مرکزی وزیر جناب پیوش گوئل نے آج نئی دہلی میں باضابطہ طور پر دوسری مدت کے لیے تجارت و صنعت کی وزارت کا عہدہ سنبھال لیا۔ عہدہ سنبھالنے کے بعد، جناب گوئل نے فوری طور پر تجارت و صنعت کی وزارت کے اندر دونوں محکموں کے سینئر افسران کے ساتھ ایک جائزہ میٹنگ طلب کی۔

وزیر مملکت، تجارت اور صنعت کی وزارت جناب جتن پرساد نے بھی میٹنگ میں شرکت کی۔ میٹنگ کے دوران، کامرس سکریٹری اور ڈی پی آئی آئی ٹی سکریٹری نے وزارت کی جاری تجاویز اور ایکشن آئٹمس پر بریفنگ دی۔

جناب گوئل نے مسلسل تعاون کی اہمیت پر زور دیا اور ہدایت کی کہ آنے والے دنوں میں ملاقاتوں کا ایک سلسلہ طے کیا جانا چاہیے تاکہ مختلف پالیسیوں اور کارروائیوں کی تفصیلات پر غور کیا جا سکے جنہیں حتمی شکل دی جانی ہے۔

تشکر کے ساتھ ساتھ اپنے جوش کا اظہار کرتے ہوئے، جناب پیوش گوئل نے کہا، "میں وزیر اعظم مودی کی تیسری مدت کار کا حصہ بن کر بہت خوش ہوں اور مجھے منتخب کرنے کے لیے شمالی ممبئی کے لوگوں کا شکر گزار ہوں۔ اب جبکہ میں عہدہ سنبھال رہا ہوں ، میں آپ کے پاس ہندوستان اور اس علاقے کے بارے میں بہت سے نئے نقطہ نظر لے کر آیا ہوں۔"

جناب پیوش گوئل نے کہا کہ محکموں کے درمیان خود کا جائزہ لینے اور بہتر تال میل کی ضرورت ہے۔ جناب پیوش گوئل نے ریسرچ اینڈ ڈیولپمنٹ (آر اینڈ ڈی) کی اہمیت اور گورننس کے پبلک پرائیویٹ پارٹنرشپ (پی پی پی) ماڈل کو مضبوط بنانے پر زور دیا۔

انہوں نے افسران پر زور دیا کہ وہ دیانتداری، رفتار، مہارت اور پیمانے پر توجہ دیں۔ انہوں نے کہا کہ اسٹیئرنگ کمیٹی آن ایڈوانسنگ لوکل ویلیو ایڈ اینڈ ایکسپورٹ (اسکیل) کمیٹی اور پروڈکشن لنکڈ انسینٹیو (پی ایل آئی) اسکیموں کو برآمدات اور ملکی پیداوار کو بڑھانے کے لیے اپنی پوری صلاحیتوں کو بروئے کار لانا چاہیے۔

اپنی سابقہ ​​میعاد کی کامیابیوں پر روشنی ڈالتے ہوئے، شری گوئل نے ہندوستان سے مجموعی برآمدات میں اضافے، مختلف آزاد تجارتی معاہدوں (ایف ٹی ایز) پر دستخط، ملک میں براہ راست غیر ملکی سرمایہ کاری (ایف ڈی آئی) کی نمایاں آمد وغیرہ کا حوالہ دیا۔ اقتصادی ترقی اور بین الاقوامی تجارت کو فروغ دیتے ہوئے وزیر نے وزارت تجارت اور صنعت کو نئی بلندیوں کی طرف لے جانے کی امید ظاہر کی، اس بات کو یقینی بناتے ہوئے کہ ہندوستان کی ترقی مستحکم اور جامع رہے۔

جناب گوئل نے وزارت کے افسران کی حوصلہ افزائی کی کہ وہ ہندوستان کی ترقی کو یقینی بنانے کے لیے کوالٹی کو منتر بنائیں۔ جناب گوئل نے نوٹ کیا کہ ڈیٹا کا بروقت اشتراک اور برآمدات اور درآمدات میں شفافیت سرمایہ کاروں کو زیادہ اعتماد کے ساتھ سرمایہ کاری کرنے کی ترغیب دے گی۔ انہوں نے کہا کہ ہندوستان ایک خوبصورت مقام پر ہے اور یہ ہمارے چیلنجوں کو مواقع میں تبدیل کرنے کا صحیح وقت ہے۔

**********

 (ش ح –ا ب ن۔ م ف)

U.No:7354