এম.এস.এম.ই. হায়বসি শুপ্নগী অপীকপা ইন্তর্প্রাইস অমখক্নি হায়না য়েংলোইদবনি, মখোয়গী ৱাখল্লন অসি অপীকপা নত্ত্রগা নেগেতিব ওইরোইদবনি, মখোয়দি চাউরবা শাফু অমনি, মখোয় অসি মায় পাক্লি, লৈবাক্কী পাঙ্গলনি অমসুং লৈবাক মীয়াম মিলিয়ন কয়াদা থবক পীদুনা লৈবাক শেম্বদা তেংবাংলিবনি। ৱাফম অসি কেন্দ্রগী কম্মর্স অমসুং ইন্দস্ত্রী মন্ত্রী, শ্রী পিয়ুশ গোয়লনা নই দিল্লীদা ঙসি পাংথোকখিবা 10শুবা ইন্দিয়া ইন্তর্নেস্নেল এম.এস.এম.ই. স্তার্তঅপ এক্সপো অমসুং সম্মিত 2024দা থমখিবনি।

ইন্নোভেতিব ওইবা ৱাখল্লোন অমসুং থবক তৌবগী অনৌবা থৌওং অসিদি এম.এস.এম.ই.গী ওন্তোপ্রিনর্শিংগী শক্তাক্নি হায়না শ্রী গোয়লনা হায়খি। চাউরবা ইন্দস্ত্রী অমসুং ইন্তর্প্রাইস কয়াগী অপুনবা ইকোসীস্তেম অসিদা এম.এস.এম.ই. লিশিং কয়া অমা মনুং চল্লি অমসুং মখোয় য়াওদনা মায় পাকপা ঙম্লোই, অমসুং এম.এস.এম.ই.শিংনা অচৌবা ইন্দস্ত্রী কয়াগী সপ্লাইয়র অমসুং কস্তমর ওইনা থৌশু পুরিবনি হায়না মহাক্না মখা তাখি।

লৈবাক্কী তুরিজম অমসুং ইনফ্রাস্ত্রকচর চাউখৎহনবদা এম.এস.এম.ই.শিংনা মরু ওইবা থৌদাং লৌবগা লোয়ননা ভারতকী এক্সপোর্তকী অচৌবা শরুক অমসু কল্লিবনি হায়না শ্রী গোয়লনা পাউদমখি। সেক্তর অসিনা শাহৌ লৌবা হায়বসি লৈবাক অসিগীদমক্তা য়াম্না মরু ওই অমসুং মসিমক লৈবাক অসিগী অচৌবা মিৎয়েং চঙফম হীরম অমসু ওইরিবনি, মহাক্না হায়খি। লৈবাক মীয়াম করোর 140না লৈবাক শেম্নবা অমত্তা ওইরকপা মতমদা ভারতনা ইং 2047 ফাওবদা চাউখৎপা লৈবাক অমা ওইবা ঙমগনি অমসুং পুম্নমকপু নুংঙাই য়াইফহনবা ঙমগনি হায়না কম্মর্স মন্ত্রীনা ফোংদোকখি।

সরকারনা ক্বালিতী কন্ত্রোল ওর্দরগী খুত্থাংদা এম.এস.এম.ই. সেক্তরবু শৌগৎলি হায়না শ্রী গোয়লনা হায়খি। “এম.এস.এম.ই.শিংনা মখোয়গী মথৌ তাবশিং থেংনবা ঙম্নবা ঐখোয়না মতম পীরি”, মহাক্না হায়খি অমসুং এম.এস.এম.ই.শিংনা মরম অনিদগী কান্নবা ফংগনি হায়না মখা তাখি। ক্যু.সি.ও.না মীরম লৈবাক্তগী চুনদবা মমলদা স্তেন্দর্দ য়ৌদবা পোত্থোক পুশিল্লকপদা অথিংবা থম্লি, মসিনা এম.এস.এম.ই.শিংবু কাঙলোন কায়বা চাংয়েংনবগী থৌওংদগী ঙাকথোক্তুনা তেংবাংলি। অনিশুবদা, এম.এস.এম.ই.শিংনা স্তেন্দর্দ য়ৌবা মতমদা মালেম অমসুং লৈবাক্কী থাক্তা চাংয়েংনবা ঙম্মি অমসুং শেন্দোং তানবা হৌরকই। ক্যু.সি.শিংনা সেক্তর খুদিংবু কান্নবা পীবগী অতোপ্পা খুদম কয়া অমসু লৈরি হায়নলা মহাক্না হায়খি।

***