కార్మికుల కోసం, ప్రత్యేకించి అసంఘటిత రంగంలోని కార్మికులను ఆదుకోవడానికి, కేంద్ర ప్రభుత్వం వేరియబుల్ డియర్‌నెస్ అలవెన్స్ (వీ.డీ.ఏ)ని సవరించింది. దీని ద్వారా కార్మిక కనీస వేతన రేట్లు పెంచుతున్నట్లు కేంద్రం ప్రకటించింది. పెరుగుతున్న జీవన వ్యయాన్ని ఎదుర్కోవడంలో కార్మికులకు సహాయపడే లక్ష్యంతో కేంద్రం ఈ నిర్ణయం తీసుకుంది.

కేంద్ర ప్రభుత్వ ఆధ్వర్యంలోని సంస్థల్లో భవన నిర్మాణం, లోడింగ్, అన్‌లోడింగ్, వాచ్ అండ్ వార్డ్, స్వీపింగ్, క్లీనింగ్, హౌస్ కీపింగ్, మైనింగ్, వ్యవసాయం వంటి వివిధ రంగాల్లో పనిచేస్తున్న కార్మికులకు ఈ సవరించిన వేతన రేట్ల ద్వారా ప్రయోజనం కలుగుతుంది. కొత్త వేతన రేట్లు అక్టోబర్ 1వ తేదీ నుండి అమలులోకి రానున్నాయి. చివరగా ఏప్రిల్ నెలలో ఈ రేట్లను కేంద్రం సవరించింది.

నైపుణ్యం లేని, పాక్షిక నైపుణ్యాలు గల, నైపుణ్యం గల అనేస్థాయుల ఆధారంగా అలాగే భౌగోళిక ప్రాంతం ఆధారంగా ఈ కనీస వేతన రేట్లను A, B, Cలుగా వర్గీకరించారు.

ఈ సవరణ తరువాత, “A” ప్రాంతంలోని నిర్మాణ, స్వీపింగ్, క్లీనింగ్, లోడింగ్ అండ్ అన్‌లోడ్ రంగాల్లో నైపుణ్యం లేని కార్మికులకు రోజుకు రూ. 783 (నెలకు రూ. 20,358), పాక్షిక నైపుణ్యాలు గల కార్మికులకు రోజుకు రూ. 868 (నెలకు రూ. 22,568), క్లరికల్, ఆయుధాలు లేని వాచ్ అండ్ వార్డ్స్ వంటి రంగాల్లో నైపుణ్యం గల కార్మికులకు రోజుకు రూ. 954 (నెలకు రూ. 24,084), అలాగే ఆయుధాలతో గల వాచ్ అండ్ వార్డ్స్ రంగాల్లో అధిక నైపుణ్యం గల కార్మికులకు రోజుకు రూ. 1035 (నెలకు రూ. 26,910) కనీస వేతనం లభించనుంది.    

పారిశ్రామిక కార్మికుల కోసం వినియోగదారుల ధరల సూచీలో ఆరు నెలల సగటు పెరుగుదల ఆధారంగా కేంద్ర ప్రభుత్వం సంవత్సరానికి రెండుసార్లు, ఏప్రిల్ 1, అక్టోబర్ 1 నుండి అమలులోకి వచ్చే విధంగా వీ.డీ.ఏ.ను సవరిస్తుంది.

రంగం, వర్గం, అలాగే ప్రాంతం వారీగా కనీస వేతన రేట్లకు సంబంధించిన సవివరమైన సమాచారం, భారత ప్రభుత్వ కార్మిక శాఖ ప్రధాన కమిషనర్ (కేంద్రం) వెబ్‌సైట్ (clc.gov.in)లో అందుబాటులో ఉంది.