குகளை நிர்ணயிப்பதற்கும், மத்திய வேளாண் அமைச்சர் திரு சிவராஜ் சிங் சவுகான் புதுதில்லியில்  ரபி பிரச்சாரம் 2024- க்கான விவசாயம் குறித்த தேசிய மாநாட்டைத் தொடங்கி வைத்தார். அத்தியாவசிய வேளாண் உள்ளீடுகளை சீராக வழங்குவதை உறுதி செய்வதற்காக புதுமையான வேளாண் நடைமுறைகள் மற்றும் டிஜிட்டல் முயற்சிகள் குறித்து அனைத்து பங்குதாரர்களிடையேயும் விவாதங்களை ஊக்குவிப்பதை இந்த மாநாடு நோக்கமாகக் கொண்டது அதிநவீன தொழில்நுட்பங்களை பின்பற்றி அதன் மூலம் பயிர் உற்பத்தி மற்றும் உற்பத்தித்திறனை அதிகரிக்க ஆதரவு அளிக்கிறது.

 மாநாட்டில் உரையாற்றிய திரு சிவராஜ் சிங் சவுகான், "உற்பத்தித் திறனை அதிகரிக்கவும், ரசாயன உரங்களைச் சார்ந்திருப்பதைக் குறைக்கவும் இயற்கை மற்றும் இயற்கை விவசாயத்தை நோக்கி நாம் நகர வேண்டும். உற்பத்திச் செலவைக் குறைத்து, விவசாயிகளுக்கு நியாயமான விலையை வழங்கி, ஒரு ஹெக்டேருக்கு மகசூலை அதிகரிப்பதே இதன் நோக்கம்" என்றார். கொள்முதல் விலைக்கும், விற்பனை விலைக்கும் உள்ள இடைவெளியைக் குறைக்க போக்குவரத்து செலவைக் குறைக்க குழு ஒன்று அமைக்கப்பட்டுள்ளது. இந்தியாவை உலகின் மிகப்பெரிய உணவுக் களஞ்சியமாக மாற்ற, வேளாண் பருவநிலை நிலைமைகளின் அடிப்படையில் உற்பத்தியை அதிகரிக்க மாநிலங்கள் மத்திய அரசுடன் இணைந்து பணியாற்ற வேண்டியது அவசியம். 2024-25 ஆம் ஆண்டில் உணவு தானிய உற்பத்தியின் தேசிய இலக்கு 341.55 மில்லியன் டன்களாக இருக்கும். அமைச்சர்கள் மற்றும் மாநில பிரதிநிதிகள் அளிக்கும் ஒவ்வொரு ஆலோசனையின் மீதும் மத்திய அரசு ஒத்துழைப்புடன் செயல்படும் என்று அவர் உறுதியளித்தார்.

மாநாட்டில், மத்திய வேளாண் இணையமைச்சர் திரு ராம்நாத் தாக்கூர், வெள்ளம் மற்றும் புயலால் பயிர் சேதத்தால் பாதிக்கப்பட்ட விவசாயிகளுக்கு உதவ மாநில அரசுகள் உடனடியாக நடவடிக்கை எடுக்க வேண்டும் என்று கேட்டுக் கொண்டார். சந்தையில் விநியோகிக்கப்படும் வேளாண் இடுபொருட்களின் தரத்தை மூத்த அதிகாரிகள் மற்றும் ஆராய்ச்சியாளர்கள் மதிப்பீடு செய்ய வேண்டும் என வலியுறுத்தினார்.

பருப்பு வகைகள் மற்றும் எண்ணெய் வித்துக்கள் உற்பத்தியில் நாட்டை தற்சார்புடையதாக மாற்ற தொடர்ந்து பணியாற்றி வரும் ஆராய்ச்சி அமைப்புகளுக்கு மத்திய வேளாண் துறை இணையமைச்சர் திரு. பகீரத் சவுத்ரி தனது நன்றியைத் தெரிவித்தார்.

விவாதங்களின் போது, நாட்டில் அதிகரித்து வரும் சமையல் எண்ணெயின் தேவையை பூர்த்தி செய்யவும், தன்னம்பிக்கை பெறவும், எண்ணெய் வித்துக்களின் உற்பத்தியை 2022-23 ஆம் ஆண்டில் 39.2 மில்லியன் மெட்ரிக் டன்னிலிருந்து 2030-31 ஆம் ஆண்டில் 69.7 மில்லியன் மெட்ரிக் டன்னாக உயர்த்தவும், சாகுபடி பரப்பை தற்போதுள்ள 29  மில்லியன் ஹெக்டேரிலிருந்து 33 மில்லியன் ஹெக்டேராக அதிகரிக்கவும், 2030-31 க்குள் 1353 கிலோ/எக்டரிலிருந்து 2112 கிலோ/எக்டராக மகசூலை மேம்படுத்தவும் அரசு நோக்கமாகக் கொண்டுள்ளது. குறுகிய கால, அதிக மகசூல் தரும் விதை வகைகள் குறித்து ஆராய்ச்சி நடத்துவதன் முக்கியத்துவத்தையும், பருப்பு வகைகள் மற்றும் எண்ணெய் வித்துக்களின் சாகுபடிக்கு விரிவான இயந்திரமயமாக்கலை செயல்படுத்துவதன் முக்கியத்துவத்தையும் குழு உறுப்பினர்கள் வலியுறுத்தினர்.

வேளாண் இடுபொருட்களின் தரத்தை உறுதி செய்வதற்கான அமைச்சகத்தின் சமீபத்திய வேளாண் தொழில்நுட்ப முன்முயற்சிகள் மற்றும் செயல்திறன் மிக்க பூச்சி மேலாண்மை உத்திகள் ஆகியவை இந்த மாநாட்டில்  காட்சிப்படுத்தப்பட்டன. பூச்சி மற்றும் நோய் தொற்றுநோய்களை முன்னறிவிப்பு, திட்டமிடல் மற்றும் நிர்வகிப்பதற்கான நாடு தழுவிய பார்வையை வழங்குகிறது. விவசாய விளைச்சலைப் பாதுகாப்பதிலும் நிலையான விவசாய நடைமுறைகளை ஊக்குவிப்பதிலும் முக்கிய பங்கு வகிக்கிறது.

டிஜிட்டல் வேளாண்மை குறித்த அமர்வில், சமீபத்தில் ஒப்புதல் அளிக்கப்பட்ட டிஜிட்டல் வேளாண் இயக்கம், வேளாண்மைக்கான பல்வேறு டிஜிட்டல் பொது உள்கட்டமைப்பு (டிபிஐ) முன்முயற்சிகளை ஆதரிப்பதற்கான ஒரு குடை திட்டம் மற்றும் மூலதன முதலீட்டிற்காக மாநிலங்களுக்கு சிறப்பு மைய உதவி ஆகியவை குறித்து குழு உறுப்பினர்கள் விவாதித்தனர். அக்ரிஸ்டாக் மூலம் ஒருங்கிணைந்த பதிவேடுகளைப் பயன்படுத்தி விவசாயிகளை மையமாகக் கொண்ட தீர்வுகளை செயல்படுத்தும் ஒருங்கிணைந்த டிபிஐ சுற்றுச்சூழல் அமைப்பை செயல்படுத்துவதிலும், கிருஷி ஆதரவு அமைப்பு மூலம் பல்வேறு ஆலோசனைகளை வழங்குவதிலும் இந்த இயக்கம் கவனம் செலுத்துகிறது.

மாநாட்டில் பல்வேறு அமர்வுகளில்,   வேளாண்மையைப் பொறுத்தவரை, முழுமையான அணுகுமுறையைக் கடைப்பிடிக்க வேண்டும், எண்ணெய் வித்துக்கள் மற்றும் பயறு வகைகளுக்கு  இயந்திரமயமாக்கல்  தேவை, நல்ல தரமான விதைகள் தேவை, தனியார் துறையை ஆராய்ச்சி செய்ய ஊக்குவிக்க வேண்டும் என  நிபுணர்கள் பதிலளித்தனர்.

மாநாட்டில் உரையாற்றிய வேளாண் செயலர் டாக்டர் தேவேஷ் சதுர்வேதி, அனைத்து விவசாயிகளுக்கும்2025 மார்ச் 31-க்குள் முகாம் முறையில் விவசாயிகள் பதிவேடு முடிக்கப்படுவதை உறுதி செய்யுமாறு மாநிலங்களுக்கு அறிவுறுத்தினார். எண்ணெய் வித்துக்கள் மற்றும் பருப்பு வகைகளின் உற்பத்தியை அதிகரிக்க வேண்டியதன் அவசியத்தையும் அவர் எடுத்துரைத்தார்.

இதைத் தொடர்ந்து, அமைச்சர்கள் மற்றும் மூத்த அதிகாரிகளுடன் கலந்துரையாடல் கூட்டம் நடைபெற்று, தங்கள் மாநிலங்களில் பரப்பளவு, விளைச்சல், உற்பத்தி மற்றும் உற்பத்தித் திறனை அதிகரிப்பது தொடர்பான பிரச்சினைகளை எழுப்பினர். மாநிலங்களைச் சேர்ந்த வேளாண் அமைச்சர்கள் விவசாயிகள் தொடர்பான தங்கள் பிரச்சினைகளை எடுத்துரைத்து, தீர்வு காண மத்திய அரசை கேட்டுக்கொண்டனர். விவசாயம் மற்றும் விவசாயிகளின் முன்னேற்றத்திற்காக அவர்கள் சில ஆலோசனைகளையும் வழங்கினர்.

இந்த மாநாட்டில் பல்வேறு அமைச்சகங்கள், மாநில அரசுகள் / யூனியன் பிரதேசங்களின் பிரதிநிதிகள் மற்றும் பிற அமைப்புகளின் பிரதிநிதிகள் பங்கேற்றனர். கலந்துரையாடல் அமர்வுகள் மூலம், மாநாடு ஒரு விரிவான உரையாடலுக்கு வழிவகுத்தது, இது வரவிருக்கும் ரபி பருவத்திற்கான செயல்பாட்டு உத்திகளுக்கு வழிவகுக்கும்.

*****

PKV/ KV