ఫ్రాన్స్‌లోని లియోన్‌లో జరిగిన వరల్డ్ స్కిల్స్ 2024లో 4 ప్రతిష్ఠాత్మక కాంస్య పతకాలను గెలుచుకోవడం ద్వారా భారతదేశం ప్రపంచ వేదికపై అద్భుతమైన ముద్ర వేసింది- అశ్విత పోలీస్ - పేస్ట్రీ, కేకుల తయారీలో పతకం సాధించగా, ఇండస్ట్రీ 4.0- ధ్రుమిల్‌ కుమార్ ధీరేంద్రకుమార్ గాంధీ, సత్యజిత్ బాలకృష్ణన్, హోటల్ రిసెప్షన్- జోతిర్ ఆదిత్య కృష్ణప్రియ రవికుమార్, పునరుత్పాదక ఇంధనం- అమరేష్ కుమార్ సాహు కాంస్య పతకాలు కైవసం చేసుకున్నారు. వీరితో పాటు భారతీయ ప్రతినిధి బృందం 12 ఉత్తమ నైపుణ్యతా పతకాలు కూడా సంపాదించి, వారి అసాధారణ నైపుణ్యాలు, వివిధ వృత్తుల్లో ఉత్తమ పని తీరుకు నిదర్శనంగా నిలిచారు.

పేస్ట్రీ, కేకులు, చాక్లెట్ల తయారీలో పోటీ చేసిన అశ్విత పోలిస్,  టీమ్ ఇండియా నుండి అత్యుత్తమ పోటీదారుగా బెస్ట్ ఆఫ్ నేషన్ అవార్డును కూడా గెలుచుకున్నారు. ఆమె చిన్నతనం నుంచీ చాక్లెట్లు తయారుచేయడం నేర్చుకుంది. టీవీ షోల ద్వారా స్ఫూర్తిని పొందిన అశ్విత- కుకింగ్ లో ఎంతో ప్రావీణ్యాన్ని సంపాదించారు. తెలంగాణలోని డాక్టర్ అంబేద్కర్ ఓపెన్ యూనివర్శిటీ విద్యార్థిని, షెఫ్ వినేష్ జానీ మార్గదర్శకత్వంలో ఆమె తన నైపుణ్యాలను మెరుగుపరుచుకున్నారు. అశ్విత విజయం- ప్రపంచ వేదికపై భారతీయ పాకశాస్త్ర ప్రతిభకు పెరుగుతున్న ప్రాముఖ్యతను సూచించడంతోపాటు, దేశవ్యాప్తంగా ఔత్సాహిక షెఫ్‌లకు స్ఫూర్తిగా నిలుస్తుంది.

ఫ్రాన్స్‌లో జరిగిన వరల్డ్ స్కిల్స్ లియోన్ 2024లో భారతదేశ పతకాలు, ఇతర పతకాల సంఖ్య పట్టిక ....

Link  https://pib.gov.in/PressReleasePage.aspx?PRID=2055378

70 కంటే ఎక్కువ దేశాలు వరల్డ్‌స్కిల్స్ లియోన్ 2024లో పాల్గొనగా, విభిన్న నైపుణ్యాల విభాగాలలో 1400 మందికి పైగా పోటీ పడ్డారు. భారతీయ పోటీదారులు అంతర్జాతీయ ప్రేక్షకుల ముందు తమ ప్రతిభను, ఆవిష్కరణలను ప్రదర్శించి ప్రపంచంలోనే అత్యుత్తమంగా నిలిచారు. చైనా, జపాన్, కొరియా, సింగపూర్, జర్మనీ, బ్రెజిల్, ఆస్ట్రేలియా, కొలంబియా, డెన్మార్క్, ఫ్రాన్స్, యూకే, దక్షిణాఫ్రికా, స్విట్జర్లాండ్, యుఎస్ఏ మొదలైన దేశాలతో భారతదేశం 52 నైపుణ్యాలలో పోటీ పడింది.

మొదటిసారిగా అంతర్జాతీయ స్థాయిలో పోటీ పడటమే కాకుండా, పతకాలు కూడా సాధించినందుకు భారతీయ బృందం ఆనందిస్తోంది. ఈ గుర్తింపు తెచ్చిన ఆనందంతోపాటు, దేశానికి ప్రాతినిధ్యం వహించినందుకు వాళ్లు మరింత గర్విస్తున్నారు. మార్గదర్శనం చేసిన సీనియర్లకూ, శిక్షకులకూ వారు కృతజ్ఞతలు తెలిపారు. నైపుణ్యం ప్రాముఖ్యతను వారి జీవితాలనీ, వృత్తి మార్గాలను మార్చడంలో దాని పాత్రనీ- విజేతలు ప్రముఖంగా ప్రస్తావించారు. ఎంతో కష్టపడి సాధించుకున్న విజయం- వారిలో ఆనందోత్సాహాలను నింపింది. తెలంగాణ నుంచి వచ్చిన అశ్విత పోలిస్ - పేస్ట్రీ, కేకులు, స్వీట్ల విభాగంలో 21 దేశాలతో పోటీ పడి, కాంస్య పతకాన్ని గెలుచుకున్నది. అశ్విత తన ఆనందాన్ని పంచుకుంటూ "నా దేశానికి ప్రాతినిధ్యం వహించడం.. పతకం సాధించడం... నా కల నిజమైంది. ప్రయాణంలో సవాళ్లున్నా తగిన ప్రతిఫలం రివార్డు రూపంలో దక్కింది " అని అన్నారు. 

భవిష్యత్తు అవసరాలకు అనుగుణంగా భారతదేశాన్ని కొత్త నైపుణ్యాల దిశగా తీసుకునిపోవడం గర్వంగా ఉందని ‘పరిశ్రమ- 4.0’ బృందం వ్యాఖ్యానించింది. అంతర్జాతీయ స్థాయి నైపుణ్య పోటీల్లో భారతదేశానికి ప్రాతినిధ్యం వహించడం మంచిదేనంటూ హోటల్ రిసెప్షన్, రెన్యూవబుల్ ఎనర్జీ పోటీదారులు అన్నారు.

టీమ్ ఇండియాను చూపిన ప్రతిభ గురించి మాట్లాడుతూ..“లియోన్‌లో వారిని ప్రత్యక్షంగా చూసినందుకు, ఇంత విపరీతమైన ఒత్తిడిలో ఈ స్థాయిలో ప్రదర్శన చేయడం అంత తేలికైన పని కాదని నేను చెప్పగలను. సాంకేతిక ఖచ్చితత్వం, డెలివరీలో మెళకువ, అవసరమైన ఫోకస్ అన్నీ శాశ్వతమైన గుర్తును మిగిల్చాయి" అని నైపుణ్యాభివృద్ధి, ఔత్సాహిక పారిశ్రామిక శాఖ సహాయ మంత్రి (స్వతంత్ర) శ్రీ జయంత్ చౌదరి ప్రశంసించారు. "వరల్డ్ స్కిల్స్ 2024లో అసాధారణ విజయాలు సాధించినందుకు టీమ్ ఇండియాని నేను హృదయపూర్వకంగా అభినందిస్తున్నాను. ఇది మన దేశానికి ఎనలేని గర్వకారణం. కాంస్య పతకాలు, అత్యుత్తమ నైపుణ్య పతకాలను సాధించడం కేవలం వ్యక్తిగత విజయం మాత్రమే కాదు, నైపుణ్యాల పరంగా భారతదేశ ప్రాధాన్యతకు ఇది నిదర్శనం. ఈ యువ పోటీదారులు తమ వ్యక్తిగత ప్రతిభను ప్రదర్శించడమే కాకుండా నైపుణ్యాల అభివృద్ధిలో ప్రపంచ శ్రేష్ఠతను సాధించడంలో భారతదేశానికి అంకితభావం ఉందని నిరూపించారు. వారి విజయం మన గౌరవ ప్రధానమంత్రి కుశల్, వికసిత భారత్ లక్ష్యాన్ని సాకారం చేస్తుంది. ప్రపంచ వేదికగా భారతదేశాభివృద్ధిని శాసించే నైపుణ్యాలను మరింత మంది యువతకు అందించాలన్న మా ఆలోచనలకు ఇది ఊతమిస్తున్నది’’ అని కేంద్ర మంత్రి తెలిపారు.

వరల్డ్ స్కిల్స్ 2024లో భారత బృందం సాధించిన విజయం- ప్రపంచంలోనే నిపుణ దేశంగా భారతదేశానికి గుర్తింపు రావడానికి ఇది తొలి మెట్టు. పేస్ట్రీ, కేకుల తయారీ రంగంలో పేరున్న ఫ్రాన్స్‌లో- భారతదేశం కాంస్య పతకాన్ని గెలుచుకోవడం ఒక అసాధారణ విజయం. ఇది కలినరీ ఆర్ట్స్ లో పెరుగుతున్న భారత్ నైపుణ్యాన్ని సూచిస్తుంది, ఈ వృత్తికి చెందిన నిపుణ దేశాల్లో ఒక దేశంగా- భారతీయ ప్రతిభ- భుజం భుజం కలిపి నిలబడగలదని రుజువు చేస్తుంది.

అదనంగా, వరల్డ్ స్కిల్స్ 2024లో రెన్యూవబుల్ ఎనర్జీ, ఇండస్ట్రీ 4.0లో భారతదేశం విజయం దేశాన్ని అత్యాధునిక, భవిష్యత్తు- కేంద్రీకృత రంగాలలో పెరుగుతున్న శక్తిగా నిలబెట్టింది.

వరల్డ్ స్కిల్స్ 2024లో భారతదేశం 12 అత్యుత్తమ నైపుణ్య పతకాలను సాధించడం వల్ల, మెకట్రానిక్స్, సైబర్ సెక్యూరిటీ నుంచి జ్యువెలరీ, బ్యూటీ థెరపీ వరకు, సంప్రదాయ లేదా పురోగామి నైపుణ్యాల పరంగా భారతదేశానికి ఒక గుర్తింపు లభిస్తుంది.

నైపుణ్యం, ఆవిష్కరణలకు అవకాశం ఉన్న 3డీ ప్రింటింగ్, వెబ్ టెక్నాలజీ, అలాగే క్యాబినెట్ మేకింగ్ (చెక్క వస్తువుల తయారీ), పాకశాస్త్ర రంగాల్లో భారతదేశపు నాయకత్వాన్ని స్పష్టం చేశాయి.  ఈ విజయాలు ప్రపంచ వేదికపై ఆవిష్కరణలు, స్థిరమైన అభ్యాసాలు, సాంకేతిక నైపుణ్యానికి కేంద్రంగా భారతదేశపు స్థాయిని బలోపేతం చేస్తున్నాయి. కీలకమైన ప్రపంచ పరిశ్రమలలో భారత్ పురోగమనంలో ఉందనడానికి ఇవన్నీ నిదర్శనం.

వరల్డ్ స్కిల్స్ 2024లో భారతీయ పోటీదారుల విజయం వారి ప్రయాణంలో వారు పొందిన కఠినమైన తయారీ, పరిశ్రమ మద్దతుకు నిదర్శనం. పాల్గొన్న ప్రతివారు పరిశ్రమ నిపుణులు, సలహాదారులు, వివిధ రంగాలలో సంస్థలు అందించిన అత్యుత్తమ-తరగతి మౌలిక సదుపాయాల మద్దతుతో విస్తృతమైన శిక్షణ పొందారు.

నైపుణ్యాభివృద్ధి, ఔత్సాహిక పారిశ్రామిక మంత్రిత్వ శాఖ (ఎంఎస్డీఈ), నేషనల్ స్కిల్ డెవలప్‌మెంట్ కార్పొరేషన్ (ఎన్ఎస్డిసి), పరిశ్రమ భాగస్వాములతో పాటు, ప్రపంచ స్థాయి శిక్షణ కార్యక్రమాలు, సన్నాహక పోటీలలో పోటీదారులను సిద్ధం చేయడంలో కీలక పాత్ర పోషించింది. ఈ సహకార ప్రయత్నం అంతర్జాతీయ ప్రమాణాలకు అనుగుణంగా పాల్గొనేవారికి బాగా ఉపకరిస్తుంది. చివరికి లియోన్‌లో వారి అద్భుతమైన పనితీరుకు మంచి అవకాశం ఇచ్చింది.

లవ్వోన్ అకాడమీ, లీలా హోటల్స్, నామ్‌టెక్, సిటీటీసి భువనేశ్వర్, టయోటా కిర్లోస్కర్, మారుతీ, ఇరాజ్ ఎవల్యూషన్ డిజైన్ కంపెనీ, సీవీ రామన్ గ్లోబల్ యూనివర్సిటీ, వెల్‌కమ్ హోటల్స్, లింకన్ ఎలక్ట్రిక్, ఫెస్టో ఇండియా, నిఫ్ట్, ఎల్ అండ్ టీ నుండి అమూల్యమైన మద్దతు లభించింది. ఈ మార్గదర్శకత్వం, సాంకేతిక నైపుణ్యం రెండింటిలోనూ, పాల్గొనే వారికి ప్రయోగాత్మక అనుభవం, ప్రపంచ పోకడలపై లోతైన అవగాహనను అందించింది. ఈ భాగస్వామ్యాలు భారతదేశ నైపుణ్య పర్యావరణ వ్యవస్థను బలోపేతం చేశాయి. యువ ప్రతిభావంతులు అంతర్జాతీయ వేదికలపై రాణించడానికి వీలు కల్పించాయి.

***