প্রধানমন্ত্রীগী লোইশঙ
ভারতকী প্রধান মন্ত্রীগী য়ুক্রেন খোঙচৎতা ফোঙদোকখিবা ভারত-য়ুক্রেনগী অপুনবা ৱারোল
Posted On:
23 AUG 2024 6:41PM by PIB Imphal
য়ুক্রেনগী রাস্ত্রপতি ভোলোদিমিয়র জেলেন্সকিনা চেবাউ পীরকপদগী, ওগস্ত ২৩,২০২৪ দা ভারতকী প্রধান মন্ত্রী শ্রী নরেন্দ্র মোদী য়ুক্রেনদা চৎখ্রে। মসি ১৯৯২ দগী লৈবাক অনিগী মরক্তা কুতনিতিগী মরী লৈনরকপদগী ভারতকী প্রধান মন্ত্রী অমনা অহানবা ওইনা য়ুক্রেনদা চৎপনি।
রাজনিতিগী মরীশিং
লৈবাক অনিগী মরীশিং অসি তুংদা কমপ্রেহেন্সিপ পার্তনরশিপ অমদগী স্ত্রাতেজিক পার্তনরশিপ অমদা পুখৎনবা থবক তৌনিংবগী অপাম্বা লুচিংবা অনিনা ফোঙদোকখি।
অমনা অমবু থাজনবা, ইকায়খুম্নবা অমসুং অরোন-অথুপ লৈতবদা য়ুম্ফম ওইদুনা লেবাক অনিমক্কী মীয়ামগী কান্নবা ফংনবা লৈবাক অনিগী মরীশিং মখা তানা চাউখৎহন্নবা মখোয়গী থাজবা লুচিংবশিংনা অমুক হন্না থমখি।
হৌখিবা চহি ৩০ দা লৈবাক অনিগী মরীশিং অফবা মাইকৈদা লাক্লিবা অসি লুচিংবশিংনা হন্না য়েংশিনখি অমসুং লৈবাকশিংনা জুন ২০২৪ দা অপুলিয়াদা অমসুং জি-৭ মীফমগী নাকলদা মে ২০২৩ দা হিরোসিমাদা উনখিবা; য়ুক্রেনগী ফোরেন এফেয়ার্স মিনিস্তরনা মার্চ ২০২৪ দা নিউ দিল্লিদা চৎখিবা; ভারতকী এক্সতর্নেল এফেয়ার্স মিনিস্তর অমসুং য়ুক্রেনগী ফোরেন এফেয়ার্স মিনিস্তরগী মরক্তা কয়ারক উনখিবা অমসুং তেলিফোন্দা ৱারি শান্নখিবা; ভারতকী নেসনেল সেকুরিতি এদভাইজর অমসুং য়ুক্রেনগী রাস্ত্রপতিগী ওফিসগী লুচিংবগী মরক্তা উনখিবা অমসুং জুলাই ২০২৩দা কিবতা পাংথোকখিবা ৯শুবা ফোরেন ওফিস কন্সলতেসন অসিনা অমনা অমবু থাজবা, মশক খঙবা অমসুং মতেং পীনবা হেনগৎহন্দুনা তোঙান-তোঙানবা থাকশিংদা ভারত অমসুং য়ুক্রেন চাং নাইনা উনবনা লৌখিবা থৌদাংশিং লুচিংবশিংনা থাগৎপা ফোঙদোকখি।
ভাইব্রেন্ত গুজরাত গ্লোভেল সম্মিৎ ২০২৪ অমসুং রাইসিনা দাইলোগ ২০২৪ দা য়ুক্রেনগী ওফিসিএলশিং শরুক য়াবদা লুচিংবশিংনা থাগৎপা ফোঙদোকখি।
অপুনবা, চৎনবা য়াবা অমসুং তুংকোইবা শান্তি অমা পুরকপা
লৈবাকশিংগী ঙমখৈগী অপুনবা শক্তম অমসুং মনিংতম্বা ইকায়খুম্নবা য়াওনা, য়ু.এন চার্তর য়াওনা মালেমগী আইনশিংগী অচুম্বা ফিদমশিংদা য়ুম্ফম ওইদুনা মখা তানা মতেং পাংন্নবা মখোয়না থৌরাং তৌরিবা অদু প্রধান মন্ত্রী মোদী অমসুং রাস্ত্রপতি জেলেন্সকিনা অমুক হন্না ফোঙদোকখি। হিরম অসিগী মতাংদা লৈবাক অনি নকশিন্ননা ৱারি শান্নবগী অপাম্বা মখোয়না থমখি।
ভারতকী মাইকৈদগী লৈবাক অসিগী ফিরেপ অমসুং ৱারি শান্নবা অমসুং কুতনিতিগী খুৎথাংদা শান্তি ওইনা ৱারোইশিন পুরকপদা মীৎয়েং থম্বা অদু অমুক হন্না ফোঙদোকখি অমসুং মসিগী শরুক অমা ওইনা ভারতনা য়ুক্রেনদা পাংথোকপা শান্তিগী মীফম, বুরজেন্সতোক, সুইজরলেন্দা জুন ২০২৪ দা পাংথোকপা মীফমদা শরুক য়াখ্রে।
অসিগুম্বা মীফমদা ভারতনা শরুক য়াখিবদা য়ুক্রেন্না থাগৎপা ফোঙদোকখি অমসুং মথংগী শান্তিগী মীফমদা অৱাংবা থাক্কী ভারতকী ওফিসিএলশিং শরুক য়াবগী মরুওইবা অদু পনখি।
য়ুক্রেনদা শান্তি পুরক্নবগী মতাংদা মীফম অদুদা চৎনখিবা শান্তিগী ফ্রেমৱার্ক অমগী অপুনবা ৱারোল অদু য়ুক্রেনগী মাইকৈদগী পাউদমখি অমসুং মসিনা ৱারি শান্নবা, কুতনিতি অমসুং মালেমগী আইনদা য়ুম্ফম ওইদুনা শান্তি পুরক্নবা মখা তানা হোৎনবগী য়ুম্ফম অমা ওইগনি।
য়ুক্রেনগী মহৈ-মরোং মতেং পাংববগী থবক য়াওনা মালেমগী ওইনা চীঞ্জাক ৱাৎহন্দনবা পায়খৎলিবা থবকশিং লুচিংবশিংনা থাগৎপা ফোঙদোকখি। এসিয়া অমসুং অফ্রিকা য়াওনা মালেমগী কৈথেলশিংদা অতৎ-অখম লৈতনা লৌউ-শিংউগী পোৎথোকশিং ফংহনবগী মরুওইবা অদু ফোঙদোকখি।
পুম্নমক্না য়াগদবা অনৌবা পাম্বৈশিং পুথোক্নবা অমসুং অথুবা মতমদা শান্তি পুরক্নবা মাইকৈদা মতেং পাংনবা মরী লৈনবা খুদিংমক পুকচেল শেংনা অমসুং থবক ওইনা পাংথোকপগী তঙাইফদবা অদু প্রধান মন্ত্রী মোদীনা অমুক হন্না ফোঙদোকখি। অথুবা মতমদা শান্তি হঞ্জিল্লক্নবা পাংবা য়াবা মতেং পাংনবা ভারতনা থৌরাং তৌরিবা অদু প্রধান মন্ত্রীনা অমুক হন্না নিংশিংখি।
শেন-থুম, সাইন্স অমসুং তেক্নোলোজিগী থবকশিংদা মতেং পীনবা
ললোন-ইতিক, লৌউ-শিংউ, ফার্মাসিউতিকেলশিং, ঙাক-শেন, লাইরিক-লাইশু তম্বা, সাইন্স অমসুং তেক্নোলোজি অমসুং নাত য়াওনা হিরম কয়াদা মতেং পীনবা হেনগৎহন্নবা লুচিংবশিংনা খন্নখি। দিজিতেল পব্লিক ইনফ্রাস্ত্রকচর, উদ্যোগ, মেনুফেকচরিং, গ্রিন ইনর্জিগুম্বা হিরমশিংদা লৈবাক অনিমক্কী ললোন-ইতিক অমসুং উদ্যোগ হেন্না শরুক য়াদুনা মতেং পীনবা হেনগৎহন্নবা খুদোংচাবশিং মশক খঙদোক্নবা লুচিংবশিংনা খন্নখি।
লৈবাক অনিগী মরক্তা তুংকোইনা চৎনবা য়াগদবা অমসুং অচেৎপা শেন-থুমগী মরী অমা লৈহন্নবা ললোন-ইতিক, শেন-থুম, সাইন্তিফিক, তেক্নিকেল, ইন্দস্ত্রিএল অমসুং কলচরগী মতেং পীন্নবা ইন্দিয়ান-য়ুক্রেনিয়ান ইন্তরগভর্নমেন্তেল কম্মিসন(আই জি সি)গী মরুওইবা অদু লুচিংবশিংনা খন্নখি।
মার্চ ২০২৪ দা য়ুক্রেনগী ফোরেন মিনিস্তরগী ভারত খোঙচৎ মনুংদা আই.জি.সি হন্না য়েংশিনখিবা অমসুং লৈবাক অনিগী খুদোংচাগদবা মতম অমদা ২০২৪ দা আই.জি.সিগী ৭শুবা মীফম পাংথোক্নবা জোইন্ত ৱার্কিং গ্রুপকী মীফমশিং পাংথোক্নবা হোৎনখিবশিং লুচিংবশিংনা থাগৎপা ফোঙদোকখি। ভারতকী এক্সতর্নেল এফেয়ার্স মিনিস্তর দোক্তর এস জয়সঙ্কর আই.জি.সিগী কো-চিয়ার/চিয়াপর্সন ওইনা হাপ্পদা য়ুক্রেনগী মাইকৈদগী তরাম্না ওকখি।
হৌজিক চৎথরিবা লাল অনিনা মরম ওইদুনা ২০২২গী লৈবাক অনিগী চহিগী ললোন-ইতিক্কী থবকশিং শিংথাবা য়ানা হন্থরক্লিবা অসি য়েংলগা, লৈবাক অনিগী ললোন-ইতিক অমসুং শেন-থুমগী মরীশিং লাল মমাঙগী ফিবমদা হঞ্জিল্লক্নবা পাম্বৈশিং খঙদোকপা খক নত্তনা মখা তানা পাকথোক-চাউথোক্নবা লম্বী খুদিংমক খঙদোক্নবা লুচিংবশিংনা আই.জি.সিগী কো-চিয়ারশিংদা খঙহনখ্রে।
ভারত অমসুং য়ুক্রেনগী মরক্তা হেন্না ললোন-ইতিক পাংথোকপদা থেংনরিবা অপনবশিং লৌথোকপগী মথক্তা, লৈবাক অনিগী শেন-থুমগী থবকশিং অমসুং শেন থাদবগীদমক ললোন-ইতিক্কী থবকশিং লাইথোকহনবগী মরুওইবা অদু লুচিংবশিংনা থমখি। অপুনবা প্রোজেকশিং, মতেং পাংনবশিং অমসুং ভেঞ্চরশিং মশক খঙদোক্নবা ওফিসিএল অমসুং ললোন-ইতিক্কি থাকশিংদা য়াম্না তোইনা উন্নবা লুচিংবশিংনা পুক্নিং থৌগৎখি।
লৌউ-শিংউগী লমদা লৈবাক অনিগী মরক্তা অচেৎপা মরীশিং লৈনরিবা অদু লুচিংবশিংনা নিংশিংখি অমসুং স্তেন্দার্দশিং অমসুং সর্তিফিকেসনগী থববকশিং ফগৎহনবা য়াওনা মতেং পাংনবা য়াবা হিরমশিংদা য়ুম্ফম ওইদুনা লৈবাক অনি ৱারি শান্নবা অমসুং য়োনফম পীবগী থবক হেনগৎহন্নবা লুচিংবশিংনা খন্নখি।
ফার্মাসিউতিকেলগী পোৎথোকশিংদা মতেং পাংনবা অসি মরুপ-মপাং ওইবগী অকনবা য়ুম্বীশিংগী মনুংদা অমা ওইনা শকখঙবগা লোয়ননা তেস্তিং, ইন্সপেক্সন অমসুং রেজিস্ত্রেসনগী খুৎথাং য়াওনা য়োনফম হেন্না ফংহনবা অমসুং শেন থাদবা অমসুং জোইন্ত ভেঞ্চরশিংগী খুদোংচাবা হেনগৎহন্নবগী অপাম্বা লুচিংবশিংনা অমুক হন্না ফোঙদোকখি। ত্রেনিং অমসুং খ্বাইদগী ফবা থবকশিং শরুক য়ামিন্নবা য়াওনা দ্রগশিং অমসুং ফার্মাসিউতিকেলশিংগী লমদা মতেং পাংনবা হেনগৎহন্নিংবগী অপাম্বা লুচিংবশিংনা থমখি।
মেদিসিনশিং অমসুং দ্রগশিং য়েংশিন্নবা ভারতকী হেল্থ অমসুং ফেমিলি ৱেলফিয়ার মিনিস্ত্রি অমসুং য়ুক্রেনগী স্তেৎ সর্বিসকী মরক্তা এম.ও.য়ু খুৎয়েক পীনখিবা অমসুং ফার্মাসিউতিকেলগী মতেং পীন্নবা ইন্দিয়ান-য়ুক্রেন্নিয়ান জোইন্ত ৱার্কিং গ্রুপকী ৩শুবা মীফম ভর্চুএল ওইনা ওগস্ত ২০২৪ দা পাংথোকখিবদা লুচিংবশিংনা তরাম্না ওকখি। মমল হোংবা অমসুং মগুন লৈবা হিদাক-লাংথকশিং ফংহনবগীদমক য়ুক্রেনগী মাইকৈদগী ভারত থাগৎপা ফোঙদোকখি।
থাদখিবা শেনফমশিং নাকল অনিনা ঙাক-শেন্নবা অমসুং লাইরিক-লাইশুগী চে-চাংশিং; একাদেমি দিগ্রিশিং; অমসুং মিংথোলশিং অমনা অমগী মশক খঙনবা লৈবাক অনিগী আইনগী ঙাক্লৌশিং পাকথোক-চাউথোক্নবা থবক য়াংশিনবা হায়না লুচিংবশিংনা য়ানখ্রে।
সাইন্স অমসুং তেক্নোলোজিগী মতেং পাংনবা, সাইন্স অমসুং তেক্নোলোজিগী মতেং পাংনবগী ইন্দিয়ান-য়ুক্রেন্নিয়ান জোইন্ত ৱার্কিং গ্রুপ মপুংফানা থবক তৌহনবা অমসুং লৈবাক অনিগী রিছার্স প্রোজেকশিং লোইশিনবগী মতাংদা ভারত অমসুং য়ুক্রেনগী মরক্তা য়ানখিবা মাইপাক্না থবক ওইনা পাংথোকপা অদু লুচিংবশিংনা খঙজিনখি। আই.সি.তি, এ.আই, মেছিন লার্নিং, ক্লাউদ সর্বিসেস, বাইওতেক্নোলোজি, অনৌবা মচাকশিং, গ্রিন ইনর্জি অমসুং আর্থ সাইন্সেসগুম্বা হিরমশিংদা চাংনাইনা চৎথোক-চৎশিন তৌনবা অমসুং থৌরমশিং পাংথোকপা লৈবাক অনিনা পুক্নিং থৌগৎখি। জুন ২০,২০২৪ দা সাইন্তিফিক অমসুং তেক্নিকেল কোওপরেসনগী জোইন্ত ৱার্কিং গ্রুপকী ৮শুবা মীফম পাংথোকখিবদা লুচিংবশিংনা তরাম্না ওকখি।
ঙাক-শেনগী লমদা মতেং পাংনবা
ভারত অমসুং য়ুক্রেনগী মরক্তা ঙাক-শেনগী মতেং পাংনবগী মরুওইবা অদু খঙলদুনা, ভারত্তা মেনুফেকচরিং তৌনবা পুন্না থবক তৌমিন্নবা য়াওনা অমসুং অনৌবা হিরমশিংদা মতেং পাংনবা য়াওনা, লৈবাক অনিগী ঙাক-শেনগী মিনিস্ত্রিশিংগী মরক্তা অচেৎপা মরী অমা থম্নবা মাইকৈদা মখা তানা থবক পায়খৎপা হায়না লুচিংবশিংনা য়ানখ্রে। ২০১২ দিফেন্স কোওপরেসন এগ্রিমেন্তগী মখাদা লিংখৎখিবা মিলিতরি-তেক্নিকেল কোওপরেসনগী ইন্দিয়ান-য়ুক্রেন্নিয়ান জোইন্ত ৱার্কিং গ্রুপকী ২শুবা মীফম তুংদা ভারত্তা পাংথোকপা হায়না লৈবাক অনিনা য়ানরে।
নাতকী অমসুং মীগা-মীগা লৈনবা মরীশিং
ভারত অমসুং য়ুক্রেনগী মরক্তা লৈনরিবা মরুপ-মপাংগী মরী অসি মতম শাংনা থম্নবা হোৎনবদা নাতকী অমসুং মীগা-মীগা লৈনবা মরীশিংনা লৌরিবা মরুওইবা থৌদাং অদু খঙবগা লোয়ননা, নাতকী মতেং পাংন্নবা লৈবাক অনিগী থৌরম পাংথোক্নবা য়ানবা পুরকখিবা অমসুং ভারত অমসুং য়ুক্রেনদা নাতকী ফেস্তিবেলশিং পাংথোক্নবা ৱারেপ লৌখিবদা লুচিংবা অনিনা তরাম্না ওকখ্রে। ইন্দিয়ান তেক্নিকেল এন্দ ইকোনোমিক কোওপরেসন প্রোগ্রাম অমসুং ইন্দিয়ান কাউন্সিল ফোর কলচরেল রিলেসন্সকী জেনেরেল কলচরেল স্কোলারসিপ স্কিমগী মখাদা পীরিবা স্কোলারশিপ য়াওনা মীগা-মীগা লৈনবা মরীশিং অমসুং নাতকী থৌরমশিং পাংথোকপা হেনগৎহনবগী মরুওইবশিং লুচিংবশিংনা থমখি।
লৈবাক অনিমক্কী মীয়ামগী লাইরিক-লাইশু তম্বগী দরকার ওইবশিং ফংহন্নবা অৱাংবা থাক্কী মহৈলোয়শঙশিংগী মশাশিং লৈবাক অমনা লৈবাক অমদা হাংদোক্নবা ওইথোকপা য়াবশিং মশক খঙদোক্নবা লৈবাক অনিনা য়ানরে।
মরুপ-মপাং ওইবা মরীশিং চাউখৎনবা অমসুং লৈবাক অনিগী মরক্তা মীগা-মীগা উনবা ঙম্নবা হোৎনবদা য়ুক্রেনদা লৈরিবা ভারতমচাশিংনা লৌরিবা থৌদাং লুচিংবশিংনা থাগৎপা ফোঙদোকখ্রে।
২০২২ গী অঙনবা শরুক্তা য়ুক্রেনদগী ভারতকী মহৈরোয়শিং লৌথোকপদা য়ুক্রেননা মতেং পাংখিবগীদমক ভারতকী মাইকৈদগী থাগৎপা ফোঙদোকখি। মতম অদুদা য়ুক্রেনদগী ভারতমচাশিং অমসুং মহৈরোয়শিং অশোই-অঙাম য়াওদনা হল্লকখি। ভারতমচাশিং অমসুং মহৈরোয়শিংদা অরাইবা ভিসা অমসুং রেজিস্ত্রেনগী খুদোংচাবশিং পীনবা ভারতকী মাইকৈদগী য়ুক্রেনগী মাইকৈদা হায়জখি।
য়ুক্রেনদা মতেং পাংলকপগীদমক য়ুক্রেনগী মাইকৈদগী ভারত থাগৎপা ফোঙদোকখি অমসুং ভারতকী গ্রান্তগী মতেংগা লোয়ননা লৈবাক অনিনা য়ানরবা প্রোজেকশিং পায়খৎপা ঙম্নবা ভারত অমসুং য়ুক্রেন অনিগী মরক্তা হায় ইম্পেক্ত কম্মুনিতি দিবলপমেন্ত প্রোজেকশিংগী এম.ও.য়ু খুৎয়েক পীনবদা তরাম্না ওকখি।
য়ুক্রেন অমুক হন্না শেমগৎ-শাগৎপদা ভারতকী কম্পেনিশিং শরুক য়ানবা ওইথোকপশিং মশক খঙদোকপদা লৈবাক অনিনা য়ানরে।
লুচিংবশিংনা অমতা ওইনা তেরোরিজম য়ানিংদবা ফোঙদোকখি। মখল খুদিংমক্কী তেরোরিজম অমসুং এক্সত্রিমিজম য়াশিন্নবা তৌদনা থেংননবা লুচিংবশিংনা য়ানখি অমসুং মালেমগী আইন অমসুং য়ু.এন চার্তরগী মতুংইন্না হিরম অসিদা মতেং পাংনবা হেনগৎহনবগী মরুওইবা অদু মখোয়না থমখি।
মালেমগী হৌজিক ওইরিবা অশেংবা ফিবমশিং মমি তাবা ঙম্নবা অমসুং মালেমগী শান্তি অমসুং সেকুরিতি পুরক্নবা মতিক চানা থবক তৌবা ঙম্নবা য়ু.এন সেকুরিতি কাউন্সিল অপুনবা ওইনা শেমদোক্নবা লুচিংবা অনিনা তকশিনখি। শেমদোক্লবা অমসুং পাকথোক-চাউথোক্লবা য়ু.এন সেকুরিতি কাউন্সিল অমদা ভারতনা লেংদবা মেম্বর অমা ওইনবা লৈবাক অসিনা শৌগৎপা অদু য়ুক্রেননা অমুক হন্না পনখি।
ইন্তরনেসনেল সোল্লার এল্লাইন্সতা য়ুক্রেন শরুক য়াগনি হায়বগী থাজবা ভারতকী মাইকৈদগী থমখি।
লৈবাক অনিগী মরীশিংগী অপুনবা হিরমশিং লুচিংবশিং কুপ্না খন্নখি অমসুং লৈবাক অমনা অমবু মশক খঙবা অমসুং ভারত-য়ুক্রেনগী মরীশিংদা থাজবা থমদুনা লমদম লমদমগী অমসুং মালেমগী ৱাফমশিংদা লুচিংবশিংনা মখোয়গী ওইবা ৱাখল্লোনশিং ফোঙদোক্নখি।
খোঙচৎ মনুংদা মহাক অমসুং মহাক্কী মীহুৎ কাংবু তরাম্না ওকপগীদমক প্রধান মন্ত্রী শ্রী নরেন্দ্র মোদীনা রাস্ত্রপতি জেলেন্সকি থাগৎপা ফোঙদোকখি অমসুং লৈবাক অনিনা খুদোংচাগদবা মতম অমদা জেলেন্সকি ভারত্তা লাক্নবা প্রধান মন্ত্রীনা চেবাউ পীখি।
***
(Release ID: 2048416)
Visitor Counter : 4
Read this release in:
English
,
Urdu
,
Marathi
,
Hindi
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam