گرین شپنگ اور توانائی کی منتقلی میں ہندوستان کی نمایاں پیش رفت پر زور دیتے ہوئے، جدید اور قابل تجدید توانائی کے مرکزی وزیر جناب پرہلاد جوشی نے 7 اکتوبر 2024 کو جرمنی میں ہیمبرگ پائیداری کانفرنس میں کلیدی  خطبہ دیا۔ وزیرموصوف نے کہا کہ ہندوستان ایک پائیدار توانائی مستقبل کے حصول کے عزم میں ایک معقول عالمی آواز کے طور پر کھڑا ہے جو ہماری ترقی کے عزائم اور ماحولیاتی ذمہ داری سے ہم آہنگ ہے۔

کانفرنس سے خطاب کرتے ہوئے مرکزی وزیر نے ہندوستان کی توانائی کی منتقلی پر روشنی ڈالی اور نوٹ کیا کہ ہندوستان نے قابل تجدید توانائی کی طرف اپنی  پیش رفت میں اہم سنگ میل حاصل کیے ہیں۔ انہوں نے کہاکہ ’’بھارت واحد جی20 ملک ہے جس نے جی20 ممالک میں سب سے کم فی کس اخراج ہونے کے باوجود اپنے موسمیاتی اہداف کو مقررہ وقت سے پہلے پورا کر لیا ہے‘‘ ۔ انہوں نے اس بات پر زور دیا کہ توانائی کی حفاظت اور رسائی ہندوستان کے لیے سب سے اہم ہے، لیکن اس نے قومی اور عالمی سطح پر توانائی کی منتقلی کے لیے قوم کے عزم میں کبھی رکاوٹ نہیں ڈالی۔

اس خطاب میں، مرکزی وزیر جوشی نے نوٹ کیا کہ وزیر اعظم نریندر مودی کی قیادت میں، ہندوستان نے 2014 سے اپنی قابل تجدید توانائی کی صلاحیت میں زبردست اضافہ دیکھا ہے، جس میں 75 جی ڈبلیو  سے آج 208 جی ڈبلیو  تک 175فیصد کااضافہ ہوا ہے۔ کل آر ای  193.5 بلین یونٹس سے بڑھ کر 360 بلین یونٹس ہو گیا، جو کہ اس مدت کے دوران 86 فیصد اضافے کو ظاہر کرتا ہے۔ شمسی توانائی کی صلاحیت میں بھی پچھلے 10 سالوں میں 33 گنا اضافہ ہوا ہے۔ جناب جوشی نے اس بات پر بھی زور دیا کہ بین الاقوامی سولر الائنس، جسے 100 سے زیادہ ممالک کی حمایت حاصل ہے، شمسی توانائی کے ذریعے موسمیاتی تبدیلیوں سے نمٹنے کی عالمی کوششوں میں ہندوستان کے قائدانہ رول کو  ظاہر کرتا ہے۔

وزیرموصوف نے یہ نوٹ کرتے ہوئے کہ ہندوستان کے ثقافتی ورثے کی طرف بھی توجہ مبذول کرائی، پائیداری کے تصور کی جڑیں ہندوستانی روایت میں گہری ہیں، انہوں نے رگ وید سے گایتری منتر کا حوالہ دیا  جس میں انسان اور فطرت کے درمیان ہم آہنگی کے بارے میں ہندوستان کے قدیم عقیدے کو اجاگر کیا گیا۔

گرین شپنگ اقدامات:

گرین شپنگ کے موضوع پر خطاب کرتے ہوئے، جناب جوشی نے عالمی تجارت میں سمندری شعبے کے اہم کردار اور گرین ہاؤس گیسوں کے اخراج پر اس کے اثرات پر زور دیا۔ انہوں نے کہا،’’جبکہ ہم  نیٹ زیرو اخراج کے ہدف کو  حاصل کرنے کی طرف بڑھ رہے ہیں، پائیدار بحری نقل و حمل کی ضرورت بہت اہم ہو گئی ہے۔ حکومتی اقدامات، تکنیکی ترقی، اور بین الاقوامی تعاون کے ذریعہ ہندوستان گرین شپنگ سیکٹر میں اہم پیش رفت کر رہا ہے۔‘‘

وزیرموصوف نے تفصیل سے بتایا کہ کس طرح ہندوستانی شپ یارڈز کو جدید بنایا جا رہا ہے اور پرانے ڈاک یارڈز کو دوبارہ کھولنے کا جائزہ لیا جا رہا ہے تاکہ گرین شپ بلڈنگ کی صلاحیت کو بڑھایا جا سکے۔ انہوں نے متبادل ایندھن اور قابل تجدید توانائی کے ذرائع جیسے بائیو فیول اور ونڈ پاورکے تعلق سےحکومت کی مضبوط عہدبستگی کا حوالہ دیتے ہوئے کہاکہ ہندوستان سبز جہاز سازی کے لیے ایک امید افزا مرکز بنتا جا رہا ہے۔  ہندوستان 2047 تک بحری جہاز سازی کے چوٹی کے  پانچ ممالک میں مقام بنانے کے ہدف کے ساتھ ہائبرڈ ماڈلز کا استعمال کرتے ہوئے گرین شپنگ ایندھن اور جہازوں کی مدد کے لیے اپنے بندرگاہ کے بنیادی ڈھانچے کو اپ گریڈ کر رہا ہے۔

نیشنل گرین ہائیڈروجن مشن (این جی ایچ ایم)، جس کا آغاز 2.4 بلین ڈالرکی لاگت کے ساتھ کیا گیا ہے، کا مقصد 2030 تک سالانہ 5 ملین میٹرک ٹن (ایم ایم ٹی) گرین ہائیڈروجن پیدا کرنا ہے، جس میں 100بلین ڈالر سے زیادہ کی سرمایہ کاری کی جائے گی اور 6 لاکھ سے زیادہ ملازمتیں پیدا ہوں گی۔ انہوں نے بین الاقوامی حصص داروں کو ہندوستان کے پرجوش گرین ہائیڈروجن اور قابل تجدید توانائی کے منصوبوں میں تعاون کرنے کی دعوت بھی دی۔

این جی ایچ ایم کے تحت پائلٹ پروجیکٹس،14 ڈالر ملین کی سرمایہ کاری کے ساتھ، پہلے ہی جہاز رانی کے شعبے میں گرین ہائیڈروجن کے استعمال کے امکانات  تلاش کر رہے ہیں۔ وزیرموصوف نے وضاحت کی کہ’’ ہم موجودہ جہازوں کو گرین ہائیڈروجن یا اس کے مشتقات پر کام کرنے کے لیے تبدیل کرنے پر توجہ مرکوز کر رہے ہیں۔ شپنگ کارپوریشن آف انڈیا فی الحال دو جہازوں کو سبز میتھانول پر چلنے کے لیے تبدیل کر رہی ہے۔‘‘ تقریباً 25 ملین ڈالر کی سرمایہ کاری کے ساتھ ہندوستان، ہائیڈروجن مراکز کی ترقی کے لیے  پیش رفت  طے کر رہا ہے جو اس کے توانائی کے منظر نامے کو تبدیل کر دے گا۔ مزید یہ کہ بندرگاہیں جیسے دین دیال، پیرا دیپ، اور وی او  چدمبرانار کو ہائیڈروجن سے چلنے والے سبز بحری جہازوں کی مدد کے لیے بنکرنگ اور ایندھن بھرنے کی سہولیات کے ساتھ کلیدی ہائیڈروجن مرکز میں تبدیل کیا جا رہا ہے۔

جناب پرہلاد جوشی نے اپنے خطاب کا اختتام اس بات کی تصدیق کرتے ہوئے کیا کہ، ’’ہندوستان کی اختراعی ٹکنالوجی، مضبوط انفراسٹراکچر میں سرمایہ کاری اور بین الاقوامی تعاون کی آبیاری نے ہمیں اس عالمی منتقلی میں محض حصہ دار سے لے کر ایک اہم قوت کے طور پر بلند کیا ہے۔‘‘

*****

ش ح ۔م م   ۔  م  ص

 (U:986)