কেমিকেল্স এন্দ ফর্তিলাইজর্স মন্ত্রালয়গী ফার্মাস্যুতিকেল্স বিভাগকী সেক্রেতরী, দা. অরুনিশ চৌলানা ঙসি নই দিল্লীদা CIIগা খুৎশম্নদুনা মেদিতেক স্তেক্কাথোন 2024 হৌদোকখ্রে। মেদিতেক স্তেক্কাথোন  অসি  অখন্নবা মেদিকেল দিভাইজশিংগী কম্প্রিহেন্সিব ভেল্যু চেন এনালাইসিস অমা পাইখৎতুনা ভারতকী চাউখৎলক্লিবা মেদতেক সেক্তর মনুংদা অচৌবা অহোংবা অমা পুরকপদা মতেং পাংনবা দিজাইন তৌখিবা অনৌবা থৌশিল অমনি। ইন্দস্ত্রী লুচিংবশিং, পোলিমেকরশিং অমসুং এক্সপর্তশিগা লোয়ননা খুৎশম্নদুনা স্তেক্কাথোন অসিনা অরুবা শীংনবশিং কোকহনবা, দোমেস্তিক মেন্যুফেকচরিং য়োকখৎপা অমসুং ইম্পোর্তকী মপাল তাংবা হন্থহনবদা পান্দম থমদুনা ভারতপু মেদিকেল তেক্নোলোজীদা গ্লোবেল লীদর অমা ওইহল্লগনি। ফার্মাস্যুতিকেল্স বিভাগকী জোইন্ত সেক্রেতরী শ্রী আর.পি. সিংহ অমসুং বিভাগ অসিগী অতৈ মকোক থোংবা ওফিসিএলশিং অমসুং ইন্দস্ত্রীগী মীহুৎশিংনা থৌরম অসিদা শরুক য়াখি।

থৌরম অদুদা ৱা ঙাংলদুনা দা. অরুনিশ চৌলানা হায়খি মদুদি ভারতকী মেদতেক ইন্দস্ত্রীদা চাউনা পোতেন্সিএল লৈরি, 2030 ফাওবদা USD 50 বিলিয়ন য়ৌদুনা চহিগী ওইনা 28%গী গ্রোথ রেৎ লৈগনি হায়না পানরি। মহাক্না হায়খি হৌজিক ভারত অসি এসিয়াদা মেদিকেল দিভাইসশিংগী মরিশুবা খ্বাইদগী চাউবা কৈথেলনি অমসুং মালেমগী ওইনা খ্বাইদগী চাউবা কৈথেল 20গী মনুংদা অমা ওইরি। 2022-23গীদমক নেৎ ইম্পোর্ত অসি USD 4101 মিলিয়ন ওইরি অমসুং ইম্পোর্ত কোভরেজ রেসিও অসি 0.45 ওইরি।

সেক্রেতরীনা হায়খি মদুদি সেক্তর অসিদা ইম্পোর্তকী চাং হেনগৎলক্লি, মরুওইনা US, চাইনা অমসুং জর্মনীগুম্বা লৈবাকশিংনা শাহৌ পীরি, অদুম ওইনমক, ভারতকী মপাঙ্গল কনবা পোলিসী ইকোসিস্তেম্না এক্সপোর্তপু হেনগৎহন্নবা অমসুং দোমেস্তিক মেন্যুফেকচরিংগী খুত্থাংদা ইম্পোর্তকী মখা পোনবা হন্থহন্নবা খুদোংচাবশিং পীরি।

ফার্মা সেক্রেতরী দা. অরুনিশ চৌলানা পোলিসী মেকরশিং, ইন্দস্ত্রীনা লৈবাক অসিদা মেদিকেল দিভাইস ইন্দস্ত্রী চাউখৎহন্নবগীদমক মপাঙ্গল কনবা পোলিসী স্তেক অমা শেম্নবা পুন্না হোৎনমিন্নবগী মরুওইবা অদু পনখি।

ভারত অসি মালেমগী থাক্তা চাংদম্নবা ঙম্বা ওইহন্নবা ক্বালিতীদা মীৎয়েং চংবগী তঙাইফদবা অদু মহাক্না ফোঙদোকখি।

হৌখিবা চহিদা কঞ্জুমেবল অমসুং দিসপোজেবলশিংদা এক্সপোর্তশিংনা ইম্পোর্তশিংদগী হেন্না হেনগৎলে হায়না মহাক্না হায়খি অমসুং মেদি-তেক সেক্তরগী অতোপ্পা য়ুম্বীশিংদা ইন্দস্ত্রীনা মখা তানা খোঙজেল  য়াংশিনহন্নবা মহাক্না তকশিনখি।

হায়রিবা শীংনবশিং অসি থেংননবা অমসুং সেক্তর অসিদা ললোন-ইতিক তৌবদা লাইবা অমসুং শেল চঙবা হেনগৎনবা স্তেকহোল্দরশিংগী মরক্তা তেংবাং পীনবা অসি য়াম্না মরু ওই। পার্তনরশিপশিং ফগৎহন্দুনা, রিসর্স অমসুং ইনোবেসনদা শেল থাদবা হেনগৎহন্দুনা, অমসুং ভেল্যু চেনগী থৌওংশিংবু মওং তানা পাঙথোক্তুনা, ঐখোয় পুম্নমক্কীদমক এক্সেসিবল অমসুং এফোর্দেবল হেল্থকেয়রগী ঐখোয়গী অপুনবা পান্দম অদু ফংবা ঙমগনি হায়না মহাক্না মখা তাখি।

স্তেক্কাথোনগী খুত্থাংদা শরুক য়ারিবশিংনা মরু ওইবা স্তেকহোল্দরশিং, প্রোসেসশিং অমসুং দিপেন্দেন্সীশিং মশক খঙদোক্নবা, ইম্পোর্তকী মীপাল তাংবা, রিগ্যুলেতরীগী অপনবশিং অমসুং তেক্নোলোজীগী গেপশিং অসিগুম্বা মেদিকেল দিভাইস ইন্দস্ত্রীগী চাউখৎ খোঙচৎতা অপনবা পীরিবা অদু খঙদোক্নবা মেদিল দিভাইস ইন্দস্ত্রীগী তোঙান-তোঙানবা সেগমেন্তশিংদা মখোয়গী অখন্নবা শীংনবশিং অমসুং খুদোংচাবশিংগী লৌশিং ফংনবা, ভেল্যু চেনশিং এনালাইজ অমসুং মেপ তৌদুনা মেদিকেল দিভাইজ ইন্দস্ত্রীগী মনুংদা লৈরিবা প্রদক্ত সেগমেন্ত কয়াগী কম্প্লেক্সিতীশিং নৈনগদবনি।

স্তেক্কাথোন্না ফোকস গ্রুপ নিপান্দা খন্ন-নৈনগনি। মখোয় অদুদি কেন্সর থেরাপী, ইমেজিং, ক্রিতিকেল কেয়র, এসিস্তিব মেদিকেল দিভাইস, বোদি ইমপ্লান্ত, সর্জিকেল ইন্সত্রুমেন্তস অমসুং হোস্পিতাল ইক্বিপমেন্ত, কঞ্জুমেবলস অমসুং দিস্পোজেবলস, অমসুং IVD ইন্সত্রুমেন্তস অমসুং রিএজেন্তশিংনি। মখোয় খুদিংমক্না সেগমেন্ত-ৱাইজ ওইনা মরুওইবা মেদিকেল দিভাইসশিং মশক খঙদোকপা, ইম্পোর্ত-এক্সপোর্ত দাইনামিকশিং য়েংশিনবা, দ্যুতী স্ত্রকচরশিং অমসুং ভেল্যু চেন পুম্বদা মখোয়গী ইম্প্লিকেসনশিং য়েংশিনবা য়াওনা অখন্নবা পান্দমশিং থমগনি।

ৱার্কশোপ অসিগী মাংওইননা, গ্রুপ লিদরশিং অমসুং মেম্বরশিংনা পাক-শন্না ভর্চুএল দিস্কসন অমসুং শেম-শাবগী থবক পায়খৎলি। সেক্তর অসিদা কোস্ত কম্পিতিতিবনেস, ক্বালিতী এস্যুরেন্স অমসুং রেগুলেতরীগী খুদোংচাদবশিং য়াওনা শীংনবশিং অসি লেপ্তনা লৈরি।

CIIগী চেয়রমেন শ্রী হিমাংশু বাইদনা স্তেকহোল্দরশিংনা অমত্তা ওইনা পুনশিন্দুনা তেঞ্জিবল আউৎকমশিং পুথোক্নবা অমসুং মেদতেক ইন্দস্ত্রীবু পেরেলেল ওইদবা গ্রোথ মায়কৈদা পুখৎনবা তেংবাং পীনদুনা পুন্না থবক তৌমিন্নবগী ৱাখল্লোন অমা থমখি। মহাক্না হায়খি মদুদি ভারতকী মেদতেক এক্সপোর্ত অসি দোল্লর বিল্লিয়ন 4 হেনখিবগা লোয়ননা ইন্দস্ত্রী অসি শীংথানীংঙাই ওইনা পাকথোক চাউথোকপগী ত্রেজেক্তরী অমদা লৈরে। অদুম ওইনমক, ভারত্তা পোত্থোক পুথোকপা অমসুং শিজিন্নবদা লৈরিবা অৱাৎপা অসি কোকহন্নবা দেতা কোলেসন মেকানিজমশিং হেন্না ফগৎহনবগী তঙাইফদবা অদু মহাক্না ফোঙদোকখি। মহাক্না হায়খি মদুদি ভারতকী মেদতেক লেন্দস্কেপ অসি লাক্কদৌরিবা চহী তরা অসিদা মালেমগী মার্কেত শরুক চাদা 10 লৌনবা শেম-শারি। মালেমগী থাক্কী হোস্পিতালশিং, স্কিল মেনপাৱর, অমসুং খ্বাইদগী ফবা রিসোর্সশিং য়াওবা মপাঙ্গল কনবা ইকোসিস্তেম অমা লৈবনা, ভারতনা মালেমগী মেদতেক লমদমদা মাংজিল থানা চঙশিনবা ঙমগনি। মহাক্না মখা তানা ইন্দস্ত্রী-ফ্রেন্দলী পোলিসীশিং পুক্নিং থৌগৎপা, রেগ্যুলেতরী ফ্রেমৱার্কশিং লাইথোকহনবা অমসুং মাইক্রো, স্মোল অমসুং মেদিয়ম ইন্তর্প্রাইজশিং (MSME) দা তেক্নোলোজী ফন্দশিংগী মতেং পীনবগী মরুওইবা অদু পনখি।

অসিগুম্বা অচৌবা পোতেন্সিএল অসিগী ফীভম অসিদা, মেদিতেক স্তেক্কাথোন 2024না স্তেকহোল্দরশিংগী অপুনবা এক্সপর্তিস অসি শীজিন্নদুনা ইন্দস্ত্রী অসি ইনোবেসন অমসুং মশা-মরোমদোম লেপচবা ঙম্নবগী মমাংদা অমুক্তা ওইখিদ্রিবা থাক্তা পুখৎনবা হোৎনরি।

*****