కేంద్ర ఆరోగ్య, కుటుంబ సంక్షేమ శాఖ మంత్రి శ్రీ జగత్ ప్రకాష్ నడ్డా ఈరోజు నిర్మాణ్ భవన్‌లో ప్రపంచ ఆహార భద్రతాధికార సదస్సు (గ్లోబల్ ఫుడ్ రెగ్యులేటర్స్ సమ్మిట్- జీఎఫ్ఆర్ఎస్) 2024 గుర్తును, కరపత్రాలను ఆవిష్కరించారు. ఆహార శుద్ధి పరిశ్రమల మంత్రిత్వ శాఖ నిర్వహించే వరల్డ్ ఫుడ్ ఇండియా 2024 ఈవెంట్‌తో పాటు ఆరోగ్య, కుటుంబ సంక్షేమ మంత్రిత్వ శాఖ ఆధ్వర్యంలో ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (ఎఫ్‌ఎస్‌ఎస్‌ఏఐ) నిర్వహించే ఈ సదస్సు సెప్టెంబర్ 19 నుంచి 21 వరకు న్యూఢిల్లీలోని భారత్ మండపంలో జరగనుంది.

ప్రపంచ వేదికగా సురక్షిత ఆహార ప్రాముఖ్యతను వివరించిన కేంద్ర ఆరోగ్య మంత్రి, "ఆహార భద్రత చాలాకాలంగా అంతర్జాతీయ ప్రయత్నాలకు కేంద్రంగా ఉన్నప్పటికీ, ప్రపంచ జనాభా ఆరోగ్యం, శ్రేయస్సు కోసం సురక్షిత ఆహారానికీ అంతే ప్రాధాన్యమివ్వాల్సిన అవసరం ఉంది" అని పేర్కొన్నారు. ఆహార చక్రంలో- సురక్షిత ఆహార వ్యవస్థలను, నియంత్రణ విధానాలను బలోపేతం చేయడం కోసం, పరస్పర అభిప్రాయాలను పంచుకునేందుకు కోసం ఆహార నియంత్రణ సంస్థల ప్రపంచస్థాయి వేదిక ఏర్పాటు ఈ సదస్సు ద్వారా సాధ్యమవుతుందన్నారు.

ప్రపంచస్థాయిలో సురక్షిత ఆహారం, నాణ్యత నిర్ధారణ కోసం పరిజ్ఞానాన్ని అందరితో పంచుకోవడం అత్యంత ముఖ్యమని శ్రీ జె పి నడ్డా పేర్కొన్నారు. పెరుగుతున్న ముప్పు, సాంకేతిక పురోగతులను ఎదుర్కోవడానికీ, అలాగే మారుతున్న వినియోగదారుల అవసరాలను తీర్చడానికీ, సురక్షిత ఆహారం, నియంత్రణ వ్యవస్థలో దీనిని నిరంతరం అనుసరించాల్సిన అవసరముందని చెప్పారు.

“ఆహార భద్రతాధికార వ్యవస్థ, ప్రమాద అంచనా సంస్థలు, పరిశోధనా సంస్థలు, విశ్వవిద్యాలయాలు సహా 30 అంతర్జాతీయ సంస్థలు, దాదాపు 5,000 మంది ప్రతినిధులు, 70కి పైగా దేశాల నుంచి ఈ 2వ గ్లోబల్ ఫుడ్ రెగ్యులేటర్ సదస్సులో ప్రత్యక్షంగా పాల్గొంటారు. దాదాపు 1.5 లక్షల మంది వీడియో అనుసంధానం ద్వారా ఈ సదస్సులో పాల్గొననున్నారు. వ్యూహాలు, సహకార మార్గాల గురించి సదస్సులో ప్రధానంగా చర్చిస్తాం. ఆహార భద్రతాధికార వ్యవస్థకు సంబంధించిన కీలక అంశాలపై కూడా చర్చించనున్నాం” అని ఆయన తెలిపారు.

వరల్డ్ హెల్త్ ఆర్గనైజేషన్ (డబ్ల్యూహెచ్ఓ), వరల్డ్ ట్రేడ్ ఆర్గనైజేషన్ (డబ్ల్యూటీఓ), ఫుడ్ అండ్ అగ్రికల్చర్ ఆర్గనైజేషన్ (ఎఫ్ఏఓ), కోడెక్స్ అలిమెంటారియస్ కమిషన్, యూరోపియన్ ఫుడ్ సేఫ్టీ అథారిటీ, జాయింట్ ఇనిస్టిట్యూట్ ఫర్ ఫుడ్ సేఫ్టీ అండ్ అప్లైడ్ న్యూట్రిషన్, యూఎస్ఏ వంటి సంస్థలు దీనిలో పాలుపంచుకుంటాయి. సదస్సులో కోడెక్స్ అలిమెంటారియస్ కమిషన్ సెక్రటేరియట్ తరపున దాని చైర్‌పర్సన్, వైస్-ఛైర్‌పర్సన్, కార్యదర్శి ప్రాతినిధ్యం వహిస్తారు. డబ్ల్యూహెచ్ఓ డైరెక్టర్ జనరల్ డాక్టర్ టెడ్రోస్ అధనామ్ ఘెబ్రేయేసస్ వీడియో అనుసంధానం ద్వారా సదస్సును ఉద్దేశించి ప్రసంగిస్తారు.

వాణిజ్య శాఖ, ఆహార శుద్ధి మంత్రిత్వ శాఖ (ఎమ్ఓఎఫ్‌పీఐ), వినియోగదారుల వ్యవహారాల మంత్రిత్వ శాఖ, వ్యవసాయ సంబంధ, శుద్ధి చేసిన ఆహార ఉత్పత్తుల ఎగుమతి అభివృద్ధి అథారిటీ (ఏపీఈడీఏ), సముద్ర సంబంధ ఉత్పత్తుల ఎగుమతి అభివృద్ధి అథారిటీ (ఎంపీఈడీఏ) అలాగే ఎగుమతుల తనిఖీ మండలి (ఈఐసీ) సహా జాతీయ వాటాదారులు సురక్షిత ఆహార ప్రమాణాల అభివృద్ధిలో భారత్ నిబద్ధతను వివరించడం ద్వారా ఎన్ఏబీసీబీ సదస్సులో క్రియాశీల పాత్ర పోషించనున్నారు.

శ్రీ నడ్డా మాట్లాడుతూ “రోమ్‌ నగరానికి బయట తొలిసారిగా భారతదేశం ప్రాంతీయ ఫుడ్ రెగ్యులేటర్స్ సదస్సుకు అతిధ్యమివ్వడం గర్వించదగ్గ విషయం. కోడెక్స్ అలిమెంటారియస్ కమిషన్‌ పరిధిలో ప్రమాణాలను నిర్దేశించే ప్రక్రియలో ప్రాంతీయ సహకారాన్ని పెంపొందించడంపై సదస్సు ప్రధానంగా దృష్టి సారిస్తుంది. సురక్షిత ఆహారం, వాణిజ్యం అలాగే నియంత్రణ వంటి ఈ ప్రాంత ప్రత్యేక సవాళ్లను చర్చించడానికి ఇది ఆసియా దేశాలకు ఒక ప్రత్యేక వేదికను అందిస్తుంది.” అన్నారు.

“సూక్ష్మజీవుల నిరోధకతను (ఏఎమ్ఆర్) తగ్గించడం, ప్రత్యామ్నాయ ఆహారాలు, పోషకాహార మందులు, నియంత్రణ, భద్రతా విధానాల్లో ఆహార సరఫరా, అందరికీ సురక్షిత ఆహారం, పోషకాహారాన్ని అందేలా చేయడం, అవశేష, కలుషితాల పర్యవేక్షణ వ్యవస్థలు, ఆహార పరీక్షల్లో ఆధునిక విశ్లేషణలు, సురక్షిత ఆహారం, ఆరోగ్యంపై పశువుల దాణా ప్రభావం, అలాగే క్రీడలు- పోషణ వంటి కీలకమైన అంశాలపై జీఎఫ్ఆర్ఎస్ 2వ సదస్సు దృష్టి సారిస్తుంది.” అని కేంద్ర ఆరోగ్య మంత్రి తెలిపారు. “సురక్షిత ఆహారం అందేలా చర్యలు చేపట్టడం, చట్టాల అమలుపై అవగాహనను పెంచడం, ఉత్తమ పద్ధతులను పంచుకోవడం, అలాగే సురక్షిత ఆహారం అందించడానికి ఇతర దేశాలతో కలిసి పనిచేయడం, ఐక్య వేదికల ఏర్పాటుకు ఈ సదస్సు సహాయపడుతుంది” అని ఆయన తెలిపారు.

పోషకాహారంపై అవగాహన పెంచడానికి చిరుధాన్యాలతో చేసే వంటకాలపై "ఫ్లేవర్స్ ఆఫ్ శ్రీ అన్నా - సెహత్ ఔర్ స్వాద్ కే సంగ్" అనే కార్యక్రమం 13 ధారావాహికలుగా దూరదర్శన్‌లో ప్రసారం కానుంది. దీనిని కూడా ఈ కార్యక్రమంలో భాగంగా ప్రారంభించనున్నారు.

సదస్సు ముఖ్యాంశాలలో- భారత రాష్ట్రాలు, కేంద్రపాలిత ప్రాంతాల్లో ఫుడ్ సేఫ్టీ పని తీరును అంచనా వేసే స్టేట్ ఫుడ్ సేఫ్టీ ఇండెక్స్ (ఎస్ఎఫ్ఎస్ఐ) 2024 విడుదల చేయడం, సులభతర వ్యాపార నిర్వహణ గురించి చర్చించడానికి సీనియర్ ప్రభుత్వ అధికారులతో పాటు ప్రధాన ఆహార కంపెనీల ముఖ్య కార్యనిర్వహణాధికారుల సమావేశం, పౌష్టికాహారానికి ప్రాప్యతను మెరుగుపరచడం అలాగే సురక్షిత ఆహారం కోసం మౌలిక సదుపాయాలను మెరుగుపరచడంతో పాటు భూటాన్, అర్జెంటీనా, న్యూజిలాండ్ అలాగే ఆస్ట్రేలియా దేశాలతో ద్వైపాక్షిక సమావేశాలు ఉన్నాయి.

జీఎఫ్ఆర్ఎస్ 2వ సదస్సులోని అత్యంత ముఖ్యాంశాలలో ఫుడ్ సేఫ్టీ పద్ధతులు అలాగే సమాచారాన్ని పంచుకునే పద్ధతులను మార్చే లక్ష్యంతో అనేక వినూత్న కార్యక్రమాలను ప్రారంభించడం ఒకటి. దీనిలో భాగంగా ప్రత్యేకించి ఆహార దిగుమతుల తిరస్కరణ నివేదికల సమాచారం (ఎఫ్ఐఆర్ఏ) కోసం కొత్త వెబ్‌సైట్ ప్రారంభించడం, ఆహార దిగుమతుల అంగీకార వ్యవస్థ 2.0 (ఎఫ్ఐసిఎస్ 2.0) ఆవిష్కరణ కూడా జరగనుంది. ‘ఎఫ్ఐఆర్ఏ’ అనేది భారత సరిహద్దుల్లో ఆహార దిగుమతి తిరస్కరణల గురించి సమాచారాన్ని పంచుకోవడానికి రూపొందించిన వెబ్ సైట్. ఇది సాధారణ ప్రజలకు, అలాగే సంబంధిత దేశంలోని ఆహార భద్రత ప్రాధికార సంస్థల సమాచారం కోసం ఉపయోగపడుతుంది.

వేగవంతమైన నిర్ణయాలు, పారదర్శకత కోసం, అధునాతన ఫీచర్లు, యాంత్రీకరణ, ఇతర సంబంధిత వెబ్ సైట్ల ఏకీకరణతో పూర్తి పరిష్కారాన్ని అందించడం ద్వారా మునుపటి వ్యవస్థల్లోని పరిమితులను పరిష్కరించే ఆహార దిగుమతుల సమ్మతిని తెలియజేసే అధునాతన వ్యవస్థే- ఈ ఎఫ్ఐసిఎస్ 2.0.  భారత రాష్ట్రాలు, కేంద్రపాలిత ప్రాంతాల ఆహార భద్రతా పనితీరును అంచనా వేసే వార్షిక నివేదిక ఆహార భద్రతా సూచిక (ఎస్ఎఫ్ఎస్ఐ) 2024 ను ఈ సదస్సులో విడుదల చేయనున్నారు.

గ్లోబల్ ఫుడ్ రెగ్యులేటర్స్ సదస్సులో అంతర్జాతీయ సంస్థల, శాస్త్రవేత్తల కీలక ప్రసంగాలు, ఫుడ్ రెగ్యులేటర్‌లతో సాంకేతిక, చర్చా కార్యక్రమాలు, జాతీయ, అంతర్జాతీయ వాటాదారులతో పరస్పర సంభాషణలు, అలాగే ప్రస్తుత, పెరుగుతున్న సవాళ్లను పరిష్కరించడానికి, పరిజ్ఞానాన్ని పరస్పరం పంచుకోవడం, సురక్షిత ఆహారం కోసం సమతుల్య విధానాలను రూపొందించడం కోసం ద్వైపాక్షిక, బహుపాక్షిక సమావేశాలు సహా విభిన్న శ్రేణి కార్యకలాపాలు నిర్వహించనున్నారు.

శ్రీ అపూర్వ చంద్ర, ఆరోగ్య, కుటుంబ సంక్షేమ మంత్రిత్వ శాఖ కార్యదర్శి, ఎఫ్ఎస్ఎస్ఏఐ చైర్‌పర్సన్, శ్రీ జి. కమల వర్ధనరావు, సీఈఓ, ఎఫ్ఎస్ఎస్ఏఐ, శ్రీ నిఖిల్ గజరాజ్, ఆరోగ్య, కుటుంబ సంక్షేమ మంత్రిత్వ శాఖ సంయుక్త కార్యదర్శి, శ్రీ యూ.ఎస్. ధ్యాని ఎఫ్ఎస్ఎస్ఏఐ ఎగ్జిక్యూటివ్ డైరెక్టర్ సహా కేంద్ర ఆరోగ్య మంత్రిత్వ శాఖ సీనియర్ అధికారులు ఈ సన్నాహక కార్యక్రమంలో పాల్గొన్నారు.

***