নহারোল অমসুং শান্ন-খোৎনবগী মন্ত্রালয়
দা. মন্সুখ মান্দবিয়ানা ভারতকী নুপাগী হোক্কী তীম্বু পেরিস ওলিম্পিক্সতা মশক থোক্না শান্নখিবগীদমক হরাওবা ফোংদোক্লদুনা ওকখ্রে; তীমগী কত্থোকপা অমসুং হনবা লৈতনা হোৎনখিবা কয়াবু শিংথাখি
"নখোয়না ভারতকীদমক অচৌবা মায় পাকপা অমা পুরক্লে অমসুং নহা ওইরিবা শান্নরোই মিলিয়ন কয়াবু মখোয়গী মঙলান মঙফাওনবা ঙমহন্নবা ইনোৎ হাপ্লে" – কেন্দ্রগী মন্ত্রী
Posted On:
10 AUG 2024 1:36PM by PIB Imphal
কেন্দ্রী য়ুথ এফিয়র্স অমসুং স্পোর্তস মন্ত্রী দা. মন্সুখ মান্দবিয়ানা ভারতকী নুপাগী হোক্কী তীম্বু পেরিস ২০২৪ ওলিম্পিক্সতা শেঞ্জেংগী তক্মান লৌদুনা মশক থোক্না শান্নখিবগীদমক হরাওবা ফোংদোক্লদুনা ঙসি দিল্লীদা ওকখ্রে।
দা. মান্দবিয়ানা মখোয়না মালেমগী থাক্তা শিংথানিংঙাই ওইবা মওংদা শান্নখিবনা লৈবাক অসিবু চাউথোকচফম ওইহল্লি হায়না পল্লদুনা তীম অসিগী কত্থোকপা অমসুং কন্না হোৎনবা কয়াবু শিংথাখি।
"নখোয়গী মায় পাকপা অসিগীদমক লৈবাক শীনবা থুংনা চাউথোকপা পোকচরি," হায়না দা. মান্দবিয়ানা ফোংদোকখি। "মায় পাকপা অসিনা নখোয়গী খাঙবা কনবা, অপুনবা পাঙ্গল, অমসুং হনবা লৈতবা থৌনা অদু তাক্লে। নখোয়না ভারতকীদমক অচৌবা মায় পাকপা অমা পুরক্লে অমসুং নহা ওইরিবা শান্নরোই মিলিয়ন কয়াবু মখোয়গী মঙলান মঙফাওনবা ঙমহন্নবা ইনোৎ হাপ্লে," হায়না মহাক্না মখা তাখি।
কেন্দ্রগী মন্ত্রীনা কোচিং স্তাফ অমসুং সপ্পোর্ত তীমগী চোকথবা নাইদনা হোৎনখিবা কয়াবুসু শকখঙবীরদুনা মখোয়না তীম অসিগী মায় পাক্নবা হোৎনবদা অচৌবা থৌদাং লৌরি হায়খি। লৈঙাক অসিনা ভারত্তা হোক্কী মশান্না হেন্না খুমাং চাউশিলহন্নবা হোৎনরিবা অমসুং লৈবাকসিগী শান্নখোৎনবগী হৈশিংবশিং য়োকখৎনবা হোৎনরিবা কয়াবু পল্লদুনা হায়খি।
"হোক্কী হায়বসি ঐখোয়গীদি মশান্না অমা ওইবখক্তা নত্তে- মসি ঐখোয়গী জাতিগী চাউথোকচফম অমসুনি। তীম অসিনা উৎখিবা খাঙবা কনবা, অচেৎপা ফিরেপনা পুৱারীদা লৈহৌরগদবা মায় পাকপসি পুরকখিবনি। অচেৎপা থাজবা লৈরবদি করি পুরকপা ঙম্মি হায়বসি নখোয়না মালেমদা উৎখ্রে," হায়না দা. মান্দবিয়ানা ফোংদোকখি।
শান্নরোইশিংগা ৱারী শান্নরদুনা দা. মান্দিবিয়ানা মখোয়বু তুংদসু হেন্না কন্না হোৎননবা অমসুং তুংদা হেন্না চাউবা মায় পাকপা পুরকপা ঙম্নবা হোৎননবা পুক্নিং থৌগৎখি।
***
(Release ID: 2044069)
Visitor Counter : 51