اپنے اہلکاروں کی ہنرمندیوں اور صلاحیت سازی کو بڑھانے کے لیے، ہندوستانی فوج اور ہندوستانی فضائیہ نے   گتی شکتی وشو ودیالیہ، وڈودرا کے ساتھ ایک مفاہمت  نامہ پر  09 ستمبر 2024 کو نئی دہلی میں رکشامنتری جناب راج ناتھ سنگھ اور ریلوے کے وزیر جناب اشونی ویشنو کی موجودگی میں دستخط کیے۔ مفاہمت نامے سے دونوں افواج کو لاجسٹکس پر اعلیٰ مہارت حاصل کرنے کا موقع ملے گا۔ یہ لاجسٹک آپریشنز کے مختلف پہلوؤں پر اندرون ملک مہارت کی ترقی کو یقینی بنائے گا اور قومی ترقیاتی منصوبوں - پی ایم گتی شکتی نیشنل ماسٹر پلان 2021 اور نیشنل لاجسٹک پالیسی 2022 میں مؤثر طریقے سے تعاون کرے گا۔

اس موقع پر بات کرتے ہوئے، رکشا منتری نے دفاع میں ’آتم نربھربھارت‘ کے وژن کے ساتھ ہم آہنگی میں مسلح افواج کی لاجسٹک ریڑھ کی ہڈی کو مزید مضبوط بنانے کے لیے تعاون کو ایک یادگار شراکت داری قرار دیا۔ انہوں نے اس بات پر زور دیا کہ لاجسٹکس اب صرف مسلح افواج کی معاونت کا کام نہیں ہے بلکہ فوجی آپریشنز اور قومی سلامتی میں ایک اہم عنصر کے طور پر ابھر رہا ہے۔ انہوں نے کہا، ‘‘ایک موثر لاجسٹکس سسٹم فوری طور پر فورسز کو متحرک کرنے اور وسائل کو کم وقت میں صحیح جگہ پر پہنچانے میں کلیدی کردار ادا کرتا ہے۔ ان حالات کو مدنظر رکھتے ہوئے جن میں ہماری افواج کام کرتی ہیں، ہمیں فوج، ساز و سامان اور رسد کی بغیر کسی رکاوٹ کے نقل و حرکت کی ضرورت ہے۔  یہ مفاہمت نامہ اس لحاظ سے بہت اہم ثابت ہو گا کہ کس طرح علم، اختراع اور تعاون کے ذریعے ہماری افواج کی ضروریات کو پورا کیا جا سکتا ہے۔’’

جناب راج ناتھ سنگھ نے زور دے کر کہا کہ یہ مفاہمت نامہ دفاعی شعبے میں خود انحصاری حاصل کرنے کے حکومت کے وژن کو حاصل کرنے میں فائدہ مند ثابت ہوگا۔ انہوں نے مزید کہا ‘‘اگر ہمیں لاجسٹکس میں مہارت کی ضرورت ہے، تو ہمیں اپنے وسائل جیسے گتی شکتی وشو ودیالیہ سے اس کی تربیت حاصل کرنی چاہیے۔ اگر ہمیں آلات کی ضرورت ہے تو ہمیں اسے ہندوستان میں ہی تیار کرنا چاہیے۔ ایک مضبوط ہندوستان کی بنیاد صرف آتم نربھر بن کر ہی رکھی جا سکتی ہے۔’’

حقیقی دنیا کے کیس اسٹڈیز کے ذریعے تجرباتی سیکھنے کے مفاہمت نامے کی دفعہ پر، رکشا منتری نے اعتماد ظاہر کیا کہ گتی شکتی وشو ودیالیہ، مسلح افواج کے اہلکاروں کی قیادت، انتظام اور آپریشنل تجربے کے ذریعے، لاجسٹک ماہرین اور مینیجرز کی ایک نئی نسل کو تشکیل دینے میں مدد کرے گا جو جدید جنگی طریقہ کار کی متحرک ضروریات کو پورا کریں گے۔

ریلوے کے وزیر جناب اشونی ویشنو نے اس اعتماد کا اظہار کیا کہ گتی شکتی وشو ودیالیہ جدید لاجسٹک تعلیم، تحقیق اور اختراع کے ساتھ مسلح افواج کو بااختیار بنانے میں ایک اہم شراکت دار کے طور پر کام کرے گا۔

اس تقریب میں وزارت دفاع اور وزارت ریلوے کے سینئر افسران بشمول سی ڈی ایس، فضائیہ کے سربراہ، آرمی چیف، دفاعی سکریٹری، ریلوے بورڈ کے چیئرمین اور گتی شکتی وشو ودیالیہ کے وائس چانسلر نے شرکت کی۔  

********

ش ح۔    اک ۔م  ص

 (U:10693 )