وزیر اعظم جناب نریندر مودی نے آج ویڈیو پیغام کے ذریعے توتیکورن انٹرنیشنل کنٹینر ٹرمینل کے افتتاح سے خطاب کیا۔ اس موقع پر بات کرتے ہوئے، وزیر اعظم نے اس بات پر زور دیا کہ آج کا دن ایک ترقی یافتہ ملک بننے کی طرف ہندوستان کے سفر میں ایک اہم سنگ میل کی حیثیت رکھتا  ہے اور نئے توتیکورین انٹرنیشنل کنٹینر ٹرمینل کو 'ہندوستان کے سمندری ڈھانچے کا نیا ستارہ' قرار دیا۔ وی او چدمبرانار پورٹ  کی صلاحیت کو بڑھانے میں اس کے کردار کو اجاگر کرتے ہوئے   وزیر اعظم نے کہا، "14 میٹر سے زیادہ کے گہرے اور 300 میٹر سے زیادہ لمبی برتھ کے ساتھ، یہ ٹرمینل V.O.C کی صلاحیت کو بڑھانے میں اہم کردار ادا کرے گا۔ انہوں نے مزید کہا کہ نئے ٹرمینل سے بندرگاہ پر لاجسٹک اخراجات میں کمی اور ہندوستان کے لیے غیر ملکی زرمبادلہ کی بچت کی توقع ہے۔ انہوں نے تمل ناڈو کے لوگوں کو مبارکباد دی اور V.O.C پورٹ سے متعلق  ان پروجیکٹوں کو یاد کیا جن کا آغاز دو سال قبل ان کے دورے کے دوران کیا گیا تھا۔ انہوں نے  اس کی تیزی سے تکمیل پر اطمینان کا اظہار کیا۔ انہوں نے اس بات  کو اجاگر کیا  کہ ٹرمینل کی اہم کامیابیوں میں سے ایک صنفی تنوع  سے  وابستگی ہے جس کےتحت  40 فیصد ملازمین خواتین ہیں، جو کہ میری ٹائم سیکٹر میں خواتین کی قیادت میں ترقی کی علامت ہے۔

تمل ناڈو کی ساحلی پٹی نے ہندوستان کی اقتصادی ترقی کو آگے بڑھانے میں جو اہم کردار ادا کیا ہے اس کا اعتراف کرتے ہوئے، جناب مودی نے کہا کہ "تین بڑی بندرگاہوں اور سترہ غیر بڑی بندرگاہوں کے ساتھ، تمل ناڈو سمندری تجارت کا ایک بڑا مرکز بن گیا ہے"۔ انہوں نے مزید کہا کہ بندرگاہ کی زیر قیادت ترقی کو مزید فروغ دینے کے لیے، ہندوستان بیرونی ہاربر کنٹینر ٹرمینل کی ترقی اور V.O.C کی صلاحیت میں 7,000 کروڑ روپے سے زیادہ کی سرمایہ کاری کر رہا ہے۔اوراس  بندرگاہ  کی ترقی میں اضافہ ہورہا ہے۔ جناب مودی نے تصدیق کی کہ  "V.O.C. بندرگاہ ہندوستان کی سمندری ترقی میں ایک نیا باب لکھنے کے لیے تیار ہے''۔

جناب مودی نے ہندوستان کے وسیع تر سمندری مشن کے بارے میں بات کی، جو بنیادی ڈھانچے کی ترقی سے آگے بڑھتا ہے۔ "ہندوستان دنیا کو پائیدار اور آگے کی سوچ  والی  ترقی کا راستہ دکھا رہا ہے،" انہوں نے کہا کہ V.O.C. بندرگاہ کو گرین ہائیڈروجن ہب اور آف شور ونڈ انرجی کے لیے نوڈل پورٹ کے طور پر تسلیم کیا جا رہا ہے۔ یہ اقدامات آب وہوا میں تبدیلی کے عالمی چیلنجوں سے نمٹنے میں اہم کردار ادا کریں گے۔

وزیر اعظم نے اس بات کو اجاگر کرتے ہوئے کہ  ٹرمینل کا افتتاح اجتماعی طاقت کا ثبوت ہے کہا کہ "جدت طرازی اور تعاون ہندوستان کی ترقی کے سفر میں سب سے بڑی طاقت ہیں"۔ جناب مودی نے اس بات پر زور دیا کہ ہندوستان اب سڑکوں، شاہراہوں، آبی گزرگاہوں اور فضائی راستوں کے ایک وسیع نیٹ ورک کے ساتھ اچھی طرح سے جڑا ہوا ہے جو عالمی تجارت میں ملک کی پوزیشن کو مضبوط کرتا ہے۔ وزیر اعظم نے زور دے کر کہا کہ  "ہندوستان عالمی سپلائی چین میں ایک بڑا حصہ دار بن رہا ہے اور یہ بڑھتی ہوئی صلاحیت ہماری اقتصادی ترقی کی بنیاد ہے ۔ جناب مودی نے اپنے خطاب کا اختتام اس اعتماد کا اظہار کرتے ہوئے کیا کہ یہ رفتار ہندوستان کو جلد ہی دنیا کی تیسری سب سے بڑی معیشت بننے کے لیے آگے بڑھائے گی اور تمل ناڈو اس ترقی کو آگے بڑھانے میں اہم کردار ادا کر رہا ہے۔

******

U.No:10980

ش ح۔ م د۔س ا