নহারোলশিংগী মরক্তা হিদাকমনা শীজিন্নবা থিংনবা শিংথানিঙাই ওইবা খোঙথাং অমদা, ইজুকেসন মিনিস্ত্রি অমসুং হেল্থ অমসুং ফেমিলি ৱেলিফিয়ার মিনিস্ত্রিগী সেক্রেতরিশিংনা রাজ্যশিং অমসুং য়ু.তিশিংদা অপুনবা চেকশিনৱা অমা পীখ্রে। চীফ সেক্রেতরিশিংদা পীখিবা চেকশিনৱা অদুদা, সিগরেতস এন্দ অদর তোবেক্কো প্রদক্স এক্ত (কোতপা), ২০২৩গী প্রোবিজনশিংগী মতুংইন্না মহৈলোয়শঙশিংদা তোবেক্কো-ফ্রি ইজুকেসনেল ইন্সতিতুসন(তোফৈ) মেনুএল থবক ওইনা পাংথোক্নবা অকনবা পাউতাক পীখ্রে।

স্কুল ইজুকেসন দিপার্তমেন্ত, হয়র ইজুকেসন দিপার্তমেন্ত অমসুং হেল্থ অমসুং ফেমিল ৱেলিফিয়ার দিপার্তমেন্তগী সেক্রেতরিশিংনা খুৎয়েক পীবা অপুনবা চেকশিনৱা অদুদা, অঙাংশিং অমসুং ইনখৎলক্লিবা নহারোলশিংনা হিদাকমনা শীজিন্নবগী অমাঙবশিং পল্লি। গ্লোবেল য়ুথ তোবেক্কো সর্ভে(জি ৱাই তি এস) ২০১৯গী মতুংইন্না ভারত্তা চহি ১৩ দগী চহি ১৫ ফাওবগী মনুংদা লৈবা স্কুলগী মহৈরোয়শিংগী চাদা ৮.৫ তোঙান-তোঙানবা মওংগী হিদাকমনাশিং শীজিন্নৈ হায়রি। য়াম্না নুঙনাংনিঙাই ওইবা অমদা, ভারত্তা নুমিৎ খুদিংগী অঙাং ৫,৫০০ হিদাকমনা শীজিন্নবা হৌই হায়রি। মসিগী মথক্তা, পুন্সি চুপ্পা হিদাকমনা শীজিন্নবা মীওইশিংগী চাদা ৫৫, চহি ২০গী মমাঙদা হিদাকমনা শীজিন্নবগী হৈনবী লৈবা হৌখি অমসুং মসিনা মরম ওইদুনা ইনখৎলক্লিবা মীওই কয়া লাইচুখি।

নহারোলশিং হিদাকমনাদা লাইচুবদগী ঙাকথোক্নবা মরীলৈনবা খুদিংমক অপুনবা ওইনা থবক তৌমিন্নবগী দরকার ওইবা অদু চেকশিনৱা অদুদা পল্লি। মসিগী পান্দমদি হিদাকমনা শীজিন্নবগী অমাঙবশিং খঙবা হেনগৎহন্দুনা অমসুং মহৈলোয়শঙ মনুংদা হিদাকমনা থিংনবা থবকশিং হেন্না পায়খৎতুনা তুংগী মীরোলশিং ঙাক-শেনবনি।

নেসনেল তোবেক্কো কন্ত্রোল প্রোগ্রাম(এন তি সি পি), হেল্থ অমসুং ফেমিলি ৱেলিফিয়ার, ভারত সরকারগী শরুক অমা ওইনা, নহারোলশিং অমসুং অঙাংশিং হিদাকমনা অমসুং ইলেক্ত্রোনিক সিগরেত শীজিন্নবা থিংনবা তোবেক্কো ফ্রি ইজুকেসনেল ইন্সতিতুসন্স (তোফৈ)গী চৎন-কাংলোনশিং ফোঙলে। মসিগী মথক্তা, সোসিও ইকোনোমিক এন্দ ইজুকেসনেল দিবলপমেন্ত সোসাইতি(সিদস) গা লোয়ননা মালেমগী হিদাকমনা শীজিন্নদবা নুমিত্তা স্কুল ইজুকেসন অমসুং লিতেরেসি দিপার্তমেন্তনা তোফৈ ইমপ্লিমেন্তসন মেনুএল পুথোক্লে অমসুং ফোঙলে। দিপার্তমেন্তনা মে ৩১, ২০২৪ দা রাজ্যশিং অমসুং য়ু.তিশিংদা মেনুএল পীখ্রে।

হিদাকমনা শীজিন্নদনবা থবকশিং মপুংফানা পায়খৎনবা তোবেক্কো ফ্রি ইজুকেসনেল ইন্সতিতুসন্স মেনুএল অসি মহৈলোয়শঙশিংগী মরুওইবা রিছোর্স অমা ওইরে। মেনুএল অদুদা মখাগী পান্দমশিং অসি য়াওরি:

i. মহৈলোয়শঙশিংদা মহৈরোয়শিং, ওজাশিং, শিন্মীশিং অমসুং ওফিসিএলশিংদা হিদাকমনাগী অমাঙবশিংগী মরমদা হেন্না খঙহনবা;

ii. হিদাকমনাদগী লাপথোক্নবা তোঙান-তোঙানবা পাম্বৈশিংগী মরমদা খঙহনবা;

iii. মহৈলোয়শঙশিংদা মশা-মউ ফবা অমসুং হিদাকমনা শীজিন্নদবা ফিবম অমা লৈহনবা অমসুং মহৈলোয়শঙ খুদিংমক হিদাকমনা শীজিন্নদবা;

iv. মহৈলোয়শঙশিং, মীয়াম তিনবা মফমশিং, আইনগী চেকশিনৱা পীবা অমসুং অপীকপা অঙাংশিংগী মতাংদা, হিদাকমনা শীজিন্নবা অমসুং য়োনবগী মতাংদা  আইন্না পীরিবা প্রোবিজনশিং থবক ওইনা পাংথোকপা।

সরকার অমসুং লনাইগী স্কুলশিং, কলেজশিং, য়ুনিভর্সিতিশিং অমসুং প্রোফেসনেল ইন্সতিতুসনশিংনা মহৈরোয়শিংগী য়াইনবা অমসুং হকশেল ঙাক-শেন্নবা তোবেক্কো ফ্রি ইজুকেসনেল ইন্সতিতুসন্স (তোফৈ)গী চৎন-কাংলোনশিং চৎন্নবা চেকশিনৱা অসিনা পুক্নিং থৌগৎলি।

অপুনবা থবকশিং পায়খৎতুনা, অঙাংশিংগী মরক্তা হিদাকমনা শীজিন্নবা হন্থহন্নবা অমসুং তুংগী মীরোলশিংদা লাইচুবদগী কলহৌনবা সরকারনা পান্দম থম্লি। হায়রিবা থবকশিং অসি মহৈলোয়শঙশিংদা মপুংফানা থবক ওইনা পাংথোক্নবা ইজুকেসন মিনিস্ত্রি অমসুং হেল্থ অমসুং ফেমিলি ৱেলফিয়ার মিনিস্ত্রিনা রাজ্য থাক্কী অমসুং জিলা থাক্কী ওফিসিএলশিংগা য়াম্না নকশিন্ননা থবক তৌমিন্নগনি।

তোবেক্কো ফ্রি ইজুকেসনেল ইন্সতিতুসন্স (তোফৈ)গী চৎন-কাংলোনশিং ফংনবা য়ু.আর.এল : https://dsel.education.gov.in/sites/default/files/update/im_tofel.pdf

তোবেক্কো ফ্রি ইজুকেসনেল ইন্সতিতুসন্স (তোফৈ)গী চৎন-কাংলোনশিং ফংনবা য়ু.আর.এল https://dsel.education.gov.in/sites/default/files/update/im_tofel.pdf

****