ದೆಹಲಿ-ಎನ್ ಸಿಆರ್ ನಲ್ಲಿ ಹದಗೆಡುತ್ತಿರುವ ಗಾಳಿಯ ಗುಣಮಟ್ಟ ಸಮಸ್ಯೆಯನ್ನು ಪರಿಹರಿಸುವಲ್ಲಿ, ವಿಶೇಷವಾಗಿ ಚಳಿಗಾಲ ಸಮೀಪಿಸುತ್ತಿರುವ ಹಿನ್ನೆಲೆ, ಮಧ್ಯಸ್ಥಗಾರರ ಸನ್ನದ್ಧತೆಯನ್ನು ನಿರ್ಣಯಿಸಲು ಪ್ರಧಾನ ಮಂತ್ರಿಯವರ ಪ್ರಧಾನ ಕಾರ್ಯದರ್ಶಿ ಡಾ. ಪಿ.ಕೆ.ಮಿಶ್ರಾ ಅವರು ಇಂದು ಪ್ರಧಾನ ಮಂತ್ರಿಗಳ ಕಚೇರಿಯಲ್ಲಿ (ಪಿಎಂಒ) ಉನ್ನತ ಮಟ್ಟದ ಕಾರ್ಯಪಡೆ ಸಭೆಯ ಅಧ್ಯಕ್ಷತೆ ವಹಿಸಿದ್ದರು.

ಭತ್ತದ ಕಡ್ಡಿ ಸುಡುವಿಕೆ, ವಾಹನಗಳಿಂದ ಬರುವ ಹೊಗೆ, ರಸ್ತೆ ಮತ್ತು ನಿರ್ಮಾಣ ಧೂಳು, ಘನತ್ಯಾಜ್ಯ ನಿರ್ವಹಣೆ ಮತ್ತು ಡೀಸೆಲ್ ಜನರೇಟರ್ (ಡಿಜಿ) ಸೆಟ್ ಗಳು ಸೇರಿದಂತೆ ವಿವಿಧ ಮೂಲಗಳಿಂದ ಮಾಲಿನ್ಯವನ್ನು ನಿಭಾಯಿಸಲು ನಡೆಯುತ್ತಿರುವ ಪ್ರಯತ್ನಗಳ ಮೌಲ್ಯಮಾಪನವನ್ನು ಸಭೆಯು ಕೇಂದ್ರೀಕರಿಸಿತು. ಚಳಿಗಾಲದ ತಿಂಗಳುಗಳಲ್ಲಿ ಹದಗೆಡುತ್ತಿರುವ ಗಾಳಿಯ ಗುಣಮಟ್ಟವನ್ನು ತಗ್ಗಿಸಲು ಎಲ್ಲಾ ಸಂಬಂಧಿತ ಏಜೆನ್ಸಿಗಳಿಂದ ಗ್ರೇಡೆಡ್ ರೆಸ್ಪಾನ್ಸ್ ಆಕ್ಷನ್ ಪ್ಲಾನ್ (GRAP) ಯ ಕಟ್ಟುನಿಟ್ಟಾದ ಮತ್ತು ಸಮಯೋಚಿತ ಅನುಷ್ಠಾನದ ನಿರ್ಣಾಯಕ ಪ್ರಾಮುಖ್ಯತೆಯನ್ನು ಡಾ. ಮಿಶ್ರಾ ಅವರು ಒತ್ತಿ ಹೇಳಿದರು.

ಏರ್ ಕ್ವಾಲಿಟಿ ಮ್ಯಾನೇಜ್ಮೆಂಟ್ ಆಯೋಗದ (ಸಿಎಕ್ಯೂಎಂ) ಅಧ್ಯಕ್ಷರಾದ ಶ್ರೀ. ರಾಜೇಶ್ ವರ್ಮಾ ಅವರು ಮುಂಬರುವ ಭತ್ತದ ಒಣಹುಲ್ಲಿನ ಉತ್ಪಾದನೆಯ ವಿವರಗಳನ್ನು ಪ್ರಸ್ತುತಪಡಿಸಿದರು. ಪಂಜಾಬ್ನಲ್ಲಿ 19.52 ಮಿಲಿಯನ್ ಟನ್ ಮತ್ತು ಹರಿಯಾಣದಲ್ಲಿ 8.10 ಮಿಲಿಯನ್ ಟನ್ ಗಳಷ್ಟು ಉತ್ಪಾದನೆ ಇದೆ ಎಂದು ತಿಳಿಸಿದರು. ಎರಡೂ ರಾಜ್ಯಗಳು ಈ ವರ್ಷ ಹುಲ್ಲು ಸುಡುವುದನ್ನು ತಡೆಯಲು ಬದ್ಧವಾಗಿವೆ. ಪಂಜಾಬ್ ತನ್ನ 11.5 ಮಿಲಿಯನ್ ಟನ್ ಭತ್ತದ ಒಣಹುಲ್ಲಿನ ಇನ್-ಸಿಟು ಬೆಳೆ ಶೇಷ ನಿರ್ವಹಣೆಯ ಮೂಲಕ ಮತ್ತು ಉಳಿದವನ್ನು ಎಕ್ಸ್-ಸಿಟು ವಿಧಾನಗಳ ಮೂಲಕ ನಿರ್ವಹಿಸಲು ಯೋಜಿಸಿದೆ. ಹರಿಯಾಣವು ಅದೇ ರೀತಿಯಲ್ಲಿ 3.3 ಮಿಲಿಯನ್ ಟನ್ ಗಳನ್ನು ಇನ್-ಸಿಟು ನಿರ್ವಹಿಸುತ್ತದೆ ಮತ್ತು ಉಳಿದವುಗಳಿಗೆ ಎಕ್ಸ್-ಸಿಟು ವಿಧಾನಗಳನ್ನು ಬಳಸುತ್ತಿದೆ. ಪಂಜಾಬ್ನಲ್ಲಿ 1.50 ಲಕ್ಷಕ್ಕೂ ಹೆಚ್ಚು ಬೆಳೆ ಶೇಷ ನಿರ್ವಹಣೆ (ಸಿಆರ್ಎಮ್) ಯಂತ್ರಗಳು ಲಭ್ಯವಿದ್ದು, 24,736 ಕಸ್ಟಮ್ ಹೈರಿಂಗ್ ಸೆಂಟರ್ ಗಳಿಂದ (ಸಿಎಚ್ ಸಿಎಸ್) ಬೆಂಬಲಿತವಾಗಿದೆ, ಆದರೆ ಹರಿಯಾಣವು 90,945 CRM ಯಂತ್ರಗಳನ್ನು 6,794  ಸಿಎಚ್ ಸಿಎಸ್ ಗಳಿಂದ ಬೆಂಬಲಿತವಾಗಿದೆ. 

ಕೈಗಾರಿಕಾ ಮಾಲಿನ್ಯಕ್ಕೆ ಸಂಬಂಧಿಸಿದಂತೆ, ಎನ್ ಸಿಆರ್ ನ 240 ಕೈಗಾರಿಕಾ ಪ್ರದೇಶಗಳ ಪೈಕಿ 220 ಕೈಗಾರಿಕಾ ಪ್ರದೇಶಗಳು ಈಗ ಅನಿಲ ಮೂಲಸೌಕರ್ಯವನ್ನು ಹೊಂದಿದ್ದು, ಉಳಿದ ಪ್ರದೇಶಗಳಿಗೆ ಶೀಘ್ರದಲ್ಲೇ ಸಂಪರ್ಕ ಕಲ್ಪಿಸಲಾಗುವುದು ಎಂದು ಸಿಎಕ್ಯೂಎಮ್ ಮಾಹಿತಿ ನೀಡಿದೆ. 500 ಚದರ ಮೀಟರ್ ಗಿಂತ ಹೆಚ್ಚಿನ ಪ್ರಾಜೆಕ್ಟ್ಗಳಿಗೆ ಕಡ್ಡಾಯ ನೋಂದಣಿಯೊಂದಿಗೆ ವೆಬ್ ಪೋರ್ಟಲ್ ಮೂಲಕ ನಿರ್ಮಾಣ ಮತ್ತು ಡೆಮಾಲಿಷನ್ (ಸಿ&ಡಿ) ಚಟುವಟಿಕೆಗಳಿಂದ ಧೂಳಿನ ಮಾಲಿನ್ಯವನ್ನು ದೂರದಿಂದಲೇ ಮೇಲ್ವಿಚಾರಣೆ ಮಾಡಲಾಗುತ್ತಿದೆ.

ಡಾ. ಮಿಶ್ರಾ ಅವರು ಪಂಜಾಬ್, ಹರಿಯಾಣ ಮತ್ತು ಉತ್ತರ ಪ್ರದೇಶದ ಮುಖ್ಯ ಕಾರ್ಯದರ್ಶಿಗಳಿಗೆ ತಮ್ಮ ಕ್ರಿಯಾ ಯೋಜನೆಗಳಲ್ಲಿ ಬದ್ಧವಾಗಿರುವಂತೆ ಹುಲ್ಲು ಸುಡುವಿಕೆಯನ್ನು ತೆಗೆದುಹಾಕುವ ಗುರಿಯನ್ನು ಕಟ್ಟುನಿಟ್ಟಾಗಿ ಮೇಲ್ವಿಚಾರಣೆ ಮಾಡಲು ಮತ್ತು ಕಾರ್ಯಗತಗೊಳಿಸಲು ಸೂಚಿಸಿದರು. CRM ಯಂತ್ರಗಳ ಸಂಪೂರ್ಣ ಬಳಕೆಯ ಅಗತ್ಯವನ್ನು ಅವರು ಒತ್ತಿಹೇಳಿದರು, ಎಕ್ಸ್-ಸಿಟು ನಿರ್ವಹಣೆಗಾಗಿ ಪೂರೈಕೆ ಸರಪಳಿಯನ್ನು ಬಲಪಡಿಸುವುದು ಮತ್ತು ಭತ್ತದ ಒಣಹುಲ್ಲಿನ ಆರ್ಥಿಕ ಬಳಕೆಯನ್ನು ಹೆಚ್ಚಿಸಲು ಸಣ್ಣ ಕೈಗಾರಿಕೆಗಳನ್ನು ಬ್ರಿಕೆಟಿಂಗ್ ಮತ್ತು ಪೆಲೆಟೈಸಿಂಗ್ ಕಾರ್ಯಾಚರಣೆಗಳಲ್ಲಿ ಬೆಂಬಲಿಸುವುದು. ಪ್ರಮುಖವಾಗಿ ನಿಯಮ ಉಲ್ಲಂಘಿಸುವವರ ವಿರುದ್ಧ ಕಟ್ಟುನಿಟ್ಟಾದ ಕ್ರಮಗಳು, ಸೂಕ್ತವಾದ ದಂಡಗಳು ಮತ್ತು ದಾಖಲೆ ನಮೂದುಗಳನ್ನೂ ಸಹ ತಿಳಿಸಿದರು.

ಪ್ರಧಾನ ಕಾರ್ಯದರ್ಶಿಯವರು ಎನ್ ಸಿಆರ್ ಸುತ್ತಮುತ್ತಲ ರಾಜ್ಯಗಳ ಮುಖ್ಯ ಕಾರ್ಯದರ್ಶಿಗಳಿಗೆ ತಮ್ಮ ಇ-ಬಸ್ ಸೇವೆಗಳನ್ನು ಎನ್ ಸಿಆರ್ ನಲ್ಲಿ ಹೆಚ್ಚಿಸಲು ವಿನಂತಿಸಿದ್ದಾರೆ. ಪಿಎಮ್ ಇ-ಬಸ್ ಸೇವಾ ಯೋಜನೆಯು ನಮ್ಮ ದೇಶದಲ್ಲಿ 10,000ದ ವರೆಗೆ ಇ-ಬಸ್ ಗಳನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ. ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳು ಆಧುನಿಕ ಇ-ಬಸ್ ಗಳ ಸಂಚಾರವನ್ನು ಹೆಚ್ಚಿಸಿ, ವಿವೇಚನೆಯಿಂದ ಯೋಜನೆಯನ್ನು ಬಳಸಿಕೊಳ್ಳುವ ಗುರಿಯನ್ನು ಹೊಂದಿರಬೇಕು.

'ತಾಯಿಯ ಹೆಸರಿನಲ್ಲಿ ಒಂದು ಮರ' ಕಾರ್ಯಕ್ರಮದ ಮಹತ್ವವನ್ನು ಅವರು ಒತ್ತಿ ಹೇಳಿದರು ಮತ್ತು ಪ್ರತಿಯೊಬ್ಬ ವ್ಯಕ್ತಿ ಅದರ ಭಾವನಾತ್ಮಕ ಮೌಲ್ಯವನ್ನು ನಗರವನ್ನು ಹಸಿರಾಗಿಸುವಲ್ಲಿ ಬಳಸಬೇಕು ಎಂದು ತಿಳಿಸಿದರು.

ಪಟಾಕಿಗಳಿಂದ ಮಾಲಿನ್ಯದ ಹಿನ್ನೆಲೆಯಲ್ಲಿ , ರಾಜ್ಯ ಸರ್ಕಾರಗಳು ಮತ್ತು ಕಾನೂನು ಜಾರಿ ಸಂಸ್ಥೆಗಳು ನಿಷೇಧವನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸುವಂತೆ ಕೇಳಿಕೊಳ್ಳಲಾಗಿದೆ. ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯವು ಬಯೋಮಾಸ್ ಸಂಗ್ರಹಣೆ ಮತ್ತು ಸಂಕುಚಿತ ಜೈವಿಕ ಅನಿಲ (CBG) ಸ್ಥಾವರಗಳ ನಿರ್ಮಾಣವನ್ನು ವೇಗಗೊಳಿಸಲು ಒತ್ತಾಯಿಸಲಾಯಿತು.

ಸಭೆಯಲ್ಲಿ ಕ್ಯಾಬಿನೆಟ್ ಕಾರ್ಯದರ್ಶಿ ಡಾ. ಟಿ.ವಿ. ಸೋಮನಾಥನ್ , ದೆಹಲಿ ಪೊಲೀಸ್ ಕಮಿಷನರ್ ಮತ್ತು ಪರಿಸರ , ಕೃಷಿ , ವಿದ್ಯುತ್ , ಪೆಟ್ರೋಲಿಯಂ , ರಸ್ತೆ ಸಾರಿಗೆ , ವಸತಿ ಮತ್ತು ನಗರ ವ್ಯವಹಾರಗಳು ಮತ್ತು ಪಶುಸಂಗೋಪನೆ ಮತ್ತು ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ (CPCB) ಸಚಿವಾಲಯಗಳ ಪ್ರಮುಖ ಅಧಿಕಾರಿಗಳು ಉಪಸ್ಥಿತರಿದ್ದರು.ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಗಳು (SPCBs) ಮತ್ತು ಪಂಜಾಬ್ , ಹರಿಯಾಣ , ಉತ್ತರ ಪ್ರದೇಶ , ರಾಜಸ್ಥಾನ ಮತ್ತು ದೆಹಲಿಯ ಕೇಂದ್ರಾಡಳಿತ ಪ್ರದೇಶದ ಮುಖ್ಯ ಕಾರ್ಯದರ್ಶಿಗಳು ಮತ್ತು ಅವರ ಪ್ರತಿನಿಧಿಗಳು ಭಾಗವಹಿಸಿದ್ದರು.

*****