విప్లవాత్మక మార్పులకు ఉద్దేశించిన ‘భారత్‌లో తయారీ (మేక్ ఇన్ ఇండియా)’ కార్యక్రమానికి దశాబ్ధం నిండుతోన్న సందర్భాన్ని పురస్కరించుకొని.. "సున్నా ప్రభావం, సున్నా లోపం (జీరో ఎఫెక్ట్, జీరో డిఫెక్ట్)"తో భారత్‌లో తయారీ జరగాలన్న ప్రధాని దార్శనికతకు అనుగుణంగా సుస్థిరమైన పద్ధతుల ద్వారా అధిక-నాణ్యత గల వస్తువుల ఉత్పత్తికి ప్రాధాన్యత ఇవ్వడంపై దృష్టి పెట్టి బ్రాండ్ ఇండియాను ప్రోత్సహించాలని భారత పరిశ్రమ ప్రతినిధులకు వాణిజ్య, పరిశ్రమల శాఖ మంత్రి శ్రీ పీయూష్ గోయల్ విన్నవించారు.

ఉత్పత్తి ఆధారిత ప్రోత్సాహక పథకం (పీఎల్ఐ) కింద వారు సాధించిన విజయాలను ప్రశంసిస్తూ 140 పీఎల్‌ఐ ద్వారా లబ్ధి పొందిన కంపెనీల సీఈఓలతో జరిగిన చర్చా కార్యక్రమంలో ఆయన మాట్లాడారు.
కీలక రంగాల్లో వృద్ధిని పెంచడంలో, ఉద్యోగాలను సృష్టించడంలో, తయారీ రంగంలో భారత్‌ను ప్రపంచ నాయకత్వ స్థానంలో నిలబెట్టడంలో కీలక పాత్ర పోషించిన పీఎల్‌ఐ ద్వారా లబ్ది పొందిన కంపెనీలు తీసుకుంటున్న చర్యలను ఆయన ప్రశంసించారు. ప్రపంచ అగ్ర కంపెనీలకు.. వారి అంకితభావానికి, సృజనాత్మక వస్తువుల ఉత్పత్తిలో గణనీయమైన పెట్టుబడులు పెట్టినందుకు, పీఎల్ఐ పథకాల ద్వారా ఉపాధి కల్పనలో సహకరించినందుకు కృతజ్ఞతలు తెలియజేశారు.

భారత్‌ స్వావలంబన సాధించడానికి తమ ఉత్పత్తులకు సంబంధించి దేశీయంగా విలువ జోడింపును పెంచడంపై దృష్టి పెట్టాలని సీఈఓలను కోరారు. ఈ విషయంలో దేశీయ తయారీదారులకు పరిశ్రమల రంగం మద్దతు ఇవ్వాలని ఆయన కోరారు.

మూడు గంటల పాటు జరిగిన ఈ సంభాషణలో లబ్ధిదారులైన కంపెనీల సీఈఓలు పీఎల్ఐ పథకాలపై తమ దృక్పథాన్ని పంచుకున్నారు. అంతేకాకుండా వారి అనుభవాలు, విజయగాథల గురించిన వివరాలను తెలియజేశారు. పథకాల ప్రభావాన్ని మెరుగుపరచడానికి, అమలును క్రమబద్ధీకరించడానికి పలు సూచనలు కూడా చేశారు. పరిశ్రమ ప్రతినిధులు, ప్రభుత్వం మధ్య బహిరంగ సమాచార మార్పిడి కోసం ఈ చర్చ ప్రయోజనకరమైన వేదికగా మారింది. సులభతర వ్యాపారాన్ని ప్రోత్సహించేందుకు చట్టాల సరళీకరణ, నేర పరిధిలోకి వచ్చే నిబంధనలను నేర రహితంగా మార్చటంపై పరిశ్రమ పెద్దల నుంచి అభిప్రాయాన్ని మంత్రి తీసుకున్నారు.

విధానపరమైన మద్దతు, భవిష్యత్తు వృద్ధికి అనువైన వాతావారణాన్ని సృష్టించే ప్రాముఖ్యతను ప్రధానంగా ప్రస్తావించిన ఆయన.. డీపీఐఐటీ సహకారంతో ప్రాజెక్టులను అమలు చేస్తున్న మంత్రిత్వ శాఖలు, విభాగాలు, సంబంధిత పీఎంఓల ద్వారా పరిశ్రమ ప్రతినిధులు, ప్రభుత్వం మధ్య నిరంతర చర్చలు జరగటాన్ని ప్రోత్సహిస్తున్నట్లు తెలిపారు. సాంకేతికత బదిలీ, విదేశీ సహకారాలను సులభతరం చేయడానికి పరిశ్రమ భాగస్వాములు.. ఇన్వెస్ట్ ఇండియా, నేషనల్ ఇన్వెస్ట్ మెంట్ ప్రమోషన్ అండ్ ఫెసిలిటేషన్ ఏజెన్సీలను సంప్రదించొచ్చని ఆయన పేర్కొన్నారు.

పీఎల్ఐ పథకాల పరిధిలో పెట్టుబడులు పెడుతూ, ఉపాధి అవకాశాలను కల్పిస్తున్న ప్రపంచ అగ్ర కంపెనీలకు ఆయన కృతజ్ఞతలు తెలిపారు. పీఎల్ఐ పథకంలోని పరిశ్రమలకు సంబంధించిన అన్ని అనుమతులను త్వరితగతిన ఇచ్చేందుకు, ఎక్కువ మార్కెట్‌‌ను చేరుకోవటంలో సహకారం అందించేందుకు ప్రభుత్వం కట్టుబడి ఉందని ఆయన పేర్కొన్నారు.

పీఎల్‌ఐని అమలు చేస్తున్న మంత్రిత్వ శాఖలు, విభాగాలు, ప్రాజెక్టు నిర్వహణ సంస్థల (పీఎంఏ)కు చెందిన సీనియర్ అధికారులు కూడా ఈ కార్యక్రమంలో పాల్గొన్నారు. 14 రంగాలలో పీఎల్ఐ పథకం సాధించిన స్పష్టమైన ఫలితాలపై ఈ సంభాషణ దృష్టి సారించింది. పీఎల్ఐ పథకం ఆయా రంగాల్లో తయారీ పెరుగుదలకు దారి తీయటంతో పాటు ప్రపంచంలో భారత్‌‍ పోటీతత్వాన్ని మెరుగుపరిచింది.

 

మన్ కీ బాత్
ఈ కార్యక్రమంలో భాగంగా ప్రధాన మంత్రి 114వ మన్ కీ బాత్‌‌ కార్యక్రమాన్ని విన్నారు. భారత్‌ను ఉత్పాదక శక్తిగా మార్చడంలో "భారత్‌లో తయారీ" కార్యక్రమం ఎంతగా దోహదపడిందో ప్రధాని వివరించారు. దీని ఫలితంగా ఎలక్ట్రానిక్స్, రక్షణ, వస్త్రాలు, విమానయానం, వాహనాలు తదితర రంగాలలో ఎగుమతులు పెరగడంతో పాటు విదేశీ ప్రత్యక్ష పెట్టుబడులు (ఎఫ్‌డీఐలు) నిరంతరం పెరుగుతూనే ఉన్నాయని ఆయన అన్నారు. దేశం ఇప్పుడు "నాణ్యత: ప్రపంచ స్థాయి ఉత్పత్తులు", "వోకల్ ఫర్ లోకల్: స్థానిక ఉత్పత్తులను ప్రోత్సహించటం" పై దృష్టి సారించిందని ప్రధానంగా చెప్పారు.

పీఎల్ఐ ప్రభావం

పీఎల్‌ఐ పథకాలు మొత్తంగా సాధించిన విజయాలపై కూడా ఈ సమావేశంలో చర్చించారు. అగస్టు 24 వరకు రూ.1.46 లక్షల కోట్ల వాస్తవ పెట్టుబడులు సాధించామని, వచ్చే ఏడాదిలో ఇది రూ.2 లక్షల కోట్లకు చేరుకునే అవకాశం ఉందన్నారు. దీనివల్ల రూ.12.50 లక్షల కోట్ల విలువైన ఉత్పత్తి, అమ్మకాలు జరిగాయని తెలిపారు. 9.5 లక్షల (ప్రత్యక్ష, పరోక్ష) మందికి ఉపాధి కల్పన జరిగిందని, త్వరలోనే ఇది 12 లక్షలకు చేరుకుంటుందని అంచనా ఉందన్నారు. ఎలక్ట్రానిక్స్, ఫార్మాస్యూటికల్స్, ఆహార శుద్ధి వంటి కీలక రంగాల నుంచి గణనీయమైన సహకారంతో ఎగుమతులు రూ.4 లక్షల కోట్లు దాటాయన్నారు.

ఇప్పుడు దేశంలో మొత్తం ఎలక్ట్రానిక్స్ రంగం ఉత్పత్తిలో మొబైల్ ఫోన్ల తయారీ సగం వాటాను కలిగి ఉంది. వీటికి సంబంధించిన ఎగుమతులు 2020-21 ఆర్థిక సంవత్సరం నుంచి 3 రెట్లు పెరిగాయి. దేశీయంగా బల్క్ డ్రగ్స్, క్లిష్టమైన జనరిక్స్ ఉత్పత్తిని పెంచటం ద్వారా దిగుమతులపై ఆధారపడటాన్ని ఫార్మాస్యూటికల్ పరిశ్రమ తగ్గించింది. ఆటోమొబైల్ రంగంలో ప్రపంచంలో ప్రఖ్యాత కంపెనీలు దేశంలో గణనీయమైన పెట్టుబడులు పెట్టాయి. ఆయా కంపెనీలు ఇక్కడ ఎలక్ట్రిక్ వాహనాలను విడుదల చేశాయి. సీటీ స్కానర్లు వంటి కీలకమైన పరికరాల తయారీ కోసం కావాల్సిన సాంకేతికతల బదిలీ ద్వారా వైద్య పరికరాల పరిశ్రమ దేశీయ ఉత్పత్తుల తయారీని ప్రారంభించింది. అదేవిధంగా ఆహార శుద్ధి రంగం.. సుస్థిర వ్యవసాయ పద్ధతులు, చిరుధాన్యాలు, సేంద్రీయ ఉత్పత్తుల ఉత్పత్తికి దోహదం చేసింది. డ్రోన్లు వంటి అభివృద్ధి చెందుతున్న రంగాల ఆదాయాలు ఏడు రెట్లు పెరిగాయి. దీనికి ఎంఎస్‌ఎంఈలు, అంకురాలు ఎక్కువ దోహదపడ్డాయి. సౌర వీపీ మాడ్యూల్, ప్రత్యేక తరహా ఉక్కుకు సంబంధించిన పరిశ్రమలు కూడా గణనీయమైన పెట్టుబడులు, స్థానిక ఉత్పత్తితో గణనీయమైన వృద్ధిని చూస్తున్నాయి.

***