প্রধান মন্ত্রী শ্রী নরেন্দ্র মোদীনা লৈবাক শিন্বা থুংনা লৈরিবা খুঙ্গংগী মীওইশিং অমসুং স্তেকহোল্দরশিংগী মফমদা ‘সবকী য়োজনা সবকা বিকাস’ অভিয়ান – পীপল্স প্লান কেম্পেন (২০২৪-২৫)তা ইচঙ থৌবা থৌদাং লৌনবা ৱাফম থমখ্রে‍। ওক্তোবর ১, ২০২৪দা ইরকপা চিথি অমদা প্রধান মন্ত্রীনা ইং ২০২৫-২৬কী গ্রাম পঞ্চায়ত দিভেলপমেন্ত প্লান (GPDP) শেম্বদা মীয়াম্না ইচঙ থৌনা অমসুং অচেৎপা ফিরেপ অমগা লোয়ননা শরুক য়াবগী মরুওইবা ৱাফমশিং থমখি‍।

অরিবা ভেদিক স্লোক “विश्वं पृष्टं ग्रामे अस्मिन् अनातुरम्”, হায়বদি “মালেম অসি মশানা মপুং ফাজবগুম, ঐখোয়গী খুঙ্গংশিংসু মতিং লৈবা, মপাঙ্গল কন্বা অমসুং নুংঙাই য়াইফবা ওইহনগদবনি” হায়বসিদগী পুক্নিং থৌগৎনফম ওইরগা, প্রধান মন্ত্রীনা মরোমদোম হিংজবা ঙম্বা অমসুং তুং কোইগদবা খুঙ্গংশিং শেমগৎনবগী মঙলানগী মতাঙদা ফোঙদোকখি‍। মঙলান অসিবু মঙফাওনহন্বদা, গ্রামীন ভারতকী মপুং ফাবা অমসুং তুং কোইবা মওংগী চাওখৎপা পুরকপদা মরুওইরিবা GPDPদা মখোয়না লৌরিবা থৌদাংশিংগী খুত্থাঙদা মীপুম খুদিংমক্না অমসুং স্তেকহোল্দরশিংনা লৌরিবা মশক থোকপা শক্লোনশিংগী মরমদা মহাক্না ফোঙদোকখি‍।

প্রধান মন্ত্রীগী পাউজেলনা পাক শন্না শরুক য়ানবা ৱাফম ফোঙদোক্তুনা মীপুম খুদিংদা মখোয়গী পঞ্চায়তশিংবু চাওখৎপা অমসুং খুমাঙ চাওশিন্বগী মফম অমা ওইরক্নবা অওন্বা পুরকপদা মতেঙ পাংনবা ৱাফম থমখি‍। থৌরাং অসিনা মায় পাকপা হায়বসি পুম্নমক্কী ওইনা মপুং ফানা অমসুং তুং কোইগদবা মওংদা চাওখৎপা পুরক্নবা পান্দম থমদুনা পুন্না হোৎনমিন্নবগী মখা পোল্লি‍। পঞ্চায়তী রাজ মন্ত্রালয়না পঞ্চায়তী রাজ ইন্সতিত্যুসনশিং/ রুরেল লোকেল বোদী পুম্নমক্কী মফমদা পাউজেল অসি লৈবাক্কী কাচিন কোয়া শিন-থুংনা য়ৌহন্দুনা, মীপুম খুদিংবু হেন্না মপাঙ্গল কন্বা, মরোমদোম লেপচবা ঙম্বা, চাওখৎপা অমসুং হেন্না নুংঙাই য়াইফবা ভারত অমগীদমক ‘সবকী য়োজনা, সবকা বিকাসস’ অভিয়ান – পীপল্স প্লান কেম্পেন্দা শরুক য়ানবা পুক্নিং থৌগৎনবা ৱাফম থমখি‍।

পঞ্চায়তী রাজকী কেন্দ্র মন্ত্রী শ্রী রাজিব রঞ্জন সিংহ এলিয়স ললন সিংহনা কেম্পেন অসিনা চাওখৎপা (ভিক্সিত ভারত) অমসুং মরোমদোম লেপচবা ভারত (আত্মনিরভর ভারত)কী মঙলানগী পরিংদা চৎলি হায়বা ৱাফম ফোঙদোকখি‍। মহাক্না মপুং ফাবা চাওখৎপগী পান্দমশিং ফংনবগীদমক অমত্তা ওইবগী মরুওইবা ৱাফমশিং থমখি অমসুং সর্পঞ্চ, পঞ্চায়ত মেম্বরশি, অমসুং মীয়ামদা মপুং ফানা শরুক য়ানবা হায়খি‍। কেন্দ্র মন্ত্রীনা চাওখৎ লম্বীদা খোঞ্জেল অমসুং ৱাখল্লোন খুদিংমক মরুওই হায়না ফোঙদোকখি‍। পঞ্চায়তী রাজকী কেন্দ্রগী রাজ্য মন্ত্রী প্রোফ এস.পি. সিংহ বঘেলনা পীপল্স প্লান কেম্পেনবু দিমোক্রেসীগী মরা চেৎশিলহন্নবা তোপ তোপ্পা থৌরাং অমনি হায়খি‍। মহাক্না মীয়ামবু মখোয়গী খুঙ্গংদা চাওখৎপা পুরক্নবা মপাঙ্গল হাপকদবনি হায়খি অমসুং তশেংবা মথৌ তাবশিংগী পাম্বৈ পুথোক্নবা প্লান শেম্নবগীদমক গ্রাম সভাদা ইচঙ থৌনা শরুক য়ানবা পুক্নিং থৌগৎখি‍। রাজ্য মন্ত্রীনা কেম্পেন অসিগা সস্তেনেবল দিভেলপমেন্ত গোলশিংগা লৈনরিবা মরীবুসু ফোঙদোকখি অমসুং মপুং ফাবা ইনফোর্মেসন ফংহন্নবগীদমক তোঙান তোঙানবা লাইন দিপার্তমেন্তশিংদগী ফ্রন্তলাইন ৱর্করশিংদা গ্রাম সভাদা শরুক য়ানবা ৱাফম খঙহনখ্রে হায়নসু ফোঙদোকখি‍।

ঙসি (ওক্তোবর ২) অসি, ২০২৫-২৬কী পঞ্চায়ত দিভেলপমেন্ত প্লানশিং (PDPs) শেম্নবা পীপল্স প্লান কেম্পেন লৈবাক শিন্বা থুংনা হৌদোক্লি‍। ভারত লৈঙাক্কী পঞ্চায়তী রাজ মন্ত্রালয়না লৈবাক পুম্বদা লৈরিবা পঞ্চায়ত অমসুং স্তেকহোল্দর পুম্নমক্কী মফমদা মরুওইবা “পীপল্স প্লান কেম্পেন” (২০২৪-২৫) অসিদা ইচঙ থৌনা শরুক য়ানবা ৱাফম থমখি‍। পীপল্স প্লান কেম্পেন (জন য়োজনা অভিয়ান) অসিনা, ‘সবকী য়োজনা সবকা বিকাস’কী ৱাখল্লোন পুদুনা, গ্রাসরুত দিমোক্রেসী মপাঙ্গল কনখৎহন্নবা অমসুং গ্রামীন ভারত্তা মপুং ফাবা চাওখৎপা পুরক্নবা পান্দম থম্লিবা মশক থোকপা থৌরাং অমনি‍। মসিনা খুঙ্গংগী মীয়ামবু লমদুগী চাওখৎ থৌরাং য়াত্থোকপদা শরুক য়াহন্দুনা মখোয়গী খুঙ্গংশিংগী তুংগী লম্বী শেম্বদা ইচঙ থৌবা শক্লোন লৌহন্নবা মপাঙ্গল হাপ্লি‍।

মরুওইবা থৌরাং অসিবু শৌগৎলদুনা, মীথুং কয়ানা পাক শন্না শরুক য়ানবা পুক্নিং থৌগৎখি‍। পঞ্চায়তী রাজ মন্ত্রালয়গী য়ুত্যুব চেনেলদা (https://www.youtube.com/playlist?list=PLr1WFeVzpoLu2lw_Dq-SeCV7vujuKBXDW) ফংলিবা অখন্ননা রেকোর্দ তৌখিবা ভিদিও পাউজেলশিংগী খুত্থাঙদা মখোয়না পঞ্চায়ত অমসুং মীয়াম অনিমক্তা পীপল্স প্লান কেম্পেন্দা পুক্নিং লুপ্না শরুক য়ানবা ৱাফম থমখি‍।

হীরম অসিগীদমক মখোয়গী ওইবা ৱাফমশিং ফোঙদোকখিবা পন্বা য়াবা মীথুংশিংগী মরক্তা মধ্য প্রদেশকী মুখ্য মন্ত্রী শ্রী (দোক্তর) মোহন য়াদব; রাজস্থানগী মুখ্য মন্ত্রী শ্রী ভজন লাল শর্ম; ত্রিপুরাগী মুখ্য মন্ত্রী প্রোফ. (দোক্তর) মনিক সাহা; অমসুং বিহারগী পঞ্চায়তী রাজ মন্ত্রী শ্রী কেদর প্রসাদ গুপ্তা য়াওখি‍। ছত্তিসগরগী মুখ্য মন্ত্রী শ্রী বিষ্ণু দিও সাইনা পঞ্চায়ত অমসুং লমদুগী মীওইশিংগী মফমদা অইবা পাউজেল অমগী খুত্থাঙদা পীপল্স প্লান কেম্পেন্দা ইচঙ থৌনা শরুক য়ানবা ৱাফম ফোঙদোকখি‍। থৌরাং অসিনা খুঙ্গংগী লমশিংদা মীয়াম পুন্না শরুক য়ামিন্নবা অমসুং চাওখৎপা পুরকপদা লুচিংবশিংগী খোঙফম উৎলি‍। পন্বা য়াবা ৱাফমদি, শ্রী বিষ্ণু দিও সাই, শ্রী ভজন লাল শর্ম, অমসুং শ্রী কেদর প্রসাদ গুপ্তানা মখোয়গী রাজনিতীগী খোঙচৎ সর্পঞ্চ / মুখিয়া ওইনা হৌরক্তুনা লোকেল সেল্ফ-গভর্নেন্সকীঈ মশক থোকপা পন্দুপ অমা ইরমখি‍।

চহি অসিদা, ‘সবকী য়োজনা সবকা বিকাস’ অভিয়ান্না ওক্তোবর ২, ২০২৪দা অখন্নবা গ্রাম সভাশিং পাঙথোক্তুনা ভারতকী মীয়ামগী লৈঙাক লৈরকপা চহি ৭৫ শুবগী থৌরম পাঙথোকপগী অখন্নবা থৌরাং অমা য়াওনা মশক থোকপা পন্দোল কয়া লোমখি‍। গ্রাম সভাশিং অসিনা গ্রাম পঞ্চায়ত লাখ ২.৫৫, ব্লোপ পঞ্চায়ত ৬,৭০০, অমসুং দিস্ত্রিক্ত পঞ্চায়ত ৬৬৫ হেন্বনা শরুক য়াদুনা, শেন্বা চহি ২০২৫-২৬কী মখোয়গী পঞ্চায়ত দিভেলপমেন্ত প্লানশিং (PDPs) শেম্নবগী মায়কৈদা গ্রাম পঞ্চায়তশিংবু (GPs) মমায় চুমগনি‍। পঞ্চায়তী রাজ মন্ত্রালয়দগী ওফিসর অমসুং কন্সল্তেন্তশিং স্তেত/ য়ু.তি. শিন্বা থুংনা অখন্নবা গ্রাম পঞ্চায়তশিংদা ওক্তোবর ২, ২০২৪দা অখন্নবা গ্রাম সভাশিং পাঙথোকপগী থবক থৌরম য়েংশিন্নবা অমসুং শেন্ননবা থাখি‍। মখোয়বু থারিবা অসিনা মমল য়াম্লবা ৱাখল্লোন অমসুং লমজিং পীদুনা, ক্বালিতী ৱাংবা পঞ্চায়ত দিভেলপমেন্ত প্লানশিং শেম্নবগীদমক হেন্না মওং মরিল নাইবা, মপুং ফাবা, অমসুং মওং চুম্বা থৌওং লৈহন্নবা পান্দম থম্লি‍।

কেম্পেন অসিগী শরুক অমা ওইনা, অখন্নবা গ্রাম সভাশিং গ্রাম পঞ্চায়ত লাখ ২.৫৫ হেন্বদা পাঙথোক্লি‍। অখন্ননা শীল্লিবা অমসুং নীংথিনা শেম শারবা গ্রাম সভাশিং অসি মীয়াম্না মখোয়গী ৱাফমশিং ফোঙদোক্নবা, মখোয়গী মথৌ তাবশিং পুখৎনবা, অমসুং মখোয় মখোয়গী লমগী চাওখৎ থৌরাং য়াৎপদা ইচঙ থৌনা থৌদাং লৌহন্নবা ফম্পাক অমা ওইরি‍। পীপল্স প্লান কেম্পেন অসিনা ভারত্তা পুম্নমক কোনশিন্বা অমসুং মীয়াম্না শরুক য়াবা খুঙ্গং চাওখৎপগী লম্বীদা চঙশিল্লিবা মশক থোকপা খোঙথাং অমা ওইরি‍। থৌরাং য়াৎপগী থৌওংদা খুঙ্গংগী মীয়ামশিং ইচঙ থৌনা শরুক য়ানবা পুক্নিং থৌগত্তুনা, মসিনা লম-লমগী মথৌ তাবশিং অমসুং অপাম্বশিংগী মমি ময়েক শেংনা তাবা চাওখৎ থৌরাং শেম্নবা পান্দম থম্লি‍। থৌশিল অসি মায় পাকহন্নবগীদমক অমসুং খুঙ্গংগী মপাঙ্গলদা মরা তাদুনা লৈরিবা চাওখৎপা ভারত অমগী মঙলান মঙফাওনহন্নবগীদমক পঞ্চায়তী রাজ ইন্সতিত্যুসনশিং অমসুং রুরেল লোকেল বোদীশিংগী ঙাক্লৌ অমসুং এঙ্গেজমেন্ত মরুওই‍। কেম্পেন অসি পায়খৎলকপদা, খুঙ্গংগী মীয়ামদা মখোয়গী চাওখৎ থৌরাংদা মশাগী ওইবা ইথিল অমা পীদুনা ইং ২০২৫-২৬কী ওইইনা হেন্না মতিং লৈবা অমসুং লম-লমদুগা মরী লৈনবা পঞ্চায়ত দিভেলপমেন্ত প্লানশিং পুরক্কনি হায়না থাজবা থম্লি‍।

হান্না পানরুদবা মওংগী পার্ত্নরসিপ অমদা, উন্নত ভারত অভিয়ান (UBA)না, IIT দিল্লীনা কোওর্দিনেৎ তৌদুনা, উন্নত ভভারত অভিয়ানগী মখাদা ‘সবকী য়োজনা সবকা বিকাস’ হায়নসু খঙনরিবা পীপল্স প্লান কেম্পেন্দা হাইয়র এজুকেসন ইন্সতিত্যুসনশিংদগী (HEIs) মহৈরোয় ১৫,০০০ হেন্ববু শরুক য়াহন্দুনা মরুওইবা থৌদাং অমা লৌগনি‍। মহৈরোয়শিং অসিনা ওক্তোবর ২, ২০২৪দা পাঙথোক্কদৌরিববা অখন্নবা গ্রাম সভাশিংদা শরুক য়াবতা নত্তনা, গ্রাম পঞ্চায়ত কয়াদা GPDP শিং শেম্বদা মতেঙ পাংগনি‍। UBA অমসুং পঞ্চায়তী রাজ মন্ত্রালয় অনিগী মরক্তা খোঙবু ওইবগী মরী অসিনা, কেম্পেন অসিগী পুৱারীদা অহান্বা ওইনা, গ্রাসরুত থাক্কী প্লান্নিংদা নহাশিংবু শরুক য়াহন্নবা পান্দম থম্লি‍। মসিগী মথক্তা, প্রোজেক্ত ফোর ক্রিএতিং মোদেল গ্রাম পঞ্চায়ত ক্লস্তর (PCMGPCs)গী মখাদা থবক তৌরিবা নহা ফেলোশিং লোয়ননা পিরামল ফাউন্দেসন, এস্পিরেস্নেল ভারত কোলাবোরেতিব (ABC) অমসুং ত্রান্সফোর্মিং রুরেল ইন্দিয়া ফাউন্দেসন (TRIF)গী ফেলোশিংনা ওক্তোবর ২গী গ্রাম সভা পাঙথোকপদা শরুক য়াগনি‍। মখোয়না LSDG শিংগী প্রি প্লান্নিং অমসুং ওরিএন্তেসন্দা সর্পঞ্চশিংদা ঙাক্লৌ পীগনি, গ্রাম সভা মেম্বরশিংবু PDI স্কোর্স অমসুং LSDG থীমশিংদা মমায় চুম্বিগনি, অমসুং চুনবা ইন্তরভেন্সন খঙদোকপদা অমসুং থীম খন্বদা মতেঙ পাংগনি‍।

পঞ্চায়তী রাত মন্ত্রালয়না ওক্তোবর ২, ২০২৪দা মশক নাইবা থৌরাং অমা হৌদোক্তুনা, লৈবাক শিন্বা থুংনা গ্রাম পঞ্চায়ত ৭৫০দা অখন্নবা গ্রাম সভা কম ওরিএন্তেসন / ত্রেনিং প্রোগ্রামশিং পাঙথোক্লি‍। অসিগুম্বা মখলগী অহান্বা থৌরম অসি পঞ্চায়তী রাজ সিস্তেম মপাঙ্গল কনখৎহন্নবা অমসুং মীয়াম্না ইচঙ থৌনা শরুক য়াদুনা ক্বালিতী ৱাংবা পঞ্চায়ত দিভেলপমেন্ত প্লানশিং (PDPs) শেম্নবা মন্ত্রালয়না লেপ্লিবা খোঙফমগী শরুক অমনি‍। ইন্দিয়ন রিপব্লিক্কী ৭৫শুবা চহি অসি, মওং কয়াদা, লৈবাক্কী খোঙচৎকী পুৱারী ওইরবা পন্দোল অমনি‍। মসি ঐখোয়গী চহি ৭৫ অমসুং মসিগী মথক্তা লৈবা অহলশিংবু মখোয়গী খোঞ্জেল মপাঙ্গল কলহন্নবা অমসুং হেন্না মপাঙ্গল কনবা কম্ম্যুনিতী শেমগৎনবা, মীয়াম্না শরুক য়াদুনা গ্রাম স্বরাজ পুরক্নবা পান্দমদা গ্রাম সভা ৭৫০দা শরুক য়ানবা পাউজেল পীদুনা মখোয়বু ইকায় খুম্ননবা অমসুং শরুক য়াহন্নবা মীৎকুপ অমনি‍। মন্ত্রালয়না মীয়ামগী মফমদা লৌশিং অমসুং খুৎশম্ননা চৎমিন্নবগী মীৎকুপ অসিদা অমত্তা ওইনা লেপমিন্নদুনা হেন্না তরং তরংবা অমসুং পুম্নমক্কী অশুপ্পা তুংলমচৎ অমগী লম্বী য়াৎমিন্ননবা ৱাফম থম্লি‍। থৌশিল অসি গ্রাসরুত থাক্কী চাওখৎ থৌরাং অসি পুম্নমক কোনশিন্বা, অরোন অথুপ লৈতবা, অমসুং মতিং লৈবা ওইহন্নবা শেম-শারবা পীপল্স প্লান কেম্পেনগী মচঙ ওইবা শরুক অমনি‍।

থৌশিল অসিনা গ্রামীন ভারতকী তুং কোইগদবা চাওখৎপা পুরক্নবগী মায়কৈদা অহল অমসুং নহা মীরোল পুন্না খুৎশম্ননা থবক তৌমিন্ননবদা অখন্নবা মীৎয়েঙ থম্লি‍। তোপ তোপ্পা লম্বী অমদা, সিনিয়র সিতিজনশিংবু ইকায় খুম্নগনি অমসুং মখোয়গী এক্সপিরিএন্সশিং ময়ামদা থম্নবা পাউজেল পীগনি‍। দেকেদ কয়াসিদা ভারতনা হোংলক্লিবা অসি উরুবদগী লাকপা মখোয়গী ৱাখল্লোনশিংনা পঞ্চায়তশিংগী তুংলমচৎ অমসুং তুং কোইনা চাওখৎপা পুরকপগী মঙলানগী লমজিং ওইগনি‍। থৌরাং য়াৎপদা অহলশিং য়াওহন্বনা খুঙ্গংগী লৈঙাক্লোন্দা হান্নদগী লৈরক্লবা লৌশিং পুক্কৈ অমসুং ৱাখল্লোনবু হেন্না চেৎশিনহল্লি‍। পঞ্চায়তী রাজ মন্ত্রালয়গী নহা ফেলোশিংনা, TRIF অমসুং পিরামল ফাউন্দেসনগী মীহুৎশিংগা লোয়ননা ফেসিলিতেতরশিং ওইনা থবক তৌগনি‍। মখোয়না লোকেলাইজেসন ওফ সস্তেনেবল দিভেলপমেন্ত গোল্স (LSDGs) অমসুং গভর্নেন্সতা লৈরিবা অহোবা মশক খঙদোকপনচিংবা চাওখৎ থৌরাং য়াৎপগী মরুওইবা হীরমশিংদা পঞ্চায়তকী মীহুৎশিং অমসুং অতৈ স্তেকহোল্দরশিংদা ত্রেনিং পীগনি‍।

ওক্তোবর ২গী স্পিসিএল গ্রাম সভা কম-ওরিএন্তেসন/ত্রেনিং প্রোগ্রাম অসিদা সিনিয়র সিতিজনশিংনা অহান্বা পঞ্চায়ত মীখলদগী হৌরগা হৌজিক্কী গভর্নেন্স প্রাক্তিস ফাওবদা পঞ্চায়তনা হোংলক্লিবা অসিদা মখোয়না নিংশিংবশিং পাউদম্বা ইন্তরেক্তিব সেসনশিং য়াওগনি‍। মসিগী মতুংদা লোকেল গভর্নেন্স অমসুং তুংগী পান্দমশিংদা লৈরিবা অহোবশিংদা মীৎয়েঙ থম্বা খন্ন-নৈনবগী থৌরম পাঙথোক্কনি‍। থৌরম অসিদা উ থাবগী কেম্পেন (এক পের মা কে নাম), লু-নান্বা, মশা ফবা, অমসুং দ্রগ লৈতবা খুন্নাইগী মীয়ামগী ৱাশক, লোয়ননা ক্বালিতী লৈববা পঞ্চায়ত দিভেলপমেন্ত প্লানশিং শেম্নবা অপুন্বগী খোঙফম্নচিংবা থৌরমশিং য়াওগনি‍।

থৌশিল অসিনা সস্তেনেবল দিভেলপমেন্ত অমসুং গ্রামীন ভারত মপাঙ্গল হাপ্পদা মীৎয়েঙ থম্বা চৎনবীশিং মমল লৈনা লৌবা মাঙদা মীৎয়েঙ থম্বা গভর্নেন্সকী লম্বী অমা তাক্লি‍। ঐখোয়না গ্রাম সভা ৭৫০গা লোয়ননা মীয়ামগী লৈঙাক লৈরকপগী ৭৫শুবা চহিগী থৌরম পাঙথোকপগা লোয়ননা, পঞ্চায়তী রাজ মন্ত্রালয়না গ্রাম পঞ্চায়ত, ব্লোক পঞ্চায়ত, দিস্ত্রিক্ত পঞ্চায়ত, অমসুং মীয়ামগী মফমদা থৌরম অসিদা ইচঙ থৌনা শরুক য়ানবা অমসুং মীয়াম্না শরুক য়াদুনা গ্রাম স্বরাজ পুরক্নবা ৱাফম থমখি‍।

***