ਕੋਲਾ ਮੰਤਰਾਲੇ ਨੇ ਅੱਜ 7ਵੇਂ ਦੌਰ ਦੇ ਦੂਜੇ ਯਤਨ ਦੇ ਤਹਿਤ ਨਿਲਾਮੀ ਕੀਤੀਆਂ ਤਿੰਨ ਕੋਲਾ ਖਾਣਾਂ ਲਈ ਕੋਲਾ ਮਾਈਨਿੰਗ ਵਿਕਾਸ ਅਤੇ ਉਤਪਾਦਨ ਸਮਝੌਤਿਆਂ ਨੂੰ ਸਫਲਤਾਪੂਰਵਕ ਲਾਗੂ ਕੀਤਾ। ਇਹ ਵਪਾਰਕ ਕੋਲਾ ਮਾਈਨਿੰਗ ਦੀ ਸਫਲਤਾ ਵਿੱਚ ਇੱਕ ਮਹੱਤਵਪੂਰਨ ਮੀਲ ਪੱਥਰ ਹੈ। ਤਿੰਨ ਖਾਣਾਂ ਵਿੱਚੋਂ ਦੋ ਦੀ ਅੰਸ਼ਕ ਤੌਰ 'ਤੇ ਖੋਜ ਕੀਤੀ ਗਈ ਹੈ, ਜਦੋਂ ਕਿ ਇੱਕ ਦੀ ਪੂਰੀ ਖੋਜ ਕੀਤੀ ਗਈ ਹੈ।

ਇਕਰਾਰਨਾਮੇ ਕੀਤੀਆਂ ਗਈਆਂ ਖਾਣਾਂ ਵਿੱਚ ਮਛਕਟਾ (ਸੋਧਿਆ) ਕੋਲਾ ਖਾਣ, ਕੁਦਨਾਲੀ ਲੁਬਰੀ ਕੋਲਾ ਖਾਣ ਅਤੇ ਸਖੀਗੋਪਾਲ-ਬੀ ਕਾਕੁ ਕੋਲਾ ਖਾਣ ਸ਼ਾਮਲ ਹਨ। ਸਫਲ ਬੋਲੀਕਾਰ ਕ੍ਰਮਵਾਰ ਐੱਨਐੱਲਸੀ ਇੰਡੀਆ ਲਿਮਿਟਿਡ, ਗੁਜਰਾਤ ਮਿਨਰਲ ਡਿਵੈਲਪਮੈਂਟ ਕਾਰਪੋਰੇਸ਼ਨ ਲਿਮਿਟਿਡ ਅਤੇ ਤਾਮਿਲਨਾਡੂ ਜਨਰੇਸ਼ਨ ਅਤੇ ਡਿਸਟ੍ਰੀਬਿਊਸ਼ਨ ਕਾਰਪੋਰੇਸ਼ਨ ਲਿਮਿਟਿਡ ਹਨ।

ਲਗਭਗ 30.00 ਐੱਮਟੀਪੀਏ ਦੀ ਕੁੱਲ ਪੀਕ ਦਰ ਸਮਰੱਥਾ ਉਤਪਾਦਨ ਦੇ ਅਧਾਰ 'ਤੇ ਇਨ੍ਹਾਂ ਤਿੰਨਾਂ ਖਾਣਾਂ ਤੋਂ ਵਪਾਰਕ ਨਿਲਾਮੀ ਦੇ ਤਹਿਤ ਅਨੁਮਾਨਿਤ ਸਾਲਾਨਾ ਮਾਲੀਆ ਉਤਪਾਦਨ ਲਗਭਗ 2,991.20 ਕਰੋੜ ਰੁਪਏ ਹੈ। ਇਨ੍ਹਾਂ ਖਾਣਾਂ ਦੇ ਚਾਲੂ ਹੋਣ ’ਤੇ ਲਗਭਗ 40,560 ਪ੍ਰਤੱਖ ਅਤੇ ਅਪ੍ਰਤੱਖ ਨੌਕਰੀਆਂ ਪੈਦਾ ਹੋਣਗੀਆਂ। ਇਸ ਤੋਂ ਇਲਾਵਾ, ਇਨ੍ਹਾਂ ਕੋਲਾ ਖਾਣਾਂ ਨੂੰ ਚਾਲੂ ਕਰਨ ਲਈ ਲਗਭਗ 4,500 ਕਰੋੜ ਰੁਪਏ ਦਾ ਕੁੱਲ ਨਿਵੇਸ਼ ਅਲਾਟ ਕੀਤਾ ਜਾਵੇਗਾ।

ਇਹ ਪਹਿਲਕਦਮੀ ਕੋਲਾ ਖੇਤਰ ਵਿੱਚ ਆਤਮਨਿਰਭਰਤਾ (ਸਵੈ-ਨਿਰਭਰਤਾ), ਆਰਥਿਕ ਵਿਕਾਸ, ਰੋਜ਼ਗਾਰ ਪੈਦਾ ਕਰਨ ਵਿੱਚ ਯੋਗਦਾਨ ਪਾਉਣ ਅਤੇ ਦੇਸ਼ ਦੀ ਊਰਜਾ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਵੱਲ ਇੱਕ ਮਹੱਤਵਪੂਰਨ ਕਦਮ ਹੈ। 

***************

ਬੀਨਾ ਯਾਦਵ/ਸ਼ੁਹੈਬ ਟੀ