ঙাকশেল মন্ত্রী শ্রী রাজনাথ সিংহনা এপ্রিল 22, 2024দা মালেমগী খ্বাইদগী ৱাংবা লানফম ওইরিবা সিয়াচেনদা চৎতুনা সেক্যুরিতীগী ফিভমগী মতাংদা ফার্স্ত-হেন্দ এসেসমেন্ত চত্থখ্রে। মহাক্না খুদোংচাদ্রবা ৱেদর অমসুং অৱাবা তেরেনগী ফিভমশিংদা থবক তৌরিবা লান্মীশিংগা ৱারী শানখি। ঙাকশেল মন্ত্রীগা লোয়ননা আর্মি স্তাফকী চীফ, জেনরেল মনোজ পান্দে; নোর্দন কমান্দগী জেনরেল ওফিসর কমান্দিং-ইন-চীফ, লেফতনেন্ত জেনরেল এম.ভি. সুচিন্দ্র কুমার; অমসুং 14 কোর্পসকী জেনরেল ওফিসর কমান্দিং, লেফতনেন্ত জেনরেল রশিম বালিসু য়াওখি।

এরিএল রিকন্নাইসেন্সকী মতুংদা ঙাকশেল মন্ত্রীনা ফোরৱার্দ পোস্ত অমদা ফুৎ 15,100গী অৱাংবা অমদা লেন্দ তৌখি, অমসুং সিয়াচেন গ্লেসিয়রদা ওপরেস্নেল রেদিয়র্নেস অমসুং ওইরিবা ঙাকশেলগী ফিভমগী মতাংদা অকুপ্পা মরোল পাউদমখি। মহাক্না ওন গ্রাউন্দদা কম্মান্দরশিংনা থেংনরিবা ওপরেস্নেল চেলেঞ্জশিংগা মরী লৈনবা হীরমশিংসু খন্নখি।

লান্মীশিংদা ৱা ঙাংলদুনা, শ্রী রাজনাথ সিংহনা য়াম্না খুদোংচাদ্রবা কন্দিসনশিংদা থৌনা লৈনা অমসুং অখাং কনবগা লোয়ননা মমা লৈবাক ঙাকপগী অফবা লম্বীদা চৎপগীদমক থাগৎপা ফোংদোকখি। মহাক্না হায়খি মদুদি লৈবাক অসি মতম পুম্নমক্তা আর্মদ ফোর্সেস পর্সনেলশিংগী মফমদা লমন তোনশিন্দুনা লৈরগনি, মরমদি মখোয়গী কত্থোকপশিং অসিনা মরম ওইদুনা প্রজা খুদিংমক্না শাফনা লৈ হায়না ফাওরি। ঐখোয়গী থৌনা ফরবা লান্মীশিংনা ঙমখৈদা লেপ্লি হায়না ঐখোয়না থাজবা থম্লদুনা ঐখোয়না শান্তি লৈবা পুন্সি অমা হিংলি। “লাক্কদৌরিবা মতমশিং অসিদা, নেস্নেল সেক্যুরিতীগী পুৱারী ইরকপা মতমদা, অইং উনগী গ্লেসিয়র অসিদা ঐখোয়গী লান্মীশিংগী থৌনা লৈবা অমসুং অখাংবা কনবগী থৌওংশিং অদু উথোকচবগা লোয়ননা নীংশিংদুনা লৈহৌরগনি। মসিনা তুংগী মীরোলশিংগীদমক মতম পুম্নমক্তা ইথিল ওইহৌরগনি।"

ঙাকশেল মন্ত্রীনা সিয়াচেনবু মহৌশাগা মান্নবা লমদম অমা নত্তে, ভারতকী নিংতম্বা অমসুং অচেৎপা ফিরেপকী খুদম অমনি হায়না ফোঙদোকখি। মহাক্না হায়খি মদুদি দিল্লী অসি ভারতকী নেস্নেল কেপিতেলনি, মুম্বাই অসি ফাইনান্সিএল কেপিতেলনি অমসুং বেঙ্গালুরু অসি তেক্নোলোজীগী কেপিতেলনি; সিয়াচেন অসি থৌনা, অখাং কনবগী কেপিতেলনি।

লৈবাক অসিনা ইকুই কুইদ্রিঙৈদা ওপরেসন মেঘদূতকী মাইপাকপগী চহি 40শুবা মপোক কুমওন পাঙথোকখ্রে। শ্রী রাজনাথ সিংহনা এপ্রিল 13, 1984দা সিয়াচেনদা ভারতকী লান্মীনা লোঞ্চ তৌখিবা ওপরেসন অসি লৈবাক অসিগী লান্মীগী পুৱারীগী সনাগী তাঙ্কক অমনি হায়না ফোঙদোকখি। মহাক্না হায়খি, "ওপরেসন মেঘদূতকী মাইপাকপা অসি ঐখোয় পুম্নমক্কী চাউথোকচনীংঙাইনি।"

থৌরম অদুদা ঙাকশেল মন্ত্রীনা সিয়াচেন ৱার মেমোরিএলদা ইমা লৈবাক্কীদমক  থৱায়না পোন্থা পীখ্রবা থৌনা ফরবা মীওইশিংদা ইকায় খুম্নবা উৎপা ওইনা লৈ পরেংসু কৎখি।

নীংশিংবা য়াই মদুদি শ্রী রাজনাথ সিংহনা মার্চ 2, 2024 দা লেহদা চৎখি অমসুং লান্মীশিংগা লোয়ননা হোলি পাঙথোকখি। মহাক্না সিয়াচেনদা চৎকনি হায়না থৌরাং তৌরম্মি, অদুবু খুদোংচাদ্রবা নুংশিৎকী ফিভম্না মরম ওইদুনা য়ৈথোকখি। লেহতগী ঙাকশেল মন্ত্রীনা সিয়াচেনদা পোস্ত তৌরিবা লান্মীশিংগা তেলিফোন্দা ৱারী শানখি অমসুং মহাক্না অথুবা মতমদা মালেমগী খ্বাইদগী ৱাংবা লানফম অসিদা চৎকনি অমসুং মখোয়গা ৱারী শানগনি হায়না মখোয়দা হায়খি। অসুম্না ঙসিগী খোংচৎ অসিদা, শ্রী রাজনাথ সিংহনা মহাক্কী অচিনবা ফনা লৈরবসু মহাক্কী ৱাশক অদু ঙাকপা খোঙচৎ ওইখি।

***