ಭಾರತ ಸರ್ಕಾರವು ಯೂರಿಯಾ ಸಬ್ಸಿಡಿ ಯೋಜನೆಯನ್ನು ಹೊಂದಿದೆ, ಇದು ರಾಸಾಯನಿಕ ಮತ್ತು ರಸಗೊಬ್ಬರ ಸಚಿವಾಲಯದ ಕೇಂದ್ರ ವಲಯದ ಯೋಜನೆಯಾಗಿದ್ದು, ಇದು ಖಾರಿಫ್ ಮತ್ತು ರಾಬಿ ಋತುಗಳಿಗೆ ಅನ್ವಯಿಸುತ್ತದೆ. ಈ ಯೋಜನೆಗೆ ಭಾರತ ಸರ್ಕಾರವು ಬಜೆಟ್ ಬೆಂಬಲದ ಮೂಲಕ ಸಂಪೂರ್ಣವಾಗಿ ಹಣಕಾಸು ಒದಗಿಸುತ್ತದೆ. ಯೂರಿಯಾ ಸಬ್ಸಿಡಿ ಯೋಜನೆಯು ಮೂರು ಘಟಕಗಳನ್ನು ಹೊಂದಿದೆ, ಅವುಗಳೆಂದರೆ, ದೇಶೀಯ ಯೂರಿಯಾ, ಆಮದು ಮಾಡಿದ ಯೂರಿಯಾ ಮತ್ತು ಏಕರೂಪದ ಸರಕು ಸಬ್ಸಿಡಿ.

ದೇಶೀಯ ಯೂರಿಯಾ ಉತ್ಪಾದನೆಗಾಗಿ ಯೂರಿಯಾ ಘಟಕಗಳಿಗೆ ದೇಶೀಯ ಯೂರಿಯಾ ಸಬ್ಸಿಡಿಯನ್ನು ನೀಡಲಾಗುತ್ತದೆ. ಆಮದು ಮಾಡಿದ ಯೂರಿಯಾ ಸಬ್ಸಿಡಿಯನ್ನು ದೇಶದಲ್ಲಿ ಯೂರಿಯಾದ ಮೌಲ್ಯಮಾಪನ ಬೇಡಿಕೆ ಮತ್ತು ದೇಶೀಯ ಉತ್ಪಾದನೆಯ ನಡುವಿನ ಅಂತರವನ್ನು ಕಡಿಮೆ ಮಾಡಲು ಮಾಡಿದ ಆಮದಿಗೆ ನಿರ್ದೇಶಿಸಲಾಗಿದೆ. ಎರಡೂ ಘಟಕಗಳು ಏಕರೂಪದ ಸರಕು ಸಬ್ಸಿಡಿ ನೀತಿಯಡಿ ದೇಶಾದ್ಯಂತ ಯೂರಿಯಾ ಸಾಗಣೆಗೆ ಸರಕು ಸಬ್ಸಿಡಿಯನ್ನು ಒಳಗೊಂಡಿವೆ.

ಯೂರಿಯಾ ಸಬ್ಸಿಡಿ ಯೋಜನೆಯಡಿ, ಯೂರಿಯಾವನ್ನು ಪ್ರಸ್ತುತ ರೈತರಿಗೆ ಶಾಸನಬದ್ಧವಾಗಿ ಅಧಿಸೂಚಿತ ಗರಿಷ್ಠ ಚಿಲ್ಲರೆ ಬೆಲೆಯಲ್ಲಿ (ಎಂ ಆರ್ ಪಿ) ಒದಗಿಸಲಾಗುತ್ತದೆ. 45 ಕೆಜಿ ಯೂರಿಯಾ ಚೀಲದ ಎಂಆರ್ ಪಿ ಪ್ರತಿ ಚೀಲಕ್ಕೆ ರೂ.242 ಆಗಿದೆ (ಬೇವಿನ ಲೇಪನ ಮತ್ತು ಅನ್ವಯವಾಗುವ ತೆರಿಗೆಗಳನ್ನು ಹೊರತುಪಡಿಸಿ). ಫಾರ್ಮ್ ಗೇಟ್ ನಲ್ಲಿ ಯೂರಿಯಾದ ವಿತರಣಾ ವೆಚ್ಚ ಮತ್ತು ಯೂರಿಯಾ ಘಟಕಗಳು ನಿವ್ವಳ ಮಾರುಕಟ್ಟೆ ಗಳಿಕೆಯ ನಡುವಿನ ವ್ಯತ್ಯಾಸವನ್ನು ಭಾರತ ಸರ್ಕಾರವು ಯೂರಿಯಾ ತಯಾರಕ / ಆಮದುದಾರರಿಗೆ ಸಬ್ಸಿಡಿಯಾಗಿ ನೀಡುತ್ತದೆ. ಪ್ರಸ್ತುತ ಸಬ್ಸಿಡಿ ಪಾವತಿಸುತ್ತಿರುವ ಯೂರಿಯಾ ನೀತಿಗಳೆಂದರೆ ಹೊಸ ಬೆಲೆ ಯೋಜನೆ (ಎನ್ ಪಿ ಎಸ್)-3, ಮಾರ್ಪಡಿಸಿದ ಎನ್ ಪಿಎಸ್-3, ಹೊಸ ಹೂಡಿಕೆ ನೀತಿ (ಎನ್ಐಪಿ) -2012 ಮತ್ತು ಹೊಸ ಯೂರಿಯಾ ಪಾಲಿಸಿ (ಎನ್ ಯುಪಿ) -2015. ಅದರಂತೆ, ದೇಶದ ಎಲ್ಲಾ ರೈತರಿಗೆ ಸಬ್ಸಿಡಿ ದರದಲ್ಲಿ ಯೂರಿಯಾವನ್ನು ಪೂರೈಸಲಾಗುತ್ತಿದೆ ಮತ್ತು ಆ ಮೂಲಕ ಈ ಯೋಜನೆಯ ಫಲಾನುಭವಿಗಳಾಗಿದ್ದಾರೆ.

ಕೇಂದ್ರ ರಾಸಾಯನಿಕ ಮತ್ತು ರಸಗೊಬ್ಬರ ಖಾತೆ ರಾಜ್ಯ ಸಚಿವರಾದ ಶ್ರೀಮತಿ ಅನುಪ್ರಿಯಾ ಪಟೇಲ್ ಅವರು ಲೋಕಸಭೆಯಲ್ಲಿ ಪ್ರಶ್ನೆಯೊಂದಕ್ಕೆ ಉತ್ತರಿಸುತ್ತಾ ಈ ಮಾಹಿತಿಯನ್ನು ನೀಡಿದರು.

*****