కేంద్ర శాస్త్ర సాంకేతిక శాఖ సహాయ (స్వతంత్ర) మంత్రి డాక్టర్ జితేంద్ర సింగ్ ఈ రోజు న్యూఢిల్లీలోని ఎల్.మీడియా సెంటర్ లో, వినూత్న జీవ ఆర్ధిక విధానాన్ని విడుదల చేశారు. తదుపరి పారిశ్రామిక విప్లవానికి ఇండియా నాయకత్వ స్థానంలో ఉందంటూ మంత్రి ప్రశంసించారు. ఇందుకు ప్రధానమంత్రి శ్రీ నరేంద్ర మోదీ అందిస్తున్న మద్దతుకు ఆయన కృతజ్ఞతలు తెలిపారు. “బయో ఈ 3 విధానం, జీవ ఆర్ధిక వ్యవస్థకు కీలక మైలురాయిగా నిలవడమే కాక, వికసిత్ భారత్ @2047 సాధనలో విప్లవాత్మక మార్పునకు దోహదపడుతుంది’’ అని మంత్రి అన్నారు. ప్రధానమంత్రి శ్రీ నరేంద్ర మోదీ అధ్యక్షతన ఇటీవల జరిగిన కేంద్ర కేబినెట్ సమావేశం, నూతన బయో ఈ3 విధానాన్ని ఆమోదించింది. కేంద్ర ప్రభుత్వం అమలు చేస్తున్న కర్బన ఉద్గార రహిత ఆర్ధిక వ్యవస్థ, మిషన్ లైఫ్ (పర్యావరణ హిత జీవన విధానం) వంటి జాతీయ విధానాలకు అనుగుణంగా, అత్యున్నత పనితీరు కనబరిచే జీవ ఉత్పత్తుల తయారీని ప్రోత్సహించడం ఈ విధానం లక్ష్యం.

బయో ఈ3 విధానం విడుదల సందర్భంగా మాట్లాడుతూ, కేంద్ర శాస్త్ర-సాంకేతిక మంత్రిత్వశాఖ, భూవిజ్ఞాన శాఖ, ప్రధాని కార్యాలయ, సిబ్బంది-ప్రజా ఫిర్యాదులు-పెన్షన్లు, అణుశక్తి-అంతరిక్ష శాఖల (స్వతంత్ర) సహాయ మంత్రి డాక్టర్‌ జితేంద్ర సింగ్‌, “అంతర్జాతీయ జీవసాంకేతిక రంగంలో ఇండియా కీలకశక్తిగా ఎదగడంతో, నూతన జీవ సాంకేతిక వృద్ధిని పరుగులు పెట్టిస్తున్న వ్యక్తిగా ప్రధానమంత్రి శ్రీ నరేంద్ర మోదీని ప్రపంచం ప్రశంసిస్తోంది’’ అని అన్నారు. మన దేశంలో వినూత్న, పోటీతత్వంతో కూడిన, శరవేగంతో వృద్ధి చెందుతున్న జీవసాంకేతిక పరిశ్రమ ఉందని కూడా ఆయన చెప్పారు.

 “బయో ఈ3 విధానం ఆహారం, ఇంధనం, ఆరోగ్య రంగాలపై కీలక ప్రభావాన్ని చూపుతుందని మంత్రి అన్నారు. ఈ విధానంలోని ఆరు ముఖ్యమైన అంశాలను డాక్టర్ జితేంద్ర ఈ సందర్భంగా ప్రస్తావించారు. ఇందులో 1)జీవ ఆధారిత రసాయనాలు, ఎంజైములు, 2) అదనపు పోషక విలువలు కలిగిన ఆహార పదార్ధాలు, స్మార్ట్ ప్రోటీన్లు 3) కచ్చితమైన జీవ చికిత్సా విధానాలు 4) వాతావరణ మార్పులను తట్టుకునే వ్యవసాయ విధానాలు 5) కర్బన ఉద్గారాలను ఒడిసిపట్టి నిల్వచేసి, వాతావరణ మార్పులను నిరోధించడానికి దానిని వినియోగించడం 6) భవిష్యత్ దార్శనికతతో చేపట్టే సముద్రరంగ, అంతరిక్ష పరిశోధనలు ఉన్నాయి.

అంతరిక్ష, జీవ ఆర్ధిక రంగాలలో దేశం సాధించిన ఘన విజయాన్ని మంత్రి ఈ సందర్భంగా  పునరుద్ఘాటించారు. బయో ఈ 3 విధానం అమలులో పిపిపి నమూనాతో పాటు, ఉపాధికల్పనను ప్రోత్సహించేందుకు పరిశ్రమలకు రాయితీలు అంతర్లీనంగా ఉంటాయని ఆయన తెలిపారు.

‘‘భారత భవిష్యత్ జీవ ఆర్థిక వ్యవస్థకు, జీవ తయారీ రంగం, జీవ కర్మాగారాలు చోదకశక్తిగా నిలుస్తాయని, ఇవి "హరిత వృద్ధి"కి దోహదపడతాయని మంత్రి చెప్పారు. ప్రధాని శ్రీ నరేంద్ర మోదీ నేతృత్వంలో – విధాన పరంగా జరిగిన కీలక మార్పుల అనంతరం, జీవ సాంకేతికరంగలో పరిశోధన, జీవ అంకుర పరిశ్రమలకు అత్యంత ప్రాధాన్యత లభించిందని, ఇవి ఇప్పుడు కీలక పాత్ర పోషిస్తున్నాయని ఆయన అన్నారు.

జీవ సాంకేతికతకు ఇది అద్భుత  సమయమని అంటూ మంత్రి, భారత దేశంలో  జీవసాంకేతికత  సాధించిన ప్రగతిని ప్రముఖంగా ప్రస్తావించారు.

దేశంలోని అపార వనరుల గురించి ప్రస్తావిస్తూ మంత్రి,“దేశంలో అపార జీవ వనరులున్నాయి. తరగని ఈ వనరులు సద్వినియోగానికి సిద్ధంగా ఉన్నాయి. విస్తారమైన జీవవైవిధ్యం, హిమాలయాలకు మాత్రమే ప్రత్యేకమైన జీవ వనరులు, జీవసాంకేతికతకు ఎంతో ప్రయోజనకరం కాగలవు” అని అన్నారు. దీనికి తోడు 7,500 కిలోమీటర్ల పొడవైన సుదీర్ఘ సముద్ర తీర ప్రాంతం ఉందని, ఇందులో  సముద్రగర్భ  అన్వేషణను ప్రారంభించామని,ఇది సముద్రంలోని జీవవైవిధ్యాన్ని వెలికితీయనున్నదని మంత్రి తెలిపారు.

గత పది సంవత్సరాలలో ఈ రంగంలో సాధించిన ప్రగతిని ప్రస్తావిస్తూ డాక్టర్ జితేంద్ర, 2014లో 10 బిలియన్ డాలర్లుగా ఉన్న జీవ ఆర్ధిక వ్యవస్థ 2024 నాటికి 130 బిలియన్ డాలర్లకు చేరుకుందని, 2030 నాటికి ఇది 300 బిలియన్ డాలర్లకు చేరుకోగలదన్న అంచనాలున్నట్టు తెలిపారు.

21వ శతాబ్దపు తదుపరి విప్లవాన్ని ముందుకు తీసుకువెళ్లడంలో జీవసాంకేతికతకు అపారశక్తి ఉందని మంత్రి పునరుద్ఘాటించారు. ఐటి రంగ విప్లవానికి పశ్చిమదేశాలు నాయకత్వం వహిస్తే, జీవ సాంకేతిక విప్లవానికి ఇండియా నాయకత్వం వహిస్తోందని డాక్టర్ జితేంద్ర తెలిపారు.

జీవసాంకేతిక విభాగం కార్యదర్శి డాక్టర్ రాజేష్ గోఖలే, నీతి ఆయోగ్ (శాస్త్ర, సాంకేతిక విభాగం) సభ్యుడు డాక్టర్ వి.కె.సారస్వత్ ఈ కార్యక్రమంలో పాల్గొన్నారు.

****