প্রধান মন্ত্রী শ্রী নরেন্দ্র মোদীনা, ৱার্ল্দ ফুদ ইন্দিয়া ২০২৪ দা মহাক্কী পাউজেল অমদা হায়খি মদুদি ৱার্ল্দ ফুদ ইন্দিয়া ২০২৪ পাংথোকপা অসিদা অপেনবা পোকই। মালেমগী তোঙান-তোঙানবা মফমশিংদগী লাক্তুনা থৌরম অসি শরুক য়ারিবা মীওইশিংদা মহাক্না তরাম্না ওকখি অমসুং য়াইফ-পাউজেল পীখি।

প্রধান মন্ত্রীনা হায়খি মদুদি ৱার্ল্দ ফুদ ইন্দিয়া ২০২৪ দা লৈবাক কয়া শরুক য়াবা অসিনা মালেমগী চীঞ্জাক্কী উদ্যোগকী, মহৈলোয়শঙগী অমসুং থিজিনবগী খ্বাইদগী ফবা লৌশিং কয়াগী অফবা মফম অমা ওইরে অমসুং লৈবাক অমনা লৈবাক অমদগী অখঙবশিং তম্নবা লম্বী অনি ওইরে।

প্রধান মন্ত্রীনা হায়খি মদুদি ভারত্তা মখল কয়াগী অমসুং হাওরবা চীঞ্জাকশিং ফংলি। ভারতকী চীঞ্জাক পুথোকপগী য়াংলেন শরুক অসি লৌমীশিংনি। মচি ওইবা অমসুং অহাওবা চীঞ্জাকশিং পুথোকপা ঙম্লিবা অসি লৌমীশিংনা ঙমহনবনি। অনৌবা থৌশিলশিং অমসুং থবক ওইনা পাংথোক্তুনা ঐখোয়না লৌমীশিংগী শুবা-নোম্বা কনবদা মতেং পাংলি।

মহাক্কী পাউজেলদা প্রধান মন্ত্রীনা মখা তানা হায়খি মদুদি অনৌবা যুগ অসিদা, অফবা লৌউ-শিংউগী থবকশিং, অকনবা লৈঙাক্কী ঙাক্লৌশিং অমসুং অৱাংবা থাক্কী তেক্নোলোজিশিংগা লোয়ননা, চীঞ্জাক পুথোকপগী লমদা অনৌবা থবক, তুংকোইনা চৎনবা য়ানবা অমসুং অশোই-অঙাম থোকহন্দনবগীদমক ভারতনা মালেমগী থাকশিং য়ৌবা ঙম্নবা ঐখোয়না হোৎনরি। হৌখিবা চহি ১০ দা, চীঞ্জাক পুথোকপগী লমদা অওনবা পুরক্নবা ঐখোয়না অনৌবা থবক কয়া পায়খৎলে।   চীঞ্জাক শেম-শাবগী থবক্তা এফ.দি.আই চাদা ১০০, প্রধান মন্ত্রী কিষান সম্পদা য়োজনা, মাইক্রো ফুদ প্রোসেসিং ইন্তরপ্রাইজশিং মওং তানা থবক তৌহন্দুনা, চীঞ্জাক পুথোকপা উদ্যোগশিংগী প্রদক্সন লিঙ্ক ইন্সেন্তিপ স্কিম পায়খৎতুনা, অনৌবা ইনফ্রাস্ত্রকচরশিং, অফবা সপ্লাই চেনশিং অমসুং লৈবাক শীনবা থুংনা থবক ফংনবা থৌরাং কয়া পায়খৎলে।

শ্রী নরেন্দ্র মোদীনা হায়খি মদুদি ঐখোয়গী পান্দমগী মরুওইবা শরুক অমদি অপীকপা ইন্তরপ্রাইজশিং ফগৎহনবনি। ঐখোয়গী এম.এস.এম.ইশিং ফগৎহনবা অমসুং মালেমগী ভেলু চেনগী তৎনবা য়াদ্রবা শরুক অমা ওইহনবা অমসুং নুপীশিং মাইক্রো ওন্ত্রেপ্রেনিউয়রশিং ওইহনবা ঐখোয়না পাম্মী। অসিগুম্বা তাঞ্জা অসিদা, ঐখোয়না বি২বিগী ৱারি শান্নদুনা অমসুং একজিবিসনশিং পাংথোক্তুনা, বয়র-সেল্লর মীফমশিং পাংথোক্তুনা অমসুং লৈবাক্কী, রাজ্যগী অমসুং অকক্নবা হিরমশিংগী মীফমশিং পাংথোক্তুনা থবক তৌনবগী অফবা মফম অমা ৱার্ল্দ ফুদ ইন্দিয়ানা পীরে।

প্রধান মন্ত্রীনা হায়খি মদুদি মসিগী মথক্তা, ফুদ সেফতি এন্দ স্তেন্দার্দস ওথোরিতি ওফ ইন্দিয়া(ফসাই)না শীন্দুনা মালেমগী ফুদ রিগুলেতরশিংগী মীফম পাংথোকপা অসিনা ফুদ সেফতি, মগুন লৈহন্নবা থবকশিং অমসুং খ্বাইদগী ফবা থবকশিং য়াওনা হিরম কয়াদা দব্লিউ.ঐচ.ও, এফ.এ.ও অমসুং লেমজনিঙাই ওইরবা লৈবাক অসিগী ইন্সতিতুৎশিং য়াওনা মালেমগী রিগুলেতরশিং মফম অমদা পুল্লগনি।

প্রধান মন্ত্রীনা হায়খি মদুদি মরুওইবা হিরমশিং হায়বদি চীঞ্জাক কুইনা থম্বা য়ানবা অমসুং চীঞ্জাক মাঙহনবা হন্থনবা ফুদ ইরাদিএসন তৌবা, মচি ওইবা চীঞ্জাক ফংনবা অমসুং তুংকোইনা শীজিন্নবা য়ানবা পাম্বীশিংদগী লৌবা প্রোতিন শীজিন্নবা অমসুং সর্কুলার ইকোনোমিগী মরমদা উৎকনি। তুংকোইনা চৎনবা য়াগদবা, অশোই-অঙাম লৈতবা, খুদিংমক কোনশিনবা অমসুং মচি ওইবা চীঞ্জাক চাবা ফংবা মালেম অমা ওইহন্নবা মঙলান মঙফাওনবা ঙম্নবা ঐখোয় মাঙলোমদা চঙশিল্লসি।

শেন থাদবা হেনগৎহনবা অমসুং ললোন-ইতিক চৎথবা লাইহনবদা মীৎয়েং থমদুনা ৱার্ল্দ ফুদ ইন্দিয়াদা কম্মর্স মিনিস্তর শ্রী পিয়ুস গোয়াল অমসুং ফুদ প্রোসেসিং ইন্দস্ত্রিগী মিনিস্তর শ্রী চিরাগ পাসৱান্না কো-চিয়ারপর্সন ওইদুনা অৱাংবা থাক্কী  সি.ই.ও রাউন্দতেবল অমা পাংথোকখ্রে। মীফম অদু শেন থাদবা হেনগৎহনবা অমসুং ললোন-ইতিক চৎথবা লাইহনবদা মীৎয়েং থমখি অমসুং সি.এক্স.ও ১০০ হেন্না শরুক য়াখি। 

রাউন্দতেবল অদুদা ফুদ প্রোসিসিং অমসুং রেলৱেজগী রাজ্য মন্ত্রী শ্রী রবনিত সিংহ বিত্তু, অন্ধ্র প্রদেসকী ইন্দস্ত্রিজ অমসুং কম্মর্স মিনিস্তর শ্রী তি.জি ভারত অমসুং গুজরাতকী এগ্রিকলচর মিনিস্তর শ্রী রাঘবজি পতেল অমসুং ভারত সরকার অমসুং রাজ্য সরকারশিংগী তোঙান-তোঙানবা মিনিস্ত্রিশিংগী সেনিয়র ওফিসিএলশিং শরুক য়াখি।

ঙসি নিউ দিল্লিগী ভারত মন্দাপমদা, নিউ অমসুং রিন্যুএবল ইনর্জি অমসুং কঞ্জুমর এফেয়ার্স, ফুদ অমসুং পব্লিক দিস্ত্রিব্যুসনগী মিনিস্তর শ্রী পালহাদ জোসিনা ফুদ প্রোসেসিং ইন্দস্ত্রিগী মিনিস্তর শ্রী চিরাগ পাসৱান অমসুং ফুদ প্রোসেসিং অমসুং রেলৱেজগী রাজ্য মন্ত্রী শ্রী রবনিত সিংহ বিত্তুগা লোয়ননা ৱার্ল্দ ফুদ ইন্দিয়া ২০২৪ দা ৩শুবা মেগা ফুদ ইনভেন্ত হৌদোকখ্রে। মখোয়না একজিবিসনগী স্তোলশিংশু য়েংখি। থৌরম অসি সেপ্তেম্বর ১৯ দগী সেপ্তেম্বর ২২, ২০২৪ ফাওবা পাংথোক্কনি।

থৌরম অদুদা তিনখিবা মীয়ামদা ৱা ঙাংবদা নিউ অমসুং রিন্যুএবল ইনর্জি অমসুং কঞ্জুমর এফেয়ার্স, ফুদ অমসুং পব্লিক দিস্ত্রিব্যুসনগী মিনিস্তর শ্রী পালহাদ জোসিনা হায়খি মদুদি চীঞ্জাক ৱাত্তনবা, তুংকোইনা চৎনবা য়াবা অনৌবা থবকশিং পায়খৎপদা ভারতনা শিংথাবা য়াবা থবক কয়া পায়খৎলে। চারা হেনবা লৈতবা মালেম অমা ওইহন্নবা, লৈবাক অসিগী অমসুং মালেমগী কঞ্জুমরশিংগীদমক অফবা মগুন লৈবা চীঞ্জাকশিং পুথোক্নবা সরকারনা থবক পায়খৎলে। লৌমীশিংগী শেন্থোক হেনগৎহন্নবা, তেক্নোলোজি শীজিন্নবা হেনগৎহন্নবা অমসুং মখোয়গী পোৎথোকশিং চুনবা মমলদা য়োনবা ফংনবা থবকশিং য়াওনা লৌমীশিংগী য়াইফনবা থবক কয়া পায়খৎলে।

মিনিস্তর চিরাগ পাসৱান্না হায়খি মদুদি থৌরম অসি ফুদ প্রোসেসিং ইন্দস্ত্রিদা মালেমগী লুচিংবা অমা ওইনবা ভারতকী খোঙচৎকী মরুওইবা তাঞ্জা অমনি। মালেমগী লৈবাকশিং, উদ্যোগকী লুচিংবশিং, থৌশিল শেম্বশিং অমসুং অনৌবা থবক পাংথোকপশিং পুন্দুনা ফুদ প্রোসেসিংগী শক্তি লৈবা লৈবাক অমা ওইনবা ভারতকী পায়খৎলিবা থবকশিং থৌরম অসিদা উৎলে। মপান্দা থাদোকপা হেনগৎহনবা, থবক পীবা অমসুং লৌমীশিংগী শেন্থোক হেনগৎহনবদা চীঞ্জাক শেম-শাবগী উদ্যোগনা মরুওইবা থৌদাং অমা লৌরে। থৌশিলশিং অমসুং থবকশিংনা মতেং পাংদুনা তুংদা মালেমদা চীঞ্জাক ৱাত্তনা ফংহন্নবা ভারতনা পায়খৎলিবা থবকশিং থৌরম অসিদা উবা ফংলে। চীঞ্জাক শেম-শাবগী তুংগী ফিবম শেম্নবা মালেমগী ওইনা মতেং পাংনবা, অনৌবা থবক পায়খৎপা অমসুং শেন থাদবদা ভারতনা মালেমদা মরুওইবা থৌদাং অমা লৌবগা লোয়ননা শেন-থুম চাউখৎহনগনি অমসুং মহৌশাগী অকোয়গী ফিবম ফগৎহন্নবা লমজিংগনি।

মিনিস্তর রবনিত সিংহনা হায়খি চীঞ্জাক পুথোকপা অমসুং শেম-শাবগী হিরমদা ভারত মালেমগী লুচিংবা অমা ওইরক্লে। তুংকোইনা চৎনবা থবকশিং, চীঞ্জাক মাংহন্দনবা থবকশিং, রিন্যুএবল ইনর্জি শীজিন্নবা অমসুং মহৌশাগী অকোয়বগী ফিবম শোকহন্দবা থবকশিংদা সরকারনা মীৎয়েং চঙলে।

থৌরম অসিগী মরুওইবা অমদি ফুদ প্রোসেসিং ইন্দস্ত্রিস মিনিস্ত্রিগী পি.এল.আই.এস অমসুং পি.এম.কে.এস.ৱাইগী মখাদা মিনিস্ত্রিনা মতেং পাংবা ফুদ প্রোসেসিং য়ুনিত ৫০ হেন্না শঙ্গাখ্রে, পি.এম.এফ.এম.ই বেনিফিসরি ২৫,০০০দা ক্রেদিৎ লিঙ্ক সবসিদিশিং য়েন্থোকখ্রে অমসুং এস.ঐচ.জি মেম্বর ৭০,০০০ দা সিদ কেপিতেল সেঙ্কসন তৌবা অসিনি।

অমোৎপা লোইশিনবদা অনৌবা থবকশিং পাংথোক্নবা, ঈশিং ফজনা শীজিন্ননবা, চীঞ্জাক শেম-শাবগী অনৌবা তেক্নোলোজিশিংগী পুক্নিং থৌগৎনবা পাংথোকখিবা স্তার্দঅপ গ্রান্ত চেলেঞ্জদা মাইপাক্লবশিংদা মনা য়েন্থোকখ্রে। মাইপাক্লবশিংদা নিফতেম-কুন্দলিগী খুৎথাংদা শেন্থং অমসুং ইনকুবেসনগী মতেং পাংগনি।

থৌরম অসিদা সরকারগী বোদিশিং, উদ্যোগকী শীনফমদা লৈরিবা মীওইশিং, লৌমীশিং, ওন্ত্রেপ্রেনিউয়রশিং অমসুং অতোপ্পা মরী লৈনবশিং এগ্রি-ফুদ সেক্তরদা পুন্না থবক তৌমিন্ননবা অমসুং শেন থাদনবগী খুদোংচাবশিং মশক খঙদোক্নবা খন্ন-নৈনবশিং পাংথোকখি।

থৌরম অসিদা তোঙান-তোঙানবা পেবিলিয়নশিংদা স্তার্দঅপ অমসুং তেক্নোলোজি য়াওনা ভারতকী চীঞ্জাক শেম-শাবগী উদ্যোগকী অনৌবা অমসুং অফবা থবক কয়া উৎখি। ৱার্ল্দ ফুদ ইন্দিয়াগী শরুক অমা ওইনা সেপ্তেম্বর ২০-২১,২০২৪ দা  ফুদ সেফতি এন্দ স্তেন্দার্দস ওথোরিতি ওফ ইন্দিয়া(ফসাই)না শীন্দুনা মালেমগী ফুদ রিগুলেতরশিংগী মীফম পাংথোক্কনি। মীফম অসিদা ফুদ সেফতি, মগুন লৈহন্নবা থবকশিং অমসুং খ্বাইদগী ফবা থবকশিং য়াওনা হিরম কয়াদা দব্লিউ.ঐচ.ও, এফ.এ.ও অমসুং লেমজনিঙাই ওইরবা লৈবাক অসিগী ইন্সতিতুৎশিং য়াওনা মালেমগী রিগুলেতরশিং মফম অমদা পুল্লগনি।

থৌরম অসিদা ফুদ প্রোসেসিং ইন্দস্ত্রিগী তোঙান-তোঙানবা হিরমশিংদা মীৎয়েং থমদুনা সেসন ৪০ হেন্না পাংথোক্কনি অমসুং মগুন লৈহনবা অমসুং মেছিন অমসুং তেক্নোলোজিগী অনৌবা থবকশিংগী মতাংদা খন্নগনি। থৌরম অসিদা মালেমগী লৈবাক ৯০ হেনবা শরুক য়ারি অমসুং  বয়র সেল্লর মিতগীদমক বয়র ১০০০ অমসুং মমিং লৈরবা ফুদ প্রোসেসিং কম্পেনিশিংগী সি.ই.ওশিং শরুক য়ারি।

ফুদ প্রোসেসিং ইন্দস্ত্রি মিনিস্ত্রিগা পুন্না থবক তৌমিন্নদুনা জপান্না পার্তনর লৈবাক অমা ওইরি অমসুং ভিয়েতনাম অমসুং ইরান্না থৌরম অসিগী ফোকস লৈবাকশিং ওইরি। লৈবাক অসিগী রাজ্য অমসুং য়ু.তি ২৬ অমসুং য়ুনিয়ন মিনিস্ত্রি অমসুং এল্লাইদ গভর্নমেন্ত বোদি ১৮ থৌরম অসিদা শরুক য়ারি।

*****