அனைவரும் இணைவோம், அனைவரும் உயர்வோம் இயக்கம்  – மக்கள் திட்ட இயக்கத்தில் (2024-25) தீவிரமாகப் பங்கேற்குமாறு நாடு முழுவதும் உள்ள கிராமப்புற மக்களுக்கு  பிரதமர் திரு. நரேந்திர மோடி வேண்டுகோள் விடுத்துள்ளார். அக்டோபர் 1 , 2024 தேதியிட்ட கடிதத்தில்,  2025-26 ஆம் ஆண்டிற்கான கிராம பஞ்சாயத்து மேம்பாட்டுத் திட்டத்தை தயாரிப்பதில் உற்சாகமான மற்றும் உறுதியான பங்கேற்பின் முக்கியத்துவத்தை பிரதமர் வலியுறுத்தியுள்ளார்.

"உலகம் தன்னளவில் முழுமையடைவதைப் போலவே, நமது கிராமங்களும் திறன்மிக்கதாகவும், அதிகாரமளிப்பதாகவும், வளமானதாகவும் இருக்க வேண்டும்" என்ற பண்டைய வேத வசனத்திலிருந்து    உத்வேகம் பெற்ற பிரதமர், தன்னிறைவு மற்றும் நீடித்த கிராமங்களை உருவாக்கும் தொலைநோக்குப் பார்வையை வலியுறுத்தியுள்ளார். கிராமிய பாரதத்தின் முழுமையான மற்றும் நீடித்த வளர்ச்சிக்கு, கிராம வளர்ச்சிக்கு மையமான கிராம வளர்ச்சித் திட்டத்திற்கு தங்களது பங்களிப்பின் மூலம் இந்த தொலைநோக்கு பார்வையை நனவாக்குவதில் ஒவ்வொருவரும்,  ஆற்றி வரும் குறிப்பிடத்தக்க பங்கை அவர் எடுத்துரைத்துள்ளார்.

ஒவ்வொருவரும் தங்கள் பஞ்சாயத்துகளை வளர்ச்சி மற்றும் முன்னேற்றத்திற்கான வளமான மையங்களாக மாற்ற உதவ வேண்டும் என்று வலியுறுத்தியுள்ள பிரதமரின் செய்தி, பரவலான பங்களிப்புக்கு அழைப்பு விடுக்கிறது. இந்த முயற்சியின் வெற்றி, அனைவரையும் உள்ளடக்கிய மற்றும் நீடித்த வளர்ச்சியை உறுதி செய்வதை நோக்கமாகக் கொண்ட கூட்டு முயற்சியைச் சார்ந்துள்ளது என்று அவர் குறிப்பிட்டுள்ளார். வலுவான, தற்சார்புடைய, வளர்ச்சியடைந்த மற்றும் வளமான இந்தியாவுக்கான அனைவரும் இணைவோம், அனைவரும் உயர்வோம் இயக்கம்- மக்கள் திட்டப் பிரச்சாரத்தில் பங்கேற்க ஒவ்வொருவரையும் ஊக்குவிக்கும் வகையில், நாட்டின் மூலை முடுக்கெங்கும் இந்தச் செய்தி சென்றடைவதை உறுதி செய்யுமாறு அனைத்து பஞ்சாயத்து ராஜ் அமைப்புகள் / ஊரக உள்ளாட்சி அமைப்புகளை பஞ்சாயத்து ராஜ் அமைச்சகம் கேட்டுக் கொண்டுள்ளது.

மத்திய பஞ்சாயத்து ராஜ் அமைச்சர் திரு ராஜீவ் ரஞ்சன் சிங் என்கிற லாலன் சிங், வளர்ந்த மற்றும் சுயசார்பு இந்தியா என்ற பார்வையுடன் இந்தப் பிரச்சாரம் சீரமைக்கப்பட வேண்டும் என்று வலியுறுத்தியுள்ளார். முழுமையான வளர்ச்சியின் இலக்கை அடைவதில் ஒற்றுமையின் முக்கியத்துவத்தை வலியுறுத்திய அவர், பஞ்சாயத்து தலைவர்கள், பஞ்சாயத்து உறுப்பினர்கள் மற்றும் குடியிருப்பாளர்கள் ஆர்வத்துடன் பங்கேற்க வேண்டும் என்று வேண்டுகோள் விடுத்தார். வளர்ச்சி செயல்பாட்டில் ஒவ்வொரு குரலும் யோசனையும் முக்கியத்துவம் வாய்ந்தவை என்று மத்திய அமைச்சர் எடுத்துரைத்தார். மத்திய பஞ்சாயத்து ராஜ் இணை அமைச்சர் பேராசிரியர் எஸ்.பி.சிங் பாகேல் மக்கள் திட்ட இயக்கத்தை ஜனநாயகத்தின் வேர்களை வலுப்படுத்துவதற்கான ஒரு தனித்துவமான முயற்சி என்று விவரித்தார். தங்கள் கிராமத்தின் வளர்ச்சியைத் திட்டமிட குடிமக்களுக்கு அதிகாரம் அளிக்க வேண்டும் என்று வலியுறுத்திய அவர், உண்மையான தேவைகளை நிவர்த்தி செய்யும் திட்டங்களை வகுப்பதில் கிராம சபைகளில் தீவிரமாக பங்கேற்பதை ஊக்குவித்தார். நீடித்த வளர்ச்சி இலக்குகளுடன் இந்த இயக்கத்தின் தொடர்பை இணையமைச்சர் சுட்டிக்காட்டியதுடன், விரிவான தகவல்களை பரப்புவதற்காக கிராம சபைகளில் கலந்து கொள்ளுமாறு பல்வேறு துறைகளைச் சேர்ந்த முன்களப் பணியாளர்களுக்கு விடுக்கப்பட்ட அழைப்பையும் குறிப்பிட்டுள்ளார்.

2025-26 ஆம் ஆண்டுக்கான பஞ்சாயத்து வளர்ச்சித் திட்டங்களைத் தயாரிப்பதற்கான மக்கள் திட்ட இயக்கம் இன்று (அக்டோபர் 2 ) நாடு தழுவிய அளவில் தொடங்கப்பட்டதைக் குறிக்கிறது. இந்த முக்கியமான "மக்கள் திட்டப் பிரச்சாரத்தில்" (2024-25) தீவிரமாக பங்கேற்குமாறு நாடு முழுவதும் உள்ள அனைத்து பஞ்சாயத்துகளுக்கும் பங்குதாரர்களுக்கும் இந்திய அரசின் பஞ்சாயத்து ராஜ் அமைச்சகம் வேண்டுகோள் விடுத்துள்ளது. அனைவரும் இணைவோம், அனைவரும் உயர்வோம் என்ற உணர்வை உள்ளடக்கிய மக்கள் திட்ட இயக்கம், அடிமட்ட ஜனநாயகத்தை வலுப்படுத்துவதையும், கிராமிய பாரதத்தில் உள்ளடக்கிய வளர்ச்சியை ஊக்குவிப்பதையும் நோக்கமாகக் கொண்ட ஒரு குறிப்பிடத்தக்க முன்முயற்சியாகும். உள்ளூர் வளர்ச்சிக்கான திட்டமிடல் செயல்பாட்டில் பங்கேற்பதன் மூலம் தங்கள் கிராமங்களின் எதிர்காலத்தை வடிவமைப்பதில் கிராமப்புற குடிமக்கள் செயலில் பங்கு வகிக்க இது அதிகாரம் அளிக்கிறது.

இந்த முக்கியமான முயற்சிக்கு ஆதரவாக, பல பிரமுகர்கள் பரவலான பங்கேற்பை ஊக்குவிக்க முன்வந்துள்ளனர். இந்தக் காரணத்திற்காக குரல் கொடுத்த மற்ற குறிப்பிடத்தக்க பிரமுகர்களில் மத்தியப் பிரதேச முதலமைச்சர் திரு (டாக்டர்) மோகன் யாதவ்; ராஜஸ்தான் முதல்வர் பஜன்லால் சர்மா, திரிபுரா முதல்வர் பேராசிரியர் (டாக்டர்) மாணிக் சாஹா, சத்தீஸ்கர் முதலமைச்சர் திரு விஷ்ணு தியோ சாய் ஆகியோர் அடங்குவர். இந்த முயற்சி கிராமப்புறங்களில் சமூக ஈடுபாடு மற்றும் வளர்ச்சியை வளர்ப்பதில் தலைமையின் உறுதிப்பாட்டை எடுத்துக்காட்டுகிறது.

2024அக்டோபர் 2 ஆம் தேதி சிறப்பு கிராம சபைகள் மூலம் இந்தியக் குடியரசின் 75 வது ஆண்டை நினைவுகூரும் சிறப்பு முயற்சி உட்பட. 2.55 லட்சத்துக்கும் மேற்பட்ட கிராம பஞ்சாயத்துகள், 6,700 வட்டார பஞ்சாயத்துகள் மற்றும் 665 மாவட்ட பஞ்சாயத்துகளை ஈடுபடுத்தி, 2025-26 நிதியாண்டிற்கான பஞ்சாயத்து மேம்பாட்டுத் திட்டங்களை  தயாரிப்பதில் கிராம பஞ்சாயத்துகளை ஈடுபடுத்துவதில் இந்த கிராம சபைகள் கவனம் செலுத்தும். அக்டோபர் 2, 2024 அன்று சிறப்பு கிராம சபைகளின் அமைப்பை மேற்பார்வையிடவும் கண்காணிக்கவும் பல்வேறு மாநிலங்கள் / யூனியன் பிரதேசங்களில் உள்ள தேர்ந்தெடுக்கப்பட்ட கிராம பஞ்சாயத்துகளுக்கு பஞ்சாயத்து ராஜ் அமைச்சகத்தின் அதிகாரிகள் மற்றும் ஆலோசகர்கள் அனுப்பப்பட்டுள்ளனர். அவர்களின் இருப்பு மதிப்புமிக்க நுண்ணறிவு மற்றும் வழிகாட்டுதலை வழங்குவதை நோக்கமாகக் கொண்டுள்ளது, உயர்தர பஞ்சாயத்து வளர்ச்சித் திட்டங்களை உருவாக்குவதற்கான மிகவும் நெறிப்படுத்தப்பட்ட, உள்ளடக்கிய மற்றும் கட்டமைக்கப்பட்ட செயல்முறையை உறுதி செய்கிறது.

இந்த இயக்கத்தின் ஒரு பகுதியாக, 2.55 லட்சத்துக்கும் மேற்பட்ட கிராம பஞ்சாயத்துகளில் சிறப்பு கிராம சபைகள் ஏற்பாடு செய்யப்பட்டுள்ளன. சிறப்பாக ஒருங்கிணைக்கப்பட்ட இந்த கிராம சபைகள், குடிமக்கள் தங்கள் கருத்துக்களை தெரிவிக்கவும், அவர்களின் தேவைகளைப் பகிர்ந்து கொள்ளவும், தங்கள் பகுதிகளின் வளர்ச்சித் திட்டமிடலுக்கு தீவிரமாக பங்களிக்கவும் மேடைகளாக செயல்படுகின்றன. மக்கள் திட்ட இயக்கம் இந்தியாவில் உள்ளடக்கிய மற்றும் பங்கேற்பு கிராமப்புற வளர்ச்சியை நோக்கிய ஒரு குறிப்பிடத்தக்க படியை பிரதிபலிக்கிறது. திட்டமிடல் செயல்பாட்டில் கிராமப்புற குடிமக்களின் தீவிர ஈடுபாட்டை ஊக்குவிப்பதன் மூலம், உள்ளூர் தேவைகள் மற்றும் அபிலாஷைகளை உண்மையாக பிரதிபலிக்கும் வளர்ச்சித் திட்டங்களை உருவாக்குவதை நோக்கமாகக் கொண்டுள்ளது. இந்த முயற்சியின் வெற்றிக்கும், கிராமங்களின் வலிமையில் வேரூன்றியுள்ள வளர்ந்த இந்தியா என்ற தொலைநோக்கு பார்வையை நனவாக்குவதற்கும் பஞ்சாயத்து ராஜ் அமைப்புகள் மற்றும் ஊரக உள்ளாட்சி அமைப்புகளின் ஆதரவும் ஈடுபாடும் முக்கியமானதாகும். இந்தப் பிரச்சாரம் வெளிவரும்போது, கிராமப்புற சமூகங்களிடையே அவர்களின் வளர்ச்சி செயல்முறைகளில் உரிமை உணர்வை வளர்க்கும் என்று எதிர்பார்க்கப்படுகிறது, இது 2025-26 ஆம் ஆண்டிற்கான மிகவும் பயனுள்ள மற்றும் உள்ளூர் ரீதியாக பொருத்தமான பஞ்சாயத்து மேம்பாட்டுத் திட்டங்களுக்கு வழிவகுக்கும்.

முன்னெப்போதும் இல்லாத வகையில், ஐ.ஐ.டி தில்லியால் ஒருங்கிணைக்கப்பட்ட உன்னத பாரத இயக்கம், இந்த ஆண்டு உயர் கல்வி நிறுவனங்களைச் சேர்ந்த 15,000-க்கும் மேற்பட்ட மாணவர்களை மக்கள் திட்ட பிரச்சாரத்தில் ஈடுபடுத்துவதன் மூலம் முக்கிய பங்கு வகிக்கும். இந்த மாணவர்கள் அக்டோபர் 2, 2024 அன்று நடைபெறும் சிறப்பு கிராம சபையில் பங்கேற்பது மட்டுமல்லாமல், பல்வேறு கிராம பஞ்சாயத்துகளில் அறிக்கைகள் தயாரிப்பதற்கும் உதவுவார்கள்.

பஞ்சாயத்து ராஜ் அமைச்சகம் அக்டோபர் 2, 2024 அன்று ஒரு மைல்கல் முயற்சியைத் தொடங்குகிறது, நாடு முழுவதும் 750 கிராம பஞ்சாயத்துகளில் சிறப்பு கிராம சபை மற்றும் நோக்குநிலை/பயிற்சித் திட்டத்தை ஏற்பாடு செய்கிறது. பஞ்சாயத்து ராஜ் அமைப்பை வலுப்படுத்துவதற்கும், தீவிர சமூக பங்கேற்பின் மூலம் உயர்தர பஞ்சாயத்து வளர்ச்சித் திட்டங்களை  உருவாக்குவதை உறுதி செய்வதற்கும் அமைச்சகத்தின் உறுதிப்பாட்டின் ஒரு பகுதியாக இந்த முதல் வகையான நிகழ்வு உள்ளது. இந்தியக் குடியரசின் 75-வது ஆண்டு, பல வழிகளில், தேசத்தின் பயணத்தில் ஒரு வரலாற்று மைல்கல். 75 வயது மற்றும் அதற்கு மேற்பட்ட நமது மூத்த குடிமக்களை 750 கிராம சபைகளில் பங்கேற்க அழைப்பதன் மூலம் அவர்களை கௌரவித்து ஈடுபடுத்துவதற்கான தருணம் இது, அவர்களின் குரல்களை உயர்த்தவும், வலுவான சமூகத்தை உருவாக்கவும், மக்களின் பங்களிப்பின் சக்தியின் மூலம் கிராம சுயராஜ்ஜியத்தை உறுதி செய்யவும் இது ஒரு தருணம். ஞானம் மற்றும் ஒத்துழைப்பின் இந்த கொண்டாட்டத்தில் ஒன்றிணைந்து, அனைவருக்கும் பிரகாசமான மற்றும் உள்ளடக்கிய எதிர்காலத்திற்கு வழி வகுக்குமாறு அமைச்சகம் மக்களுக்கு அழைப்பு விடுக்கிறது. இந்த முன்முயற்சி மக்கள் திட்ட பிரச்சாரத்தின் ஒரு முக்கிய அங்கமாகும், இது அடிமட்ட அளவில் வளர்ச்சித் திட்டமிடல் உள்ளடக்கியதாகவும், வெளிப்படையானதாகவும், பயனுள்ளதாகவும் இருப்பதை உறுதி செய்ய வடிவமைக்கப்பட்டுள்ளது.

கிராமப்புற இந்தியாவின் நீடித்த வளர்ச்சியை நோக்கி ஒத்துழைக்க மூத்தவர்கள் மற்றும் இளைய தலைமுறையினர் இருவரையும் ஈடுபடுத்துவதில் இந்த முயற்சி சிறப்பு கவனம் செலுத்துகிறது. ஒரு தனித்துவமான அணுகுமுறையில், மூத்த குடிமக்கள் கௌரவிக்கப்படுவார்கள் மற்றும் அவர்களின் அனுபவங்களைப் பகிர்ந்து கொள்ள அழைக்கப்படுவார்கள். பல தசாப்தங்களாக இந்தியாவின் மாற்றத்தைக் கண்டதிலிருந்து பெறப்பட்ட அவர்களின் நுண்ணறிவுகள், பஞ்சாயத்துகளின் எதிர்கால மற்றும் நீடித்த வளர்ச்சிக்கான தொலைநோக்கு பார்வைக்கு வழிகாட்ட உதவும். திட்டமிடல் செயல்பாட்டில் பெரியவர்களின் ஈடுபாடு கிராமப்புற நிர்வாகத்தில் பொதிந்துள்ள பாரம்பரிய ஞானம் மற்றும் மதிப்புகளை வலுப்படுத்துகிறது. பஞ்சாயத்து ராஜ் அமைச்சகத்தின் இளம் உறுப்பினர்கள், டி.ஆர்.ஐ.எஃப் மற்றும் பிரமல் அறக்கட்டளைகளின் பிரதிநிதிகள் ஒருங்கிணைப்பாளர்களாக செயல்படுவார்கள். நீடித்த வளர்ச்சிக்கான இலக்குகளை உள்ளூர்மயமாக்குதல் மற்றும் ஆளுமையில் உள்ள இடைவெளிகளைக் கண்டறிதல் போன்ற வளர்ச்சித் திட்டமிடலின் முக்கிய அம்சங்களில் பஞ்சாயத்து பிரதிநிதிகள் மற்றும் இதர பங்குதாரர்களுக்கு இவை கவனம் செலுத்தும் பயிற்சியை வழங்கும்.

அக்டோபர் 2 ஆம் தேதி சிறப்பு கிராம சபை மற்றும் நோக்குநிலை / பயிற்சித் திட்டத்தில் கலந்துரையாடல் அமர்வுகளும் அடங்கும், இதில் மூத்த குடிமக்கள் முதல் பஞ்சாயத்து தேர்தல்கள் முதல் தற்போதைய நிர்வாக நடைமுறைகள் வரை பஞ்சாயத்துகளின் பரிணாம வளர்ச்சி குறித்த நினைவுகளைப் பகிர்ந்து கொள்வார்கள். இதைத் தொடர்ந்து, உள்ளாட்சி நிர்வாகத்தில் தற்போதுள்ள இடைவெளிகள் மற்றும் எதிர்கால இலக்குகள் குறித்து விவாதங்கள் நடைபெறும். இந்த நிகழ்ச்சியில் மரம் நடும் பிரச்சாரங்கள் , தூய்மை, உடற்பயிற்சி மற்றும் மருந்து இல்லாத சங்கங்களுக்கான சமூக உறுதிமொழிகள் மற்றும் தரமான பஞ்சாயத்து வளர்ச்சித் திட்டங்களை தயாரிப்பதற்கான கூட்டு அர்ப்பணிப்பு ஆகியவை இடம்பெறும்.

இந்த முன்முயற்சி ஆளுகைக்கான தொலைநோக்கு அணுகுமுறையை அடையாளப்படுத்துகிறது – இது நிலையான வளர்ச்சி மற்றும் கிராமிய பாரதத்தின் அதிகாரமளித்தல் ஆகியவற்றில் கவனம் செலுத்தும் அதே நேரத்தில் பாரம்பரியத்தை மதிக்கும் அணுகுமுறையாகும். 750 கிராம சபைகளுடன் 75-வது குடியரசு ஆண்டை நாம் கொண்டாடும் இந்த நிகழ்ச்சியில் அனைத்து கிராம பஞ்சாயத்துகள், வட்டார பஞ்சாயத்துகள், மாவட்ட பஞ்சாயத்துகள் மற்றும் சமூகங்கள் தீவிரமாக பங்கேற்க வேண்டும் என்று பஞ்சாயத்து ராஜ் அமைச்சகம் கேட்டுக் கொள்கிறது.

---

PKV/DL