প্রধান মন্ত্রী, শ্রী নরেন্দ্র মোদীনা রসিয়াদা লৈবা ভারতকী কম্ম্যুনিতীগা মোস্কোদা ঙসি পাঙথোকপা থৌরম অমদা ৱারী শানখ্রে। মহাকপু কম্ম্যুনিতী মেম্বরশিংনা হরাও তয়াম্বগা লোইননা ওকখি। কম্ম্যুনিতীদা পীবা মহাক্কী ৱারোলদা, প্রধান মন্ত্রীনা ভারত মচাশিংবু তরাম্না ওকপীবগীদমক থাগৎপা ফোংদোকখি অমসুং ভারত রসিয়াগী মরীবু হেন্না ফগৎনবা হোৎনরিবা কয়াবু শিংথাখি। ভারত মচা বিলিয়ন ১.৪গী মহুৎ শিন্দুনা তরাম্না ওকচরদুনা মহাক্না হায়খি মদুদি কম্ম্যুনিতী অসিগা ৱারী শানবা ফংবসি য়াম্না অখন্নবা অমনি, মরমদি মসিনা পুৱারী ওইহৌরগদবা অহুমশুবা তার্ম অসিদা ভারতকী মপান্দা লৈখ্রবশিংদা ৱা ঙাংবা অহানবা ওইবগীনি।

প্রধান মন্ত্রীনা হৌখিবা চহি তরারোম অসিদা ভারত্তা উরিবা অহোংবা কয়া অসিগী মতাংদা ৱা ঙাংখি। মসি ভারত মচা খুদিংমক্কী ওইনদি য়াম্না চাউথোকচনিংঙাই অমনি হায়না মহাক্না হায়খি। মহাক্না হায়খি, মহাক্কী অহুমশুবা তার্ম অসিদা, মালেমগী অহুমশুবা খ্বাইদগী চাউবা শেন্মিৎলোন ওইহন্নবা হোৎনবনা লৈঙাক অসিগী পান্দম ওই হায়খি। মালেমগী খুমাং চাউশিনবদা চাউনা শরুক তম্লিবা ভারতকী শেন্মিৎলোন চাউখৎপগী মতাং; মসিগী দিজিতেল অমসুং ফিন্তেক্কী মায় পাকপা; গ্রীন দিবেলপমেন্তগী মায় পাকপা; অমসুং মীচম মীয়াম্বু শক্তি পীরিবা শাফু কল্লবা সোসিও একনোমিক প্রোগ্রামশিংগী মতাংদা ঙাংখি। মহাক্না ভারতকী মায় পাক্লবা অহোংবশিং অসি থোক্লিবগী মরমদি ভারতপু চাউখৎলবা লৈবাক অমা ওইননবগীদমক ঙসি মঙ মঙলিবা ভারত মচা বিলিয়ন ১.৪গী কত্থোকপা, ফিরেপ অমসুং হোৎনজবা কয়াননি হায়খি। মহাক্না হায়খি, হনবা লৈবা লৈতবা ফিরেপকা লোইননা, অইং অশা হোংলকপা থেংনবদগী হৌদুনা তুং কোইনা চৎপা য়াবা চাউখৎপগী পান্দম ফাওবদা, ভারতনা মালেমগী মরুপ ভিশ্ববন্ধু অমা ওইদুনা মালেমগী চাউখতপগী খোংথাংদা চাউনা শরুক তম্লি। মহাক্না মখা তানা হায়খি মদুদি ভারতনা লাউরিবা শান্তিগী পাউজেল, ৱারী ৱাতাই অমসুং দিপ্লোমেসীনা মালেমগী সমশ্যাশিং থেংননবা হোৎনরিবসি নীল খোংলে।

প্রধান মন্ত্রীনা ভারতকী কম্ম্যুনিতীবু মখা তানা রসিয়াগা হেন্না অচেৎপা অমসুং পাঙ্গল কল্লবা মরী শেম্নবা লৌরিবা চাউরবা থৌদাং অসি লৌবীনবা থৌনা হাপখি। মহাক্না পনখি মদুদি, অনৌবা ইন্দিয়ন কন্সুলেত অমা কজান অমসুং একাতরিনবর্গতা হাংনবা ৱারেপ অমা লৌরে, মসিনা মীয়ামগী মরীদা হেন্না চেৎশিলহল্লগনি। লাউথোকপা অসিদা মীয়াম্না হৌনা খুবাক খুনখি। কম্ম্যুনিতী অসিনা লৈবাক অসিদা ভারতকী নাতকী চৎনবী কয়া য়োকখৎনবা হোৎনরিবা অমসুং রসিয়াগী মীয়ামগা লান্থোকনরিবা অসিদা হরাওবা ফোংদোকখি।

***