ہندوستان کے زراعت اور کسانوں کی فلاح و بہبود اور دیہی ترقی کے مرکزی وزیر جناب شیوراج سنگھ چوہان نے نیوزی لینڈ کے وزیر برائے زراعت، جنگلات، تجارت، اور امور خارجہ کے وزیر جناب ٹوڈ میکلے سے ان کے  وفد کے ساتھ ملاقات کی۔ یہ اعلیٰ سطحی دو طرفہ میٹنگ آج نئی دہلی کے کرشی بھون میں منعقد  ہوئی۔

ملاقات میں باہمی دلچسپی کے اہم شعبوں اور تعاون کے مواقع پر توجہ مرکوز کی گئی۔ بات چیت کا مرکز دونوں ممالک کی زرعی ترجیحات کے بارے میں معلومات کے تبادلے اور شراکت داری کے لیے نئی راہیں تلاش کرنے پر تھا، جس میں باغبانی سے متعلق مجوزہ مفاہمت نامے پر (ایم او سی) تبادلہ خیال بھی شامل ہے۔ وزراء نے زرعی شراکت داری کو مزید گہرا کرنے کے عزم کا اظہار کیا جس میں حالیہ برسوں میں نمایاں پیش رفت دیکھنے میں آئی ہے۔

وزیرموصوف جناب چوہان نے ہندوستان کے ساتھ تعلقات کو مضبوط بنانے میں نیوزی لینڈ کی سرگرم کوششوں کی تعریف کی اور اس تعلقات کے لیے نیوزی لینڈ کی حکومت کی جاری وابستگی کی اہمیت کو تسلیم کیا۔ انہوں نے دونوں ممالک کے درمیان تاریخی، کاروباری اور ثقافتی تعلقات پر روشنی ڈالی، نیوزی لینڈ میں ہندوستانی باشندوں کی اہم شراکت اور ممالک کے درمیان بڑھتے ہوئے تعلیمی تبادلوں کو اجاگر کیا۔

میٹنگ میں ہندوستان میں نیوزی لینڈ کے ہائی کمشنر جناب پیٹرک راٹا کے علاوہ دونوں ممالک کے سینئر افسران نے بھی شرکت کی۔

اجلاس کے اہم نتائج میں تجارت اور مارکیٹ تک رسائی میں مثبت پیش رفت شامل ہے۔ نیوزی لینڈ کی جانب سے ہندستانی  انار کی درآمد اور آم کی برآمدات پر سے پابندیاں ہٹانے کی حمایت کا دل سے اعتراف کیا گیا۔ جناب چوہان نے لکھنؤ اور دہلی میں نئی ​​آڈٹ شدہ وی ایچ ٹی سہولیات کی تیزی سے منظوری کی بھی امید ظاہر کی، جس سے نیوزی لینڈ کو ہندوستانی آم کی برآمد میں مزید اضافہ ہوگا۔

مزید برآں، نیوزی لینڈ کے وزیر نے حال ہی میں نیوزی لینڈ سے ہندوستان کو پائن لاگ کی برآمدات دوبارہ شروع کرنے کے لیے شکریہ ادا کیا، جس سے انہیں پچھلے فیومیگیشن سے متعلق چیلنجوں پر قابو پانے میں مدد ملی۔ مرکزی وزیر جناب چوہان نے اس شعبے میں تعاون جاری رکھنے کے لیے ہندوستان کی حمایت کا اعادہ کیا اور دیگر زرعی مصنوعات بشمول نارنگی اور کیلے جیسے تازہ اور خشک میوہ جات میں تجارت کو وسعت دینے کی صلاحیت پر زور دیا۔ انہوں نے خاص طور پر نیوزی لینڈ کو انگور برآمد کرنے کے لیے ہندوستانی برآمد کنندگان تک جلد بازار تک رسائی پر غور کرنے کا ذکر کیا۔ دونوں فریقوں نے دو طرفہ تجارت اور سرمایہ کاری کو مزید بڑھانے کے لیے نجی شعبے کی زیادہ سے زیادہ شراکت داری کو فروغ دینے پر اتفاق کیا۔

میٹنگ میں تحقیق اور ترقی میں تکنیکی تعاون کی اہمیت پر بھی بات کی گئی، خاص طور پر باغبانی اور کیج فشریز میں، اس شعبے میں تعاون کے وسیع امکانات کو تسلیم کیا گیا۔ وزراء نے اقتصادی اور تجارتی تعلقات کو مضبوط بنانے کے لیے مل کر کام کرنے کے اپنے عزم کا اعادہ کیا، جس سے دونوں ممالک کے کسانوں، پروڈیوسروں اور صارفین کو فائدہ پہنچے گا۔

جناب شیوراج سنگھ چوہان کے ہندوستان میں نتیجہ خیز اور خوشگوار قیام کے لیے وزیر  جناب  میکلے اور ان کے وفد کے لیے نیک تمناؤں کا اظہار کرتے ہوئے میٹنگ کا اختتام ہوا۔

***

ش ح۔  ش ت۔ ج

Uno-9743