ریشمی دھاگوں نے سوشل میڈیا پر چلنے والی ورچوئل راکھیوں کا قد پست کر دیا ہے۔ بہنیں اپنے بھائیوں کو ڈاکخانوں کے ذریعے رنگ برنگی راکھیاں بھیجنے کو ترجیح دے رہی ہیں۔ محکمہ ڈاک نے بھی اس کے لیے تمام ضروری انتظامات کر لیے ہیں۔ پوسٹ ماسٹر جنرل، نارتھ گجرات، احمد آباد جناب کرشن کمار یادو نے بتایا کہ اب تک احمد آباد خطے کے مختلف پوسٹ آفسوں سے 3 لاکھ سے زیادہ راکھیاں بُک کر کے ملک اور بیرون ملک بھیجی جا چکی ہیں۔ رکشا بندھن سے ایک دن پہلے اتوار کو راکھیوں کی ترسیل کے لیے خصوصی انتظامات کیے گئے ہیں تاکہ کسی بھی بھائی کی کلائی محروم نہ رہے۔

راکھی کا جنون ملک سے باہر بھی بہت زیادہ ہے۔ پوسٹ ماسٹر جنرل جناب کرشنا کمار یادو نے بتایا کہ راکھیاں ڈاکخانوں سے اسپیڈ پوسٹ اور رجسٹرڈ پوسٹ کے ذریعے بیرون ممالک بھیجی جارہی ہیں۔ احمد آباد خطے کے مختلف ڈاک خانوں کے ذریعہ تقریباً 1.5 لاکھ راکھیاں بیرونی ممالک کے لیے بُک کی گئیں۔ ان میں سے زیادہ تر راکھیاں امریکہ، برطانیہ، آسٹریلیا، نیوزی لینڈ، سنگاپور، کینیڈا، روس، متحدہ عرب امارات، جرمنی، جاپان، چین وغیرہ ممالک میں بھیجی گئی ہیں۔ ساتھ ہی بیرون ملک مقیم بہنیں بھی اپنے پیارے بھائیوں کو راکھیاں بھیج رہی ہیں جو کہ فوری طور پر ڈاکخانوں کے ذریعے پہنچائی جارہی ہیں۔ بہنیں بیرون ملک کے لیے پہلے سے ہی راکھیاں بھیج رہی ہیں تاکہ ان کی راکھیاں صحیح وقت پر بھائیوں تک پہنچ جائیں اور ان کی کلائیاں سونی نہ رہیں۔

پوسٹ ماسٹر جنرل جناب کرشنا کمار یادو نے بتایا کہ راکھی میل کی بکنگ اور چھانٹنے كے عمل كے علاوہ   ڈاکخانوں سے اُن کی فوری ترسیل بشمول ریلوے میل سروس اور چھانٹنے كے قومی مراكز کے لیے خصوصی انتظامات کیے گئے ہیں۔ خطوط کے ذریعے خوشیاں پھیلانے والے محکمہِ ڈاک نے  اس تعلق کو بھی نئی بلندیوں پر پہنچا دیا ہے۔

***

ش ح۔ ع س۔ ک ا