গুজরাতকী গভরনর, শ্রী অচার্য় দেবব্রত জী; মীয়াম্না পাম্নবা গুজরাতকী মুখ্য মন্ত্রী, শ্রী ভুপেন্দ্রভাই পতেল; মুলুভাই বেরা, নরহরী অমিন, সি.আর. পাতিল, ক্রিইতিভাই সোলাঙ্কি, মেয়র শ্রীমতী প্রতিভা জৈন জী, অমসুং ভাই কার্তিকেয় জী, অতৈ মীথুংশিং, ইবেম্মা অমদি ইবুংঙোশিং!

পুজ্য বাপুগীঈ সাবর্মতী আশ্রমনা লেপ্পা লৈতনা অতৈগা মান্নবা ইনর্জী অমা থাদোক্তুনা, মশক মচু থোকপা মফম অমা ওইদুনা লাক্লি‍। অতৈ মফমগুম্না, ঐখোয়না চৎপগী তাঞ্জা ফংবা খুদিং, ঐখোয়দা বাপুগী হনবা লৈত্রবা পুক্নিং থৌগৎনফম ওইবা ইহুল ফাওই‍। বাপুনা পামজরম্বা অচুম্বা, অহিংসা, লৈবাক্কী মফমদা পুক্নিং লুপচবা, অমসুং তোল্ল-তারবশিংগী থৌগল তৌবগী মমলশিং হৌজিকসু সাবরমতী আশ্রম্না ঙাক্না চৎলি‍। ঙসি ঐনা সাবরমতী আশ্রম নৌনা শেমগৎপা অমসুং পাকথোক চাউথোকহনবগী উরেপ উয়ুং তম্বা ফংজবা তশেংনা য়াইফরবা নুমিৎ অমনি‍। মসিগী মথক্তা, বাপুনা খা অফ্রিকাদগী হল্লকপগা অহানবা লৈখিবা কোচ্রব আশ্রম অসিসু নৌনা শেমজিল্লি, অমসুং ঐনা ঙসি মসি শঙ্গারগনি হায়না ময়ামদা লাউথোকচবদা নুংঙাইবা ফাওই‍। কোচ্রব আশ্রম অসিদনি গান্ধীজীনা অহানবা ওইনা তরেং চাকপা অমসুং উ শুবা তম্বা হৌখিবা মফম্নি‍। মফমদুদা মহাক্না চহি অনি লৈরবা মতুংদা, গান্ধীজীনা সাবরমতী আশ্রমদা চৎখি‍। মসি অমুক হন্না শেমগৎপনা, গান্ধীজীঈগী ঙল্লিঙৈ মতমগী নীংশিং খুদমশিং কোচ্রব আশ্রমদা হেন্না ফবা মওংদা লীদুনা থম্বা ঙম্লগনি‍। ঐনা লাইওইরবা বাপুগী মফমদা ইকায়খুম্নবা উৎচরি‍। ঐনা লৈবাক মীয়াআমগী মফমদা মশক নাইবা অমসুং পুক্নিং থৌগৎনফম ওইরবা মফমসি শেমগৎপগীদমক নুংঙাইবা ফোঙদোকচরি‍।

মরূপশিং,

ঙসি, মার্চ ১২ অসি পুৱারীগী মরুওইবা নুমিৎ অমনি‍। নুমিৎ অসিদনি, বাপুনা মহাক্কী মমিং লৈরবা দান্দি খোঙচৎকা লোয়ননা নীংতম ঈহৌগী লম্বী য়াত্তুনা পুৱারীগী লমায়দা পন্দুপ অমা হকখিবা‍। নীংতম্লবা ভারত্তসু, নুমিৎ অসি অতোপ্পা পুৱারীগী ওইইবা থৌদোক অমা ওইনা অনৌবা মতম অমগী অহৌবা নুমিৎ ওইরি‍। মার্চ ১২, ২০২২দা, লৈবাকসিনা সাবরমতী আশ্রমদগী ‘অজাদী কা অমৃৎ মহোৎসব’ হৌখি‍। দান্দী খোঙচৎনা নীংতম্বা ভারতকী শেংলবা শকফম অমা শেম্বদা মরুওইবা থৌদাং লৌদুনা, খোঙচৎ অসি হৌদোকপা অমসুং মাঙদা চঙশিনবগী য়ুম্ফম থোনখি‍। অমৃৎ মহোৎসব হৌদোকখিবনা ভারতনা ‘অমৃৎ কাল’গী মতমদা খোঙ থাংজিনবগী মতম ওইখি‍। মসিনা নীংতমদ্রিঙৈ মমাঙদা উখিবা মীয়াম পুন্না শরুক য়ামিন্নবগী মান্নবা ইথিল অমা লৈবাক শিনবা থুংনা ফাওহনখি‍। ভারত মচা খুদিংমক্না ‘অজাদী কা অমৃৎ মহোৎসব পাক শন্না পাঙথোকখিবা অমসুং মসিদা গান্ধীগী ফিদমগী মমি তাখিবদা চাওথোকচবা পোক্কনি‍। ‘অজাদী কা অমৃৎ মহোৎসব’ পাঙথোক্লিঙৈসিদা, মীওই করোর ৩ হেনবনা পঞ্চ প্রানগী ৱাশক শকখি‍। অমৃৎ ভাতিকা লাখ ২ হেন্না, উ পাম্বী করোর ২ হেন্না থাদুনা লৈবাক শিনবা থুংনা লিংখৎখি‍। মসিগী মথক্তা, অমৃৎ সরোবর ৭০,০০০ হেন্না শেমগত্তুনা ঈশিং য়োকশিনবগী লমদা মশক থোকপা খোঙথাঙশিং পায়খৎখি‍। ‘হর ঙর তিরঙ্গা’ কেম্পেন্না লৈবাক পুম্বদা লৈবাক নীংবগী অকনবা ইহুল চেলহনখি‍। ‘মেরী মাতী, মেরা দেশ’ থৌরাংগী খুত্থাঙদা লৈবাক মীয়াম করোর কয়ানা লৈবাকসিগী অথৌবশিংগী মফমদা শ্রদ্ধাঞ্জলি কৎখি‍। নীংশিং য়ুম্বী প্লাক লাখ ২ হেন্না অমৃৎ মহোৎসব মনুংদা খিনখি‍। মতুং তারকপদা, সাবরমতী আশ্রম নীংতম ঈহৌগী খুদম অমা ওইবতা নত্তনা চাওখৎপা ভারত অমা শেমগৎপগী খুদমসু ওইখি‍।

মরূপশিং,

মশাগী নাৎকী লন মীরায়বা লৈবাক অমনা মাগী তুংলমচৎপু মাঙহল্লবনি‍। বাপুগা মরী লৈনবা পুৱারীগী পারী পুরীগী লন অমা ওইরিবা সাবরমতী আশ্রম ভারতকীখক নত্তনা মীওইবা খুন্নাই পুম্বগী মরুওই‍। অদুম ওইনমক, নীংতম্লবা মতুংদা, পারী পুরীগী লন অসি মানা ফংফম থোকপা মীৎয়েঙ ফংদনা লাক্লি‍। মতম অমদা একর ১২০ পাক চাউরম্বা আশ্রম অসি হৌজিক মরম কয়াদগী একর ৫ খক্তা ঙায়রে‍। মতম অমদা শঙ ৬৩ লৈরম্বা মফম অসি হৌজিক্তি শঙ ৩৬খক ঙায়দুনা লমকোয়বশিদা শঙ অহুমখক চঙবা য়াহল্লি‍। পুৱারী শেমখিবা ইন্সতিত্যুসন অমা ওইনা লৈবাক্কী নীংতম ঈহৌদা অচৌবা থৌদাং লৌখিবা অমসুং মালেম পুম্বদগী লমকোয়বশিংগী পুক্নিং লেপ্তনা চিংশিল্লিবা সাবরমতী আশ্রম অসিবু ঙাক শেন্দুনা থম্বা হায়বসি ভারত মচা করোর ১৪০গী থৌদাংনি‍।

অদুগা মরূপশিং,

মফমসিদা লৈরিবা ইমুংশিংনা ঙসি লৈরিবা সাবরমতী আশ্রম পাকথোক চাউথোকহনবা অমসুং শেমগৎপদা মশক থোক্না থৌদাং লৌখি‍। আশ্রম অসিগী লম একর ৫৫ অমুক হন্না লৌশিনখিবা অসি মখোয়গী মতেঙননি‍। থৌরাং অসিদা অফবা মশক থোকপা থৌদাং য়াখিবা ইমুংশিংগী মফমদা ঐনা থম্মোয় শেংনা তৌবিমল খঙবা অমদি থাগৎপা ফোঙদোকচরি‍। ঐখোয়গী পান্দমদি আশ্রম অসিগী অরিবা শঙশিং হান্নগী ফীভমদা ঙাক শেন্দুনা থম্বনি‍। ঐনা মকোক্তগী হৌনা শাগৎপা মথৌ তাবা য়ুমশিং মশক খঙদোক্নবা হোৎনদুনা লমদমসিগী য়ুমশারোল ঙাক্না থম্নবা হোৎনরি‍। খুদক্তা মথৌ তাদ্রবসু, মথৌ তাবা পুম্নমক পাঙথোক্নবা ঐনা খোঙফম চেৎনা লেপ্লি‍। অমুক হন্না শাগৎপগী থৌরাং অসিনা তুংদা লমদমসিগী অমদি মালেমগী মীৎয়েঙ তারিবশিংগী পুক্নিং শোয়দনা চিংশিনগনি‍।

মরূপশিং,

নীংতম্লবা মতুংদা লৈখিবা লৈঙাকশিংগী মফমদা মীৎয়েঙ শানবা অমসুং লৈবাকসিগী পারী পুরীগী লন ঙাক্তুনা থম্নবগী রাজনিতীগী ফিরেপ ৱাৎখি‍। ভারতপু মপান লৈবাকশিংগী মীৎয়েঙদগী য়েংবগী চৎনবী অমসুং পেলহনবগী মওং মতৌশিংনা ঐখোয়গী ইনাক খুল্লবা পারী পুরীগী লনশিং মীরায়দুনা মাঙহন তাকহল্লম্মি‍। লম খোপচিনবা, লু-নান্না থমদবা, অমসুং মওং মরিল নাইদবনা ঐখোয়গী পারী পুরীগী লন ওইরিবা মফমশিং শোকচিনহল্লম্মি‍। কাশীগী এম.পি. ওইনা, ঐনা কাশী বিস্বনাথ ধামগী খুদম পীজগে‍। চহি ১০গী মমাঙদা লৈরম্বা মফমদুগী ফীভম মীয়াম্না মুন্না খঙই‍। অদুম ওইনমক, লৈঙাক্কী ফিরেপ অমসুং মীয়ামগী তেংবাংগা লোয়ননা কাশী বিস্বনাথ ধাম অমুক হন্না শেমগৎনবগীদমক লম একর ১২ লৌশিনখি‍। ঙসি, ম্যুজিয়ম, ফুদ কোর্ত, গেস্ত হাউস, মুমুক্সু ভবন, মন্দির চৌক, এম্পোরিয়ম, পেসেঞ্জর ফেসিলিতেসন সেন্তরনচিংবা তোঙান তোঙানবা ফেসিলিতীশিং মফমসিদা শেমগত্তুনা শুপ্নগী চহি ১২দা লাই নীংজবা মীওই করোর ১২ হেন্না চিংশিনবা ঙম্লে‍। মতৌ অসুম্না, লম একর ২০০সু মমাঙদা চগুংননা শারম্বা অয়োধ্যাগী শ্রী রাম জন্মভুমী পাকথোক চাউথোকহন্নবা হাঙহল্লে‍। ঙসিদি, রাম পথ, ভক্তি পথ, অমসুং জন্মভুমী পথনচিংবা ফেসিলিতীশিং মফমসিদা শেমগৎলি‍। অয়োধ্যাদা, হৌখিবা নুমিৎ ৫০ খকসিদা লাই নীংজবা মীওই করোর অমা হেনবনা প্রভু শ্রী রামবু খুরুমজখি‍। ঐনা হন্দক্তা দ্বারকা জীদসু মশিং য়াম্লবা চাওখৎ থৌরাংগী প্রোজেক্তশিং শঙ্গাখি‍।

অদুগা ৱাফম অমনা মরূপশিং,

তশেংবসু গুজরাতনা লৈবাকসিদা পারী পুরীগী লন ঙাক্তুনা থম্বগী খুদম অমা ওইরে‍। সরদার সাহেবকী লুচিং মখাদা সোমনাথ লাইশঙ নৌনা শেমজিনখিবসি পুৱারী ওইবা পন্দুপ অমনি‍। অহমদবাদনা ৱর্ল্দ হেরিতেজ সিতী অমা ওইনা শকখঙদুনা গুজরাত অসি অসিগুম্বা পারী পুরীগী লন ওইরিবা মফম কয়াগী তুংনফম্নি‍। রানী কী ভাব, চম্পানের, অমসুং ধোলাবিরাসু ৱর্ল্দ হেরিতেজ সাইতশিং ওইনা লাউথোকখ্রে‍। অরিবা হিথাংফম ময়োল্লম লোথলসু মালেম পুম্বনা খন্নরিবা মফম অমনি‍। গির্নর, পাবাগর, অমসুং অম্বাজী, অমদি অতৈ মশক নাইবা পারী পুরীগী লন ওইরিবা মফমশিংসু শেমগৎনবা হোৎনরি‍।

মরূপশিং,

ঐখোয়না নীংতম ঈহৌ অমসুং ঐখোয়গী লৈবাক্কী পুক্নিং থৌগৎনফম ওইবা পারী পুরীগী লন ওইরিবা মফমশিং শেমগৎনবগী কেম্পেন অমা হৌদোক্লে‍। দিল্লীগী রাজপথপু কর্তব্য পথ ওইনা ওন্থোকখিবা অদোম খঙবিরমগনি‍। ঐখোয়না কর্তব্য পথতা নেতাজী সুভাস চন্দ্র বোসকী মীতম খিনখ্রে‍। মসিগী মথক্তা, ঐখোয়না অন্দমান অমসুং নিকোবর ঈথৎশিংদা লৈরিবা নীংতম ঈহৌ অমসুং নেতাজীগা মরী লৈনবা মফমশিং ফীভম ফগৎহন্দুনা মখোয়বু শকখঙনহল্লি‍। বাবা সাহেব অম্বেদকরগা মরী লৈনবা মফমশিংসু পঞ্চ তীর্থ ওইনা শেমগৎলে‍। এক্তা নগরদা লৈবা সর্দার বল্লবভাই পতেলগী স্তেচু ওফ য়ুনিতীসু মীওই লিশিং কয়ানা সরদার পতেলগী মফমদা শ্রদ্ধাঞ্জলী কত্তুনা মালেমগী পুক্নিং চিংশিন্নফম অমা ওইরে‍। দান্দীসু মশক থোক্না অহোংবা পুরক্তুনা, অরাকপা মীওই লিশিং কয়াগী পুক্নিং চিংশিল্লি‍। সাবরমতী আশ্রম শেমগৎপা অমসুং পাকথোক চাউথোকহনবগী হৌজিক পায়খৎলিবা থবক অসিনা মায়কৈ অসিদা থাংজিনবা অতোপ্পা মশক থোকপা খোঙথাঙ অমা ওইরি‍।

মরূপশিং,

তুংগী মীরোলশিং অমসুং আশ্রম অসিদা লাক্লিবশিংনা মতৌ করম্না সাবরমতীগী লম্বোইবশিংনা তরেংগী মতিক্কী খুত্থাঙদা লৈবাক্কী থম্মোয় অমসুং পুক্নিংবু ওনহল্লি‍। মহাক্না মীয়ামগী পুক্নিংবু য়াকায়দুনা নীংতম ঈহৌবু মাঙদা পুখৎনবা মায়কৈ কয়াদা মথৌ হাপখি‍। চহিচা কয়াগী লোইলম লৈঙাক অমসুং মীনাই নাইথাংগী নীংবা কায়বশিং মায়োক্নরিবা লৈবাক অমদা, বাপুনা মীয়ামগী ওইবা ঈহৌ অমগী মৈরী চুখত্তুনা মীয়ামদা অনৌবা মঙলান অমসুং থাজবা পীখি‍। ঙসিমকসু, মহাক্কী মঙলানশিংনা ঐখোয়গী লৈবাকসিগী ফজরবা তুংলমচৎ অমগী লম্বী তাক্লি‍। বাপুনা ‘গ্রাম স্বরাজ’ (খুঙ্গং মশানা লৈঙঙাকচবা)) অমসুং মরোমদোম লেপচবা ভারতকী মঙ মঙখি‍। হৌজিক মতমদা, “ভোকেল ফোর লোকেল”গী ৱাফম তোয়না খন্নরি‍। ৱাফম অসি মতমসিগা চুনবা মীৎয়েঙ অমসুং শীজিন্নফম অমা পীননবা শীজিন্নখিবনি‍। শীজিন্নরিবা ৱাহৈ ৱাতাগী ৱাফম নত্তনা, মসিদা গান্ধীজীগী ইশানা লৈঙাকচবা লোয়ননা ‘মরোমদোম লেপচবা ভারত’কী ইহুলখক্তনি য়াওরিবা অতৈ য়াওবা নত্তে‍। ঙসি, অচার্য় জীনা ঐঙোন্দা ওর্গানিক লৌউ পথাপকী মহাক্কী মিসনগী মতাঙদা পাউদম্লকখি‍। গুজরাত খক্তদা, লৌমী ইমুং লাখ ৯ লৈ হায়না মহাক্না পনখি, মসি য়াম্লবা মশিংনি‍। মসিগী মনুংদা, ইমুং লাখ ৯না ওর্গানিক লৌউ পথাপ্তা হোংলক্তুনা, কেমিকেল হার য়াওদনা লৌউ-শিংউবগী গান্ধীজীগী মঙলান মঙফাওনহল্লি‍। হোংলক্লিবা অসিনা গুজরাত্তা য়ুরিয়া শীজিন্নবগী চাং মেত্রিক তন লাখ ৩ হন্থরে হায়নসু মহাক্না তম্লকখি‍। মসিনা মালেম ইমাবু ঙাক শেন্দুনা থম্নবগী পুক্না হোৎনমিন্নবা থৌরাং উৎলি‍। করিগুম্বা মসি মহাত্মা গান্ধীগী ফিদমগা চুশিন্নদ্রবদি করিগা চুশিন্নগদৌরিবনো? অচার্য়গী লমজিং মখাদা, গুজরাত বিদ্যাপীথ নৌনা শেমজিল্লি‍। মফমসিগী অফাওবা মীওইশিংনা ঐখোয়দা অফবা চারোন শুরোন থম্বিরম্মি‍। মসিবু মতমসিগা চুনবা মওংদা হোংদোকপা হায়বসি ঐখোয়গী থৌদাংনি‍। খোঙজঙ অসিদা ঐনা লৌখিবা থৌদাং খাদী নৌনা হিঙ্গৎলকপনা তাক্লি‍। খাদীগী ইথিল অমসুং শীজিন্নবগী চাং মশক থোক্না হেনগৎলে‍। মমাঙদা রাজনিতিৱালাশিংখক্তনা শীজিন্নরম্বা খাদী অসি ঐখোয়না পাম্নবা হেনগৎহন্দুনা থাক অসি য়ৌনা পাকথোক চাউথোকহল্লক্লিবা অসি শিংথানিংঙাই ওইবা থৌরাং অমনি‍। মসিদা গান্ধীজীগী ৱাফমশিং ইকায়খুম্ননবগী ফিরেপ মমি তারি‍। ঐখোয়গী লৈঙাক্না, গান্ধীজীগী ৱাখল্লোনশিংনা পুক্নিং থৌগত্তুনা, খুঙ্গংগী মীয়ামগী য়াইফবা পুরকপদা মরুওইবা মীৎয়েঙ থমখি অমসুং আত্মনিরভর ভারত অভিয়ান হৌদোকখি‍। ঙসিদি, খুঙ্গংশিং খুমাঙ চাওশিল্লক্তুনা, বাপুগী গ্রাম স্বরাজকী মঙলানশিং উৎলি‍। নুপীশিংনা সেল্ফ-হেল্প গ্রুপশিংগী খুত্থাঙদা খুঙ্গংগী শেন্মিৎলোন্দা মরুওইবা থৌদাং অমুক হন্না য়াবা ঙম্লি‍। খুঙ্গংগী সেল্ফ-হেল্প গ্রুপশিংদা য়াওরিবা ইচে ইচল করোর ১ হেনব লাখপতী দিদী ওইরে, অমসুং ঐখোয়গী অহুমশুবা তর্মদা ইচে ইচল করোর ৩ থাক অসিদা থাঙ্গৎপা হায়বসিনা ঐগী অপাম্বনি‍। ঙসি, হায়রিবা খুঙ্গংগী সেল্ফ-হেল্প গ্রুপকী নুপীশিং অসি দ্রোন পাইলোৎ ওইরক্তুনা, মতমগা চুনবা লৌউ-শিংউগী থৌওং পায়খৎলি‍। চঙশিল্লিবা খোঙফম অসিনা অচৌবা ভারত অমসুং পুম্নমক কোনশিনবা ভারত অমবু মশক তাক্লি‍। ঐখোয়না হোৎনজবনা, চাকথুং ফিথুংদ্রবা মীওইশিং লায়রবা থেংননবা মশাদা থাজবা থম্বা ঙম্লে‍। হৌখিবা দেকেদ অসিদা, ঐখোয়গী লৈঙাক্কী খুজিল থৌরাংনা মরম ওইরগা মীওই করোর ২৫ লায়রবগী পনখৈগী ৱাংমদা কাখৎপা ঙম্লে‍। পুজ্য বাপুগী থৱায়না লৈরিবা মফম খুদিংদা, মহাক্কী থৱায়না ঐখোয়বু থৌজানবিরি হায়না ঐনা চেৎনা থাজৈ‍। ঙসি, ভারতনা ‘অজাদী কা অমৃৎ কাল’ মতমসিদা হান্না খল্লুদবা পন্দোলশিং লোমদুনা, কংফাল, তরং, অমসুং চাওখৎ থৌরাংগী মঙলানশিংদা খুমাঙ চাওশিন্দুনা, মহাত্মা গান্ধীগী শেংলবা খুভম অসিনা ঐখোয় পুম্নমকপু পুক্নিং থৌগৎলি‍। সাবরমতী আশ্রম, কোচ্রব আশ্রম, অমসুং গুজরাত বিদ্যাপীথনা লমজিং মৈরা ওইদুনা, অনৌবা মতমবু ঐখোয়গী পারী পুরীগী লনগা মরী শম্নহল্লি‍। মখোয়না ঐখোয়গী ফিরেপ চেৎশিনহল্লি অমসুং চাওখৎপা ভারত অমগী ঐখোয়গী মঙলান্দা থৱায় হাপ্লি‍। সাবরমতী আশ্রমগী মঙলান অসি মীৎমাঙদা মঙফাওনরক্লবা মতমদা, মসিনা বাপুগী পুৱারী খঙনিংবা অমসুং তম্নিংবা মীওইই লিশিং কয়াবু মফমসিদা চিংশিনগনি হায়না ঐনা চেৎনা থাজৈ‍। মরম অদুনা, ঐনা গুজরাত লৈঙাক অমসুং অহমদবাদ ম্যুনিসিপাল কোর্পোরেসনগী মফমদা গাইদ কম্পিতিসন অমা পাঙথোক্তুনা মশিং য়াম্লবা মীওইশিং থোরক্তুনা গাইদ ওইনা থবক তৌবদা পুক্নিং থৌগৎনবা থবক পায়খৎপিয়ু হায়বা ফম থমজরি‍। হেরিতেজ সিতী অসিনা অঙাংশিংগী মরক্তা কনানা খ্বায়দগী হেন্না ফবা গাইদ ওইগনি হায়বগী অফবা মওংদা অথোই অহেন তান্নবগী ফীভম ফংহনগনি‍। ঐখোয়না সাবরমতী আশ্রমদা খ্বায়দগী হেন্না ফবা গাইদ ওইবা য়াবা মীওইশিং খঙদোক্কদবনি‍। অঙাংশিংগী মরক্তা অথোই অহেন তানবা লৈহল্লবদি, মদুনা মহৈশঙ খুদিংদা শন্দোকখিদুনা অঙাং খুদিংদা সাবরমতী আশ্রম লিংখৎখিবা অমসুং মসিগী মরুওইবগী মরমদা খঙহনগনি‍। অনিসুবদা, চহি অমগী নুমিৎ ৩৬৫নিসিদা, অহমদবাদকী তোঙান তোঙানবা মহৈশঙশিংদগী য়ামদ্রবদা অঙাং ১০০০দি সাবরমতী আশ্রমদা চৎহন্দুনা মফমদুদা য়ামদ্রবদা পুং অমদি লেলহন্নবা ৱাফমসু হৌদোকচরি‍। মখোয় মখোয়গী মহৈশঙশিংগী গাইদ ওইরিবা অঙাংশিংদুনা আশ্রম অসিদা তৌখিবা গান্ধীজীগী থবক থৌরমশিংগী পাউতাক ৱারীশিং লিহন্দুনা পুৱারীগা অচেৎপা মরী অমা শাগৎহনগদবনি‍। থৌরাং অসি পায়খৎপদা অহেনবা বজেৎ নৎত্রগা থবক চঙগদবা নত্তে; শুপ্নতগী অনৌবা মীৎয়েঙ অমখক্নি মথৌ তারিবসি‍। বাপুগী ৱাখল্লোনশিং অমসুং মহাক্কী মরী লৈনবা পুক্নিং থৌগৎনফম ওইরবা মফমশিংনা ঐখোয়গী লৈবাক শেমগৎপগী খোঙচত্তা মখা তানা লমজিংবিখিগনি অমসুং ঐখোয়দা অনৌবা থৌনা হাপখিগনি হায়না ঐনা থাজৈ‍।

ঐগী লৈবাক মীয়ামশিং, ঙসি ঐনা ইকোক নোন্না প্রোজেক্ত অসিবু ময়ামগী মফমদা কত্থোকচরি‍। থাংজিল্লিবা খোঙথাঙ অসি ঐনা মুখ্য মন্ত্রী ওইরিঙৈ মতমদগী মতম শাংনা নীংজরকপা মঙলান অমা ওইবা মরম্না ঐগী থম্মোয়দা অখন্নবা মফম অমা লৈ‍। ঐনা হীরম অসিদা, তোঙান তোঙানবা শিংনবশিং থেংনদুনা অমদি মীয়াম্না মখল মখা কয়াগী ৱায়েৎশিং থাঙ্গৎলকপনা লিগেলগী ওইবা লান ফাওবা থেংনদুনা মতম চঙনা হোৎনরকখিবনি‍। মতমদুদা কেন্দ্র লৈঙাক্তগীসু অপনবা পীরকখি‍। অপনবশিং অদু লৈদুনসু, লাইনা থৌজানবিবদগী অমসুং মীয়ামগী হনবা লৈত্রবা চৈঙাক্না, ঐখোয়না হৌজিক পরৈ চেনবা ৱাফম খুদিংমক নমথরম্লগা মঙলান অসি মঙফাওনহল্লে‍। ঐনা ময়ামগী মফমদা থম্মোয়নুংদগী থাগৎচবা ফোঙদোকচরি‍। ঐনা হায়জগদবা ৱাফমদি প্রোজেক্ত অসি লোইশিনবা হায়বসি উ পাম্বীশিং থাজনবদা লৈরবনিনা থিন্থবা তৌদনা হৌবিয়ু অমসুং খোঙজেল য়াঙ্খৎহনবিয়ু হায়বসিনি‍। উমংগুম্না অশঙ অমান্না থনবা মফম অমা শেমগৎপদা মতম চঙগনি, অদুবু মসিনা পুরক্কদবা মহৈদুদি মীয়াম খঙগনি‍। ঐনা চেৎনা থাজৈ মদুদি, অহুমশুবা তর্ম অসিদা… ঐ মখা তানা হায়নিংঙাই লৈত্রে‍।

হন্না হন্না থাগৎচরি‍।

দিসক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি‍। অশেংবা ৱারোলদি হিন্দীদা পীখিবনি‍।

***