రైల్వే రక్షణ దళం (ఆర్పీఎఫ్) 40వ వ్యవస్థాపనా దినోత్సవ కవాతులో కేంద్ర రైల్వేలు, సమాచార ప్రసారాలు, ఎలక్ట్రానిక్స్, ఇన్ఫర్మేషన్ టెక్నాలజీ శాఖల మంత్రి శ్రీ అశ్వనీ వైష్ణవ్ ముఖ్య అతిథిగా పాల్గొన్నారు. నాసిక్‌లోని ఆర్పీఎఫ్ శిక్షణ కేంద్రంలో ఈ కవాతు జరిగింది. ఈ కార్యక్రమంలో 2023-24 సంవత్సరానికి గాను అత్యుత్తమ సేవలు అందించి ధైర్యసాహసాలతో ప్రయాణికుల ప్రాణాలను కాపాడి జీవన్ రక్షా మెడల్ అందుకున్న 33 మంది ఆర్పీఎఫ్ సిబ్బందిని కేంద్రమంత్రి సత్కరించారు. జాతీయ రైల్వే వ్యవస్థకు భద్రత కల్పించడంలో వారు చేసిన సేవలను ఈ పురస్కారాలు ప్రతిబింబిస్తాయి. అలాగే ఆర్పీఎఫ్ సహోద్యోగుల్లో స్ఫూర్తిని నింపి బాధ్యతలకు అంకితమయ్యేందుకు తోడ్పడతాయి.

భద్రతా ప్రమాణాలను పాటించేందుకు ఆధునిక టెక్నాలజీని విరివిగా ఉపయోగిస్తున్న రైల్వే ప్రొటెక్షన్ ఫోర్స్(ఆర్పీఎఫ్)ను మంత్రి మెచ్చుకున్నారు. ఆర్పీఎఫ్ సిబ్బందికి రక్షణ కల్పించే బుల్లెట్ ప్రూఫ్ జాకెట్లు, మెరుగైన హెల్మెట్లు సహా అధునాతన భద్రతా పరికరాలు అందించనున్నట్టు ఆయన తెలిపారు.  ఆర్పీఎఫ్ శిక్షణ కేంద్రాలను ఆధునికీకరించేందుకు రూ.35 కోట్ల నిధులు విడుదల చేస్తున్నట్టు మంత్రి ప్రకటించారు. వీటితో మహిళా సిబ్బందికి తగిన సౌకర్యాలు కల్పించేందుకు ప్రాధాన్యమిస్తారు. దీనికి అదనంగా తమిళనాడులోని ఆర్పీఎఫ్ డాగ్ స్క్వాడ్ జోనల్ శిక్షణ కేంద్రానికి మరో రూ.5.5 కోట్లు కేటాయించారు. ప్రత్యేక శిక్షణ వసతులను మెరుగుపరిచేందుకు ఈ నిధులు వినియోగిస్తారు.

క్రమశిక్షణ, నిబద్ధతను తెలియజేస్తూ సాగిన ఆర్పీఎఫ్ పరేడ్ లో కేంద్రమంత్రి గౌరవ వందనం స్వీకరించారు. ఈ కార్యక్రమంలో భాగంగా ‘సాంగ్యాన్’ మొబైల్ అప్లికేషన్ హిందీ ఎడిషన్‌ను ప్రారంభించారు. ఇది ఆర్పీఎఫ్‌లో అంతర్గతంగా సాగే సమాచార ప్రసారాన్ని మెరుగుపరుస్తుంది. కొత్తగా అమల్లోకి వచ్చిన మూడు నేరచట్టాలపై  ఆర్పీఎఫ్ సిబ్బందికి అవగాహన కల్పించేందుకు హిందీలో రాసిన ప్రామాణిక పుస్తకాలను విడుదల చేశారు.

భారత రైల్వేల్లో రూపుదిద్దుకుంటున్న కొత్త మార్పులకు మార్గదర్శకత్వం వహిస్తూ స్ఫూర్తిదాయకంగా నిలుస్తున్న ప్రధానమంత్రి శ్రీ నరేంద్ర మోదీకి.. శ్రీ వైష్ణవ్ కృతజ్ఞతలు తెలిపారు. గతేడాది 5300 కి.మీ, గత పదేళ్లలో 31,000 కి.మీ మేర కొత్త రైల్వే లైన్లను నిర్మించినట్లు మంత్రి వెల్లడించారు. అలాగే పదేళ్లలో 40,000 కి.మీ మేర రైల్వే లైన్లను విద్యుదీకరించామని, గడచిన 60 ఏళ్లతో పోలిస్తే ఇది రెట్టింపు అని తెలిపారు. 

వందేభారత్, అమృత్ భారత్ తరహా కొత్త తరం రైళ్ల ద్వారా ప్రయాణికులకు సౌకర్యవంతమైన, వేగవంతమైన ప్రయాణాన్ని సరసమైన ధరల్లో అందించడమే భారతీయ రైల్వేల లక్ష్యమని మంత్రి వివరించారు. కవచ్ లాంటి అత్యాధునిక సౌకర్యాలతో సురక్షితమైన ప్రయాణాన్ని ప్రజలకు అందిస్తామన్నారు. ప్రజల సౌకర్యార్థం 12,500 జనరల్ కోచ్ లను తయారుచేస్తున్నట్లు తెలిపారు.

ఆర్పీఎఫ్ డైరెక్టర్ జనరల్ శ్రీ మనోజ్ యాదవ, సెంట్రల్ రైల్వే జనరల్ మేనేజర్, భూస్వాల్ డివిజన్ డివిజనల్ రైల్వే మేనేజర్ శ్రీ ధరమ్ వీర్ మీనా, ప్రధాన కార్యాలయం, సెంట్రల్ రైల్వేకి చెందిన ఉన్నతాధికారులు ఈ 40వ వ్యవస్థాపనా దినోత్సవ కవాతులో పాల్గొన్నారు. 

ఆర్పీఎఫ్ సిబ్బంది, వారి కుటుంబ సభ్యులు ఈ వ్యవస్థాపన దినోత్సవాన్ని నిర్వహిస్తారు. ప్రజా శ్రేయస్సు పట్ల తమ నిబద్ధతను తెలియజేస్తూ, వారి ఆనందాన్ని పరస్పరం పంచుకునే రోజు ఇది. రైల్వే ఆస్తుల పరిరక్షణ మాత్రమే కాకుండా ప్రయాణికులు, రైళ్ల భద్రతా బాధ్యతలు కూడా ఆర్పీఎఫ్‌కు అప్పగించారు. రైల్వే సాయం కోరిన మహిళలు, పిల్లలు, రోగులు, వృద్ధులు, దివ్యాంగులతో సహా అవసరమైన వారికి భద్రత కల్పిస్తుంది. రైల్వే ప్రయాణికులకు సురక్షితమైన, సౌకర్యవంతమైన ప్రయాణ అనుభూతిని అందిచేందుకు ఈ రక్షణ దళం రోజంతా పని విధులు నిర్వర్తిస్తుంది. రవాణా భద్రత కల్పించడం, ఉగ్రవాద నిరోధక చర్యలు చేపట్టడం, మానవ అక్రమ రవాణా, స్మగ్లింగ్‌తో సహా ఇతర నేరాలపై పోరాడటం, నేరాలను గుర్తించడంలో పోలీసులు, ఇతర చట్టపరమైన సంస్థలకు తోడ్పడటం, శాంతి భద్రతల నిర్వహణ చర్యల్లో భాగం పంచుకోవడం, జాతీయ, రాష్ట్ర ఎన్నికల సమయాల్లో పటిష్ట భద్రత కల్పించడం తదితరమైన కార్యకలాపాల ద్వారా జాతీయ భధ్రతా వ్యవస్థలో కీలక భాగస్వామిగా ఆర్పీఎఫ్ మారింది.

నిబద్ధత, నిజాయతీతో పనిచేస్తూ  దేశానికి, దేశ ప్రజలకు సేవ చేసేందుకు రైల్వే ప్రొటెక్షన్ ఫోర్స్ తనని తాను అంకితం చేసుకుంది. ‘సేవా హీ సంకల్ప్’ విధానాన్ని అవలంబించేందుకు ‘‘యశో లభస్వ (కీర్తిని పొందడం) అనే లోకోక్తి సాధన దిశగా ఆర్పీఎఫ్ అన్ని అవకాశాలను వినియోగించుకుంటోంది.

***