ورلڈ زونوسس ڈے کے موقع پر ، مویشی پالن اور دودھ کی صنعت کے محکمے نے ایک باہم اثر پذیر سیشن کا انعقاد کیا جس کی صدارت مویشی پالن اور دودھ کی صنعت (اے ایچ ڈی) کے سکریٹری نے کی۔

زونوسس چھوت کی بیماریاں ہیں جو جانوروں سے انسانوں میں پھیل سکتی ہیں، ان میں ریبیز، اینتھراکس،  انفلوئنزا (ایچ 1 این 1 اور ایچ 5 این 1)، نپاہ، کووِڈ19، بروسیلوسس اور  تپ دق جیسی بیماریاں شامل ہیں۔ یہ بیماریاں بیکٹیریا، وائرس، پرجیوی اور فنگی سمیت مختلف پیتھوجینز کی وجہ سے لاحق ہوتی ہیں۔

تاہم، تمام جانوروں کی بیماریاں زونوٹک نہیں ہیں۔ بہت سی بیماریاں انسانی صحت کے لیے خطرہ  پیدا کیے بغیر صرف مویشیوں کو متاثر کرتی ہیں۔ یہ غیر زونوٹک بیماریاں جانوروں کے لیے مخصوص ہیں اور انسانوں کو متاثر نہیں کر سکتیں۔ ان میں کھر پکا منھ پکا بیماری، پی پی آر، جلد کی گانٹھ کی بیماری، کلاسیکی سوائن فیور، اور رانی کھیت کی بیماری شامل ہیں۔ یہ سمجھنا کہ کون سی بیماریاں زونوٹک ہیں، صحت عامہ کی موثر حکمت عملیوں اور جانوروں سے غیر ضروری خوف اور بدنامی کو روکنے کے لیے بہت ضروری ہے۔

ہندوستان میں مویشیوں کی سب سے بڑی آبادی ہے، جس میں 536 ملین مویشی اور 851 ملین پولٹری ہیں، جو عالمی مویشی اور پولٹری کی آبادی کا بالترتیب تقریباً 11فیصد اور 18فیصد  ہیں۔ مزید برآں، بھارت دودھ پیداوار کے معاملے میں کا سب سے بڑا ملک اور عالمی سطح پر انڈے کی پیداوار کے معاملے میں دوسرا سب سے بڑا ملک ہے۔

حال ہی میں، مڈاکتھرن پنچایت، تھریسور ضلع، کیرالہ میں افریقی سوائن فیور(اے ایس ایف) کا معاملہ سامنے آیا۔ اے ایس ایف کی پہلی بار ہندوستان میں مئی 2020 میں آسام اور اروناچل پردیش میں اطلاع ملی تھی۔ تب سے، یہ بیماری ملک کی تقریباً 24 ریاستوں/مرکز کے زیر انتظام علاقوں میں پھیل چکی ہے۔ محکمے نے 2020 میں اے ایس ایف پر قابو پانے کے لیے نیشنل ایکشن پلان مرتب کیا۔ موجودہ وباء  کے پھوٹ پڑنے کے لیے ریاست کے اے ایچ ڈیپارٹمنٹ کی جانب سے ریپڈ رسپانس ٹیمیں تشکیل دی گئی ہیں، اور 5 جولائی 2024کو زلزلے کے مرکز کے ایک کلومیٹر کے دائرے میں خنزیروں کو مارنے کا کام کیا گیا تھا۔مجموعی طور پر 310 خنزیروں کو مارا گیا اور گہرے گڑھے میں دباکر ٹھکانے لگایا گیا۔ ایکشن پلان کے مطابق مزید نگرانی وباء سے ازحد متاثرہ علاقے کے مرکز کے 10 کلومیٹر کے دائرے میں کی جانی ہے۔ یہ بتانا ضروری ہے کہ اے ایس ایف زونوٹک نہیں ہے اور انسانوں میں نہیں پھیل سکتا ہے۔ فی الحال، اے ایس ایف کے لیے کوئی ویکسین موجود نہیں ہے۔

زونوٹک بیماریوں کی روک تھام اور کنٹرول ویکسی نیشن، اچھی حفظان صحت، مویشی پالنے کے طریقوں اور ویکٹر کنٹرول پر منحصر ہے۔ ’ون ہیلتھ‘ نقطہ نظر کے ذریعے باہمی تعاون کی کوششیں، جو کہ انسان، جانوروں اور ماحولیاتی صحت کے باہمی ربط پر زور دیتی ہیں، بہت اہم ہیں۔ زونوٹک بیماریوں سے جامع طور پر نمٹنے کے لیے جانوروں کے ڈاکٹروں، طبی پیشہ ور افراد اور ماحولیاتی سائنس دانوں کے درمیان تعاون ضروری ہے۔

زونوٹک بیماریوں کے خطرے کو کم کرنے کے لیے، مویشی پالن اور دودھ کی صنعت (ڈی اے ایچ ڈی) نے این اے ڈی سی پی کے تحت بوائین گائے بھینس کے بچھڑوں کی بروسیلا ٹیکہ کاری کے لیے ایک ملک گیر مہم شروع کی ہے اور اے ایس سی اے ڈی کے تحت ریبیز کی ٹیکہ کاری شروع کی ہے۔ محکمہ معاشی طور پر اہم جانوروں کی بیماریوں کے لیے ایک جامع ملک گیر نگرانی کے منصوبے پر بھی عمل پیرا ہے۔ مزید برآں، ون ہیلتھ نقطہ نظر کے تحت، قومی مشترکہ وبائی مرض ردعمل ٹیم (این جے او آر ٹی) قائم کی گئی ہے، جس میں وزارت صحت اور خاندانی بہبود، آئی سی ایم آر، مویشی پالن اور دودھ کی صنعت کے محکمے، آئی سی اے آر، اور ماحولیات جنگلات اور آب و ہوا  کی تبدیلی کی وزارت کے ماہرین شامل ہیں۔ یہ ٹیم ازحد تشویشناک پیتھوجینک ایویئن انفلوئنزا (ایچ پی اے آئی)  کے پھوٹ پڑنے سے متعلق مشترکہ تفتیش  کے عمل میں فعال طور پر شامل ہے۔

ابتدائی طور پر پتہ لگانے، روک تھام اور کنٹرول کے بارے میں بیداری میں اضافہ کرنے سے بالآخر صحت عامہ کی حفاظت ہوتی ہے۔ زونوٹک اور غیر زونوٹک بیماریوں کے درمیان فرق کے بارے میں عوام کو آگاہ کرنا غیر ضروری خوف کو کم کرنے میں مدد کرتا ہے اور جانوروں کی صحت اور حفاظت کے بارے میں زیادہ باخبر نقطہ نظر کو فروغ دیتا ہے۔

اگرچہ زونوٹک بیماریاں صحت عامہ کے لیے اہم خطرات کا باعث ہیں، لیکن یہ تسلیم کرنا بھی اتنا ہی ضروری ہے کہ مویشیوں کی بہت سی بیماریاں غیر زونوٹک ہیں اور انسانی صحت کو متاثر نہیں کرتیں۔ اس فرق کو سمجھ کر اور بیماری کے مناسب انتظام کے طریقوں پر توجہ مرکوز کرکے، ہم جانوروں اور انسانوں دونوں کی صحت کو یقینی بناسکتے ہیں، اور اس طرح سب کے لیے زیادہ محفوظ ماحول پیدا کرنے میں تعاون دے سکتے ہیں۔

ورلڈ زونوسس ڈے لوئی  پاسچر کے اعزاز میں منایا جاتا ہے، جنہوں نے 6 جولائی 1885 کو ریبیز ، ایک زونوٹک بیماری ، کا پہلا کامیاب ٹیکہ لگایا۔  یہ دن جانوروں سے انسانوں میں پھیلنے والی زونوٹک بیماریوں کے بارے میں بیداری پیدا کرنے  اور حفاظتی و تدارکی اقدامات کے لیے وقف ہے۔

**********

 (ش ح –ا ب ن۔ م ف)

U.No:8135