কেন্দ্রগী পোর্তস, শিপ্পিং অমসুং ৱাতরৱেজ মন্ত্রী, শ্রী সর্বানন্দ সোনোৱলনা শিলোং, মেঘালয়দা বিজিনেস কম্ম্যুনিতী, নহারোল অমসুং নুপীশিংগী লুচিংবশিংগা লোয়ননা 2024গী কেন্দ্রগী বজেৎকী মতাংদা খন্ন-নৈনবদা শরুক য়াখি। ৱারী শানখিবশিং অসি কেন্দ্রগী বজেৎ 2024গী প্রোভিজনশিংগী মতাংদা ওইখি। মসিনা ভিকসিৎ ভারতকী মঙলান অদু মঙফাওনহন্নবা রোদমেপ অমা শেমগৎকনি। য়াম্না মরু ওইবা থৌদাং অমা লৌরিবা অৱাং-নোংপোক ভারতনা মসিগী বজেৎ অসিদগী কান্নবা ফংগনি। মসিগী পান্দমদি নহারোল, নুপী অমসুং ত্রাইবেল কম্ম্যুনিতীশিংবু মপাঙ্গল কনখৎহন্দুনা লমদম অসিগী ইকনোমিক, ইন্দস্ত্রীএল অমসুং লৌউ-শিংউগী সেক্তরশিংবু শক্তি পীনবা হোৎনবনি হায়না শ্রী সোনোৱালনা ফোংদোকখি।

ত্রাইবেল কম্ম্যুনিতীশিংবু শক্তি লৈহন্নবা মীফম অদুদা ৱা ঙাংলদুনা শ্রী সর্বানন্দ সোনোৱলনা হায়খি, "কেন্দ্রগী বজেৎ, 2024না ভারতপু ভিকসিৎ ভারত ওইহন্নবা রোদমেপ অমা শেম্লে। অনৌবা থৌনা অমসুং অখন্নবা মীৎয়েংগা লোয়ননা, বজেৎ অসিনা অৱাং নোংপোক্কী নহারোল, নুপী অমসুং ত্রাইবেল কম্ম্যুনিতীশিংবু মপাঙ্গল কনখৎহন্দুনা ইকনোমিক, ইন্দস্ত্রী অমসুং লৌউ-শিংউগী সেক্তরশিং হেনগৎহন্নবা পান্দম থম্লি। ঐখোয়গী থৌনা ফরবা প্রধান মন্ত্রী শ্রী নরেন্দ্র মোদীজীনা ঐখোয়গী ফজরবা অৱাং-নোংপোক লমদম অসি 'অস্তলক্ষ্মী' অমসুং ভারতকী চাউখৎপগী অনৌবা ইঞ্জিননি হায়না শকখঙখি। মোদী জীগী মখাদা ত্রাইবেল কম্ম্যুনিতীশিংবু শক্তি লৈহনবগীদমক মসিগী বজেৎ অসিদা প্রোভিজন অসি চাদা 200 হেনগৎখ্রে। ত্রাইবেল কম্ম্যুনিতীশিংগী য়াইফনবা শীজিন্নগদবা লুপা করোর 13,000গী এলোকেসন তৌখ্রে। ঐখোয়গী ত্রেদিস্নেল আর্তিসান, ক্রেস্তমেন, সেল্ফ হেল্প গ্রুপ (SHG), সেদ্যুল কাস্ত, সেদ্যুল ত্রাইব অমসুং নুপী ওন্তপ্রিনোরশিং, পি.এম. বিশ্বকর্মা, পি.এম. স্বানিধি, নেস্নেল লাইবলিহুদ মিসন, অমসুং স্তেন্দ অপ ইন্দিয়া পায়খৎনবা বজেৎ অসিদা এলোকেসন হেনগৎহনখি। ত্রাইবেল কম্ম্যুনিতীশিংগীদমক্তা সোসিএল জস্তিস ফংহন্নবা অতোপ্পা মকোক থোংবা স্কিম অমা, ত্রাইবেল কম্ম্যুনিতীশিংগী সোসিও-ইকনোমিক কন্দিসন ফগৎহন্নবা পান্দম থম্লিবা প্রধান মন্ত্রী জনজাতিয় উন্নাৎ গ্রাম অসি বজেৎ অসিদা লাউথোকখ্রে। মসিনা খুঙ্গং 63,000দা লৈরিবা ত্রাইবেল কাংলুপ করোর 5দা হকথেংননা কান্নবা ফংহল্লগনি।

অৱাং-নোংপোক লমদমদা লৌউ-শিংউগীদমক বজেৎকী মতেং পীনবগী মতাংদা পল্লদুনা কেন্দ্রগী মন্ত্রীনা হায়খি, প্রধান মন্ত্রী শ্রী নরেন্দ্র মোদীজীগী থৌনা ফরবা লুচিং মখাদা, ঐখোয়না অৱাং-নোংপোক লমদমগী অপুনবা পোতেন্সিএল অসি নেচরেল ফার্মিং অমসুং হোর্তিকলচরগী হব অমা ওইহন্নবা হোৎনরি অমসুং ঐখোয়গী নহা ওইরিবা তেলেন্তশিংবু মালেমগী থাক্কী হৈথোই-শিংথোইরবা ৱার্কফোর্স অমা ওইহন্নবা হোৎনরি। লৌউ-শিংউ অমসুং হোর্তিকলচরগী মহৈ-মরোং 32গী মহৈ-মরোং য়াম্না পীরবা অমসুং ক্লাইমেৎ রেসিলিয়েন্ত মখল 109 থাদোকপা অসিনা লমদম অসিদা মপুং ওইবা থৌদাং লৌরিবা মেঘালয়গীদমক্তা ইনকম জেনরেসন মল্তিপ্লাই তৌনবা অমসুং ক্লাইমেৎ চেঞ্জগী অমাংবা হন্থহন্নবা খুদোংচাবা অমা পীরি। দিজিতেল ক্রোপ সর্ভে অসিগা লোয়ননা কিসান ক্রেদিৎ কার্দকী খুত্থাংদা ক্রেদিৎ ফংহনবদা খুমাং চাওশিল্লগনি। ইকো-ফ্রেন্দলী সস্তেনেবল এগ্রিকলচর প্রোজেক্তকীদমক লুপা করোর 598গী এলোকেসন তৌবনা ক্লাইমেৎ চেঞ্জ, লৈহাও মাংহনবা অমসুং ইচেক, পেস্ত অমসুং লাইনা-লাইচৎকী শাফু লাকশিনগনি। মসিনা লমদম অসিগী লৌউ-শিংউগী পোত্থোকশিংগী ওইথোকপা হেনগৎহনগনি।

শ্রী সর্বানন্দ সোনোৱলনা মখা তানা হায়খি, "বাজেৎ অসিনা মেনুফেকচরিং অমসুং সর্ভিস সেক্তরদা পুক্নিং থৌগৎনবা পান্দম থম্লি, মরু ওইনা MSMEশিংদা মথৌ তাবা ক্রেদিৎ সপোর্ত পীরিবা মুদ্রা স্কিমগী খুত্থাংদা। মসিনা ওন্ত্রপ্রিনরশিপকী ওইথোকপা হেনগৎহনবতা নত্তনা থবক ফংহন্নবগী অচৌবা খুদোংচাবা কয়া অমসু লৈহল্লগনি। অনৌবা ক্রেদিৎ গেরেন্তী স্কিম অমনা MSMEশিংবু মখোয়গী ওপরেস্নেল কেপাসিতী হেনগৎহন্নবা অমসুং লমদম অসিগী ইন্দস্ত্রীএল সেক্তরদা চাউখৎপা পুরক্নবা মতেং পাংগনি হায়বসি প্রধান মন্ত্রী মোদীজীগী মিৎয়েংনি। মোদী সরকারগী অখন্নবা থৌরাং অমা ওইরিবা দাইরেক্ত বেনিফিৎ ত্রান্সফর (DBT) না অহানবা ওইনা থবক শুবা মীওইশিংদা ইন্সতোলমেন্ত অহুমদা লুপা 15,000 পীরি অমসুং মসি মেঘালয় ইন্দস্ত্রীএল এন্দ ইনভেস্তমেন্ত প্রমোসন পোলিসীগা পুনশিনগনি। মসিনা রাজ্য অসিদা ইন্দস্ত্রীএল দিবেলপমেন্ত অমসুং থবক ফংহনবদা মতেং পাংগনি। নহারোলশিংগী শক্তি হেনগৎহন্নবা, ITI 1000গী থাক ৱাংখৎহল্লগনি অমসুং নুপীশিংগী হোস্তেলশিং লিংখৎকনি, নর্সশিংনা নুপীশিংবু ইন্দস্ত্রীশিংদা থবক তৌবদা মতেং পাংগনি।

কেন্দ্রগী বজেৎ 2024না অৱাং-নোংপোক য়াওনা অরাপ্পা মফমশিংদা ৱেদরগী খুদোংচাদবা ফিভম পুম্নমক্তা কনেক্তিবিতী ফংহন্নবা প্রধান মন্ত্রী গ্রাম সড়ক য়োজনাগী ফেজ 4গী খুত্থাংদা ইনফ্রাস্ত্রকচর হেনগৎহন্নবগীদমক শেলগী মতেং য়াম্না পীরক্লি। PMGSY না মেঘালয় শিনবা থুংনা কিলোমীতর 3,482গী লম্বীশিং শম্নহনখ্রে, মসিদা অপুনবা শেনফম লুপা করোর 2310.76 চঙখ্রে। বজেৎ অসিদা অৱাং নোংপোক লমদমগী রুরেল ইনফ্রাস্ত্রকচর য়াওনা রুরেল দিবেলপমেন্তকীদমক লুপা কোতি লাখ 2.66গী প্রোভিজন থম্লে।

অৱাং-নোংপোক লমদমগী লম্বী অমসুং লম্বী-থোংগী কনেক্তিবিতী ফগৎহন্নবগীদমক 2024গী কেন্দ্রগী বজেৎতা অতোপ্পা লুপা করোর 19,338 থাদগনি। মসিনা মেঘালয় য়াওনা লমদম অসিদা তুরিস্ত ইনফ্রাস্ত্রকচর চাউনা হেনগৎহনগনি।

*****