લક્ષદ્વીપ, દમણ દીવ, દાદરા અને નગર હવેલીના પ્રશાસક શ્રી પ્રફુલ્લ પટેલે આજે અહીં કેન્દ્રીય મંત્રી ડૉ. જિતેન્દ્ર સિંહની મુલાકાત લીધી હતી અને કેન્દ્રીય પૃથ્વી વિજ્ઞાન મંત્રાલયના નેજા હેઠળ ચેન્નાઈની નેશનલ ઇન્સ્ટિટ્યૂટ ઑફ ઓશન ટેકનોલોજી, ચેન્નાઈ દ્વારા પીવાના પાણી માટે વિશ્વનો પ્રથમ "ડિસેલિનેશન પ્લાન્ટ" સ્થાપિત કરવા જેવી પહેલો માટે પ્રસન્નતા વ્યક્ત કરી હતી.

શ્રી પટેલે વિશ્વના પ્રથમ લો ટેમ્પરેચર થર્મલ ડિસેલિનેશન (એલટીટીડી) પ્લાન્ટ માટે પૃથ્વી વિજ્ઞાન મંત્રી ડો.જિતેન્દ્ર સિંહનો આભાર માન્યો હતો, જેણે કેન્દ્રશાસિત પ્રદેશના લોકોને પીવાનું શુધ્ધ પાણી પૂરું પાડીને મોટી રાહત આપી છે. કુલ 9 ડિસેલિનેશન પ્લાન્ટને મંજૂરી આપવામાં આવી છે, જેમાંથી 7 કાર્યરત છે અને આગામી સપ્તાહમાં વધુ એક કાર્યરત કરવામાં આવશે. આ દરેક એલટીટીડી યુનિટની ક્ષમતા દરરોજ આશરે 1 લાખ લિટર પીવાલાયક પાણીની છે, જે આગામી સમયમાં વધારીને 1.5 લાખ લિટર પ્રતિદિન કરવામાં આવશે.

એલટીટીડી (LTTD) ટેકનોલોજી મહાસાગરોમાં કુદરતી રીતે ઉપલબ્ધ તાપમાનના તફાવતનો ઉપયોગ કરે છે, નીચા દબાણે સપાટી પરના પાણીનું બાષ્પીભવન કરે છે અને તેના પરિણામે પેદા થતી વરાળનું ઊંડા દરિયાના ઠંડા પાણી સાથે 12 °C તાપમાને ઘનીકરણ કરે છે, જે લગભગ 400 મીટરની ઊંડાઈએથી મેળવવામાં આવે છે. આ ટેકનોલોજી સ્વદેશી, પર્યાવરણને અનુકૂળ અને સંચાલનમાં સરળ છે. તેમણે બે એરપોર્ટને મંજૂરી આપવા બદલ વડા પ્રધાન નરેન્દ્ર મોદી અને કેન્દ્ર સરકારનો આભાર માન્યો હતો.

ડો.જિતેન્દ્રસિંહે જણાવ્યું હતું કે, "લક્ષદ્વીપમાં ઇકો-ટૂરિઝમ અને વિકાસ માટે બે એરપોર્ટ વરદાનરૂપ સાબિત થશે." તેમણે કેન્દ્રશાસિત પ્રદેશની વર્ષ 2014થી અત્યાર સુધીની વિકાસલક્ષી સફર અને શાળાઓ, કોલેજો અને હોસ્પિટલો અને સ્થાનિક સ્વરાજ્યની સંસ્થાઓ જેવા અન્ય સામાજિક ક્ષેત્રોમાં લાવવામાં આવેલા સુધારાઓ પર પ્રકાશ પાડ્યો હતો.

કેન્દ્રીય વિજ્ઞાન અને ટેકનોલોજી રાજ્ય મંત્રી (સ્વતંત્ર હવાલો), પૃથ્વી વિજ્ઞાન રાજ્યમંત્રી (સ્વતંત્ર હવાલો), પ્રધાનમંત્રી કાર્યાલય, પરમાણુ ઊર્જા વિભાગ અને અંતરિક્ષ વિભાગ, કર્મચારી, જાહેર ફરિયાદ અને પેન્શન રાજ્યમંત્રી ડૉ. જિતેન્દ્ર સિંહે શ્રી પ્રફુલ પટેલને માહિતી આપી હતી કે, બે પુનઃ ખનિજીકરણ પ્લાન્ટ કાર્યરત કરવામાં આવી રહ્યાં છે, જે ડિસેલિનેશન પ્રક્રિયા દરમિયાન બાષ્પીભવન થયેલા આવશ્યક ક્ષારોનો ઉમેરો કરશે. તેમણે ઉમેર્યું હતું કે, અન્ય ડિસેલિનેશન એકમો/પ્લાન્ટ્સને પણ આ જ પ્રકારની પુનઃ-ખનિજીકરણ સુવિધા ઉપલબ્ધ કરાવવામાં આવશે.

ડો.જિતેન્દ્રસિંહે જણાવ્યું હતું કે, એસઆરએમ ઇન્સ્ટિટ્યૂટના તબીબોની ટીમે કવારટ્ટી પ્લાન્ટની સ્થાપનાના 6 મહિના પહેલા અને પછીના સ્થાનિક આરોગ્ય રેકોર્ડના આધારે નોંધ્યું હતું કે પાણીજન્ય રોગોની ઘટનાઓમાં 90% (200 થી 8) નો ઘટાડો થયો છે, જે પીવાલાયક પાણીની જોગવાઈના આરોગ્ય લાભો અને અસરને પ્રકાશિત કરે છે. તેમણે એવી ખાતરી પણ આપી હતી કે આ સ્વદેશી તકનીકી વિકાસ એક સીમાચિહ્નરૂપ સાબિત થશે અને કેન્દ્રશાસિત પ્રદેશમાં વિકાસની ગતિમાં વધારો કરશે અને પર્યટનને પ્રોત્સાહન આપશે.

ડૉ. જિતેન્દ્ર સિંહે લક્ષદ્વીપનાં વિકાસ માટે પ્રધાનમંત્રીનાં વિઝન પર પ્રકાશ પાડ્યો હતો અને કહ્યું હતું કે, "આગામી વર્ષોમાં તે સ્થાનિક તેમજ આંતરરાષ્ટ્રીય પ્રવાસીઓ માટે રોજગારીનું સર્જન કરવા અને અર્થતંત્રને વેગ આપવા માટેનું મુખ્ય કેન્દ્ર બની જશે. તેમણે શ્રી પટેલને એવી જાણકારી પણ આપી હતી કે, ડૉ. જિતેન્દ્ર સિંહનાં નેતૃત્વમાં લગભગ તમામ મંત્રાલયો આ વિસ્તારમાં વધારે પ્રોજેક્ટ અને વિકાસ માટે ખભેખભો મિલાવીને કામ કરી રહ્યાં છે. એક બાજુ એ બંનેએ યુટીમાં વિવિધ વિકાસલક્ષી પ્રવૃત્તિઓ અને પ્રોજેક્ટ્સ પર ચર્ચા કરી.

AP/GP/JD