ಬ್ರೆಜಿಲಿನ ಫೋರ್ಟಲೆಜಾದಲ್ಲಿ ನಡೆದ ಜಿ 20 ಕಾರ್ಮಿಕ ಮತ್ತು ಉದ್ಯೋಗ ಸಚಿವರ (ಎಲ್ಇಎಂಎಂ) ಸಭೆಯು  2024 ರ ಜುಲೈ 26 ರಂದು ಕಾರ್ಮಿಕ ಮತ್ತು ಉದ್ಯೋಗ ಸಚಿವರ ಘೋಷಣೆಯನ್ನು ಅನುಮೋದಿಸಿದೆ. ಬ್ರೆಜಿಲ್ ಅಧ್ಯಕ್ಷತೆಯಲ್ಲಿ ಜುಲೈ 25-26 ರಂದು ಎರಡು ದಿನಗಳ ಕಾಲ ನಡೆದ ಕಾರ್ಮಿಕ ಮತ್ತು ಉದ್ಯೋಗ ಸಚಿವರ ಸಭೆ (ಎಲ್ಇಎಂಎಂ) ಮುಗಿದ ನಂತರ ಅಂತಿಮ ಪಠ್ಯವನ್ನು ಅನುಮೋದಿಸಲಾಯಿತು.

ಭಾರತೀಯ ನಿಯೋಗದ ನೇತೃತ್ವವನ್ನು ಕಾರ್ಮಿಕ ಮತ್ತು ಉದ್ಯೋಗ ಖಾತೆ ಸಹಾಯಕ ಸಚಿವರಾದ ಶ್ರೀಮತಿ ಶೋಭಾ ಕರಂದ್ಲಾಜೆ ವಹಿಸಿದ್ದರು. ಜಿ 20 ರ ಹಿಂದಿನ ಮತ್ತು ಮುಂದಿನ ಆತಿಥ್ಯ ವಹಿಸಿದ್ದ ಭಾರತ ಮತ್ತು ದಕ್ಷಿಣ ಆಫ್ರಿಕಾದೊಂದಿಗೆ ಬ್ರೆಜಿಲ್ ಈ ತ್ರಿಕೋನದ ಸದಸ್ಯ ರಾಷ್ಟ್ರವಾಗಿದೆ. ಕಾರ್ಮಿಕ ಮತ್ತು ಉದ್ಯೋಗ ಸಚಿವರ ಸಭೆಯ ಮೊದಲು ಜುಲೈ 23-24 ರಂದು 5 ನೇ ಉದ್ಯೋಗ ಕಾರ್ಯ ಗುಂಪಿನ ಸಭೆ (ಇಡಬ್ಲ್ಯುಜಿ) ನಡೆಯಿತು, ಇದು ಅಂತಿಮ ಪಠ್ಯದ ಬಗ್ಗೆ ಚರ್ಚೆ ನಡೆಸಿತು.

ಎರಡು ದಿನಗಳ ಅವಧಿಯಲ್ಲಿ, ಕಾರ್ಮಿಕ ಮತ್ತು ಉದ್ಯೋಗ ಸಚಿವರು ಕಾರ್ಮಿಕ ಮತ್ತು ಉದ್ಯೋಗ ಟ್ರ್ಯಾಕ್ ನ ಪ್ರಮುಖ ಗಮನ ನೀಡಬೇಕಾದ  ಕ್ಷೇತ್ರಗಳ ಬಗ್ಗೆ  ಚರ್ಚೆ ನಡೆಸಿದರು. ಗಮನ ನೀಡಬೇಕಾದ  ಕ್ಷೇತ್ರಗಳಲ್ಲಿ ಪರಿವರ್ತನೆ; ಸಾಮಾಜಿಕ ಒಳಗೊಳ್ಳುವಿಕೆಯನ್ನು ಖಚಿತಪಡಿಸಿಕೊಳ್ಳಲು ಮತ್ತು ಬಡತನ ಮತ್ತು ಹಸಿವನ್ನು ತೊಡೆದುಹಾಕಲು ಗುಣಮಟ್ಟದ ಉದ್ಯೋಗಗಳನ್ನು ಸೃಷ್ಟಿಸುವುದು ಹಾಗು ಯೋಗ್ಯ ಕೆಲಸವನ್ನು ಉತ್ತೇಜಿಸುವುದು; ಲಿಂಗ ಸಮಾನತೆ ಮತ್ತು ಕೆಲಸದ ಜಗತ್ತಿನಲ್ಲಿ ವೈವಿಧ್ಯತೆಯನ್ನು ಉತ್ತೇಜಿಸುವುದು; ಮತ್ತು ಪ್ರತಿಯೊಬ್ಬರ ಜೀವನದ ಗುಣಮಟ್ಟವನ್ನು ಸುಧಾರಿಸುವ ಸಾಧನವಾಗಿ ತಂತ್ರಜ್ಞಾನಗಳ ಬಳಕೆಗಳು ಸೇರಿವೆ.  

ಬಲವಾದ, ಸುಸ್ಥಿರ, ಸಮತೋಲಿತ ಮತ್ತು ಅಂತರ್ಗತ ಆರ್ಥಿಕ ಬೆಳವಣಿಗೆಯನ್ನು ಉತ್ತೇಜಿಸುವ ಗುರಿಯನ್ನು ಹೊಂದಿರುವ ಸಕ್ರಿಯ ಸೇರ್ಪಡೆ ನೀತಿಗಳನ್ನು ಅಭಿವೃದ್ಧಿಪಡಿಸುವ ಮತ್ತು ಬೆಂಬಲಿಸುವ ಅಗತ್ಯವನ್ನು ಘೋಷಣೆ ಒತ್ತಿಹೇಳುತ್ತದೆ. ಔಪಚಾರಿಕ ಉದ್ಯೋಗಗಳನ್ನು ಸೃಷ್ಟಿಸುವುದು ಮತ್ತು ಯೋಗ್ಯವಾದ ಕೆಲಸವನ್ನು ಉತ್ತೇಜಿಸುವುದು  ನ್ಯಾಯಯುತ ಮತ್ತು ಹೆಚ್ಚು ಸಮಾನ ಆದಾಯ ವಿತರಣೆಯನ್ನು ಸಾಧಿಸಲು ಅತ್ಯಂತ ಪರಿಣಾಮಕಾರಿ ಸಾಮಾಜಿಕ ಸಾಧನಗಳಾಗಿವೆ ಎಂಬುದನ್ನು ಘೋಷಣೆಯು ಗುರುತಿಸುತ್ತದೆ. ಆರ್ಥಿಕತೆಯ ಕೌಶಲ್ಯ ಅಗತ್ಯಗಳು ಮತ್ತು ಬೇಡಿಕೆಗಳಿಗೆ ಅನುಗುಣವಾಗಿ ಮತ್ತು ಸಾಮಾಜಿಕ ಪಾಲುದಾರರೊಂದಿಗೆ ಸಮಾಲೋಚಿಸಿ, ಕೌಶಲ್ಯ ಅಭಿವೃದ್ಧಿ, ತರಬೇತಿಗೆ ಪ್ರವೇಶ ಮತ್ತು ಆಜೀವ ಕಲಿಕೆ ಹಾಗು ಉದ್ಯೋಗ ಹೊಂದಾಣಿಕೆಯಂತಹ ಯೋಗ್ಯ ಕೆಲಸವನ್ನು ನಿರ್ಮಾಣ ಮಾಡುವ ಮತ್ತು ಉತ್ತೇಜಿಸುವ ಹಾಗು ಪರಿಣಾಮಕಾರಿ ಕಾರ್ಮಿಕ ಮಾರುಕಟ್ಟೆ ನೀತಿಗಳನ್ನು ಒದಗಿಸುವ  ಅಗತ್ಯವನ್ನು ಘೋಷಣೆ ಒತ್ತಿಹೇಳುತ್ತದೆ. ಉದ್ಯೋಗಗಳನ್ನು ಔಪಚಾರಿಕಗೊಳಿಸಲು, ಪ್ಲಾಟ್ಫಾರ್ಮ್ ಕೆಲಸಕ್ಕೆ ಸೂಕ್ತವಾಗಿ ಪ್ರತಿಕ್ರಿಯಿಸಲು, ಸಾಕಷ್ಟು ಮಟ್ಟದ ವೇತನ ಮಹಡಿಗಳನ್ನು ಉತ್ತೇಜಿಸಲು, ಸಾಕಷ್ಟು ಸಾಮಾಜಿಕ ರಕ್ಷಣೆಗೆ ಪ್ರವೇಶವನ್ನು ಒದಗಿಸಲು ಮತ್ತು ಸಾಮಾಜಿಕ ಸಂವಾದ ಹಾಗು ಸಾಮೂಹಿಕ ಚೌಕಾಸಿಯನ್ನು ಉತ್ತೇಜಿಸಲು ನೀತಿ ಕ್ರಮಗಳನ್ನು ತೆಗೆದುಕೊಳ್ಳುವಂತೆ ಅದು ಸರ್ಕಾರಗಳನ್ನು ಒತ್ತಾಯಿಸುತ್ತದೆ.

ಕಾರ್ಮಿಕ ಮತ್ತು ಉದ್ಯೋಗ ಸಚಿವರ ಸಭೆಯ 'ನ್ಯಾಯಯುತ ಪರಿವರ್ತನೆಗಳು' ಕುರಿತ ಅಧಿವೇಶನದಲ್ಲಿ ತಮ್ಮ ಆರಂಭಿಕ ಮಾತುಗಳಲ್ಲಿ, ಶ್ರೀಮತಿ ಕರಂದ್ಲಾಜೆ ಅವರು ಹಸಿರು ಪರ್ಯಾಯಗಳಿಗೆ ನ್ಯಾಯಯುತ ಮತ್ತು ನ್ಯಾಯೋಚಿತ ಪರಿವರ್ತನೆಯನ್ನು ಖಚಿತಪಡಿಸಿಕೊಳ್ಳಲು ಕೌಶಲ್ಯ ಮತ್ತು ಮರು ಕೌಶಲ್ಯದ ಅಗತ್ಯವನ್ನು ಒತ್ತಿ ಹೇಳಿದರು. " ಪರಿವರ್ತನೆಗಳು ಇಂಗಾಲ-ತೀವ್ರತೆಯ ಕೈಗಾರಿಕೆಗಳನ್ನು ಹಂತ ಹಂತವಾಗಿ ಹೊರಹಾಕುವುದರಿಂದ ಬಾಧಿತರಾಗುವ ಕಾರ್ಮಿಕರು ಮತ್ತು ಸಮುದಾಯಗಳನ್ನು ರಕ್ಷಿಸುವುದು ಸೇರಿದಂತೆ ವಿವಿಧ ಆಯಾಮಗಳನ್ನು ಒಳಗೊಂಡಿವೆ. ಇದಕ್ಕೆ ಸಾಮಾಜಿಕ ರಕ್ಷಣೆ, ಮರು ತರಬೇತಿ ಕಾರ್ಯಕ್ರಮಗಳು ಮತ್ತು ಸುಸ್ಥಿರ ಕೈಗಾರಿಕೆಗಳಲ್ಲಿ ಹೂಡಿಕೆಗಳ ದೃಢವಾದ ಚೌಕಟ್ಟು ಅಗತ್ಯವಿದೆ. ಆದಾಗ್ಯೂ, ಹಸಿರು ಪರ್ಯಾಯಗಳಿಗೆ ಬದಲಾಗುವುದನ್ನು ಎಚ್ಚರಿಕೆಯಿಂದ ನಿರ್ವಹಿಸದಿದ್ದರೆ ಗಮನಾರ್ಹ ಉದ್ಯೋಗ ನಷ್ಟ ಮತ್ತು ಆರ್ಥಿಕ ಅಸ್ಥಿರತೆ ಎದುರಾಗಬಹುದು "ಎಂದು ಶ್ರೀಮತಿ ಕರಂದ್ಲಾಜೆ ಹೇಳಿದರು.

ಸೌರಶಕ್ತಿ, ಇಂಧನ ದಕ್ಷತೆ, ನೀರು, ಸುಸ್ಥಿರ ಕೃಷಿ, ಆರೋಗ್ಯ, ಹಿಮಾಲಯದ ಪರಿಸರ ವ್ಯವಸ್ಥೆ, ಸುಸ್ಥಿರ ಆವಾಸಸ್ಥಾನ, ಹಸಿರು ಭಾರತ ಮತ್ತು ಹವಾಮಾನ ಬದಲಾವಣೆಗಾಗಿ ಕಾರ್ಯತಂತ್ರದ ಜ್ಞಾನದಂತಹ ನಿರ್ದಿಷ್ಟ ಕ್ಷೇತ್ರಗಳಲ್ಲಿ ಭಾರತವು ರಾಷ್ಟ್ರೀಯ ಮಿಷನ್ ಗಳನ್ನು ರಚಿಸಿದೆ ಎಂದು ಕೇಂದ್ರ ಸಚಿವರು ಹೇಳಿದರು. ಸಂಬಂಧಿತ ಕ್ಷೇತ್ರಗಳಿಗೆ ನುರಿತ ಕಾರ್ಯಪಡೆಯನ್ನು ಅಭಿವೃದ್ಧಿಪಡಿಸುವಲ್ಲಿ ಸೆಕ್ಟರ್ ಸ್ಕಿಲ್ ಕೌನ್ಸಿಲ್ ಫಾರ್ ಗ್ರೀನ್ ಜಾಬ್ಸ್ (ಎಸ್ಎಸ್ಸಿಜಿಜೆ) ನಿರ್ಣಾಯಕ ಪಾತ್ರ ವಹಿಸುತ್ತದೆ ಎಂದು ಅವರು ಹೇಳಿದರು.

ಸಾಮಾಜಿಕ ಒಳಗೊಳ್ಳುವಿಕೆಯನ್ನು ಖಚಿತಪಡಿಸಿಕೊಳ್ಳಲು ಮತ್ತು ಬಡತನ ಮತ್ತು ಹಸಿವನ್ನು ತೊಡೆದುಹಾಕಲು ಗುಣಮಟ್ಟದ ಉದ್ಯೋಗಗಳ ಸೃಷ್ಟಿ ಮತ್ತು ಯೋಗ್ಯ ಕೆಲಸದ ಉತ್ತೇಜನ ಕುರಿತ ಅಧಿವೇಶನದಲ್ಲಿ ಮಧ್ಯಪ್ರವೇಶಿಸಿ ಮಾತನಾಡಿದ ಶ್ರೀಮತಿ ಕರಂದ್ಲಾಜೆ, ಭಾರತವು 2017-18 ರಿಂದ 2021-22 ರವರೆಗೆ 80 ದಶಲಕ್ಷಕ್ಕೂ ಹೆಚ್ಚು ಉದ್ಯೋಗಾವಕಾಶಗಳನ್ನು ಸೃಷ್ಟಿಸಿದೆ, ವರ್ಷಕ್ಕೆ ಸರಾಸರಿ 20 ಮಿಲಿಯನ್ ಉದ್ಯೋಗಗಳನ್ನು ಸೃಷ್ಟಿಸಿದೆ ಮತ್ತು ಯುವ ನಿರುದ್ಯೋಗ ದರವು 2017-18 ರಲ್ಲಿ 17.8% ರಿಂದ 2022-23 ರಲ್ಲಿ 10%ಕ್ಕೆ ಇಳಿದಿದೆ ಎಂದು ಮಾಹಿತಿ ನೀಡಿದರು.  ಕಾರ್ಮಿಕ ಶಕ್ತಿಯಲ್ಲಿ ಯುವಜನರ ಭಾಗವಹಿಸುವಿಕೆ ಹೆಚ್ಚಾಗಿದೆ. ಭಾರತದ 'ಒಂದು ರಾಷ್ಟ್ರ, ಒಂದು ಪಡಿತರ ಚೀಟಿ' ಉಪಕ್ರಮವು ವಲಸೆ ಕಾರ್ಮಿಕರಿಗೆ ದೇಶಾದ್ಯಂತ ಅವಶ್ಯ  ಆಹಾರ ಧಾನ್ಯಗಳನ್ನು ಪಡೆಯಲು ಅನುವು ಮಾಡಿಕೊಡುತ್ತದೆ ಎಂದು ಅವರು ಹೇಳಿದರು. ಇದಲ್ಲದೆ, ವಿಶ್ವದ ಅತಿದೊಡ್ಡ ಸರ್ಕಾರಿ ಅನುದಾನಿತ ಆರೋಗ್ಯ ಕಾರ್ಯಕ್ರಮವಾದ ಆಯುಷ್ಮಾನ್ ಭಾರತ್ ಯೋಜನೆ 550 ದಶಲಕ್ಷಕ್ಕೂ ಹೆಚ್ಚು ನಾಗರಿಕರನ್ನು ತನ್ನ ವ್ಯಾಪ್ತಿಗೆ ತಂದಿದೆ, ಇದು ಆರೋಗ್ಯ ಸುರಕ್ಷತೆಗೆ ನಮ್ಮ ಸಮರ್ಪಣೆಯನ್ನು ಪ್ರದರ್ಶಿಸುತ್ತದೆ ಎಂದು ಅವರು ಹೇಳಿದರು.

'ಕೆಲಸದ ಜಗತ್ತಿನಲ್ಲಿ ಲಿಂಗ ಸಮಾನತೆ ಮತ್ತು ವೈವಿಧ್ಯತೆಯ ಉತ್ತೇಜನ' ಕುರಿತ ಸಂವಾದದ ಸಂದರ್ಭದಲ್ಲಿ, ಕೇಂದ್ರ ಸಚಿವರು ದೃಢವಾದ ಶಾಸನಾತ್ಮಕ ಕ್ರಮಗಳ ಮೂಲಕ ಕೆಲಸದ ಸ್ಥಳದಲ್ಲಿ ಲಿಂಗ ಸಮಾನತೆಯನ್ನು ಉತ್ತೇಜಿಸುವಲ್ಲಿ ಭಾರತ ಗಮನಾರ್ಹ ದಾಪುಗಾಲು ಇಟ್ಟಿದೆ ಎಂದು ಹೇಳಿದರು. "ಕೆಲಸದ ಸ್ಥಳದಲ್ಲಿ ಮಹಿಳೆಯರ ಮೇಲಿನ ಲೈಂಗಿಕ ಕಿರುಕುಳ (ತಡೆಗಟ್ಟುವಿಕೆ, ನಿಷೇಧ ಮತ್ತು ಪರಿಹಾರ) ಕಾಯ್ದೆ, 2013, ಮಹಿಳೆಯರಿಗೆ ಸುರಕ್ಷಿತ ಕೆಲಸದ ವಾತಾವರಣವನ್ನು ಖಾತ್ರಿಪಡಿಸುವ ಕಠಿಣ ಕಾರ್ಯವಿಧಾನಗಳನ್ನು ರೂಪಿಸುತ್ತದೆ. ಇದಲ್ಲದೆ, ಸಮಾನ ಸಂಭಾವನೆ ಕಾಯ್ದೆ, 1976, ಒಂದೇ ರೀತಿಯ ಕೆಲಸ ಅಥವಾ ಕೆಲಸವನ್ನು ನಿರ್ವಹಿಸುವ ಪುರುಷರು ಮತ್ತು ಮಹಿಳೆಯರಿಗೆ ಸಮಾನ ವೇತನವನ್ನು ಕಡ್ಡಾಯಗೊಳಿಸುತ್ತದೆ. ಮತ್ತೊಂದು ಮಹತ್ವದ ಹೆಜ್ಜೆಯೆಂದರೆ ಮಹಿಳಾ ಉದ್ಯೋಗಿಗಳಿಗೆ ವೇತನ ಸಹಿತ ಹೆರಿಗೆ ರಜೆಯನ್ನು 12 ವಾರಗಳಿಂದ 26 ವಾರಗಳಿಗೆ ವಿಸ್ತರಿಸಿರುವುದು, ಇದು ಸಾರ್ವಜನಿಕ ಮತ್ತು ಖಾಸಗಿ ವಲಯಗಳಿಗೆ ಅನ್ವಯಿಸುತ್ತದೆ" ಎಂದು ಅವರು ಹೇಳಿದರು.

'ಪ್ರತಿಯೊಬ್ಬರ ಜೀವನದ ಗುಣಮಟ್ಟವನ್ನು ಸುಧಾರಿಸುವ ಸಾಧನವಾಗಿ ತಂತ್ರಜ್ಞಾನಗಳ ಬಳಕೆ' ಕುರಿತ ಅಧಿವೇಶನದಲ್ಲಿ ಮಾತನಾಡಿದ ಶ್ರೀಮತಿ ಕರಂದ್ಲಾಜೆ, ಉದ್ಯಮಶೀಲತೆ ಮತ್ತು ಉದ್ಯೋಗಕ್ಕೆ ಹೊಸ ಮಾರ್ಗಗಳನ್ನು ತೆರೆಯಲು ಭಾರತವು ಡಿಜಿಟಲ್ ಇಂಡಿಯಾ ಮಿಷನ್ ಮೂಲಕ ಡಿಜಿಟಲ್ ವೇದಿಕೆಗಳನ್ನು ಬಳಸಿಕೊಂಡಿದೆ ಎಂದು ಹೇಳಿದರು. ಕಟ್ಟಡ ಕಾರ್ಮಿಕರು, ಗಿಗ್ ಮತ್ತು ಪ್ಲಾಟ್ಫಾರ್ಮ್ ಕಾರ್ಮಿಕರು, ಬೀದಿ ಬದಿ ವ್ಯಾಪಾರಿಗಳು, ಮನೆಕೆಲಸದವರು, ವಲಸೆ ಕಾರ್ಮಿಕರು ಸೇರಿದಂತೆ ಎಲ್ಲಾ ಅಸಂಘಟಿತ ಕಾರ್ಮಿಕರ ರಾಷ್ಟ್ರೀಯ ಡೇಟಾಬೇಸ್ ರಚಿಸುವ ಉದ್ದೇಶದಿಂದ ಭಾರತ ಸರ್ಕಾರ 2021 ರಲ್ಲಿ ಇ-ಶ್ರಮ್ ಪೋರ್ಟಲ್ ಪ್ರಾರಂಭಿಸಿತು. ಈವರೆಗೆ 298 ದಶಲಕ್ಷಕ್ಕೂ ಹೆಚ್ಚು ಅನೌಪಚಾರಿಕ ವಲಯದ ಕಾರ್ಮಿಕರು ಪೋರ್ಟಲ್ನಲ್ಲಿ ನೋಂದಾಯಿಸಿಕೊಂಡಿದ್ದಾರೆ.  ಅನೌಪಚಾರಿಕ ವಲಯದ ಕಾರ್ಮಿಕರಿಗೆ ಕೌಶಲ್ಯ ಅವಕಾಶಗಳನ್ನು ಪ್ರವೇಶಿಸಲು ಇದನ್ನು ಸ್ಕಿಲ್ ಇಂಡಿಯಾ ಡಿಜಿಟಲ್ ಪೋರ್ಟಲಿಗೆ ಲಿಂಕ್ ಮಾಡಲಾಗುತ್ತಿದೆ " ಎಂದು ಅವರು ಸಭೆಗೆ ಮಾಹಿತಿ ನೀಡಿದರು. ವಿಶ್ವದ ಅತಿದೊಡ್ಡ ಬಯೋಮೆಟ್ರಿಕ್ ಐಡಿ ವ್ಯವಸ್ಥೆಗಳಲ್ಲಿ ಒಂದಾದ ಆಧಾರ್, ಲಕ್ಷಾಂತರ ಜನರಿಗೆ ಬ್ಯಾಂಕ್ ಖಾತೆಗಳನ್ನು ತೆರೆಯಲು ಮತ್ತು ನೇರ ಲಾಭ ವರ್ಗಾವಣೆಯನ್ನು ಪಡೆಯಲು ಅನುವು ಮಾಡಿಕೊಡುವ ಮೂಲಕ ಆರ್ಥಿಕ ಸೇರ್ಪಡೆಗೆ ಅನುಕೂಲ ಮಾಡಿಕೊಟ್ಟಿದೆ ಎಂದು ಶ್ರೀಮತಿ ಕರಂದ್ಲಾಜೆ ಹೇಳಿದರು. ಆದಾಗ್ಯೂ, ತಂತ್ರಜ್ಞಾನದೊಂದಿಗೆ ಬರುವ ನೈತಿಕ ಪರಿಗಣನೆಗಳನ್ನು ಗಮನಿಸಲು ಸಚಿವರು G20 ದೇಶಗಳನ್ನು ಒತ್ತಾಯಿಸಿದರು. ಡೇಟಾ ಗೌಪ್ಯತೆ, ಸೈಬರ್ ಸುರಕ್ಷತೆ ಮತ್ತು ಕೃತಕ ಬುದ್ಧಿಮತ್ತೆ (ಎ.ಐ.-AI) ಯ ನೀತಿಯುಕ್ತ  ಬಳಕೆಗೆ ಸಂಬಂಧಿಸಿದ ಸಮಸ್ಯೆಗಳನ್ನು ದೃಢವಾದ ನಿಯಂತ್ರಣ ಚೌಕಟ್ಟುಗಳು ಮತ್ತು ಅಂತರರಾಷ್ಟ್ರೀಯ ಸಹಕಾರದ ಮೂಲಕ ಪರಿಹರಿಸಬೇಕು ಎಂದು ಅವರು ಆಗ್ರಹಿಸಿದರು.

ಸಭೆಯ ನೇಪಥ್ಯದಲ್ಲಿ ಕೇಂದ್ರ ಕಾರ್ಮಿಕ ಮತ್ತು ಉದ್ಯೋಗ ಖಾತೆ ಸಹಾಯಕ ಸಚಿವರಾದ ಶ್ರೀಮತಿ ಶೋಭಾ ಕರಂದ್ಲಾಜೆ ಅವರು ಅಂತಾರಾಷ್ಟ್ರೀಯ ಕಾರ್ಮಿಕ ಸಂಸ್ಥೆ (ಐಎಲ್ಒ) ಮಹಾನಿರ್ದೇಶಕ ಶ್ರೀ ಗಿಲ್ಬರ್ಟ್ ಹೌಂಗ್ಬೊ ಅವರನ್ನು ಭೇಟಿಯಾದರು.

ಬ್ರೆಜಿಲ್ ನ ಫೋರ್ಟಲೆಜಾದಲ್ಲಿ ನಡೆದ ಜಿ 20 ಕಾರ್ಮಿಕ ಮತ್ತು ಉದ್ಯೋಗ ಸಚಿವರ ಸಭೆಯ ನೇಪಥ್ಯದಲ್ಲಿ ಅವರು ಜಪಾನಿನ ಆರೋಗ್ಯ, ಕಾರ್ಮಿಕ ಮತ್ತು ಕಲ್ಯಾಣ ಸಚಿವ ಶ್ರೀ ಮಿಯಾಝಾಕಿ ಮಸಾಹಿಸಾ ಅವರನ್ನು ಭೇಟಿಯಾದರು. ಇಬ್ಬರೂ ನಾಯಕರು ಭಾರತದಿಂದ ಜಪಾನ್ ಗೆ ಅರೆ ಕುಶಲ ಮತ್ತು ನುರಿತ ಕಾರ್ಮಿಕರ ಚಲನಶೀಲತೆಯನ್ನು ಮತ್ತಷ್ಟು ಹೆಚ್ಚಿಸುವ ಅಗತ್ಯ ಸೇರಿದಂತೆ ಪರಸ್ಪರ ಹಿತಾಸಕ್ತಿಯ ಕ್ಷೇತ್ರಗಳ ಬಗ್ಗೆ ಚರ್ಚಿಸಿದರು.

*****