ভাৰতত এক সম্পূৰ্ণ অৰ্ধপৰিবাহী উৎপাদন ব্যৱস্থা গঢ়ি তোলাৰ দিশত এটি উল্লেখযোগ্য পদক্ষেপ হিচাপে আজি অসমৰ মাননীয় মুখ্যমন্ত্ৰী ডঃ হিমন্ত বিশ্ব শৰ্মা আৰু টাটা চন্স লিমিটেডৰ অধ্যক্ষ এন চন্দ্ৰশেখৰনৰ উপস্থিতিত টাটাৰ অৰ্ধপৰিবাহী ইউনিটৰ অসম ইউনিটৰ ভূমি পূজন অনুষ্ঠান অনুষ্ঠিত হয়। এই সন্দৰ্ভত কেন্দ্ৰীয় ৰেলৱে, ইলেক্ট্ৰনিকছ আৰু তথ্য প্ৰযুক্তি তথা তথ্য আৰু সম্প্ৰচাৰ মন্ত্ৰী শ্ৰী অশ্বিনী বৈষ্ণৱে সংবাদ মাধ্যমৰ সৈতে হোৱা মত-বিনিময়ৰ সময়ত উল্লেখ কৰে যে ভাৰতৰ প্ৰধানমন্ত্ৰীগৰাকীয়ে সদায়েই এক্ট ইষ্ট নীতিৰ ওপৰত গুৰুত্ব আৰোপ কৰি আহিছে আৰু এই ইউনিটটো নিৰ্মাণৰ কাম আৰম্ভ হোৱাৰ লগে-লগে আজি অসমত এক অতিশয় গুৰুত্বপূৰ্ণ মাইলৰ খুঁটি স্থাপন হয়। তেওঁ উল্লেখ কৰে যে এই প্ৰকল্পটোত ২০২৪ৰ ২৯ ফেব্ৰুৱাৰীত কেন্দ্ৰীয় কেবিনেটে অনুমোদন জনাইছিল।

২১-১২-২০২১ত ভাৰতত অৰ্ধপৰিবাহী আৰু ডিছপ্লে মেনুফেকচাৰিং ব্যৱস্থাৰ বিকাশ কাৰ্য্যক্ৰমৰ অধিসূচনা জাৰি কৰা হৈছিল আৰু ইয়াৰ মুঠ ব্যয় ৭৬,০০০ কোটি টকা ধাৰ্য্য কৰা হৈছিল। ২০২৩ৰ জুনত ভাৰতৰ প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত কেন্দ্ৰীয় কেবিনেটে গুজৰাটৰ সানন্দত এটা অৰ্ধপৰিবাহী ইউনিট স্থাপনৰ বাবে মাইক্ৰনৰ প্ৰস্তাৱত অনুমোদন জনাইছিল, যাৰ নিৰ্মাণৰ কাম দ্ৰুত গতিত অব্যাহত আছে।

অৰ্ধপৰিবাহী ইউনিটটো সম্পৰ্কে

কেন্দ্ৰীয় মন্ত্ৰীগৰাকীয়ে উল্লেখ কৰে যে এই ইউনিটটো ২৭ হাজাৰ কোটি টকা বিনিয়োগ সাপেক্ষে স্থাপন কৰা হ’ব আৰু ইয়াৰ জৰিয়তে ১৫ হাজাৰ প্ৰত্যক্ষ আৰু ১১-১৩ হাজাৰ পৰোক্ষ নিয়োগ সৃষ্টি হ’ব বুলি আশা কৰা হৈছে। অৰ্ধপৰিবাহী উদ্যোগটোক এক ভিত্তিগত উদ্যোগ বুলি অভিহিতকৰণেৰে তেওঁ কয় যে ইয়াৰ জৰিয়তে ভিন্ন আপষ্ট্ৰিম আৰু ডাউনষ্ট্ৰিম উদ্যোগত কৰ্মসংস্থাপনৰ সুযোগ সৃষ্টি হ’ব।

এই ইউনিটৰ প্ৰস্তাৱিত ক্ষমতা প্ৰতিদিনে ৪.৮৩ কোটি অৰ্ধপৰিবাহী চিপ উৎপাদন। তেওঁ লগতে উল্লেখ কৰে যে এই ইউনিটটোৱেই হ’ব ৱায়াৰ বণ্ড, ফ্লিপ চিপ আৰু আই-এছআইপি (ইন্টিগ্ৰেটেড চিষ্টেম ইন পেকেজ) প্ৰযুক্তিকে প্ৰমুখ্য কৰি থলুৱা উন্নত অৰ্ধপৰিবাহী পেকেজিং প্ৰযুক্তিৰ বিকাশৰ স্থান আৰু এই প্ৰকল্পটোত প্ৰয়োগ হ’বলগীয়া এই তিনিওটা প্ৰধান প্ৰযুক্তি ভাৰততে বিকশিত কৰা হৈছে। এই প্ৰযুক্তিসমূহ মূল এপ্লিকেচন যেনেঃ অট’ম’টিভ (বিশেষকৈ বৈদ্যুতিক বাহন), যোগাযোগ, নেটৱৰ্ক আন্তঃগাঁথনি আৰু আন-আনসমূহৰ বাবে অত্যন্ত গুৰুত্বপূৰ্ণ।

প্ৰতিভা বিকাশৰ পৰিকল্পনা

কেন্দ্ৰীয় মন্ত্ৰীগৰাকীয়ে লগতে উল্লেখ কৰে যে সমগ্ৰ দেশৰ ১১৩ খন শৈক্ষিক প্ৰতিষ্ঠানত বি.টেক, এম.টেক আৰু পিএইচডি পৰ্য্যায়ত ৮৫,০০০ উদ্যোগৰ বাবে- সাজু কৰ্মশক্তিক অৰ্ধপৰিবাহী চিপ ডিজাইনৰ প্ৰশিক্ষণ প্ৰদান কৰা হৈছে। ইয়াৰে ৯ খন প্ৰতিষ্ঠান উত্তৰ-পূবৰে, যাৰ সবিশেষ তলত উল্লেখ কৰা হৈছেঃ

আজিৰ এই ঘোষণা উত্তৰ-পূৰ্বাঞ্চলৰ অগ্ৰগতি ত্বৰান্বিতকৰণৰ লগতে ভাৰতৰ প্ৰধানমন্ত্ৰীগৰাকীৰ ‘বিকশিত ভাৰত, বিকশিত উত্তৰ-পূব’ৰ দৃষ্টিভংগীক বাস্তৱায়িতকৰণৰ ক্ষেত্ৰত এক উল্লেখযোগ্য মাইলৰ খুঁটি হিচাপে পৰিগণিত হৈছে।

Union Minister @AshwiniVaishnaw remarks on commencement of construction of Tata Semiconductor unit in Jagiroad, Assam#Tata #Semiconductor #Assam@GoI_MeitY@PIB_MeitY @CMOfficeAssamhttps://t.co/7q7bQqa64q

— PIB in Assam (@PIB_Guwahati) August 3, 2024

*****

PPG/KS/SB