ইনকম তেক্স হায়বসি করিনো?

ইনকম তেক্স হায়বসি মীওই অমসুং কারবার অমনা চহি অমগী মনুংদা তানবা ইনকমদা লৌবা শেনফম অমনি। “ইনকম” হায়বসিদা ইনকম তেক্স এক্তকী সেক্সন 2(24)গী মনুংদা শন্দোক্না তাক্লিবা সোর্স কয়া অমা য়াওরি। হীরম অসিগী মতাংদা লায়না তাকপা ৱারোলশিং মখাদা পীরিঃ

• তোলোবতগী লাকপা ইনকমঃ মসিদা বেসিক পে, এলাৱেন্স, কম্মিসন অমসুং থবক্তগী পোত্থাবদা ফংবা কান্নবশিংগুম্বা থবক পীরিবা মীওইনা থবক তৌরিবা মীওইদা পীবা শেনফম খুদিংমক মনুং চল্লি।

• য়ুমগী লনথুমদগী লাকপা ইনকমঃ মী লৈনবা নত্ত্রগা কম্মর্সিএল ওইবা লনথুম শানবদগী লাকপা ভারা অসিগী তেক্স থীফম থোকই।

• কারবার নত্ত্রগা শিনফমদগী লাকপা ইনকমঃ কারবার নত্ত্রগা শিনফম অমদগী চাদিং খাইদোকখ্রগা লাকপা শেন্দোং অসিগী তেক্স থীফম থোকই।

• কেপিতেল গেন্দগী লাকপা ইনকমঃ  লন থুম নত্ত্রগা সনা লুপাগুম্বা কেপিতেল এসেত য়োনবদা ফংবা শেন্দোং অসিগী তেক্স থীফম থোকই। মসিগী তোংজবশিং অসি অশাংবা নত্ত্রগা অতেনবা মতমগী ওইবা য়াই।

• অতোপ্পা সোর্সতগী লাকপা ইনকমঃ  মসিদা অতোপ্পা কেতগরীদা চন্দবা ইনকমশিং, হায়বদি সেবিংস ইন্তরেস্ত, ফেমিলী পেন্সন গিফ, লোত্তরী ফাওবা অমসুং ইনভেস্তমেন্ত রিতর্শিংদগী লাকপা ইনকমশিং মনুং চল্লি।

বেকগ্রাউন্দ

জুলাই 24দা পাংথোকপা ইনকম তেক্স নুমিৎ অসিনা ভারতকী ফিস্কেলগী খোঙচত্তা মশক থোকপা মফম অমা কল্লি। সর জেম্স ৱিলসন্না ইং 1860দা ভারত্তা ইনকম তেক্স হৌদোক্লম্বা থৌওংবু নুমিৎ অসিনা নীংশিংলি। মতমদুদা হৌদোক্লম্বা পথাপ্না ফম্বাক শেম্বা ওইরবশু, লৈবাক্কী মওং চুম্লবা তেক্সকী পথাপ অমা শিজিন্নখিবা হৌখিবসিদি ইং 1922গী মপুং ওইরবা ইনকম তেক্স অসিননি। এক্ত অসিনা ইনকম তেক্স ওথোরিতীবু ফোর্মেলাইজ তৌবতা নত্তনা পথাপ নাইনা লৈঙাকপগী ফ্রেমৱর্ক অমগী য়ুম্বী শাবা হৌখি।

সেন্ত্রেল বোর্দ ওফ রেভেন্যু এক্তনা ইং 1924দা বোর্দ অসিবু ইনকম তেক্স এক্তকী কাঙলোন ঙাক্নবা স্তেত্যুতরী বোদী ওইহন্দুনা পথাপ অসিবু মপাঙ্গল হেনগৎহনখি। মতম অসিদা প্রোভিন্স খুদিংগী ইনকম তেক্সকী কম্মিস্নর অমমম খনখি অমসুং মখোয়বু এসিস্তেন্ত ওফিসর অমসুং ইনকম তেক্স ওফিসরশিংনা মতেং পাংহনখি।

ইং 1946তা গ্রুপ এ. ওফিসর লৌবগী থৌওংনা মশক থোকপা থবক অমা ওইখি অমসুং বোম্বে অমসুং কলকত্তাদা অহানবা ত্রেনিং পাংথোকখি। ইং 1957দা নাগপুরদা আই.আর.এস. (দাইরেক্ত তেক্স) স্তাফ কোলেজ লিংখৎখি, মসিবু নেস্নেল একাদমী ওফ দাইরেক্ত তেক্স হায়ান কোন্না মিংথোনখি অমসুং কোলেজ অসি লিংখৎপনা বিভাগ মনুংগী প্রোফেস্নেল দিভেলপমেন্তকী পাঙ্গল হেনগৎহনখি।

ইং 1981দা কম্প্যুতর শিজিন্নবা হৌদুনা তেক্নোলোজী চাউখৎহনবনা মরু ওইবা থৌদাং য়াখি। অহানবা ফেজতা চল্লানশিংবু ইলেক্ত্রোনিক ওইনা প্রোসেসিং তৌবদা মিৎয়েং চঙখি। ই-ফাইল অমসুং পেপর রিতর্ন মশিং য়াম্না প্রোসেস তৌবা ঙম্নবগীদমক্তা ইং 2009দা অকোনবা ওইবা বেঙ্গালুরুদা সেন্ত্রেলাইজ প্রোসেসিং সেন্তর (সি.পি.সি.) লিংখৎখি, অমসুং জুরিসদিক্সন-ফ্রী ওইবা মওংদা নীংথিনা মথৌ পাংথোকপা হৌখি।

ইনকম তেক্স নুমিৎ অসিনা ভারত্তা তেক্সকী লৈঙাক্লোন চাউখৎপগী পুৱারী নৈনবখক নত্তনা হেন্না ফবা অমসুং তেক্সপেয়র শিংদা নুংঙাইবা পথাপ অমা শেম্নবা থাক ৱাংবা অমসুং মতমগা চুনবা চাউখৎ থৌরাং লাক্লিবা অসিবুশু খঙহল্লি।

ইনকম তেক্সকী মরু ওইবা

ইনকম তেক্সনা অফবা লৈবাক অমগী তঙাই ফদবা থৌওংশিংদা শৌগত্তুনা লৈবাক-শেম্বদা মরু ওইবা থৌদাং য়ারি। মসিনা হেল্থকেয়র, এজুকেসন অমসুং ইনফ্রাস্ত্রকচরগুম্বা তঙাই ফদবা সেবাশিংগী শেল থাদনবা রেভেন্যু শোইদনা লৈহল্লি। সর্ভিসশিং অসি নাগ্রিক অমনা নুংঙাই য়াইফনা লৈবা অমসুং খুন্নাইগী অপুনবা চাউখৎ থৌরাংগীদমক্তা য়াম্না মরু ওই। ইনকম তেক্সতগী লাকপা রেভেন্যুনা তোঙান-তোঙানবা সেক্তরশিংদা ইনভেস্ত তৌদুনা, শাহৌ লৈহন্দুনা অমসুং থবক্কী খুদোংচাবা কয়া লৈহন্দুনা শেন্মিৎলোন চাউখৎপদশু তেংবাংই।

তেক্সেসন্না লন-থুম পৈশিনবা অমসুং য়েন্থোকপগী খল ঙাক্তুনা লৈবাক অমগী সোসিএল কেরেক্তর শেম্মি। মসিনা লৈবাক অমগী শক্তি শাগৎপা, কায়দনা লৈহনবদা অমসুং সোসিএল কনত্রেক্ত শাগৎপদা তেংবাংদুনা লৈবাক অমসুং নাগ্রিকশিংগী মরক্তা থাজবগী মরী শাগৎলি। মীওই অমসুং কারবারশিংনা মখোয়গী শেন্থোক্কী শরুক খরা লৈবাক্কীদমক্তা শরুক তমহন্দুনা, তেক্সেসন্না রিসোর্সশিং অসি মীয়াম্না শিজিন্ননবা ফংহল্লি, অমসুং মসিনা খুন্নাইবু অমত্তা ওইনা থম্মি।

সরকারনা তেক্স রিফোর্ম পাংথোক্তুনা মীয়াম্না থাজবা লৈঙাক অমা শেম্বা ঙম্মি, লৈবাক্কী মতিক হেনগৎহল্লি অমসুং অচুম্বা তৌবা হেনগৎহল্লি। মথৌ নীংথিনা তৌবা তেক্সকী পথাপ অমনা মীয়াম্না পাম্বা থৌশিল থৌরাং শেম্বা ঙমহল্লি অমসুং মসিনা সরকার অমসুং মীয়ামগী মরক্তা লৈরিবা মরীগী মপাঙ্গল হেনগৎহল্লি। মসিগুম্বা থাজবগী মতৌনা অফবা কাঙলোন অমা শেম্বা ঙমহল্লি, অদুগা হান্নদগী হেন্না ফগৎলবা পব্লিক সর্ভিস পীবনা মীয়াম্না সরকারদা থাজবা হেনগৎহল্লি, তেক্সকী কাঙলোন ইনহল্লি অমসুং মসিনা লৈবাক্কী মপাঙ্গল লৈহল্লি।

মরম অদুনা, ইনকম তেক্স হায়বসি রেভেন্যু তানবতা নত্তনা নাগ্রিকশিংগী অপাম্বা থুংহনবা ঙম্বা অমসুং খুন্নাইগী য়াইফ য়ুম্বাল পুরকপা ঙম্বা অমদি মরোমদোম লেপচবা ঙম্বা লৈবাক অমা শেম্বদশু তেংবাংই। ইনকম তেক্সকী কান্নবা অসি শেল থুমগী হীরমদগী য়াম্না হেন্দোক্তুনা মান্নবা মিৎয়েং য়েংবা, তংদু লৈতাবা অমসুং নুংঙাই য়াইফবা খুন্নাই অমা শেম্বদশু মশক থোক্না তেংবাংই।

হৌজিক ওইরিবা ফিভম

ভারতকী পর্স্নেল ইনকম তেক্স (পি.তি.আই.)কী ফিভম অসি হন্দক্কী ইকুই কুইদবা চহিশিংদা শাহৌ য়াম্না লৌবগী মতৌ উখি, লৈবাক্কী পাকথোক চাউথোক্লিবা শেন্মিৎলোন অমসুং তেক্সকী কাঙলোন ইনবা হেনবগী মতৌ উবা ফংখি। ইং 2020-21দা, সেক্যুরিতীজ ত্রাঞ্জেক্সন তেক্স (এস.তি.তি.) য়াওনা গ্রোস পর্স্নেল ইনকম তেক্সনা লুপা করোর লাক্ষ 5.75 য়ৌখি। কোবিদ-19 লাইচৎনা পুরকপা  শেন্মিৎলোনগী শিংনবা কয়াগী মাইয়োক্তা মসিনা লৈবাক্কী রেভেন্যুদা মশক থোকপা শরুক তমখি।

মখা তারকপা শেনবা চহি 2021-22দা পি.তি.আই. অপুনবা কল্লেক্সন্দা মশক থোক্না হেনগত্তুনা লুপা করোর লাক্ষ 7.10 য়ৌখি। শাহৌ অসি শেন্মিৎলোন্না তপ্না ফগৎলকপা অমসুং তেক্স হেন্না খোম্বা ঙম্বগী থৌওংনা ওইহনখিবনি। চৎনবী অসি ইং 2022-23দশু মখা চত্থখি, লুপা করোর লাক্ষ 9.67 খোম্বা ঙমদুনা মতমদুদা চত্থরিবা তেক্স রিফোর্ম অমসুং শেন্মিৎলোনগী মপাঙ্গলগী মওং-মতৌ নীংথিনা উৎখি।

ইং 2023-24দা, এ.তি.আই. য়াওনা পর্স্নেল ইনকম তেক্স খোম্বগী মশিংনা য়াম্লবা লুপা করোর লাক্ষ 12.01 (এপ্রিল 21, 2024গী প্রোবিজনেল ফিগর) য়ৌখি। মসিগুম্নবা মশক থোকপা চাংদা হেনগৎপগী মশিংনা ভারতকী শেন্মিৎলোনগী নীংহন্নদবা অমসুং চাউবগী মতৌগা লোয়ননা তেক্সপেয়র কমপ্লাইএন্স হেনগৎলিবা অমসুং সরকারনা তেক্স বেজ পাকথোক চাউথোক্নবা হোৎনরিবা থৌওংশিংবু ময়েক শেংনা উহল্লি। পি.আই.তি. কল্লেক্সনগী মথক কারিবা ত্রাজেক্তরী অসিনা ভারতকী শেন্মিৎলোনগী ইনফ্রাস্ত্রকচর অমসুং মীয়ামগী য়াইফ থৌরাংগী প্রোগ্রামশিংদা ইনকম তেক্সকী মরু ওইরিবা অসিবু ময়েক শেংনা তাক্লি।

বজেৎ 2024-25: ইনকম তেক্স স্লেবতা লাকপা অহোংবা

ইং 2024-25কী বজেৎ অসিদা তোলোব চাবা মীওই অমসুং পেন্সন ফংবা মীওই অনিমক্তা কান্নবা য়াম্না পীগদবা অহোংবা কয়া অমা পুরক্লি। অনৌবা তেক্স রেজিম পাম্বা তোলোব চাবা ইমপ্লোয়ীশিংগী স্তেন্দর্দ দিদক্সনবু লুপা 50000দগী 75000দা হেনগৎখ্রে। মান্নবা থৌওং ওইনা, পেন্সন চাবশিংগী ফেমিলী পেন্সনগী দিদক্সন অসিশু লুপা 15000দগী লুপা 25000দা হেনগৎখ্রে। অহেনবা থৌওং ওইনা, এসেসমেন্ত অসিশু এসেসমেন্ত চহি লোইবদগী চহি অহুমদগী চহি মঙা ফাওবগী মনুংদা তোবা য়াহল্লে, অদুবু মসিদি এক্সকেপ ইনকম্না লুপা লাক্ষ 50 হেনবা মতমদা য়াগনি। নৌনা শেমদোক্লবা তেক্স রেজিম অসিনা কান্নবা কয়া অমা পীরি, মসিদা তোলোব চাবা ইমপ্লোয়ীশিংনা ইনকম তেক্সকী লুপা 17500 ফাওবগী কান্নবা ফংবা য়াগনি।

পনবা য়াবা অতোপ্পা খোঙথাং

তেক্স খোম্বগী চাং হেনগৎহন্নবা অমসুং তেক্স থীদবগী থৌওং থিংদুনা তেক্স বেজ চাউথোকহন্দুনা, তেক্স বেজ হেনগৎহন্দুনা, তেক্নোলোজী শিজিন্নদুনা ভোলুন্তরী কমপ্লিএন্স তৌহন্দুনা অমসুং দিজিতেল ত্রাঞ্জেক্সন খুমাং চাউশিলহন্দুনা কেন্দ্র সরকারনা খোঙথাং কয়া অমা পায়খৎখ্রে। সরকারনা পায়খৎপা খোঙথাং খরা মখা পীরিঃ

পর্স্নেল ইনকম তেক্স লাইথোকহনবা

• ফাইনান্স এক্ত, 2020: অখন্ননা পীরিবা একজেম্পসন অমসুং ইন্সেন্তিব ফংদবা মতমদা, তেক্স থীবা মীওই অমনা অনেম্বা স্লেব রেত্তা ইনকম তেক্স থীজগে হায়না খনবা য়াগনি।
• ফাইনান্স এক্ত, 2023: এসেসমেন্ত চহি 2024-25তগী হৌদুনা, ইনকম তেক্স এক্ত, 1961গী সেক্সন 115BA)1A)গী মখাদা লৈবা রেত অসি দিফোল্ত ওইগনি হায়বগী মতুং ইন্না মীওই অমনা পীফম থোকপা রেত হন্থহল্লে অমসুং স্কোপ হেনগৎহল্লে।

26ASকী অনৌবা ফোর্ম

• দিদক্সন নত্ত্রগা তেক্স কল্লেক্সন এত সোর্স, স্পেসিফাইদ ফাইনেন্সিএল ত্রাঞ্জেক্সন (এস.এফ.তি.), তেক্স থীদকপা, দিমান্দ অমসুং রিফন্দগী ই-পাউ খুদিংমক য়াওই।
• ফোর্ম অসিদা এস.এফ.তি. দেতাগী অকুপ্পা মরোল য়াওবনা তেক্স থীরিবশিংদা মখোয়না মমাংদা পাংথোকপা ত্রাঞ্জেক্সন উহল্লি, মখোয়গী অশেংবা ইনকম হাইদোক্নবা পুক্নিং থৌগৎলি।

ইনকম তেক্স রিতর্ন (আই.তি.আর.) প্রি ফাইলিং তৌবা

তেক্স কমপ্লাইএন্স লাইথোকহন্নবা তেক্সপেয়রশিংদা আই.তি.আর. প্রি ফাইল তৌবা য়াহল্লে। স্কোপকী মনুংদা সেলেরী ইনকম, বেঙ্ক ইন্তরেস্ত, দিবিদেন্দকুম্বা ৱারোল য়াওরি।

অপদেতেদ রিতর্ন

এক্ত অসিগী সেক্সন 139(8A): তেক্সপেয়রশিংনা মখোয়গী মথৌ তাবা এসেসমেন্ত চহিদগী চহি অনিগী মনুংদা মখোয়বু রিতর্নবু মতম অমা হেক্তদা অপদেত তৌবা য়াহল্লি।

ই-ভেরিফিকেসন স্কিম

স্কিম অসিনা তেক্সতা নম্থাক তৌবগী থৌওং থোকহন্দনবা ওথোরিতীশিংদা তেক্স পেয়র অদুগী তসেংবা ইনকম খঙনবা অশেংবা ৱারোল লৌখৎপা ঙমহল্লি। মসিনা তেক্সপেয়রশিংদা মখোয়না ফংখিবা সোর্সশিংগী শেল থুমগী ৱারোল খঙহল্লি।

দিস্প্যুত রিজোল্যুসন কম্মিত্তী (দি.আর.সি.) শেম্বা

লিতিগেসন হন্থহন্নবা অমসুং তেক্স পীক্না থীবা মীওইশিংগী ৱাকৎ হন্থহন্নবা হায়দুনা দি.আর.সি. অমা শেমখ্রে। লুপা লাক্ষ 50 ফাওবগী তেক্সেবল ইনকম অমসুং লুপা লাক্ষ 10 ফাওবগী চয়েৎনবা লৈবা মীওইশিংনা কম্মিত্তী অসিদা ৱাকৎপা য়াগনি। মসিগী থবকশিং অসি ই-দিস্প্যুত রিজোল্যুসন কম্মিত্তী স্কিম, 2021গী মখাদা দিজিতেল প্লেতফোর্মদা পাংথোক্লি।

তি.দি.এস./তি.সি.এস.কী স্কোপ চাউথোকহনবা

অনৌবা তেক্সপেয়রশিংবু তেক্সকী পথাপ্তা চলহন্নবা তি.সি.এস./তি.দি.এস.পু চাউথোকহনখ্রে। মসিগী মনুংদা শেল য়াম্না লৌথোকপা, ফোরেন রেমিত্তেন্স, লকজরী কার লৈবা, ই-কম্মর্স পার্তিসিপেন্ত অমসুং পোৎলম য়োনবগী থৌওংশিং মনুং চলহল্লি।

ইনকম তেক্স রিতর্ম

ইনকম তেক্স রিতর্ন (আই.তি.আর.) হায়বসি মীওই অমনা ভারতকী ইনকম তেক্স বিভাগতা থাজিনগদবা ফোর্ম অমনি। মসিদা মীওই অমগী ইনকম অমসুং চহিদুগী মনুংদা পীগদবা তেক্সকী ৱারোল য়াওরি। আই.তি.আর.দা পল্লিবা ই-পাউ খুদিংমক মরী লৈনবা চহিদুগী মতমগী ওইগদবনি। মতম অসি চহিদুগী এপ্রিল 1দগী মথংগী চহিগী মার্চ 31 ফাওবগী ওইগনি।

মমাংগী চহি মরিদা ইনকম তেক্স রিতর্ন মেনখিবা মীওই মশিং মখাদা পীরিঃ

2019-20: করোর 6.48

2020-21: করোর 6.72

2021-22: করোর 6.94

2022-23: করোর 7.40

মশিং অসিনা ইনকম তেক্স রিতর্ন ফাইল তৌরকপা মীওই মশিং হেনগৎলকপা, তেক্স বেজ হেনগৎলকপা অমসুং তেক্স কমপ্লাইএন্স হেনগৎলকপগী মতৌ উৎলি।

ৱারোইশিন

ভারতনা ইনকম তেক্স নুমিৎ 2024 পাংথোক্লিবা অসিদা লৈবাক অসিনা তেক্সকী লৈঙাক্লোন্না ইং 1860দা হৌখিবদগী হৌজিক ফাওবা মতম শাংনা লাক্লে হায়বা উৎলি। অচম্বা তেক্সকী পথাপ্তগী লৈবাক্কী শেন্মিৎলোনগী চাউখৎ থৌরাং অমসুং মীচম মীয়ামগী পুন্সি মহিং নুংঙাইহনবদা তেক্সকী পথাপ্না অচৌবা থৌদাং য়ারি হায়বা ৱাফমশু উবা ফংলি। তেক্সকী ফিভমদা ভারত্তা লাক্লিবা অহোংবা কয়াশু নুমিৎ অসিনা ঐখোয়দা খঙহল্লি। বজেৎ 2024-25তা তেক্সকী কাঙলোন্দা অহোংবা কয়া পুরক্লিবা অসিনা সরকার অসিনা মীচঙ মীখায় নাইবা তেক্সকী পথাপ অমা পুরক্নবা হোৎনরি। নুমিৎ অসিদি শেল থুমগী ৱাফমখক নত্তনা তেক্সেসনগী পথাপ ফগৎহন্নবা হোৎনবগী থৌওং কয়া ঐখোয়দা খঙহল্লি। ঐখোয়না তুংগী মতমদা য়েংলুবদা, তেক্সকী লৈঙাক্লোন্দা পুরক্লিবা অহোংবা কয়া অসিনা নুংঙাই য়াইফবা অমসুং সস্তেনেবল ওইবা তুংলমচৎ অমা শোইদনা লৈরগনি হায়বগী ঐখোয়দা থাজবা পীরি।

রিফরেন্স

https://incometaxindia.gov.in/Pages/about-us/history-of-direct-taxation.aspx

https://www.pib.gov.in/PressReleasePage.aspx?PRID=1884583#:~:text=2021%2D22.,Tax(STT)%20at%20Rs.

https://pib.gov.in/PressReleasePage.aspx?PRID=1710598#:~:text=The%20Gross%20collection%20of%20Direct,Tax(CIT)%20at%20Rs.

https://pib.gov.in/PressReleaseIframePage.aspx?PRID=2018373#:~:text=The%20Gross%20Personal%20Income%20Tax,crore%20of%20the%20preceding%20year.

https://sansad.in/getFile/loksabhaquestions/annex/1715/AU295.pdf?source=pqals

https://sansad.in/getFile/loksabhaquestions/annex/1712/AS45.pdf?source=pqals

https://sansad.in/getFile/loksabhaquestions/annex/1714/AU87.pdf?source=pqals

ক্লিক তৌদুনা দাউনলোদ তৌবীয়ুঃ PDF

***