গ্রীন সিপ্পিং অমসুং ইনর্জী ত্রাঞ্জিসনগী লমদা লৈরিবা ভারতকী শিংথানিংঙাই ওইরবা খোঙজেল পল্লদুনা, নিউ অমসুং রিনিউএবল ইনর্জীগী কেন্দ্র মন্ত্রী, শ্রী প্রহ্লাদ জোসিনা ওক্তোবর ৭, ২০২৪দা জর্মনীদা পাঙথোকপা হেমবর্গ সস্তেনেবিলিতী কন্ফরেন্সতা ৱাহৌদোক্কী ৱারোল থমখ্রে‍। ঐখোয়গী চাওখৎপগী পান্দম অমসুং অকোয়বগী ফীভমদা লৈরিবা থৌদাংগা চুননা চৎলিবা সস্তেনেবল ওইবা ইনর্জীগী তুংলমচৎ অমা তান্নবদা লেপ্লিবা খোঙফমদা ভারতনা মালেমগী মরম চাবা খোঞ্জেল অমা ওইনা লেপ্লি হায়া মন্ত্রীনা ফোঙদোকখি‍।

কন্ফরেন্স অদুদা ৱা ঙাংলদুনা, কেন্দ্র মন্ত্রীনা ভারতকী ইনর্জী ত্রাঞ্জিসনগী মতাঙদা ফোঙদোকখি অমসুং ভারতনা রিনুউএবল ইনর্জীরোমদা ওনশিল্লকলপদা মশক থোকপা পন্দোল লোম্বা ঙম্লে হায়খি‍। “G20 লৈবাকশিংগী মরক্তা খ্বায়দগী নেম্বা পর কেপিতা ইমিসন লৈজরগসু, ভারতনা থাখিবা মতমগী মাঙওইননা ক্লাইমেত তার্গেৎশিং ফংবা ঙম্বা অমত্তা ঙায়রবা G20 লৈবাক ওইরি,” হায়না মহাক্না ফোঙদোকখি‍। ইনর্জী সিক্যুরিতী অমসুং একসেস ফংহনবদা ভারতনা মকোক থোংবা মীৎয়েঙ থম্লি, অদুবু মসিনা লৈবাক্কী অমসুং মালেমগী থাক্তা ইনর্জী ত্রাঞ্জিসন পুরক্নবা লৈবাকসিনা লেপ্লিবা খোঙফমদা কৈদৌঙৈদসু অপন্বা ওইদে হায়না মহাক্না ফোঙদোকখি‍।

মহাক্কী ৱারোলদা, কেন্দ্র মন্ত্রী জোসিনা, প্রধান মন্ত্রী নরেন্দ্র মোদীগী লমজিং মখাদা ভারতনা ২০১৪দগী হৌরগা ঙসি ফাওবদা, ভারতনা ৭৫ GW দগী ২০৮ GW ফাওবা ১৭৫% হেনগৎহন্দুনা লৈবাকসিগী রিনিউএবল ইনর্জী কেপাসিতী অওন্বা পুরক্কদবা মওংদা হেনগৎহনখি হায়না ফোঙদোকখি‍। অপুন্বা RE ১৯৩.৫ বিলিয়ন য়ুনিত্তগী ৩৬০ BU ফাওবা হেনগৎহন্দুনা হায়রিবা মতম অসিগী মনুংদা ৮৬% হেনগৎপা ঙমখি‍। হৌখিবা চহি ১০সিদা সোলার ইনর্জী কেপাসিতীসু শরুক ৩৩ হেনগৎলে‍। লৈবাক ১০০ হেন্বনা শৌগৎলিবা ইন্তরনেসস্নেল সোলার এলাইএন্সনা সোলার ইনর্জীগী খুত্থাঙদা অইং অশাগী খল হোংলকপা থেংননবা মালমে অসিনা হোৎনরিবা অসিদা ভারতকী লুচিংবগী মতিক ময়াই উৎলি হায়নসু শ্রী জোসিনা হায়খি‍।

মন্ত্রীনা ভারতকী নাৎকী লনগী মতাঙদসু পুক্নিং চিংশিল্লদুনা, সস্তেনেবিলিতীগী ৱাখল্লোন অসি ভারতকী চৎনবীদা মরা তাদুনা লাক্লবা ৱাফম অমনি হায়খি‍। মহাক্না রিগবেদদগী গায়ত্রী মন্ত্র থিরদুনা, মীওইবা খুন্নাই অমসুং মহৌশাগী মরক্তা অফবা মরী থম্নবগী ভারতকী অরিবা চৎনবীবু ফোঙদোকখি‍।

গ্রীন সিপ্পিংগী থৌশিলশিং:

গ্রীন সিপ্পিংগী থীমগী মতাঙদা ৱা ঙাংলদুনা, শ্রী জোসিনা মালেমগী ললোন ইতিক্তা মেরিতাইম সেক্তরনা লৌরিবা মরুওইবা শক্লোন অমসুং মসিনা গ্রীনহাউস গ্যাস থাদোকপদা পীরিবা ইথিলগী মরমদা ফোঙদোকখি‍। “ঐখোয়না নেত-জিরো ইমিসন ফংনবা মায়কৈদা চঙশিনবগা লোয়ননা, সস্তেনেবল ওইবা মেরিতাইম ত্রান্সপোর্তকী মথৌ তাবা হেন্না হেনগৎলক্লি‍। ভারতনা, লৈঙাক্কী থৌশিলশিং, তেক্নোলোজিগী খুমাঙ চাওশিন্বা, অমসুং মালেমগী খুৎশম্ননা চৎমিন্নবা মরীশিংদা থৌদুনা, গ্রীন সিপ্পিং সেক্তরগী লমদা মশক থোক্না খোঙ লাওনা থাংজিল্লি,” হায়না মহাক্না হায়খি‍।

মন্ত্রীনা গ্রীন সিপবিল্দিং কেপাসিতী হেনগৎহন্নবগীদমক ভারতকী সিপয়ার্দশিং মতৌ করম্না মতমগা চুনবা ওইল্লিবা অমসুং অরিবা দোকয়ার্দশিং অমুক হন্না হাংদোক্নবা কমদৌনা ইভালুএত তৌরি হায়বগী মতাঙদা মচা খায়না থমখি‍। বাইওফ্যুল অমসুং ৱিন্দ পৱারনচিংবা অল্তরনেতিব ফ্যুল অমসুং রিনিউএবল ইনর্জী সোর্সশিংদা লৈঙাক্না অকন্বা মীৎয়েঙ চঙলি হায়রদুনা, “ভারতনা গ্রীন সিপবিল্দিংগী থাজনিংঙাই ওইবা মফম অমা ওইরক্লি” হায়না মহাক্না হায়খি‍। ভারতনা ২০৪৭ ফাওবদা মকোক থোংবা সহাজ শাবা লৈবাক মঙাগী মনুংদা চন্নবা পান্দমগা লোয়ননা গ্রীন সিপ্পিং ফ্যুল অমসুং ভেসেলশিং হায়ব্রিদ মোদেল শীজিন্নদুনা চৈঙাক পীননবা ভারতনা মাগী হিথাংফমগী ইনফ্রাস্ত্রকচরবু অপগ্রেদ তৌরি‍।

$২.৪ বিলিয়নগী শেনফমগা লোয়ননা হৌদোকখিবা নেস্নেল গ্রীন হায়দ্রোজেন মিসন (NGHM)না ২০৩০ ফাওবদা চহিদা গ্রীন হায়দ্রোজেন মিলিয়ন মেত্রিক তন (MMT) ৫ পুথোক্নবা পান্দম থমদুনা, $১০০ বিলিয়নগী ইনভেস্তমেন্ত চিংশিল্লি অমসুং থবক লাখ ৬ হেন্না পীরি‍। মহাক্না মালেমগী স্তেকহোল্দরশিংগী মফমদা ভারতকী মঙলান চাউবা গ্রীন হায়দ্রোজেন অমসুং রিনিউএবল ইনর্জী প্রোজেক্তশিংদা খুৎশম্ননা চৎমিন্ননবা ৱাফম থমখি‍।

NGHMগী মখাদা পায়খৎলিবা পাইলোত প্রোজেক্তনা, $১৪ মিলিয়নগী ইনভেস্তমেন্তকা লোয়ননা, সিপ্পিং সেক্তরদা গ্রীন হায়দ্রোজেন শীজিন্নবগী মওং মতৌশিং থিজিল্লি‍। “ঐখোয়না হান্নাদগী লৈরবা ভেসেলশিং গ্রীন হায়দ্রোজেন নৎত্রগা মসিদগী থোরকপা থাউ মখলশিংনা চলাইনবা ওন্থোকপদা মীৎয়েঙ থম্লি‍। সিপ্পিং কোর্পোরেসন ওফ ইন্দিয়ানা হৌজিক হৌজিক ভেসেল অনি মিথেনোলনা চেলহন্নবা ওন্থোক্লি,” হায়না মন্ত্রীনা শন্দোক্না পাউদমখি‍। ভারতনা চাউরাক্না $২৫ মিলিয়নগী ইনভেস্তমেন্তকা লোয়ননা ইনর্জী লেন্দস্কেপতা অওনবা পুরক্কদবা হায়দ্রোজেন হব শেমগৎনবা য়ুম্ফম থোল্লি‍। মসিগী মথক্তা, দীনদয়াল, পরাদিপ, অমসুং V.O. চিদমবরানরনচিংবা হিথাংফমশিং গ্রীন হায়দ্রোজেন্না চলাইবা জহাজশিং সপ্পোর্ত তৌনবা বঙ্করিং অমসুং রিফ্যুলিং ফেসিলিতীশিং থমদুনা মরুওইবা হায়দ্রোজেন হবশিং ওইনা শেমগৎলি‍।

“ভারতনা ইনোভেতিব ওইবা তেক্নোলোজী শীজিন্নদুনা, অচৌবা ইনফ্রাস্ত্রকচরদা শেল থাদদুনা, অমসুং মালেমগী ওইবা তেংবাংনবগী মরী শেমগৎ শাগত্তুনা ঐখোয়বু চুম্নগী শরুক য়াবা অমগী থাক্তগী গ্লোবেল ত্রাঞ্জিসন্দা মাঙজিল থাবা শাফু অমগী থাক্তা পুখৎলক্লে,” হায়বা ৱাফমগা লোয়ননা শ্রী প্রহ্লাদ জোসিনা মহাক্কী ৱারোল লোইশিনখি‍।

******