১৮শুবা মুম্বাই ইন্তরনেসনেল ফিল্ম ফেস্তিবেল(মিফ)দা শক্নাইরবা লম্লক্কী শা-উচেক্কী ফিল্ম পুথোকপা শ্রী সুবিয়া নাল্লামতুদা লেমজনিঙাই ওইরবা ভি. শান্তরাম লাইফতাইম এচিভমেন্ত এৱার্দ পীরে হায়না ঙসি ইনফোর্মেসন অমসুং ব্রোদকাস্তিংগী রাজ্য মন্ত্রী দোক্তর এল মুরুগান্না লাউথোকখ্রে।

এন.এফ.দি.সি কমপ্লেক্সতা পাউমীগা উনবদা মিনিস্তরনা হায়খি ফেস্তিবেল অসিদা লেমজনিঙাই ওইরবা মনা অসি ফংবগীদমক ঐনা শী নাল্লামতু থাগৎপা ফোঙদোকচরি। লম্লক্কী শা-উচেক্কী ফিল্ম পুথোকপগী হিরমদা মহাক্কী শিংথানিঙাই ওইরবা থবকশিংগীদমক মিফনা শী নাল্লামতুদা মনা অসি পীগদবনি।

শী সুবিয়া নাল্লামতু লম্লক্কী শা-উচেক্কী সেনিমাতোগ্রাফিদা অখন্নবা থবক কয়া পাংথোকখি অমসুং মহাক মালেম শীনবা থুংনা খঙনখি। ফিল্ম অমসুং তেলিবিজন ইন্সতিতুৎ ওফ ইন্দিয়াগী মহৈরোয় অমা ওইনা, ভারতকী খ্বাইদগী শাংবা পান্দা এৱার্দ ফংলবা ইনভাইরোনমেন্তগী সেরিজ লিভিং ওন দি এজদা থবক তৌবদা মহাক্না শকখঙনখি। মহাক্না হায়-স্পিৎ কেমেরামেন অমা ওইনা ইন্দিয়ান স্পেস রিছার্স ওর্গনাইজেসনগা থবক তৌমিন্নখি।

মহাক্না রোয়াল বেঙ্গল তাইরদা ঙাউজবা অদু থবক ওইনা ওন্থোক্তুনা নেসনেল  জিওগ্রাফিক চেন্নেল অমসুং বি.বি.সিগীদমক কৈদা য়ুম্ফম ওইবা মালেমগী দোকুমেন্তরি মঙা পুথোকখি। মহাক্কী ফিল্মশিংগী মনুংদা তাইগর দাইনাস্তি(২০১২-১৩), তাইগর ক্বিন(২০১০) অমসুং দ ৱার্ল্দ ফেমস তাইগর(২০১৭) য়াওরি। মহাক্না মহৌশাগী অকোয়গী মতাংদা দোকুমেন্তরি ফিল্ম কয়া পুথোকখি অমসুং মীওইবা অমসুং ইকোসিস্তেমগা ৱারি শানবা ফিল্মশিং হায়বদি বি.বি.সি ৱার্ল্দগী আর্থ ফাইল(২০০০) অমসুং এনিমেল প্লানেতকী দ ৱার্ল্দ গোন ৱাইল্দ পুথোকখি। লম্লক্কী শা-উচেক্কী সেনিমাতোগ্রাফিদা মহাক্কী মাইপাকপশিংগী মনুংদা ভারত্তা অহানবা ওইনা লম্লক্কী শা-উচেক্কী ফিল্ম নম্বদা ফোর কে রিজোলুসন শীজিন্নবা অসিনি।

শী সুবিয়া নাল্লামতু নেসনেল এৱার্দ মঙা য়াওনা তোঙান-তোঙানবা নেসনেল অমসুং ইন্তরনেসনেল এৱার্দ কয়া ফংখ্রে। মহাক জেকসন হোল ৱাইল্দলাইফ ফিল্ম ফেস্তিবেলগী রিগুলার জুরি মেম্বর অমনি অমসুং মহাক ইন্দিয়ান পেনোরামা ফিল্ম ফেস্তিবেলগী জুরি চিয়ারমেন(২০১২) ওইখ্রে।

ভি.শান্তরাম লাইফতাইম এচিভমেন্ত এৱার্দকী মরমদা

দোকুমেন্তরি  ফিল্মশিংদা শিংথাবা য়ানা থবক তৌবা অমসুং ভারত্তা মসিগী ইহৌ চাউখৎনবা হোৎনবা ফিল্ম মেক্কর অমদা, মিফগী ইদিসন খুদিংদা লেমজনিঙাই ওইরবা দোক্তর ভি.শান্তরাম লাইফতাইম এচিভমেন্ত এৱার্দ পীরি। মনা অশিদা শেন ওইনা লুপা লাখ ১০, ত্রোফি অমা, সাইতেসন অমা য়াওরি। হৌখিবা চহিশিংদা মনা অসি ফংখ্রবা অতোপ্পা শক্নাইরবা ফিল্মগী মীওইশিংগী মনুংদা স্যাম বেনেগল, বিজয় মুলে অমসুং অতোপ্পা ফিল্ম মেক্করশিংনি। মনা অসি শক্নাইরবা ফিল্ম মেক্কর ভি. শান্তরাম নিংশিংনবা লিংখৎপনি।

****