Ka International Buddhist Confederation, ha ka jingiatreilang bad ka Nava Nalanda Mahavihara kan pynlong ia ka International Conference kaba ar sngi halor ka jingim bad ki kam jong u Guru Padmasambhava ha ka 28 bad 29 tarik u Nailar, 2024. U Guru Padmasambhava uba ngi ithuh ruh kum u Guru Rinpoche u la im ha ki spah snem ba khatphra ha India. U dei uwei na ki riewkhraw ba ioh burom tam ha ka Buddha Dhamma mynta bad u dei ma u uba la pynsaphriang ia ka Buddha Dhamma ha kylleng ka thain Himalaya.

U Lat ka Jylla Bihar, Rajendra Vishwanath Arlekar, un wan iashim bynta kum u Jongsan. Most Ven. Khenpo Chimed, Vice Chairman jong ka Lumbini Development Trust, Nepal, bad Most Ven. Khenpo Ugyen Namgyel, Secretary/Chief Monk jong ka Royal Bhutan Temple, Central Monastic Body, Bhutan, kin long ki symbud kongsanha kane ka conference. La ithuh ia u Guru Padmasambhava kum u Buddha ba ar bad la ithuh ruh ia u kum u Guru Rinpoche uba long u Rishi (lane Sant) ba pawnam jong ka thain Himalaya uba la im ha ki spah snem ba khatphra ha India.

Ki mat ba kongsan jong kane ka conference kin kynthup ia ka jingim bad ki jinghikai jong u, ki jingleit jong u sha kylleng ka thain Himalaya, bad ka jingburom ia u ha kane ka juk mynta. U Guru Padamasambhava u long kum ka dak jong ka jingpyniasoh ia ki bynta bapher bapher jong ka deiriti naduh ki jingleh Yoga bad Tantra haduh ka jingpynleit jingmut, ka jingsaindur, ka put ka tem, ka shad ka rwai, ki khana tang bad ki jinghikai shaphang ka niam. Yn don ka jingburom ia ki kam jong u lyngba ki jingthoh, ki tiar ba kyntang, ki jingdro bad ki mot ha kane ka conference.

Ki phang ba kongsan jong kane ka Conference ki kynthup:

1. Biographical Insights and Mythology

2. Teachings of Vajrayana Buddha Dhamma and the Tantras

3. Cultural and Artistic Contributions

4. Travels and Regional Impact

5. Legacy and Contemporary Relevance

Ha ka jingpyrshang ban pynsaphriang ia ki jingngeit tynrai jong ka Buddha Dhamma, u Guru Padamasambhava u la sngewthuh ia ki jinglong kyrpang jong ki jaka bad ki briew kiba sah ha kine ki jaka. Kumta, u la saindur ia ki jinghikai jong ki katkum ki jinglong tynrai bad ka deiriti kaba la pynsuk bha ban pdiang ia kane ka niam. Ha ka jingbuddien ia ka jingim bad ki kam jong u, kane ka Conference ka thmu ban ioh ia ki jingsngewthuh shaphang ka rukom treikam jong u haba u la don jingiadei bad ki jaitbynriew, ki niam bad ki deiriti bapher bapher, da kaba pyndonkam ia ki jingngeit tynrai bad ki jingleh niam kum ki lad ban pynsaphriang ia ki jinghikai jong u Blei Buddha.

********