প্রধান মন্ত্রী শ্রী নরেন্দ্র মোদী সেপ্তেম্বর ২০ দা মহারাস্ত্রাগী ৱার্ধাদা চৎকনি। মহাক্না অয়ুক পুং ১১:৩০ রোম তাবদা, পি.এম বিশ্বকর্মাগী মখাদা চহি অমা মাইপাক্না থবক পায়খৎলকপগী নেসনেল পি.এম বিশ্বকর্মা প্রোগ্রাম শরুক য়াগনি।

থৌরম মনুংদা, প্রধান মন্ত্রীনা পি.এম বিশ্বকর্মা বেনিফিসরিশিংদা শক্তাকচেশিং অমসুং লোনশিং য়েন্থোক্কনি। স্কিম অসিগী মখাদা খুৎহৈবশিংদা মতেং পাংবগী খুদম ওইনা, ত্রেদ ১৮গী মখাদা বেনিফিসরি ১৮ দা পি.এম বিশ্বকর্মাগী মখাদা প্রধান মন্ত্রীনা শেন্থং য়েন্থোক্কনি। মখোয়গী থবক অমসুং মখোয়না খুন্নাইগীদমক পাংথোক্লিবা থবকশিং ইকায়খুম্নবা উৎপা ওইনা, পি.এম বিশ্বকর্মাগী মখাদা চহি অমা মাইপাক্না থবক তৌরকপগী শরুক অমা ওইনা কম্মেমোরেতিপ স্তাম্প অমা প্রধান মন্ত্রীনা ফোঙদোক্কনি।

প্রধান মন্ত্রীনা মহারাস্ত্রাগী অমরাবতিদা পি.এম মেগা ইন্তেগ্রেতেদ তেক্সতাইল রিজন্স এন্দ এপ্পারেল (পি এম মিত্রা) পার্ক শানবা উরেপ-উয়ুং তমগনি। একর ১০০০গী পার্ক অসি মহারাস্ত্রা ইন্দস্ত্রিএল দিবলপমেন্ত কোর্পোরেসন(এম আই দি সি)না স্তেৎ ইমপ্লিমেন্তেসন এজেন্সি ওইনা শেমগৎকনি। তেক্সতাইল উদ্যোগকীদমক পি.এম মিত্রা পার্ক ৭ শেমগৎনবা ভারত সরকারনা অয়াবা পীরে। পি.এম মিত্রা পার্কশিং অসি তেক্সতাইল মেনুফেকচরিং অমসুং মপান্দা থাদোকপদা ভারত মালেমগী মফম অমা ওইহন্নবা মঙলান মঙফাওন্নবা মাইকৈদা থাংজিনবা অচৌবা খোঙথাং অমনি। ফোরেন দাইরেক্ত ইনভেস্তমেন্ত(এফ দি আই) য়াওনা য়াম্লবা শেনফমশিং থাদনিংনবা অমসুং হিরম অসিদা অনৌবা থবক পায়খৎপা অমসুং থবক ফংহনবা পুক্নিং থৌগৎনবা মালেম থাক্কী ইন্দস্ত্রিএল ইনফ্রাস্ত্রকচর শেমগৎপদা মসিনা মতেং পাংগনি।

প্রধান মন্ত্রীনা মহারাস্ত্রা সরকারগী “অচার্য়া চানক্যা স্কিল দিবলপমেন্ত সেন্তর” স্কিম হৌদোক্কনি। নহারোলশিং মশা মরোমদোম লেপচবা ঙম্নবা অমসুং থবক ফংনবগী তোঙান-তোঙানবা খুদোংচাবশিং ফংনবা, চহি ১৫ দগী চহি ৪৫ ফাওবগী মনুংদা লৈবা নহারোলশিং ত্রেনিং পীনবা রাজ্য শীনবা থুংবগী মমিং লৈরবা কলেজশিংদা স্কিল দিবলপমেন্ত ত্রেনিং সেন্তরশিং লিংখৎকনি। চহি অমদা রাজ্য অসিগী নহারোল ১,৫০,০০০ রোম লেম্না স্কিল দিবলপমেন্ত ত্রেনিং পীগনি।

প্রধান মন্ত্রীনা পুন্যস্লোক অহল্যবাই হোলকার ৱুমেন স্তার্দ-অপ স্কিম হৌদোক্কনি। স্কিম অসিগী মখাদা, মহারাস্ত্রাদা নুপীশিংনা লুচিংবা স্তার্দ-অপশিংদা মতেং পাংগনি। লুপা লাখ ২৫ ফাওবগী মতেং পীগনি। স্কিম অসিগী মখাদা অপুনবা খুদোংচাবশিংগী চাদা ২৫ সরকারনা মশক খঙদোক্লবা শেন-থুমগী ফিবম ফত্তবা অমসুং চাউখৎত্রিবা কাংলুপকী নুপীশিংগী খাক্তুনা থমগনি। মসিনা নুপীশিংনা লুচিংবা ওইবা স্তার্দ-অপশিং মশা-মরোমদোম লেপচবা ঙমগনি অমসুং মনিংতমগনি।

****