مرکزی وزیر ڈاکٹر جتیندر سنگھ نے آج یہاں قومی دارالحکومت سمیت ملک بھر میں مانسون کے جاری موسم کے تناظر میں عوام کے خدشات اور مشوروں پر غور کرنے کے لیے بلائی گئی ایک خصوصی اعلیٰ سطحی میٹنگ میں کہا کہ دہلی میں موسم اور بارش کی پیشین گوئی کے نظام میں بڑے پیمانے پر بہتری لائی جائے گی۔

انہوں نے کہا کہ پیشین گوئی کے نظام کو عوام دوست بنانے کے لیے ہر ممکن کوشش کی جائے گی تاکہ شہریوں کے لیے سہولت اور آسانی کو یقینی بنایا جا سکے اور غیر متوقع موسمی تبدیلیوں کی وجہ سے انسانی دنوں کے ساتھ ساتھ معاشی نقصان کو بھی بچایا جا سکے۔

اس وقت دہلی میں 17 خودکار موسم کی پیشین گوئی کے مراکز ہیں۔ وزیر موصوف نے جلد از جلد 50 اور بعد میں 100 تک مزید سسٹمز لگانے کی ہدایت کی۔ اس کا مقصد اے ڈبلیو ایس کی تعداد کو 100 تک لے جانا اور اسے عالمی معیارات کے برابر لانا ہے۔ موسم کی پیشن گوئی کے یہ خودکار نظام بہت مخصوص، درست اور وقتاً فوقتاً پیشین گوئیاں فراہم کرتے ہیں۔

سائنس اور ٹکنالوجی کے مرکزی وزیر مملکت (آزادانہ چارج)، ارضیاتی سائنس، ایم او ایس پی ایم او، محکمہ جوہری توانائی اور محکمہ خلا اور ایم او ایس پرسنل، عوامی شکایات اور پنشن کے وزیر مملکت (آزادانہ چارج) ڈاکٹر جتیندر سنگھ نے دہلی اور خاص طور سے قومی دارالحکومت خطے کے مانسون سے متعلق ایک اعلیٰ سطحی اجلاس طلب کیا۔ انہوں نے ملک بھر میں موسم کی پیشین گوئی کے نظام کی اپ گریڈیشن کا جائزہ لیا۔

اپ گریڈیشن کے محاذ پر ڈاکٹر جتیندر سنگھ نے بتایا کہ آنے والے وقت میں دہلی این سی آر میں 3 ریڈار اور 180 خودکار موسم کی پیشین گوئی کرنے والے نظام نصب کیے جائیں گے۔ ممبئی میں 2 ریڈار لگائے گئے ہیں اور 4 مزید نصب کیے جانے ہیں۔ چنئی میں 3 ریڈار پہلے سے موجود ہیں اور ایک اور کولکتہ میں بھی نصب کیا جائے گا۔

ڈاکٹر جتیندر سنگھ نے کہا کہ ”صرف میٹرو شہروں میں ہی نہیں، یہ اپ گریڈیشن دوسرے شہروں کے ساتھ ساتھ ایسے شہروں میں بھی جاری رہے گی جن کی آبادی 10 لاکھ سے زیادہ ہے اور اسے چھوٹے شہروں اور دیگر دور دراز علاقوں میں بھی کیا جائے گا۔

ارضیاتی سائنس کے وزیر مملکت نے بتایا کہ آئی ایم ڈی طویل مدتی اوسط (ایل پی اے) ڈیٹا کے ساتھ مستقبل کے لیے تیار جدید موسم کی پیشین گوئی کے ماڈل کے ساتھ ایک بہت بڑا اپ گریڈ موڈ شروع کر رہا ہے۔

ڈاکٹر جتیندر سنگھ نے یہ بھی بتایا کہ اپ گریڈیشن کے حصے کے طور پر 20 پیٹا فلاپ کی صلاحیت کے ساتھ ایک ہائی پرفارمنس کمپیوٹنگ (ایچ پی سی) سسٹم نصب کیا جائے گا۔ وزیر موصوف نے آفات کے خطرے کو کم کرنے میں اہم کردار ادا کرنے کے لیے ضلعی حکام، مسلح افواج اور ڈیزاسٹر مینجمنٹ حکام کے ساتھ ڈیٹا کا اشتراک کرنے کے لیے آئی ایم ڈی کی کوششوں کی تعریف کی۔ آئی ایم ڈی عام آدمی کی مدد اور عالمی معیار کی موسم کی پیشین گوئی کرنے والی ٹیکنالوجی کے فوائد کا اشتراک کرنے کے لیے موسم کی پیشن گوئی کے نظام کو مسلسل بہتر بنا رہا ہے۔

آئی ایم ڈی کی ٹیم کی رہنمائی کرتے ہوئے ڈاکٹر جتیندر سنگھ نے کہا کہ وزیر اعظم نریندر مودی کا وژن موسم کی پیشین گوئی کرنے والے ان نظاموں کے ذریعے کسانوں، ماہی گیروں اور عام آدمی کو با اختیار بنانا ہے۔

ڈاکٹر مرتیونجے موہاپاترا، ڈی جی آئی ایم ڈی اور آئی ایم ڈی اور ارضیاتی سائنس کی وزارت کے دیگر سینیئر افسران میٹنگ میں موجود تھے۔

****

ش ح۔ ف ش ع- م ف

U: 8161