এক সফলতাত, ‘দ্বিপাক্ষিক মজুৰী মীমাংসা সমিতি’ (বিডব্লিউএনচি) আৰু ‘ইণ্ডিয়ান বন্দৰ এছ'চিয়েশ্যন’ (আইপিএ)ৰ মাজত এক বুজাবুজিচুক্তি স্বাক্ষৰিত হয়, যাৰ ফলত কেন্দ্ৰীয় বন্দৰ, জাহাজ পৰিবহণ আৰু জলপথ দপ্তৰৰ মন্ত্ৰী শ্ৰী সৰ্বানন্দ সোণোৱালৰ সময়োচিত হস্তক্ষেপৰ জৰিয়তে ভাৰতৰ ১২ টা মুখ্য বন্দৰত কাম-কাজ ব্যাহত হোৱাৰ আশংকা প্ৰকট কৰা এক অনিৰ্দিষ্টকালীন ধৰ্মঘট প্ৰতিহত হয়।

এই বুজাবুজি চুক্তিয়ে মজুৰীৰ গাঁথনি সংশোধন কৰাত সহায় কৰে আৰু পেঞ্চনৰ লাভকে ধৰি অন্যান্য সেৱাৰ চৰ্তাৱলী সমাধান কৰে। এই মৰ্মে ৩১-১২-২০২১ তাৰিখৰ মৌলিক দৰমহাৰ মুঠ পৰিমাণৰ ওপৰত ৮.৫% ‘ফিটমেণ্ট লাভ’, লগতে ১-১-২০২২ ৰ হিচাপত ৩০% ‘ভিডিএ’ প্ৰদান কৰা হ'ব। নিষ্পত্তিৰ ম্যাদ ১-১-২০২২ ৰ পৰা ৩১-১২-২০২৬ লৈ পাঁচ বছৰৰ বাবে নিৰ্ধাৰণ কৰা হৈছে। ১-১-২০২২ তাৰিখৰ পৰা কাৰ্যকৰী হোৱা নতুন দৰমহা নিৰিখসমূহ বৰ্তমানে অব্যাহত থকা পদ্ধতি অনুসৰি প্ৰস্তুত কৰা হ'ব।

দুয়োটা পক্ষই যিকোনো সাম্ভাব্য বিসংগতি পৰিহাৰ কৰিবলৈ ১-১-২০২৭ তাৰিখৰ পৰা আৰম্ভ কৰি বিষয়া আৰু কৰ্মচাৰী দুয়োৰে বাবে ভৱিষ্যতৰ মজুৰী সংশোধনৰ সময়সীমা একত্ৰিত কৰাৰ বিষয়টো বিবেচনা কৰিবলৈ সন্মত হয়।

ইয়াৰ উপৰিও, ১-১-২০২২ ৰ পৰা ৩১-১২-২০২৬ লৈকে নিষ্পত্তিৰ কাৰ্যকৰীকৰণৰ সময়ছোৱাত, বা কৰ্মচাৰীসকলৰ অৱসৰৰ তাৰিখলৈকে, যিটো প্ৰথমে আহে, কৰ্মৰত কৰ্মচাৰীসকলক প্ৰতি মাহে ৫০০ টকাৰ এক বিশেষ ভাট্টা প্ৰদান কৰা হ'ব।

সফল প্ৰস্তাৱ সন্দৰ্ভত জাহাজ পৰিবহণ আৰু জলপথৰ বন্দৰ মন্ত্ৰী শ্ৰী সৰ্বানন্দ সোণোৱালে কয়, "ভাৰতীয় সামুদ্ৰিক খণ্ডৰ মেৰুদণ্ডস্বৰূপ হৈ অহা আমাৰ বন্দৰ শ্ৰমিকসকলৰ বাবে ন্যায্য আৰু ন্যায়সঙ্গত সৌহাৰ্দ্য নিশ্চিত কৰাৰ ক্ষেত্ৰত এই চুক্তি এক গুৰুত্বপূৰ্ণ পদক্ষেপ হিচাপে চিহ্নিত হৈছে। এই বিষয়বোৰৰ সময়মতে সমাধানে সকলো ভাৰতীয় বন্দৰত এক সুসংগত আৰু উৎপাদনশীল কৰ্মপৰিৱেশ গঢ়ি তোলাৰ বাবে ‘এমঅপিএছডব্লিউ’-ৰ প্ৰতিশ্ৰুতিবদ্ধতাক প্ৰতিফলিত কৰে।" শ্ৰী সোণোৱালে এই আলোচনাৰ প্ৰতি তেওঁলোকৰ গঠনমূলক দৃষ্টিভংগীৰ বাবে শ্ৰমিক ফেডাৰেশ্যন আৰু ‘আইপিএ’ দুয়োকে প্ৰশংসা কৰে।

২৮-০৮-২০২৪ তাৰিখে অনুষ্ঠিত হ'বলগীয়া এখন খচৰা সমিতিৰ বৈঠকত দহ দিনৰ ভিতৰত মীমাংসাৱলী প্ৰস্তুত কৰা হ'ব। এই সমিতিখনত প্ৰতিটো ফেডাৰেশ্যনৰ এজন প্ৰতিনিধি, লগতে ‘আইপিএ’-ৰ অধ্যক্ষৰ দ্বাৰা নিযুক্ত ‘ব্যৱস্থাপনা প্ৰতিনিধি’ অন্তৰ্ভুক্ত থাকিব। কৰ্তৃপক্ষই আশ্বাস দিয়ে যে ‘বিডব্লিউএনচি’-ৰ প্ৰক্ৰিয়াসমূহৰ সামৰণি মৰা হ'ব, চূড়ান্ত মীমাংসাত ১৫ দিনৰ ভিতৰত উপনীত হ'ব। এই অগ্ৰগতিৰ কথা বিবেচনা কৰি ছটা ফেডাৰেশ্যনে সৰ্বসন্মতিক্ৰমে পূৰ্বৰ সিদ্ধান্ত অনুসৰি গ্ৰহণ কৰা ২৮ আগষ্ট ২০২৪-ৰ ধৰ্মঘট কাৰ্যসূচী স্থগিত ৰখাৰ সিদ্ধান্ত লয়।

ছটা ফেডাৰেশ্যনে শ্ৰী সৰ্বানন্দ সোণোৱালক তেওঁৰ সময়োচিত হস্তক্ষেপ আৰু দীৰ্ঘদিনীয়া মজুৰী আলোচনা সমাধানৰ ক্ষেত্ৰত নিৰন্তৰ নিৰ্দেশনা প্ৰদান কৰি অহাৰ বাবে প্ৰশংসা কৰে।

*****

NB/AK/KB