ملک میں اعضاء کے عطیہ کی بڑی ضرورت کو پورا کرنے کے لیے مرنے والے افراد اور "برین اسٹیم ڈیڈ" لوگوں سے اعضاء کے عطیہ کو فروغ دینے کی ضرورت ہے۔ وزیر اعظم جناب نریندر مودی نے اعضاء کے عطیہ کی اہمیت کو اجاگر کیا ہے اور اس حقیقت پر خصوصی زور دیا ہے کہ ایک عضو عطیہ کرنے والا 8 لوگوں کو نئی زندگی دے سکتا ہے۔ صحت اور خاندانی بہبود کی مرکزی وزیر مملکت محترمہ انوپریہ پٹیل نے آج یہاں نیشنل آرگن اینڈ ٹشو ٹرانسپلانٹ آرگنائزیشن (این او ٹی ٹی او) کے زیر اہتمام اعضاء عطیہ 14ویں بھارتی  دن کی تقریب کے موقع پر ڈاکٹر وی کے پال، ممبر (صحت) کی موجودگی میں یہ بات کہی۔

اس موقع پر خطاب کرتے ہوئے محترمہ پٹیل نے مرنے والے اعضاء عطیہ کرنے والوں کے اہل خانہ کی ستائش کی کہ انہوں نے ‘متعدد لوگوں کی زندگیاں بچا کر بنی نوع انسان کی سب سے بڑی خدمت’ کی۔ انہیں پورے ملک کے لئے ایک تحریک قرار دیتے ہوئے، انہوں نے ہم وطنوں کی  حوصلہ افزائی کی کہ وہ مرنے کے بعد اپنے اعضاء عطیہ کرنے کا عہد کریں۔ انہوں نے کہا کہ ‘‘ہر فرد اور اداروں کی مشترکہ کوششوں سے ہی ہندوستان اعضاء کے عطیہ اور ٹرانسپلانٹیشن میں سرکردہ ممالک میں سے ایک بننے کے اپنے وژن کو پورا کر سکتا ہے’’۔

مرکزی وزیر نے کہا کہ اگرچہ اسپین، امریکہ اور چین جیسے بہت سے ممالک اعضاء کے عطیہ میں بہت آگے ہیں، ہندوستان نے بھی حالیہ دنوں میں اس میدان میں کچھ قابل ذکر کامیابیاں حاصل کی ہیں۔ انہوں نے عہدیداروں پر بھی زور دیا کہ وہ اس بات کو یقینی بنانے کے لیے تمام اقدامات کریں کہ ٹرانسپلانٹیشن سے پہلے کوئی حاصل شدہ اعضاء ضائع نہ ہوں۔

ڈاکٹر ونود کمار پال جو اس تقریب کے مہمان خصوصی بھی تھے، نے اعضاء کی طلب اور فراہمی کے درمیان بڑے فرق پر روشنی ڈالی اور اعضاء کی ٹرانسپلانٹیشن کے چیلنج سے نمٹنے کے لیے سرکاری اسپتالوں میں ادارہ جاتی اصلاحات کی ضرورت کو نوٹ کیا۔ انہوں نے افسوس کا اظہار کیا کہ صرف 750 کے قریب ادارے اعضاء کی پیوند کاری کی خدمات فراہم کر رہے ہیں اور دیگر اداروں کو بھی ایسی خدمات فراہم کرنے کے لیے آگے آنے کی ترغیب دی۔

ڈاکٹر پال نے بتایا کہ گردے کی پیوند کاری اے بی – پی ایم جے اے (آیوشمان بھارت پردھان منتری جن آروگیہ یوجنا) کے تحت آتی ہے اور بیمہ کمپنیوں سے اعضاء کی پیوند کاری کا احاطہ کرنے کا مطالبہ کیا۔ انہوں نے مرکزی حکومت کی طرف سے اعضاء کی پیوند کاری میں آسانی کو یقینی بنانے کے لیے کی گئی اہم کوششوں پر بھی روشنی ڈالی جیسے "ایک قوم، ایک پالیسی" جس نے اعضاء کی پیوند کاری کے لیے ڈومیسائل اور عمر سے متعلق رکاوٹوں کو دور کیا۔ انہوں نے اپنے خطاب کا اختتام اعضاء عطیہ کرنے والوں کو خراج تحسین پیش کرتے ہوئے کیا اور لوگوں پر زور دیا کہ وہ متحد ہو کر اس نیک مقصد کے لیے آگے آئیں۔

مرکزی صحت سکریٹری، جناب اپوروا چندرا نے اعضاء کے عطیہ کے بارے میں بیداری بڑھانے کی ضرورت پر روشنی ڈالی کیونکہ اعضاء کی ضرورت کے لیے بڑی تعداد میں لوگ رجسٹر کر رہے ہیں۔ انہوں نے ذکر کیا کہ "اگرچہ اعضاء کی پیوند کاری میں ہندوستان تیسرے نمبر پر ہے، چونکہ زیادہ تر اعضاء کا عطیہ خاندان کے افراد کے درمیان ہوتا ہے، اس لیے لوگوں کو اعضاء کے عطیہ کے لیے رجسٹر کرنے کی ترغیب دینے کی ضرورت ہے"۔

انہوں نے یہ بھی زور دیا کہ "اس بات کو یقینی بنانے کے لیے کہ اعضاء کا ضیاع نہ ہو، ہمیں اپنے نظام کو مضبوط کرنا چاہیے۔ جب ہمیں کوئی بھی برین ڈیڈ ملتا ہے تو وقت کم ہوتا ہے اور ہمیں 12 گھنٹے میں اعضاء کی کٹائی کرنی پڑتی ہے اور ٹرانسپلانٹ ایک مختصر سی کھڑکی میں ہونا ہوتا ہے۔ اس لیے ہمیں اپنے نظام کو بہتر کرنا ہوگا اور یہ نوٹو، سوٹو اور روٹو کی بڑی ذمہ داری ہے۔

اس موقع پر مرکزی وزیر نے مرنے والے عطیہ دہندگان کے 10 کنبہ کے افراد کو اپنے پیاروں کے اعضاء عطیہ کرنے کے بہادرانہ فیصلے اور اعضاء عطیہ کرنے والے چار وصول کنندگان کو مبارکباد دی۔ بہترین کارکردگی کا مظاہرہ کرنے والی ریاستوں، علاقائی اور ریاستی آرگن اور ٹشو ٹرانسپلانٹ تنظیموں، میڈیکل کالجوں اور اداروں، پیشہ ورانہ معاشروں، طبی پیشہ ور افراد اور غیر سرکاری تنظیموں وغیرہ کو اعضاء کے عطیہ اور پیوند کاری کے میدان میں ان کے تعاون کو تسلیم کرنے کے لیے ایوارڈز بھی پیش کیے گئے۔

اس تقریب میں ای نیوز لیٹر، نوٹو کی سالانہ رپورٹ اور آرگن ٹرانسپورٹ سٹینڈرڈ آپریٹنگ پروسیجرز (ایس او پی ز) کا تعارف فراہم کرنے والے ایک مینول کے اجراء کا بھی مشاہدہ کیا گیا۔

اس تقریب میں ڈاکٹر انیل کمار، ڈائریکٹر، نوٹو ،دہلی پولیس کے اہلکار، اعضاء حاصل کرنے والے، طلباء، نیز مرکزی وزارت صحت کے سینئر اہلکاروں نے بھی شرکت کی۔

پس منظر:

مرکزی حکومت اعضاء اور بافتوں کے عطیہ کو فروغ دینے کے لیے پرعزم ہے۔ عزت مآب وزیر اعظم جناب نریندر مودی نے "من کی بات" پروگرام کی اقساط میں کئی بار اعضاء کے عطیہ کی اہمیت کو اجاگر کیا ہے۔

انڈین آرگن ڈونیشن ڈے (آئی او ڈی ڈی) ہر سال 2010 سے منایا جاتا ہے تاکہ دماغی خلیہ کی موت اور اعضاء کے عطیہ کے بارے میں بیداری کو بڑھایا جا سکے، اعضاء کے عطیہ سے جڑی خرافات اور غلط فہمیوں کو دور کیا جا سکے اور ملک کے شہریوں کو موت کے بعد اعضاء اور بافتوں کا عطیہ کرنے کی ترغیب دی جا سکے۔ اس کے ساتھ ساتھ اعضاء کے عطیہ کی اقدار کو اپنی زندگیوں میں شامل کرنا۔ اعضاء کی پیوند کاری کی مانگ کو کم کرنے کے لیے، مہم کی سرگرمیاں صحت مند طرز زندگی کو اپنانے، تندرستی اور اعضاء کی خرابی کی روک تھام کے لیے اقدامات کو بھی فروغ دیتی ہیں۔ 14 واں آئی او ڈی ڈی  لوگوں کو اعضاء عطیہ کرنے کی ترغیب دینے کا ایک موقع ہے تاکہ ٹرانسپلانٹ کے لیے اعضاء کی ضرورت والے افراد کی تعداد اور عطیہ کرنے والوں کی تعداد کے درمیان موجودہ فرق کو ختم کیا جا سکے۔

عطیہ کیا گیا ہر عضو قیمتی، جان بچانے والا اور قومی وسیلہ ہے۔ ایک شخص اپنی موت کے بعد گردے، جگر، پھیپھڑے، دل، لبلبہ اور آنت جیسے اہم اعضاء عطیہ کرکے 8 افراد کو نئی زندگی دے سکتا ہے اور ٹشوز جیسے کارنیا، جلد، ہڈی اور دل کے والو وغیرہ کو عطیہ کرکے بہت سے لوگوں کی معیاری زندگی کو بہتر بنا سکتا ہے۔ لوگوں کی حوصلہ افزائی کی جاتی ہے کہ وہ ایک نیک مقصد کے لیے آگے آئیں اور اس قومی کوشش میں اپنا حصہ ڈالیں۔ اعضاء کے عطیہ اور پیوند کاری سے متعلق کسی بھی معلومات کے لیے کوئی بھی نوٹو کی ویب سائٹ www.notto.mohfw.gov.in پر جا سکتا ہے یا ٹول فری ہیلپ لائن نمبر 180114770 پر کال کر سکتا ہے۔

************

ش ح۔ا م  ۔ م  ص۔

 (U: 9266)